A Cakacaka 10

E dua na agilose ni Kalou sa rairai vei Korinilio, ka vakavulica me lakovi Petero, 1-8. Era sa lako ki Jopa na nona tamata, a sa raica na raivotu ko Petero mai Jopa, 9-18. Sa lako ki Samaria ko Petero, ka vunautaki Jisu vei Korinilio kei ira na wekana, 19-48.

1SA dua na tamata mai Sisaria, ko Korinilio na yacana, a nodra turaga na matai valu sa vakayaca vaka-Itali, 2a tamata daulotu, a sa rerevaka na Kalou, vata kei ira kecega na nona lewe ni vale, a sa dausolia vakalevu na ka-ni-loloma vei ira na tamata, a sa daumasu vua na Kalou e na veisiga. 3Sa raica ko koya e na raivotu, e nai kaciwa ni tiki-ni-siga, e dua na agilose ni Kalou ni sa curu vua, a sa kaya vua, I Korinilio. 4Ia ni sa vakaraica, sa rerevaka, ka kaya, A cava o qori, Turaga? A sa kaya vua ko koya, A nomu masu kei na nomu ka-ni-loloma sa lako cake ki na mata ni Kalou mo nanumi kina: 5ia mo tala na tamata e so ki Jopa, me lakovi Saimoni, a yacana talega ko Petero: 6sa tiko vata ko koya kei Saimoni na matai ni kuli-ni-manumanu, sa tu na nona vale e baravi: ena tukuna vei iko ko koya na ka e dodonu mo cakava. 7Ia ni sa lako tani na agilose ka vosa vei Korinilio, sa qai kaciva e lewe rua na nona lewe ni vale, kei na tamatai valu sa daulotu, e le dua vei ira sa dauqaravi koya: 8ia ni sa tukuna vei iratou na ka kecega, sa talai iratou ki Jopa.

9Ia e na sabogibogi, ni ratou sa lako e na gau-ni-sala, ka toro voleka ki na koro, sa cabe cake ki na dela ni vale ko Petero me masu e nai kaono ni tiki-ni-siga; 10a sa viakana sara, ka garova na ka me kania; ia ni ra sa vakarau tiko, sa raivotu vei koya, 11a sa raici lomalagi ni sa tawase rua, a sa dua na ka sa lako sobu mai vua, sa vaka nai tutuvi levu sa buki na tutuna e va, a sa tukuci sobu mai ki vuravura; 12a sa tiko kina na manumanu ni vanua e yavai va e dui nodra veimataqali kecega, kei na manumanu kila, kei na veika sa dauqasi voli, kei na manumanu ni lagi. 13Sa qai lako mai vua na vosa, Tu cake, Petero; mo vakamatea, ka kania. 14A sa kaya ko Petero, Kakua, Turaga; niʼu a sega ni kania na ka sa tabu se tawa-savasava. 15A sa vakarua tale vua na vosa, A ka sa vakasavasavataka ko na Kalou, mo kakua ni vaka e tabu. 16A sa caka vakatolu na ka o qo: a sa qai kau tale na ka ki lomalagi.

17Ia ni sa taqaya tiko na loma i Petero, se cava na ka sa raica e na raivotu, raica, sa taroga na vale i Saimoni ko iratou na tamata sa tala ko Korinilio, a ratou sa tu e na matamata-ni-koro; 18a ratou sa kaci, ka taroga, se sa tiko ekeri ko Saimoni, a yacana talega ko Petero, se segai.

19Ia ni sa vakananuma tiko na raivotu ko Petero, sa kaya na Yalo vei koya, Raica, e tolu na tamata sa vakasaqarai iko. 20Mo tu cake kina ka lako sobu, ia mo lako vata kei iratou, me kakua ni veileti na lomamu: niʼu sa talai iratou mai. 21Sa qai lako sobu ko Petero vei iratou na tamata sa tala ko Korinilio vei koya; a sa kaya, Raica, oi au ga o qo dou sa vakasaqara: a cava na vu ni nomudou lako mai? 22A ratou sa kaya, Sa dua na agilose yalosavasava sa vakatakila vei Korinilio, e dua na turaga ni valu, a tamata yalododonu, ka sa rerevaka na Kalou, a sa rogorogo vinaka vei ira kecega na kai Jutia, me lakovi iko, mo mai lako ki nona vale, me rogoca vei iko na vosa ko koya. 23Sa qai kacivi iratou mai ko koya, ka karoni iratou.

Ia e na mataka sa lako vata kei iratou ko Petero, ka sa lako kaya e so na veiwekani mai Jopa. 24Ia e na bogi rua eratou sa curu ki Sisaria. A sa waraki iratou ko Korinilio, a sa vakasoqoni ira vata oti na kai nona kei na wekana dina. 25Ia ni sa curu ko Petero, sa veitata kei koya ko Korinilio, a sa bale sobu ki yavana, ka cuva. 26A sa vakaduria cake ko Petero, a sa kaya, Tu cake; au sa bau tamata talega koi au. 27A rau sa veivosaki kaya, a sa qai curu ki loma, a sa kunei ira na lewe vuqa era sa soqoni vata mai.

