A Cakacaka 9

Sa saumaki ko Saula, 1-22. Sa qai via vakamatei koya ko ira na Jiu, a ra sa vakatalai koya ki Tarisu ko ira na veiwekani; a ra sa qai cegu na lewe ni soro, 23-31. Sa vakabulai Inia ko Petero, 32-35. Sa qai vakabulai Tapica, 36-43.

1A SA cavuta tiko ko Saula na vosa vakacudrucudruya kei na veivakamatei vei ira sa lotu vua na Turaga, a sa lako ki na bete levu, 2a sa masuta vua nai vola ki Tamasiko ki na veivale ni lotu, kevaka e kunea ko koya e so era sa muria nai valavala ko ya, se ra tagane se ra yalewa, me kau ka vesu tu ki Jerusalemi. 3Ia ni sa lako tu, sa yaco me voleka ki Tamasiko; a sa cila vakavolivoliti koya vakasauri mai e dua na rarama mai lomalagi: 4a sa bale sobu ki na soso, a sa rogoca e dua na domo ni sa kaya vua, I Saula, i Saula, o sa vakacacani au e na vuku ni cava? 5A sa kaya ko koya, O cei ko iko, Turaga? A sa kaya na Turaga, Oi au ko Jisu, o koya ko sa vakacacana: e ca vei iko mo caqeta na mata ni moto. 6A sa sautaninini ko koya ka kidacala, ka kaya, Turaga, a cava ko sa vinakata meʼu cakava? A sa kaya na Turaga vei koya, Tu cake, ka lako ki na koro, ka na tukuni vei iko na ka e dodonu mo cakava. 7Ia ko ira na tamata sa lako vata kaya era sa tu ka vagagalu, era sa rogoca ga na domo, a ra sa sega ni raica e dua. 8A sa tu cake mai na soso ko Saula; ia ni sa basu na matana, sa sega ni raica e dua: a ra sa tuberi koya, ka kauta ki Tamasiko. 9A sa bogi tolu ka sega ni rai rawa, a sa sega ni kana se gunu.

10A sa dua na tisaipeli mai Tamasiko, ko Anania na yacana; a sa kaya na Turaga vei koya e na raivotu, I Anania. A sa kaya ko koya, Raica, oi au, Turaga. 11A sa kaya na Turaga vei koya, Tu cake ka lako ki na salatu, na yacana ko Dodonu, ka taroga na kai Tarisu, ko Saula na yacana, ki na vale i Juta; ia raica, sa masu ko koya; 12a sa kunea e na raivotu e dua na tamata, ko Anania na yacana, sa curu mai, ka tabaka e na ligana, me rai rawa ko koya. 13Sa qai kaya ko Anania, Turaga, era sa lewe vuqa kaʼu sa rogoca maikina e na tamata o qo, na levu ni ca sa kitaka vei ira na nomu tamata yalosavasava mai Jerusalemi: 14eke talega sa lesia ko ira na bete levu me vauci ira kecega sa masuta na yacamu. 15A sa kaya na Turaga vei koya, Mo lako ga; o koya o qo na tamata digitaki vei au, me kauta na yacaqu ki na matadra na veimatanitu kisau, kei na tui e so, kei ira na luve i Isireli: 16ni kaʼu na vakatakila vua na levu ni ka ena vosota e na vuku ni yacaqu.

17A sa lako ko Anani a, ka curu ki na vale; a sa tabaka e na ligana, ka kaya, Na wekaqu Saula, a Turaga ko Jisu, o koya ka rairai vei iko e na gau-ni-sala ko a lako mai kina, sa talai au mai, mo rai rawa, mo vakasinaiti talega e na Yalo Tabu. 18A sa lutu vakasauri mai na matana na ka e vaka na vari ni ika: a sa rai rawa vakasauri ko koya; a sa tu cake, ka sa papitaisotaki. 19Ia ni sa kana oti, sa kaukauwa mai.

A sa tiko ko Saula e na bogi e so kei ira sa lotu mai Tamasiko. 20A sa vunautaka sara e na veivale ni lotu, ni sa Luve ni Kalou ko Karisito. 21A ra sa kidacala kecega era sa rogoca, a ra sa kaya, Sa sega li ni koya o qo sa vakacacani ira mai Jerusalemi era sa masuta na yaca o qo, a sa lako talega mai kike me kitaka vakakina, me kauti ira ka vesu tu vei ira na bete levu? 22A sa kaukauwa cake mai ko Saula, a sa vakataqayataki ira na Jiu era sa tiko mai Tamasiko, ni sa vakadinadina sara ni sa Karisito ko koya o qo.

