Ai Vola I Isaia, na Parofita 58
58
Sa ra vakalaivi na kai Jutia e na vuku ni ra tawa lotu dina, 1-7. Ke ra sa lotu dina, ke ra sa vinaka tikoga, 8, 9. Era sa vunauci me veivutuni, me ra vinaka kina, 9-14.
1MO kaci vakadomoi levu, kakua ni maninitaka, tabalaka na domomu me vaka na davui, ka vakatakila vei ira na noqu tamata na nodra talaidredre, ia ki na mataqali i Jekope na nodrai valavala ca. 2A sai au era sa vakasaqara, tiko e na veisiga; na noqu sala era sa reki ni kila, me vaka na matanitu sa daucaka dodonu, ka sa sega ni biuta na lewa ni nodra Kalou; era sa tarogi au e na vuku ni veilewai dodonu, era sa marautaka na torovi koya na Kalou. 3Era kaya, A cava keimami sa lolo, ka sa sega ni ko raica kina? ka vakararawataki keimami, ka sa sega ni ko kila kina?
Raica, e na nomudou siga ni lolo dou sa kunea na mamarau, ia na nomudou dauveiveilavi kecega dou sa vakasautaka. 4Raica, me ia na veileti kei na veicudruvi dou sa lolo kina, ia me veivacu e na ligai valavala ca: dou na tawa lolo me vaka e na siga edaidai, me vakarogotaki kina kicake na domomudou. 5Me vakaoqo li na lolo kaʼu sa vinakata, na siga me vakamalumalumutaki koya kina na tamata? me sa vakacuva li na uluna me vaka na kuta, ka cakava nai sulu taqarotu kei na dravusa me nonai davodavo? o na vakatoka li na ka o qo me lolo, me siga sa vinakata ko Jiova? 6Sa vakaoqo na lolo kaʼu sa vinakata, se segai? me sereka nai vesu tawa dodonu, me luvata nai kaukau bibi, me vakatalai ira yani na bobula me lalaga, mo dou musuka kece talega nai vua? 7Sa vakane, se segai, me dovia vua sa viakana na kemu madrai? ia ko ira sa rarawa ka luveniyali mo sa kauta ga ki na nomu vale; ni ko sa kunea e dua sa luvawale, mo sa vakasuluma, ia mai vua sa lewemu dina ga mo kakua ni vunitaki iko?
8Ena qai kida mai, me vaka na mataka, na nomu rarama; kei na nomu bula vinaka ena vakasauri na kena tubu mai: ena qai liutaki iko na nomu cakacaka dodonu, ia nai ukuuku i Jiova ena kemui murimuri: 9o na qai kaci, ena rogo mai ko Jiova; o na qai tagi, ena kaya mai ko Jiova, Oi au o qo!
Kevaka ko biuta tani e na kemudou maliwa nai vua, na dusi qaqalo, kei na vosa ca; 10ia kevaka ko daulomasoli vua sa viakana, kei na yalo i koya sa rarawa ko sa vakamamautaka; ena qai cadra na nomu rarama e na butobuto, kei na nomu bogi loaloa me vaka na siga levu: 11ia ko Jiova ena tuberi iko tikoga, ka vakamamautaka na yalomu e na dausiga; na suimu ena vakaukauwataka; ia ko na vaka na were sa vakasuasuataki, ka vaka nai vurevure sa tawa yali na kena wai. 12A ra na tara tale ko ira na se tani vei iko na veikoro e lala makawa; nai yavu ni tabatamata eliu sara ko na tauyavutaka tale; ia ko na vakatokai, Nai Vakavinaka ni bai basu, Na Daucaka sala me vinaka tale, me tawa na vanua.
13Kevaka ko na tarova na yavamu mai na si ga tabu, ka mo kakua ni cakava na nomu veitalia e na noqu siga tabu; ka sa vakatoka ga na siga tabu me ka e rekitaki, na siga tabu sa nei Jiova, me ka e vakarokorokotaki; kevaka ko na vakarokorokotaka, ka sega ni cakava kina na nomu cakacaka, se kunea kina na nomu veitalia, se vosa wale kina; 14drau na qai veirekitaki kei Jiova; ia kaʼu na cakavi iko mo vodo lako e na veiyasana cecere kei vuravura, ka vakani iko e nai votavota i Jekope na tamamu: ni sa gusu i Jiova sa cavuta na ka o qo.
Currently Selected:
Ai Vola I Isaia, na Parofita 58: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
