Marika 14
14
Sa bukiveretaki ko Jisu, 1, 2. Sa lumuti koya e dua na yalewa, 3-9. Sa volitaki koya ko Juta, 10, 11. Sa kania ko Jisu na solevu ni lako-sivia, 12-25. Sa tukuna ni ratou na dro na nona tisaipeli, ka cakitaki koya ko Petero, 26-31. Sa masu mai Kecisemani, 32-42. Sa soli koya ko Juta, a sa tauri koya ko ira na kai Jutia, 43-52. Era sa qai vakacacani koya, 53-65. Sa cakitaki koya ko Petero, 66-72.
1IA sa vo na bogi e rua me qai yaco na solevu ni lako-sivia kei na ka tawa-vakaleveni: a ra sa vakasaqara ko ira na bete levu kei ira na vu-ni-vola me ra lawakitaki koya me ra taura, ka vakamatea. 2A ra sa kaya, Me kakua ga ni sa ia na solevu, de ra ue kina na tamata.
3Ia ni sa tiko ko koya mai Pecania e na vale i Saimoni na vukavuka, ni sa tiko me kana, sa lako mai e dua na yalewa sa taura e dua na tavaya alapasiteri ni waiwai, na narita dina, sa talei sara; a sa vorota na tavaya, ka livia ki na uluna. 4A sa cudru sara e so vakai ira, ka kaya, Sa biu walega na waiwai o qo e na vuku ni cava? 5ni sa rawarawa me volitaki o qo e na tola e vasagavulu ka vakacaca, ka soli vei ira na dravudravua. A ra sa vosavakacataka na yalewa.
6A sa kaya ko Jisu, Laivi koya ga; dou sa saga e na vuku ni cava? sa cakava vei au e dua na cakacaka vinaka: 7ni sa tiko vakadua kei kemudou ko ira na dravudravua; ia ni dou sa via cakava na ka sa yaga vei ira, sa rawarawa ga: ia koi au, kaʼu na sega ni tiko vakadua kei kemudou. 8Sa kitaka ko koya na ka sa rawata: sa lako mai eliu ko koya me lumuta na yagoqu me bulu. 9Au sa kaya vakaidina vei kemudou, E na veiyasana kecega e vuravura taucoko ena vunautaki kina nai tukutuku-vinaka o qo, ena bau tukuni talega kina na ka sa kitaka na yalewa o qo, me kenai divi.
10Ia ko Juta Isikarioti, e dua vei iratou na lewe tinikarua, sa lako vei ira na bete levu, me soli koya vei ira. 11Ia ni ra sa rogoca, era sa reki, a ra sa yalayala me solia vua nai lavo. Sa qai vakasaqara ko koya na gauna e rawarawa me soli koya kina.
12Ia e nai matai ni siga ni ka tawu-vaka-leveni, ni ra sa vakamatea na ka sa ia kina na solevu ni lako-sivia, sa kaya vua ko iratou na nona tisaipeli, Evei na tikina ko sa vinakata me keitou lako kina me vakarautaka mo kania na solevu ni lako-sivia? 13A sa lewe rua vei iratou na nona tisaipeli sa tala ko koya, ka kaya vei rau, Drau lako ki na koro, drau na qai sota kaya e dua na tamata sa colata e dua na saqa wai: muri koya; 14ia na vale ena curu kina ko koya, drau kaya vua na kenai taukei, Sa taroga nai Vakavuvuli, Evei na tiki-ni-vale meʼu kania kina na solevu ni lako-sivia kei iratou na noqu tisaipeli? 15Ena qai vakatakila vei kemudrau e dua na tikina levu ecake e na vale sa vakarautaki tu e nai yaya: drau vakarautaka kina na kedatou. 16A rau sa lako yani na nona tisaipeli, ka yaco ki na koro; a rau sa kunea me vaka ka kaya vei rau ko koya: a rau sa vakarautaka na solevu ni lako-sivia.
17Ia ni sa yakavi mai, sa lako mai ko koya kei iratou na tinikarua. 18Ia ni ratou sa tiko ka kana tiko, sa kaya ko Jisu, Au sa kaya vakaidina vei kemudou, ni na soli au yani e dua vei kemudou sa kana vata kei au. 19A sa vakatekivu me rarawa na lomadratou, ka kaya ko iratou yadua vei koya, Oi au beka? ka dua tale, Oi au beka? 20A sa vosa ko koya, ka kaya vei iratou, E dua vei kemudou na lewe tinikarua, o koya sa tonidromuca vata kei au na kena e na bilo. 21Sa lako na Luve ni tamata, me vaka sa volai e na vukuna: ia ka ca vua na tamata koya sa solia yani na Luve ni tamata! ke sa sega ni sucu mai na tamata ko ya, ke sa vinaka vua.
