Ai Vola I Isaia, na Parofita 59
59
Era sa ca na kai Jutia e na vukudra ga, 1-3. Sa ka levu na nodrai valavala ca, 4-8. O koya ga o qo era sa ca kina, 9-15. Ni sa sega e dua na dautataro, sa qai ia na Kalou na veivakabulai kei na veicudruvi, 15-19. A veiyalayalati sa ia kaya nai Vakabula, 20, 21.
1RAICA, sa sega ni lekaleka na liga i Jiova, me dredre ni ia na veivakabulai, a sa sega ni bibi na daligana, me dredre ni rogoca: 2ia sa nomudou caka cala ga sa tawasei kemudou tani mai vua na nomudou Kalou, a sa nomudoui valavala ca sa tabonaka na matana maivei kemudou, me sega ni rogoca. 3Ni sa dukadukali na ligamudou e na dra, kei nai qaqalo ni ligamudou e na caka cala; a tebenigusumu-dou, sa vosa lasu; a yamemudou, sa cavuta na ka ca.
4Sa sega e sa ia na veikacivi e na yalododonu, a sa sega e sa ia na veilewai e na yalodina; era sa vakararavi e nai lawaki, ka vosa lasu; era sa kunekunetaka na ca, ka vakasucuma na caka cala: 5na yaloka ni gata daukata era sa saulaka, kei na lawa ni butalawalawa era sa talia; o koya sa kania na kedra yaloka ena mate, ia na ka sa butuvoro sa saulaki mai me gata loa. 6A nodra lawa ena tawa yaco mei sulu, a ra na tawa tutuvitaka na ka era sa cakava; a nodra cakacaka na cakacaka ca, a sa tu ga e ligadra nai valavala kaukauwa: 7a yavadra sa ciciva na ka ca, a ra sa kusarawa me vakadavea na dra tawa cala; a nodra vakanananu na vakanananu ca; a rusa kei na rarawa sa tu e na nodra sala. 8A sala ni veivakacegui era sa tawa kila; a sa sega na ka dodonu e na nodrai lakolako: a nodrai valavala era sa vakavevetaka; o koya sa muria sa lecava na veivakacegui.
9O koya o qo sa yawa kina vei keda na veilewai, a sa sega ni vauci keda na veivakadonui: eda sa vakanananu ki na rarama, ka, raica, sa butobuto; ki nai serau ni siga, ia eda sa lako tu e na butobuto loaloa. 10Me vakai ira na mataboko eda sa vakayamo ki na bai, me vakai ira na matayali eda sa vakayayamo tu: eda sa tarabe e na siga levu me vaka e na yakavi; e na bogi loaloa, me vakai ira na mate. 11Eda sa kudrukudru me vaka na pera koi keda kece, ka vaka na ruve eda sa tagi tiko: eda sa vakanananu ki na veilewai, ka sa sega; ki na veivakabulai, ka sa yawa vei keda.
12Ni sa levu mai e matamu na neimami talaidredre, ia na neimami valavala ca sa tukuni keimami: ni sa tiko kei keimami na neimami talaidredre, ia na neimami caka cala, keimami sa kila ga: 13keimami sa talaidredre ka lasu vei Jiova, ka sa lesu tani me vakanadaku vua na neimami Kalou; ka sa vosataka na veivakasaurarataki kei na vuki, ka sa vakananuma ka cavuta mai na vu ni yalo i keimami na vosa lasu: 14a sa vakasukai kimuri ko lewa dodonu, a sa tu vakayawa ko valavala dodonu; ni sa bale ko dina e nai saqata ni koro, a sa tawa curu rawa ko caka dodonu: 15ia ko dina sa yali, ia ni sa lako tani mai na ca ko koya, sa qai koveraki.
A sa raica ko Jiova, a sa ca e matana, ni sa sega na lewa dodonu. 16A sa raica ko koya ni sa sega e dua na tamata, a sa kurabui sara ni sa sega e dua na dauveisorovi; a sa qai ia na ligana dina na veivakabulai e na vukuna; ia na nona yalododonu, o qori sa tokoni koya; 17a sa suluma ko koya nai valavala dodonu me vaka nai sulu ni valu, a sa vakaisala e nai sala ni veivakabulai; a sa vakaisulutaki koya e nai sulu ni veisaumi, a sa tutuvitaki koya e na lomakatakata. 18Me vaka na nodra cakacaka, ena sauma vakakina ko koya; na cudru vei ira na nona meca, nai sau dodonu vei ira sa cati koya; ki na veiyanuyanu ena ia na veisaumi. 19A ra na rerevaka mai ra na yaca i Jiova, ka mai nai cadracadra ni siga na nonai ukuuku: ni sa lako vakawaluvu mai na meca, ena vakaduria na Yalo i Jiova, na drotini me tarovi koya.
20Ia ena lako mai ki Saioni nai Vakabula, io vei ira na Jekope era sa saumaki mai na talaidredre, sa kaya ko Jiova. 21Ia koi au, sa vakaoqo na noqu veiyalayalati kei ira, sa kaya ko Jiova; Na Yaloqu a ya sa tu vei iko, kei na noqu vosa kaʼu sa tauca ki na gusumu, ena sega ni lako tani e na gusumu, se na gusudra na nomu kawa, se na gusudra na kawa ni nomu kawa, mai na gauna o qo ka tawa mudu, sa kaya ko Jiova.
Currently Selected:
Ai Vola I Isaia, na Parofita 59: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
