A Cakacaka 8

Era sa vakacacani vakalevu na tamata lotu, a ra sa veiseyaki kina ki na veikoro, a sa tubu kina na lotu, 1-4. Sa laʼki vunau mai Samaria ko Filipo, a ra sa lewe vuqa sa veivutuni ka papitaisotaki, 5-13. Sa talai ko Petero kei Joni vei ira, a sa yaco kina vei ira na Yalo Tabu, 14-17. Sa via volia na kaukauwa me solia na Yalo Tabu ko Saimoni, a sa vunauca ko Petero, 18-24. A kenai tukutuku na matanivanua ni Iciopia, 25-40.

1A SA vinakata na nona mate ko Saula.

Ia e na gauna ko ya era sa vakacacani vakalevu kina nai vavakoso lewe ni soro era sa tiko mai Jerusalemi; a ra sa veiseyaki kina ki na veiyasana i Jutia kei Samaria, o iratou ga nai apositolo e segai. 2A ra sa buluti Sitifeni e so na tamata daulotu, a ra sa cakava na somate levu e na vukuna. 3Ia ko Saula, sa vakacacani ira vakalevu nai vavakoso lewe ni soro, ni sa curu ki na veivale kecega, a sa yarataki ira na tagane kei ira na yalewa, ka biuta ki na vale ni veivesu. 4Ia ko ira era sa veiseyaki, era sa lako ki na veiyasana kecega ka vunautaka na vosa.

5Sa qai lako sobu ko Filipo ki na koro ko Samaria, a sa vunautaki Karisito kivei ira. 6Ia ko ira na tamata era sa lomavata me ra vakarogoca na ka sa tukuna ko Filipo, ni ra sa rogoca ka raica na veika-mana sa kitaka ko koya. 7Ni sa lako yani maivei ira na lewe levu e so na yalo tawa-savasava sa curumi ira, ni ra sa qoqolou tiko e na domo levu; kei ira talega era lewe vuqa sa tauvi ira na mate sautaninini, kei na lokiloki, era sa vakabulai. 8A sa levu kina na marau e na koro ko ya.

9A sa dua na tamata, ko Saimoni na yacana, sa daucakai sausau makawa e na koro ko ya, a sa vakidacalataki ira vakalevu kina na kai Samaria, ni sa dautukuni koya me dua na ka levu: 10a ra sa vakarogoci koya ko ira kecega, o ira e lalai kei ira e lelevu, a ra sa kaya, O koya o qo na kaukauwa levu ni Kalou. 11A ra sa vakarogoci koya, ni sa vakidacalataki ira vakadede ko koya e na nonai sausau. 12Ia ni ra sa vakadinati Filipo ni sa vunautaka na veika ni matanitu ni Kalou, kei na yaca i Jisu Karisito, era sa qai papitaisotaki, o ira na tagane kei ira na yalewa. 13Sa qai vakadinata talega ko Saimoni; ia ni sa papitaisotaki oti, erau sa dautiko vata kei Filipo; a sa kidacala, ni sa raica na veika-mana kei na caka-mana levu sa kitaki tiko.

14Ni sa qai rogoca ko iratou nai apositolo eratou sa tiko mai Jerusalemi, ni ra sa vakadinata na vosa ni Kalou na kai Samaria, eratou sa talai Petero kei Joni vei ira: 15ia koi rau, ni rau sa lako sobu mai, erau sa masulaki ira, me yaco vei ira na Yalo Tabu; ( 16ni sa sega ni lutu vua e dua vei ira ko koya: era sa papitaisotaki walega e na yaca ni Turaga ko Jisu.) 17A rau sa tabaki ira e na ligadrau, a sa yaco kina kivei ira na Yalo Tabu.