22Ia ni ratou sa kana tiko, sa taura na madrai ko Jisu, ka vatonaka, ka dovia, ka solia vei iratou, ka kaya, Taura, kania: o qo na yagoqu. 23Sa qai taura na bilo ko koya, ia ni sa vakavinavinaka oti, sa solia vei iratou; a ratou sa gunu kece kina. 24A sa kaya vei iratou, Sa noqu dra o qo ni veiyalayalati vou, a ya sa sova e na vukudra e lewe vuqa. 25Au sa kaya vakaidina vei kemudou, Au na sega ni gunuva tale na vua ni vaini, ka malua me yaco mada na siga kaʼu na gunuva vou kina e na matanitu ni Kalou.
26Ia ni ratou sa sere oti, eratou sa lako yani ki na ulu-ni-vanua ni veiolive. 27A sa kaya vei iratou ko Jisu, Dou na tarabe kecega e na vukuqu e na bogi edaidai; ni sa volai, Au na yavita nai vakatawa ni sipi, ka ra na dui vakasesei na qele ni sipi. 28Ia ni kaʼu sa tu cake tale oti mai, au na qai liutaki kemudou ki Kalili.
29Sa qai kaya vua ko Petero, Kevaka ena tarabe ko ira kecega, oi au, kaʼu na segai. 30A sa kaya vua ko Jisu, Au sa kaya vakaidina vei iko, E na siga o qo, e na bogi ga edaidai, ni sa sega ni tagi mada vakarua na toa, o na cakitaki au vakatolu. 31Sa qai kaya vakaukauwa cake mai ko koya, Kevaka edaru na mate vata, au na sega sara ni cakitaki iko. Sa kaya vaka talega kina ko iratou kecega.
32A ratou sa lako ki na dua na yasana na yacana ko Kecisemani: a sa kaya ko koya vei iratou na nona tisaipeli, Dou tiko ga eke, meʼu masu mada.
33A sa kauti Petero vata kaya ko koya, kei Jemesi kei Joni, a sa vakatekivu me kidacala sara, ka yaluma sara. 34A sa kaya vei iratou ko koya, Sa rarawa vakalevu na yaloqu, me vaka na mate; dou tiko ga eke, ka vakatawa. 35A sa lako vakalailai vaka kiliu ko koya, a sa bale ki na soso, a sa masu, kevaka e rawarawa, me lako tani na gauna ko ya vei koya. 36A sa kaya, Apa, Tamaqu, sa rawarawa vei iko na ka kecega; kauta tani vei au na bilo o qo; ia me kakua ga ni vaka na noqu veitalia, me vaka ga na nomu. 37A sa lako tale mai, ka kunei iratou ni ratou sa moce tu, a sa kaya vei Petero, Saimoni, o sa moce, ne? o sa sega ni rawata me vakatawa ka dua bauga na tiki-ni-bogi, ne? 38Dou vakatawa ka masu, me kakua ni rawai kemudou na vere: e dina ya ni sa gu na yalo, ia na yago sa malumalumu.
39A sa lako tani tale ko koya, ka masu, a sa cavuta tale na vosa ko ya. 40Ia ni sa lesu tale mai, sa kunei iratou ni ratou sa moce tale, (ni sa bibi na matadratou,) a ratou sa sega ni kila e dua na ka me ratou kaya vua.
41A sa lako tale vakatolu mai, a sa kaya vei iratou, Dou qai moce ga, ka dou cegu; sa levu ga, sa yaco na gauna: raica, sa soli yani na Luve ni tamata ki na ligadra na tamata ca: 42tu cake, me datou lako; raica, sa voleka mai ko koya sa soli au yani.
43Ia ni sa vosa tiko ko koya, sa lako sara mai ko Juta, e dua vei iratou na tinikarua, kei ira vata kaya e lewe vuqa sara era sa taura e so nai seleiwau kei nai wau, maivei ira na bete levu kei ira na vu-ni-vola kei ira na qase. 44Ia ko koya sa soli koya yani sa cavuta oti vei ira e dua nai vakatakilakila, ka kaya, O koya kaʼu na reguca, sai koya; taura, ka kauta vinaka yani. 45Ia ni sa tadu ko koya, sa lako sara vua, a sa kaya, Vakavuvuli, vakavuvuli: a sa reguca. 46A ra sa qai kauti koya, ka taura matua.
