Marika 10

Sa vakavulici ira na Farisi ko Jisu me kakua ni biuta na watidra ko ira na tagane, 1-12. Sa vosavakalougatataki ira na gone lalai, 13-16. Sa tarogi Jisu e dua na tamata vutuniyau e na ka me bula kina, 17-22. Sa dredre ni bula ko ira na vutuniyau; ia ena nodra sa muri Jisu nai yau dina, 23-31. Sa tukuna ko Jisu na nona mate, 32-34. Sa vakavulici iratou na nona tisaipeli me ratou yalomalumalumu, 35-45. Sa vakabulai Paritimeo, 46-52.

1A SA tu cake maikea ko koya, ka lako ki na yasayasa vaka-Jutia mai na tai kadua ni Joritani: a ra sa lewe vuqa sa soqoni vata tale vua; a sa vakavulici ira tale ko koya, me vaka na nonai valavala.

2A sa lako mai vei koya ko ira na Farisi, ka taroga, E tara vua na tamata me biuta na watina, se segai? a ya ni ra sa vakatovolei koya. 3A sa vosa ko koya, ka kaya vei ira, A cava sa vakarota vei kemudou ko Mosese? 4A ra sa kaya, Sa laiva ga ko Mosese me vola nai vola ni veibiu, ka qai biuta tani. 5Sa qai vosa ko Jisu, ka kaya vei ira, E na vuku ni nomudou lomakaukauwa sa vola vei kemudou ko koya na vunau o qori. 6Ia e nai vakatekivu ni ka sa buli, sa buli rau na Kalou me dua na tagane ka dua na yalewa. 7E na vuku ni ka o qo ena biuti tamana kei tinana na tamata, ka kabita na watina; 8ia koi rau erau na lewe dua: erau sa sega ni lewe rua tiko, erau lewe dua ga. 9Ia na ka sa vauca vata na Kalou, me kakua ni tawasea rua na tamata.

10E na vale talega, sa tarogi koya tale ko iratou na nona tisaipeli e na ka ko ya. 11A sa kaya vei iratou ko koya, 0koya yadua sa biuta na watina, ka laʼki veiwatini kei na dua tani, sa dauyalewa. 12Ia kevaka sa biuta na watina ko na yalewa, ka laʼki veiwatini kei na dua tani, sa dautagane.

13A ra sa kauta mai vua e so na gone lalai, me tarai ira ko koya: a sa vunauci ira era a kauta mai ko iratou na tisaipeli. 14Ia ni sa raica ko Jisu, sa cudru sara, a sa kaya vei iratou, Laivi ira na gone lalai me ra lako mai vei au, ka kakua ni tarovi ira: ni sa vakataki ira ko na lewe ni matanitu ni Kalou: 15au sa kaya vakaidina vei kemudou, O koya ena sega ni vakabauta na matanitu ni Kalou me vaka na gone lailai, ena sega sara ni curu kina. 16A sa keveti ira e na ligana, ka tabaki ira e na ligana, ka vosavakalougatataki ira.

17Ia ni sa lako yani ko koya e na gau-ni-sala, sa cici mai e dua, ka tekiduru vua, ka tarogi koya, Vakavuvuli vinaka, a cava meʼu kitaka meʼu rawata kina na bula tawa mudu? 18A sa kaya vua ko Jisu, O sa vakatokai au meʼu vinaka e na vuku ni cava? sa sega e dua tani e vinaka, na Kalou duaduaga. 19O sa kila na vunau, Kakua ni ia na veibutakoci, Kakua ni laba, Kakua ni butako, Kakua ni veibeitaki vakailasu, Kakua ni kovea, Vakarokoroko vei rau na tamamu kei na tinamu. 20Sa qai vosa ko koya, ka kaya vua, Vakavuvuli, a ka kecega o qo kaʼu sa vakabauta ni kaʼu a gone ka yacova na siga o qo. 21A sa vakaraici koya ko Jisu, a sa lomana, a sa kaya vua, E dua na ka sa sega vei iko: mo lako, mo volitaka na ka kecega sa tu vei iko, ka solia vei ira sa dravudravua, o na qai vakaiyau mai lomalagi: ia mo lako mai, mo colata na kauveilatai, ka muri au. 22A sa vakaveveku mata e na vuku ni vosa ko ya, a sa lako tani a sa rarawa na lomana: ni sa levu na nonai yau.

23A sa veiraiyaki ko Jisu, a sa kaya vei iratou na nona tisaipeli, E dredre sara vei ira sa vutuniyau me curu ki na matanitu ni Kalou! 24A sa kidacala ko iratou na tisaipeli e na nona vosa. Sa qai vosa tale ko Jisu, ka kaya vei iratou, Ragone, e dredre sara vei ira era sa vakararavi ki nai yau me curu ki na matanitu ni Kalou! 25Sa rawarawa me curuma na mata ni cula na kameli, ka dredre vua na tamata vutuniyau me curu ki na matanitu ni Kalou. 26A ratou sa kidacala vakalevu sara, ka veikayaka vakai iratou, O cei ena qai vakabulai rawa? 27A sa vakaraici iratou ko Jisu, ka kaya, Sa dredre sara vei ira na tamata, ia ka sega ga vua na Kalou; ni sa rawarawa vua na Kalou na ka kecega.

