Matiusu 17

O Yesusu womahimatoko ai medebini ma dararono abe iwinii-niiki yaruange manga himangoka

Maruku 9:2-13; Lukasa 9:28-36

1De o wange butaanga ipahaika de o Yesusu wao o Peturusu de o Yakobusu de o Yohanese abe to Yakobusu ai dodoto, de ona yaruange gea wao de wahihira-hira la yodoa daku o loku kohagurutiye. 2De yomahiadonoka genangiye de ona yaruange iwilega-lega o Yesusika de to Una ai rupa idadi o fara moioli to ona manga himangoka. Abe to Una ai himanga yamake ngade-ngade imaketero hoka o wange ma dararono angamoi duru kohadararono. De ai pakeanga gea idadi duru iarehoka ho hiadono hoiletongo. 3De ka itodokanino de o Musa de o Elia onangoo naga genangoka de yomakoketemo de o Yesusu. 4Ho ka de gea wamake de o Peturusu wotemo o Yesusika wato, “Ahi Baluhu, abe ngomi miamakeoka naa duru irahai. Ho nako ani hininga adaene ngohi ka idadi o hijai-jai ma tau o gahumu hange todiai nenangoka. Abe moi to Ngona, moi to Musa, de moi to Elia.”

5De o Peturusu wotemo ai gogiriaka de o lobi moi ma dararono yakokihawoka. De ahao Ma Jou wotemo de yoihene o lobioka de auku o ilingi abe wotemo wato, “Naa to Ngohi ahi Ngofaka abe duru tidora Unangika de duru tisanangi Unangika, ho kiani ngini niwihigihene Unangika.” 6De o ilingi gea iwinii-niiki yaruange yoihene de duru yohawana hiadono yomamotu-motumuku dau ma tonakuku.

7De ahao o Yesusu woboa onangino de waso de wotemo onangika wato, “Nimomikoka, de ibootohi nihawana.” 8De wotemo ibooto de ona yomalega arihonongaika masara ka o Yesusokahi iwimake angamoi o Elia de o Musa ona ka aiaho, ko yamakeokaua, ho o Yesusu dika nagahi.

9De ipaha de ahao ona yaruata manga gogiriaka youti o lokuku de o Yesusu wahibehehongo onangika wato, “Abe ngini niamakeoka naa o lokuoka de gea ngarouahi niade-ade o nyawaika. De gea ko niade-adeuahi hiadono Ngohi o Nyawa ma Ngofaka tomomikoka ahi honengino. De tomomiki ipahaino de ahao ngini ka idadi niade-ade o nyawaika.”

10De ona yaruange iwinii-niikino ona yataoko de itararono abe ma titi o Yesusu Una gea o Koano abe ma dodihiraino Ma Jou wahibehehongo wato ahao wihidingoto o duniauku. Masara nagahi utu abe ko itararonuahi onangika, ho iwileha o Yesusika ato, “Ma titi o kia hiadono ona yotobadoto-dotoko o Musa ai Paretaino inadotoko ato,

‘O Elia kiani wohira woboa, de ahao nanga Koano o Mesia wihidoduruino?’” # 17:10 Maleaki 4:5

11De o Yesusu wopaluhu wato, “Gea ona yagoungu. Kiani o Elia wohira la wato o nyawa manga wowangoka wahitiaiokahi de ahao nanga Koano o Mesia wihidoduruino. 12Ho naa tinihingahu dika, igoungu una gea abe iwihiromanga o Elia, una woboaka, masara o nyawa ko iwihiorikua abe una o Elia. Ho o kia dika naga abe o nyawa manga hiningaka ma dorou, gea unangika iwihipake. De naa ko itedekanokaua de Ngohioo o Nyawa ma Ngofaka ihihikangela o nyawa utu manga giamoka.” 13De hokogea o Yesusu wotemo ibooto de ona iwinii-niiki ka idadi yataoko itiai abe to Una ai demo ma dumutu ma titi tanu o Yohanese Wotobaohi-ohikika abe una hoka o Elia ma dodihiraino.