28A sa kaya vei ira ko koya, Dou sa kila ni sa ka tabu vua na kai Jutia me tiko vata, se toro voleka vua na tamata sa matanitu tani; ia sa vakatakila ga vei au na Kalou meʼu kakua ni vakatoka e dua na tamata me tabu se tawa-savasava. 29O koya ga o qo kaʼu sa lako mai kina ka sega ni veileti, niʼu sa lakovi yani; au sa taroga kina se na vuku ni cava dou sa lakovi au yani kina. 30A sa kaya ko Korinilio, Sa qai oti ga e va na bogi kaʼu a lolo ka yacova na tiki-ni-siga o qo; e nai kaciwa ni tiki-ni-siga kaʼu a masu e na noqu vale, ka raica, sa dua na tamata sa tu e mataqu sa vakaisulu lumilumisa, 31a sa kaya, Korinilio, sa rogo na nomu masu, a sa vakananumi na nomu ka-ni-loloma e na mata ni Kalou: 32o koya ga o qo mo qai talaki ki Jopa, ka lakovi Saimoni mai, a yacana talega ko Petero; sa tiko ko koya e na vale i Saimoni na matai ni kuli-ni-manumanu mai na baravi: ni sa lako mai ko koya, ena vosa vei iko. 33O koya ga o qo kaʼu sa talaki vakasauri kina vei iko; ia ko sa caka vinaka ni ko sa lako mai. Keimami sa qai tiko kecega eke e na mata ni Kalou, me keimami rogoca na ka kecega sa vakarota vei iko ko na Kalou.

34Sa qai dalaga na gusuna ko Petero, ka kaya, E dina kaʼu sa qai kila ni sa sega ni vinakati ira vakailoa na tamata ko na Kalou: 35ia e na veivanua kecega sa vinaka vua ko koya sa rerevaki koya, ka caka dodonu. 36Ai vakavuvuli sa tukuna ko koya vei ira na luve i Isireli, ni sa vunautaki na veivinakati e ua vuku i Jisu Karisito: (o koya ga sa Turaga e na ka kecega:) 37ai vakavuvuli ko ya, dou sa kila, sa vunautaki mai Jutia taucoko, a sa vakatekivuni mai Kalili, ni sa oti na papitaiso ka vunautaka ko Joni; 38ni sa lumuti Jisu na kai Nasareci ko na Kalou e na Yalo Tabu kei na kaukauwa: o koya ka lako voli ka daucaka vinaka, a sa vakabulai ira kecega sa vakasaurarataki ira ko na tevoro; ni sa tiko kaya ko na Kalou. 39Ia keitou sa yaco me dautukutuku e na ka kecega ka cakava ko koya e na nodra vanua na kai Jutia, mai Jerusalemi talega; o koya era sa vakamatea ni ra sa vakarubeca e na dua na kau: 40sa vakaturi koya cake ko na Kalou e nai katolu ni siga, a sa vakatakilai koya votu; 41e segai vei ira na tamata kecega, vei ira ga ka digitaka eliu ko na Kalou, me ra dautukuna, io vei keitou, koi keitou a kana ka gunu kaya ni sa tu cake oti tale mai na mate ko koya. 42A sa vakarota vei keitou me keitou vunau vei ira na tamata, ka vakadinadina ni sai koya ga ka lesia eliu ko na Kalou me lewai ira na bula kei ira na mate. 43O koya era sa dautukuna ko ira kecega na parofita, ni na bokoci e na vuku ni yacana na nodrai valavala ca na tamata kecega era sa vakabauti koya.

44Ni sa tukuna tiko ko Petero na vosa o qo, sa lutu ko na Yalo Tabu kivei ira kece era sa rogoca na vosa. 45Ia ko iratou sa cili ka sa vakabauta, o iratou kecega eratou sa lako vata kei Petero, eratou sa kidacala, ni sa sovaraki na Yalo Tabu nai solisoli kivei ira talega era sa matanitu kisau. 46Ni ratou sa rogoci ira ni ra sa vosataka na vosa ni veivanua tani, ka vakarokorokotaka na Kalou. Sa qai kaya ko Petero, 47Sa dua beka na tamata me bureitaka na wai, me kakua ni papitaisotaki ko ira na tamata o qo, era sa rawata na Yalo Tabu me vakataki keda? 48A sa qai kaya me ra papitaisotaki e na yaca ni Turaga. A ra sa qai masuta me tiko me oti mada na veisiga e so.

Currently Selected:

A Cakacaka 10: FIJ1864

Highlight

Copy