Ai Vola I Isaia, na Parofita 57
57
Era sa mate na yalododonu, me ra vakacegu kina, 1, 2. Sa ka vakasisila na nodrai valavala era sa qarava na kalou lasu, era na cudruvi ga, 3-13. O ira sa veivutuni dina era na vakabulai, 14-21.
1SA yali na tamata yalododonu, a sa sega e dua sa vakasara ki lomana; ia na tamata yalololoma era sa kauti tani, ka sa sega e dua sa vakananuma ni sa mai na mata ni ca sa kauti tani kina na yalododonu. 2Ena curuma nai vakavakacegu ko koya; era na vakacegu no e na nodrai davodavo, o ira yadua sa lako vakadodonu.
3Ia koi kemudou, dou toro mai kike, na luvena na alewa daucaka mana lasu, na kawa ni dauyalewa kei na dauyatagane. 4Sa vei cei dou sa ia kina na veivakalialiai? Sa vei cei dou sa vakabegusu, ka dara yame kina? dou sa sega li ni gone dautalaidredre, na kawa daulasu? 5e kemudou sa waqa tu ki na matakau e na ruku ni kau bulabula kecega, ka sa vakamatei ira na gone e na wai drodro e na ruku ni uluvatu. 6E na vatu yagoyago-vinaka ni wai drodro ko sa votai kina; sa ko ya, sa ko ya ga, na nomui votavota: ia ki na ka ko ya ko sa sova kina nai sevu, ka vakacabora nai madrali. Meʼu tawa cudruvaka li na ka o qo? 7E dela ni ulu-ni-vanua cecere ka rewaicake ko sa cakava na nomui mocemoce, ia kikea ko sa cabe cake kina me cabora nai soro: 8ia mai daku ni katuba kei na duru ni katuba ko sa vakaduria kina na nomui vakanananu; ni ko sa biuti au ka sa laʼki vakaraitaki iko vua e dua tani, ka sa cabe cake kina; ko sa vakalevutaka na nomui mocemoce, ka ia na veiyalayalati kei ira; ko sa vinakata na nodrai mocemoce, ko sa vakarautaka na kenai tutu. 9Ia ko a lako vua na tui ka lumuti tu, ka sa vakalevutaka na nomui lumu; ka sa talai ira na nomui talatala ki na vanua vakayawa, ka sa vakaisini iko sobu ki etesi. 10O sa oca e na nomu daulako, ia ko sa sega ni kaya, Au sa oca walega: ko sa kunea na kaukauwa ni ligamu; o koya o qo ko sa sega ni yalolailai kina. 11O cei ko a domobula kina, ka rerevaka, mo sa lasu kina? ia koi au ko sa sega ni nanuma, ko sa sega ni vakasara ki lomamu. E na vuku niʼu a galu, io mailiu sara, sai koya beka ga ko sa sega ni rerevaki au kina, ne? 12Au na vakatakila na nomu yalododonu, kei na nomu cakacaka, ia na ka o qori ena tawa yaga ga vei iko. 13Ni ko sa tagi, me ra qai vakabulai iko na nomui soqosoqo: ena kauti ira kece tani ga na cagi: ia na mu-dremudre ena kauti ira tani: ia ko koya sa vakararavi vei au ena rawata na vanua, ka taukena na noqu ulu-ni-vanua tabu; 14ena qai kaya ko Koya, Dou vakacerea, dou vakacerea, caramaka na sala; kauta tani mai na nodra sala na ka era tarabe kina na noqu tamata. 15Ni sa vosa vakaoqo ko Koya sa cecere ka levu, ka sa tikora na gauna tawa mudu, o Koya ko Yalosavasava na yacana; Au sa tiko e na yasana cecere ka tabu, kei koya talega sa ramusu ka malumalumu na yalona, me vakabula na yalo i koya sa yalomalumalumu, ka Vakabula na lomadra sa bibivoro. 16Ni na sega ni tawa mudu na noqu ia na veileti, ena sega tale ni ia tikoga na noqu cudru: ni na qai ceguoca ga mai mataqu na yalo, ia na yalo ni tamata kaʼu sa cakava. 17E na vuku ni nona caka cala ni sa daukocokoco kaʼu sa cudru kina, kaʼu na yaviti koya; kaʼu sa vunitaki au, kaʼu na cudru ga kina; ni sa gumatua ko koya ni lesu tani ki na sala sa lomana kina. 18A nonai valavala kaʼu a raica, ia kaʼu na vakabulai koya; kaʼu na tuberi koya, ka vakasuka na vakacegu vua, vei ira talega na kai nona era sa tagi: 19kaʼu sa vakatubura na vua ni tebenigusu; na veivinakati tale, na veivinakati tale kei koya sa yawa, kei koya talega sa voleka, sa kaya ko Jiova; ia kaʼu sa vakabulai koya ga.
20Ia ko ira na tamata ca era sa vaka ua wasa cudrucudru, ni sa tawa cegu rawa; na kena wai sa nana tiko mai na qele kei na lolobo: 21sa sega na veivinakati tale, sa kaya na noqu Kalou, kei ira na tamatai valavala ca.
Currently Selected:
Ai Vola I Isaia, na Parofita 57: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
