Marika 11

Sa vodoka na asa ko Jisu, ka lako ki Jerusalemi, 1-11. Sa vosa me ca na kau lolo sa tawa vua, 12-14. Sa vakasavi ira era sa veivoli e na vale ni soro, 15-19. Sa vakavulici iratou na nona tisaipeli me ratou masu e na vakabauta, kei na yalo e loloma, 20-26. Sa veileti kei ira na Farisi, 27-33.

1IA ni ratou sa toro voleka ki Jerusalemi, ki Pecifaki kei Pecania, e na ulu-ni-vanua ni veiolive, sa tala ko koya e lewe rua na nona tisaipeli, 2a sa kaya vei rau, Drau lako ki na koro lailai sa donui kemudrau: ia ni drau sa curu kina, drau na kunea sara e dua na luve ni asa sa noka tu, a ya sa sega ni vodoka e dua na tamata; drau sereka, ka kauta mai. 3Ia kevaka sa dua e kaya vei kemudrau, Drau sa kitaka o qo e na vuku ni cava? drau kaya ni sa yaga vua na Turaga; ena qai vakatalai koya sara kike.

4A rau sa lako, ka kunea na luve ni asa, sa noka tu e na mata ni katuba e na tikina sa sota vata kina e rua na sala; a rau sa sereka. 5Ta ka so vei ira era sa tu kina, era sa kaya vei rau, A cava drau sa kitaka, ni drau sa sereka na luve ni asa? 6A rau sa kaya vei ira me vaka ka vakarota ko Jisu: a ra sa qai laivi rau me lako. 7A rau sa kauta na luve ni asa vei Jisu, ka virikotora kina na nodraui sulu, a sa vodoka ko koya.

8A ra sa lewe vuqa era sa tevuka na nodrai sulu e na gau-ni-sala: ka so tale era tamusuka e so na taba ni kau, ka duibiuta e na gau-ni-sala. 9Ia ko ira sa liu, kei ira sa muri, era sa kaci, ka kaya, Osana! sa kalougata ko koya sa lako mai e na yaca ni Turaga! 10sa kalougata na matanitu nei Tavita na noda qase, a ya sa yaco mai e na yaca ni Turaga! Osana kicake sara!

11A sa curu ko Jisu ki Jerusalemi, ki na vale ni soro talega: ia ni sa vakaraica voli na ka kecega, a sa qai yakavi mai, sa lako yani ko koya ki Pecania, kei iratou na lewe tinikarua.

12Ia e na sabogibogi, ni ratou sa lako yani mai Pecania, sa viakana ko koya: 13ia ni sa raica vakayawa e dua na kau lolo sa vakadrauna, sa lako, de kunea kina e dua na ka: (ia ni sa yaco kina, sa sega ni kunea e dua na ka, a drauna walega;) ni sa tawa yaco na vula i lolo. 14A sa vosa ko Jisu, ka kaya kina, Me kakua na vuamu e kani emuri ka tawa mudu. A ratou sa rogoca na nona tisaipeli.

15A ratou sa yaco ki Jerusalemi: a sa curu ki na vale ni soro ko Jisu, ka vakatekivu me vakasavi ira tani kina era sa veivoli e na vale ni soro; sa vukica talega na nodra veitutu era sa veisaui lavo, kei na nodra veitikotiko era volitaki ruve; 16a sa sega ni laiva e dua me colata e dua na ka e loma ni vale ni soro. 17A sa vakavulici ira, ka kaya, Sa sega li ni volai, A noqu vale ena vakatokai me nodra vale ni masu na tamata kecega? ia dou sa cakava me nodra qara na daubutako.

18A ra sa rogoca ko ira na vu-ni-vola kei ira na bete levu, a ra sa vakasaqara me ra vakamatea rawa: ni ra sa rerevaka, ni ra sa kidacala ko ira kecega na lewe vuqa e na nonai vakavuvuli.

19Ia ni sa yakavi mai, sa lako tani e na koro ko koya.

20Ia e na mataka, ni ratou sa lako voli, eratou sa raica ni sa malai sara na kau lolo mai na wakana. 21Ia ni sa nanuma ko Petero, sa kaya vei koya, Vakavuvuli, raica, na lolo ko sa kaya me ca sa malai sara. 22A sa vosa ko Jisu, ka kaya vei iratou, Dou vakadinata na Kalou. 23Niʼu sa kaya vakaidina vei kemudou, Kevaka sa dua e kaya ki na ulu-ni-vanua o qo, Mo kau tani, ka biu ki na wasaliwa, ia ka sega ni vakatitiqa na yalona, a sa vakadinata ga ni na yaco na ka sa kaya; ena rawata ko koya na ka kecega sa kaya ko koya. 240 koya o qo kaʼu sa kaya kina vei kemudou, A ka kece sara ga dou sa kerea, ni dou sa masu, dou vakadinata ni dou sa rawata, ena qai nomudou ga. 25Ia ni dou sa tu me masu, kakua ni cudruvi koya sa cala vei kemudou; me kakua talega ni cudruvi kemudou e na vuku ni nomudoui valavala ca na Tamamudou sa tiko mai lomalagi. 26Ia kevaka dou sa cudruva ga, ena sega talega ni bokoca na nomudoui valavala ca na Tamamudou sa tiko mai lomalagi.

27A ratou sa lako tale mai ki Jerusalemi: ia ni sa lako voli ko koya e na vale ni soro, sa lako mai vua ko ira na bete levu, kei ira na vu-ni-vola, kei ira na qase, 28a ra sa kaya vua, Ko sa lesi vakaevei mo cakava na veika o qo? ia ko cei sa solia vei iko nai lesilesi o qo mo cakava kina na veika oqo?

29A sa vosa ko Jisu, ka kaya vei ira, Au na tarogi kemudou talega e na dua na ka, ia dou tukuna vei au; au na qai tukuna talega vei kemudou se kaʼu sa lesi vakaevei meʼu cakava na veika o qo: 30A papitaiso i Joni, sa mai lomalagi, se mai na tamata? tukuna mai vei au. 31A ra sa veivosakitaka vakai ira, ka kaya, Kevaka eda na kaya, Mai lomalagi; ena qai kaya ko koya, Ia dou a sega ni vakadinati koya e na vuku ni cava? 32Ia kevaka eda na kaya, Mai na tamata; era sa rerevaki ira na tamata; ni ra sa vakasama kecega ni sa parofita dina ko Joni. 33A ra sa vosa, ka kaya vei Jisu, Keitou sa sega ni kila. Sa qai vosa ko Jisu, ka kaya vei ira, Au na sega talega ni tukuna vei kemudou se kaʼu sa lesi vakaevei meʼu cakava na veika o qo.

Currently Selected:

Marika 11: FIJ1864

Highlight

Copy