O ngofaka iwikokitokata de hiadono wohone-honenge de o Yesusu wohititokoka ma tokata unangoka de aino

Maruku 9:14-29; Lukasa 9:37-43

14De ipahaino o Yesusu de yaruange iwinii-niikino yomahiadonoka manga dodiawouku de yamake o nyawa yowoe-woe yomatoomuino genangoka. De naga womatengo onangino woboa o Yesusino de watilabukuku ai himangoka. 15De una duru wogahoko o Yesusika wato, “Ahi Baluhu, duru togahoko la nidora ahi ngofaka abe ga doka hiadono nihitogumu unangika! Angamoi una duru wokangelakaholi ma titi wohone-honenge. De gea hiadono ma ngoe iwihirubauku de iwiumo o ukuika de o akerikaoo. 16De gea ma titi hiadono ahi ngofaka tiao ona ininii-niikika la tato ona ka idadi iwiduhunu iwihitogumu, masara ona ko yakunua.”

17De una gea wotemo ibooto de o Yesusoli wotemo o nyawa yowoe-woeika wato, “Adoo! Ngini naa mata-mata ko iwahi nia ngongaku Ngohino! De ngini ka ihikaika nirehene Ma Jou ai ngekomoka de aino! De hiokoo ngini, angamoi nako Ngohi ko ahi dekanohi nginioka de ngaro hokogea ma bote ngini ko nihingakuahi Ngohino! Ho mode muruonoka de ahao nihingaku? Abeika to una ai ngofaka niwiaoino Ngohino.” 18De iwiaoino de o Yesusu wataere o tokatika gea abe iwihitobahikokangela ma ngofakika de ahao ma tokata ihupuoka ai badangoka de iwinoaka. De genangoka de imahikaino de ma ngofaka gea wososanangi angamoi wotogumoka.

19De o Yesusu wihitogumu ipahaino de o nyawa yowoe-woe yokokilioka ho o Yesusu de iwinii-niiki ka onangokahi. De ona iwileha o Yesusika ato, “Ho kangano gea ma titi o kia hiadono ngomi ko miakunua miatitoko unangino ma tokata gea?”

20De o Yesusu wopaluhu wato, “Mangale ti ngini nia ngongaku ka ikurangohi. De naa tagou-goungu tinihingahu, abe nako ti ngini nia ngongaku naga, gea ahao ngaro o kangela eko o dadaili kohaamoko niaohana nia wowangoka masara gea nia ngongaku Ma Jouika ena gea ka idadi ihikala enangika. Abeika naa tohiketero. De nako ti ngini nia ngongaku naga, ngaro ma eteteke dika nia ngongaku abe imaketero hoka o sawi ma mui ma mengeteke, masara nia ngongakuino gea ka idadi niakunu niahuloko o loku ma amo-amokika gea la imagoraka de imaturuuru o ngi moiikali, de ma loku gea kiani inihigihene. Ho gea duru ko iwa abe ngini ko niakunua nidiai, iti ngini naga de nia ngongakuoka.” [ 21De o Yesusu wahitararonoli onangika wato, “Nako naga ma tokata ma rupa hokogea, kiani homaniatohi de hopuahahi de ahao ka idadi hohititoko o nyawaino. Masara nako ko homaniatikaua de ko hopuahaikaua de hohititoko, gea ko hakunua.”]#17:21 Nako Ma Jou ai Demo-demo ma buku ma asli mata-mata abe yamake, gea ma buku iwoe-woe ko iwa ma demo abe o ayata 21 ma dolaka. Ho ma buku utu dika ko iwoeua abe genangoka hamake o ayata 21 ma demo.