47A sa dua vei iratou sa tu voleka sa ucuna na nonai seleiwau, a sa yavita na nona tamata na bete levu, a sa seledrutia na daligana.
48A sa tarogi ira ko Jisu, ka kaya, Dou sa lakova beka mai e dua na daubutako, ni dou sa taura e so nai seleiwau kei nai wau, mo dou tauri au, ne? 49Au a tiko voli vata kei kemudou e na veisiga e na vale ni soro ka vakatavuvuli, ia dou a sega ni tauri au: ia nai Vola ena vakayacori ga. 50Sa qai biuti koya ko iratou kecega, ka dro. 51A sa muri koya e dua na cauravou, a sa ovici na yagona e nai tutuvi matailalai; a ra sa taura ko ira na cauravou: 52a sa biuta nai tutuvi ko koya, ka dro tani ni sa luvawale.
53A ra sa kauti Jisu vua na bete levu: a ra sa soqoni vata kaya ko ira kecega na bete levu kei ira na qase kei ira na vu-ni-vola.
54A sa muri koya vakayawa ko Petero, ka yaco sara ki na vale ni bete levu; a sa tiko sobu vata kei ira nai talatala kei ira na vada, ka tatalai e na buka.
55Ia ko ira na bete levu, kei ira kecega na mataveilewai, era vakasaqara e so me ra beitaki Jisu, me mate kina ko koya; a ra sa tawa kunea: 56ni ra sa lewe vuqa sa beitaka vakailasu, a sa sega ni lako vata na veibeitaki. 57Sa qai tu cake e so, a ratou sa beitaka vakailasu, ka kaya, 58Keitou sa rogoci koya ni sa kaya, Au na basuka na vale ni soro o qo sa caka e na liga, ia kaʼu na tara e dua tale sa sega ni caka e na liga, e na bogi e tolu. 59A sa sega ni lako vata talega ua nodratou veibeitaki. 60Sa qai tu cake na bete levu e na kedra maliwa, ka tarogi Jisu, ka kaya, Sa sega na ka ko kaya mai, ne? a cava o qo eratou sa beitaki iko kina ko iratou o qo? 61A sa galu tu ga ko koya, ka sa sega na ka sa kaya.
Sa tarogi koya tale na bete levu, ka kaya vua, O iko beka na Karisito, na Luve i Koya sa nona na vakarokoroko, se segai? 62A sa kaya ko Jisu, Oi au: ia dou na raica na Luve ni tamata ni sa tiko e na liga i matau i Koya sa kaukauwa, ni sa lako talega mai e na veio ni lomalagi.
63Sa qai dresulaka na nonai sulu na bete levu, ka kaya, Sa yaga tale vakacava me so na dauveibeitaki? 64dou sa rogoca ga na vosavakacacataka na Kalou; a cava dou lewa? A ra sa lewai koya kecega, ni sa dodonu me vakamatei. 65A ra sa vakatekivu e so me kasivita, ka tabonaka na matana, ka vaculaka, ka kaya vua, Tukuna mai se ko cei; a ra sa sabica ko ira nai talatala.
66Ia ka sa tiko era ko Petero e na rara ni vale, a sa lako mai e dua na nona vada na bete levu; 67ia ni sa kunei Petero ni sa tatalai, sa vakaraici koya, ka kaya, O iko talega sa tiko vata kei Jisu na kai Nasareci. 68A sa cakitaka ko koya, ka kaya, Au sa sega ni kila, au sa lecava tu na ka ko sa kaya. A sa qai lako yani kivaka ki na katuba; a sa tagi na toa. 69A sa raici koya tale na vada, a sa vakatekivu me vosa vei ira sa tu voleka, E dua vei ira ko koya o qo. 70A sa cakitaka tale ko koya. A sa dede vakalailai ga, a ra sa kaya vei Petero ko ira sa tu voleka, Sa dina ga ni sa dua vei ira ko iko; ni ko sa kai Kalili, a sa vakakina na nomu vosa. 71Sa qai vakatekivu ko koya me ruru ka bubului, ka vaka, Au sa sega ni kila na tamata ko ya dou sa vosataka. 72Sa qai tagi vakarua na toa. Sa qai nanuma ko Petero na vosa ka kaya vua ko Jisu, Ni sa sega ni tagi mada vakarua na toa, o na cakitaki au vakatolu. Ia ni sa vakasama, sa tagi.
Currently Selected:
Marika 14: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