28Sa qai vakatekivu ko Petero me kaya vua, Raica, keitou sa biuta na ka kece, ka muri iko. 29Sa qai vosa ko Jisu, ka kaya, Au sa kaya vakaidina vei kemudou, Sa sega e dua na tamata sa biuta na vale, se na veitacini, se na ganena, se na tamana, se na tinana, se na watina, se na luvena, se na vanua, e na vukuqu, kei navuku ni tukutuku-vinaka, 30ena tawa rawata yadrau e na bula o qo, na veivale, kei na veitacini, kei na ganena, kei na tinana, kei na luvena, kei na vanua, vata kei na veivakacacani; e na gauna emuri talega, na bula tawa mudu. 31Ia ka ra lewe vuqa sa liu era na muri; kei ira talega sa muri era na liu.

32A ra sa lako ga e na salatu ni ra sa lako ki Jerusalemi; a sa liutaki ira ko Jisu: a ra sa kidacala, ia ni ra sa muri voli, era sa rere. A sa kauti iratou tale na tinikarua, ka vakatekivu me tukuna vei iratou na ka ena yaco vua, 33ka kaya, Raica, edatou sa lako cake ki Jerusalemi; ka na soli yani na Luve ni tamata vei ira na bete levu, kei ira na vu-ni-vola; ka ra na lewai koya me mate, a ra na soli koya vei ira na veimatanitu kisau: 34a ra na vakalialiai koya, ka vakanakuitataki koya, ka kasivita, ka vakamatea: ena qai tu cake tale mai ko koya e nai katolu ni siga.

35A rau sa lako mai vua ko Jemesi kei Joni, koi rau na luve i Sepeteo, ka kaya, Vakavuvuli, keirau sa vinakata mo cakava vei keirau na ka keirau na kerea. 36A sa kaya vei rau ko koya, A cava drau sa vinakata meʼu cakava vei kemudrau? 37A rau sa kaya vua, Solia vei keirau, me keirau tiko e na nomui ukuuku, e dua e na ligamu i matau, ka dua e na ligamu i mawi. 38Sa qai kaya vei rau ko Jisu, Drau sa sega ni kila na ka drau sa kerea: drau sa rawata beka me gunuva na bilo kaʼu na gunuva, ka papitaisotaki e na papitaiso kaʼu na papitaisotaki kina? 39A rau sa kaya vua, Keirau sa rawata. Sa qai kaya vei rau ko Jisu, Drau na gunuva dina na bilo kaʼu na gunuva; drau na papitaisotaki talega e na papitaiso kaʼu na papitaisotaki kina: 40ia me tiko e na ligaqu i matau kei na ligaqu i mawi sa sega ni noqu meʼu solia vakailoa, vei ira ga sa vakarautaki kina me nodra.

41Ia ni sa rogoca ko iratou na lewe tini, eratou sa vakatekivu me cudru sara vei Jemesi kei Joni. 42A sa kacivi iratou mai ko Jisu, ka kaya vei iratou, Dou sa kila, ni ra sa lewai ira na veimatanitu ko ira era sa kainaki me nodra turaga; a sa veitalia vei ira ko ira na nodra qaqa. 43Ia ena sega ni vakakina vei kemudou; ia ena nomudoui talatala ga ko koya yadua vei kemudou sa viavialevu; 44ka na nomudou kaisi kecega ko koya yadua vei kemudou sa viaviaturaga. 45Ni sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.

46A ratou sa yaco ki Jeriko: ia ni ra sa lako tani e Jeriko ko koya kei iratou na nona tisaipeli kei ira e lewe vuqa sara, sa mai tiko e na tutu-ni-sala me kerekere ko Paritimeo na mataboko, na luve i Timeo. 47Ia ni sa rogoca ko koya ni sai Jisu na kai Nasareci, sa vakatekivu me kaci, ka kaya, Jisu, na Luve i Tavita, lomani au mai. 48A ra sa lewe vuqa era vunauci koya me tiko lo: a sa qai kaci vakalevu cake kina ko koya, Luve i Tavita, lomani au mai. 49Sa qai tu vakadua ko Jisu, a sa kaya me kacivi mai. A ra sa qai kaciva na tamata mataboko, a ra sa kaya vua, Mo vakacegu, tu cake; sa kacivi iko ko koya. 50A sa biuta na nonai tutuvi ko koya, a sa tu cake, ka lako vei Jisu. 51A sa vosa ko Jisu, ka kaya vua, A cava ko sa vinakata meʼu cakava vei iko? A sa kaya na tamata mataboko vei koya, Turaga, meʼu rai rawa. 52A sa kaya vua ko Jisu, Mo lako ga; sa vakabulai iko na nomu vakabauta. A sa rai rawa sara ko koya, a sa muri Jisu e na gau-ni-sala.

Currently Selected:

Marika 10: FIJ1864

Highlight

Copy