18Ia ni sa raica ko Saimoni ni sa soli na Yalo Tabu e na veitabaki ni ligadrau nai apositolo, sa qai via solia vei rau nai lavo, 19ka kaya, Solia talega mai vei au na kaukauwa o qo, me yaco kina na Yalo Tabu vei ira yadua kaʼu na tabaka e na ligaqu. 20A sa kaya vua ko Petero, Mo drau rusa vata kei na nomui lavo, e na vuku ni ko sa nanuma ni sa voli rawa nai solisoli ni Kalou e nai lavo. 21Sa sega na nomu tikina se nomui votavota e na ka o qo, ni sa tawa dodonu na yalomu e na mata ni Kalou. 22O koya o qo mo qai veivutunitaka na nomui valavala ca o qo, ka masu vua na Kalou, de ko na sega beka ni cudruvi e na nanuma ni yalomu. 23Niʼu sa kunea ni sa nomu tu na ka gaga sara, ka ko sa vauci e nai valavala ca. 24Sa qai vosa ko Saimoni, ka kaya, Drau masulaki au vua na Turaga, me kakua ni yaco vei au e dua na ka drau sa vosa kina.

25Ia koi rau, ni rau sa tukuna oti ka vunautaka ua vosa ni Turaga, erau sa lesu tale ki Jerusalemi, ka rau sa vunautaka nai tukutuku-vinaka e na Veikoro lalai e vuqa mai Samaria.

26A sa vosa vei Filipo e dua na agilose ni Turaga, ka kaya, Mo ia ka lako vaka ki na mata ni ceva, e na sala sa lako mai Jerusalemi kivaka ki Kesa, ko ya e veikau. 27Sa qai ia ko koya ka lako: ka raica, e dua na kai Iciopia, a matanivanua, a tamata levu i Kadasi na nodra ranadi na kai Iciopia, a sa veitaliataka na nonai yau kecega, a sa lako oti ki Jerusalemi me soro, 28a sa lesu tu, a sa wiliki Isaia na parofita, ni sa tiko e na nona vale-vodoki. 29Sa qai kaya na Yalo vei Filipo, Lako voleka, mo drau laʼki tiko kaya e na vale-vodoki ko ya. 30Sa qai cici yani ko Filipo, a sa rogoci koya ni sa wiliki Isaia na parofita; a sa kaya, O sa kila na ka ko sa wilika, se segai? 31A sa kaya ko koya, Au sa rawata vakaevei, kevaka sa sega e dua me tuberi au? A sa masuti Filipo me cabe cake me rau tiko kaya. 32O qo ga na tiki ni Vola sa wilika ko koya, Sa tuberi ko koya me vaka na sipi me vakamatei; ia me vaka na lami sa galu e na mata i koya sa kotiva, sa vakakina ko koya, ni sa sega ni dalaga na gusuna. 33Ni sa malumalumu tiko ko koya, sa sega ni lewai vakadodonu: ia ko cei ena tukuna na nonai tubutubu? ni sa kau tani e vuravura na nona bula. 34Sa qai vosa na matanivanua vei Filipo, ka kaya, Au tarogi iko mada, se sa vosataki cei na parofita e na vosa o qo: o koya ga, se dua tani? 35Sa qai dalaga na gusuna ko Filipo, a sa vakatekivu e na tikina ko ya ni Vola, a sa vunautaki Jisu vua.

36Ia ni rau sa lako tu e na sala, erau sa yaco ki na dua na wai: a sa kaya na matanivanua, Raica, na wai! a cava sa tarovi au meʼu kua ni papitaisotaki? 37A sa kaya ko Filipo, Kevaka ko sa vakadinata e na vu ni yalomu taucoko, sa tara ga. A sa vosa ko koya, ka kaya, Au sa vakadinata ni sa Luve ni Kalou ko Jisu Karisito. 38Sa qai kaya ko koya me tu vakadua mada na vale-vodoki: a rau sa lako sobu ruarua ki na wai, ko Filipo kei na matanivanua, a sa papitaisotaka. 39Ia ni rau sa cabe cake mai na wai, sa kauti Filipo tani na Yalo ni Turaga, a sa sega ni raica tale ko na matanivanua: a sa lako ko koya e nona sala ka reki tiko. 40A sa kune ko Filipo mai Asoto: a sa lakova na veikoro kecega ka vunau lako, a sa yaco sara ki Sisari a.

Currently Selected:

A Cakacaka 8: FIJ1864

Highlight

Copy