23A sa oti mada na veisiga e vuqa, sa qai bosea ko ira na Jiu me ra vakamatea: 24a sa kila ko Saula na nodra buki vere. A ra sa vakatawa na veimatamata-ni-koro e na siga kei na bogi me ra vakamatea. 25Sa qai kauta e na bogi ko ira sa lotu, ka tukuca sobu e na dua na sova ki daku ni bai. 26Ia ni sa yaco ki Jerusalemi ko Saula, sa vakatovolea me laʼki tiko vata kei ira sa lotu: a ra sa rerevaka kecega, a ra sa sega ni vakadinata ni sa lotu ko koya. 27Sa qai kauti koya ko Parinapa, ka kauta vei iratou nai apositolo, a sa tukuna vei iratou na nona raica na Turaga e na gau-ni-sala, o koya sa vosa talega vua, kei na nona vunau doudou mai Tamasiko e na yaca i Jisu. 28A sa tiko vata lako ko koya kei iratou mai Jerusalemi: 29a sa vosa doudou e na yaca ni Turaga ko Jisu; a sa vosa ka veileti kei ira ka vulagi e na veimatanitu kisau; a ra sa saga me ra vakamatea. 30Ia ni sa kila ko ira na veiwekani, era sa kauti koya ki Sisaria, a ra sa qai vakatala ki Tarisu.

31Sa qai cegu nai vavakoso lewe ni soro mai Jutia taucoko kei Kalili kei Samaria, a ra sa vakatataki cake; a sa dau nodrai valavala me rerevaka na Turaga, a sa vakacegui ira na Yalo Tabu, a ra sa tubu kina me ra lewe vuqa.

32A SA yaco, ni sa lakova ko Petero na veiyasana kecega, sa lako sobu talega vei ira na tamata lotu era sa tiko mai Lita. 33A sa kunea kina e dua na tamata ko Inia na yacana, sa davo ga e nai mocemoce ka yabaki walu, ni sa tauva na mate sautaninini. 34A sa kaya vua ko Petero, Inia, sa vakabulai iko ko Jisu Karisito: tu cake, ka vakarauna na nomui mocemoce. A sa tu cake vakasauri ko koya. 35A ra sa raica ko ira kecega era sa tiko mai Lita kei Sarona, ia era sa saumaki mai ki na Turaga.

36A sa tiko mai Jopa e dua sa lotu ko Tapica na yacana, a kenai balebale ko Torika: sa sinai na yalewa o qo e na cakacaka vinaka, kei na cakacaka loloma sa kitaka tiko. 37A sa yaco e na gauna ko ya, sa tauvi-mate ko koya, ka ciba: ia ni ra sa vakasilima oti, era sa vakotora e na dua nai taba loma ni vale ecake. 38Ia e na vuku ni sa veivolekati ko Jopa kei Lita, ni ra sa rogoca ko ira sa lotu ni sa tiko kina ko Petero, era sa tala e lewe rua na tamata vei koya, me masuta me kakua ni dede ni lako mai vei ira. 39Sa qai ia ko Petero ka lako vata kei rau. Ia ni sa tadu ko koya, era sa kauti koya ki nai taba loma ni vale ecake: a sa tu voleka vua ko ira na yada kecega, a ra sa tagi, ka vakatakila na veicurucuru kei na veisulu ka cakava ko Torika, ni sa tiko vata kei ira. 40A sa vakatalai ira kece yani ko Petero, a sa vakatekiduru, ka masu; a sa vuki vaka ki na yago, ka kaya, Tapica, tu cake. A sa rai tale na matana: ia ni sa kunei Petero, sa qai duri cake ko koya. 41A sa dodoka vua na ligana, ka laveti koya cake; ia ni sa kacivi ira na tamata lotu kei ira na yada, sa vakaraitaki koya ni sa bula. 42A ka o qo sa kilai mai Jopa taucoko; a ra sa lewe vuqa sa vakabauta na Turaga. 43A sa vuqa na siga sa tiko vata ko koya mai Jopa kei Saimoni a matai ni kuli-ni-manumanu.

Currently Selected:

A Cakacaka 9: FIJ1864

Highlight

Copy