O Yesusu ma moioli womahingahu onangika ma titi ai honenge

Maruku 9:30-32; Lukasa 9:43-45

22De o wange moiuku de o Yesusu de iwinii-niiki naga yomatoomuino o Galilea ma tonakoka de o Yesusu wahingahu onangika wato, “De naa ngini nihiorikoka abe Ngohi naa o Nyawa ma Ngofaka abe toboa o Horogaka de tauku. Ho naa tinihingahu nginika abe ahao o nyawa ihihidoaka Ngohi o nyawa utuikali la ahao ona gea ihihohonenge. 23De gea ihihohonengoka masara ma futu hange ipahaika de ahao tomomikoli ahi honengino.” De ona iwinii-niiki duru to ona manga hininga ihuha ma titi ai demo gea abe womahingahuoka.

Ma Jou ai Tau ma pajaka o Yesusu de o Peturusu yofangu

24De ipahaino de o Yesusu de iwinii-niiki yomahiadono o Kapenaumu ma kapongika. De naga genangoka o nyawa yamuruono naga abe ona manga tagongo la o pajaka ma tiwi yatobatoomu o nyawa homoi-homoiino, abe ma tiwi ihipake Ma Jou ai Tau gea. De ona gea yoboa o Peturusino de iwileha ato, “Sarakia, to ngona ani guru Una ko wofangua abe Ma Jou ai Tau ma pajaka ma tiwi?”

25De gea o Peturusu wapaluhu wato, “Koua, una ka wofangu ma pajaka gea.” Masara ka de wotemo ipaha de ahao una wowohama o tau ma goronaika abe o Yesusu womahidodogumu genangoka la wato una de o Yesusu ka idadi yomaketemo abe ma titi ma pajaka gea. Ho o Peturusu wowohamoka masara ko womadaenua wotemo de o Yesusu wilehaka unangika wato, “Ho sarakia to ngona ani hininga abe ma titi o pajaka ma tiwi la onagona kiani yofangu? Abeika homafikirohi o kokoano o duniaka naa manga hiaturu. Ho nako o kokoano, sarakia, ona gea yogahoko la to ona ma hirete manga ngofa-ngofaka kiani yofangu ma pajaka gea, ekola o kokoano manga hininga la ato ona dika yofangu abe o homoaino ma nyawa? Ngona ani hininga sarakia?”

26De o Peturusu wopaluhu wato, “Nako ngohi, o kokoano gea yogahoko la o homoaino ma nyawa dika yofangu ma pajaka ma tiwi.”

De gea o Yesusu wopaluhu wato, “Ho nako hokogea yodiai, gea to ona ma hirete manga ngofa-ngofaka ngaro ufa dika de yofangu!” De ai demoino gea de wihitararono o Peturusika abe tanu ngaro ufa dika o Yesusu wofangu Ma Jou ai Tau ma pajaka ma tiwi gea, angamoi Una wodadi nanga Koano Ma Jou Una ma hirete ai Ngofaka.

27De o Yesusu wogila-gila wotemo o Peturusika wato, “Ho tanu ngaro ufa dika de hofangu ma pajaka ma tiwi gea, masara nako ko hofangua ahao done naga utu abe inahininga kuranga ngoneino. Ho naa ngona noiki daukuku o akere ma ngooto ma ngigoruku de nomemekana. De ahao bootino abe o nawoko ihira-hira abe naliarino, de ma nawoko gea namoana to ena ma uru. De doka ma uru ma goronaka ahao namake o tiwi ise-senge moi abe inawedono ma titi to ngone inahinooto nanga pajaka hofangu. Ho ma tiwi gea nagorakoka de noiki nao onangika abe yotobagahoko o pajaka o nyawaino la gea nanga pajaka nonabangu.” De igoungu hokogea idadi abe imakiniiki de to Yesusu ai demo, ho gea ona yofangu Ma Jou ai Tau ma pajaka.

Currently Selected:

Matiusu 17: MJDD

Highlight

Copy