Matiusu 18

Abe iwinii-niiki iwileha o Yesusika ato, “Ho ka onagonahi mikurutiye?”

Maruku 9:33-37, 9:42-48; Lukasa 9:46-48

1De ma oraha gea iwinii-niiki yoboa o Yesusino de iwileha Unangika ato, “Nako ahao dokena nanga himangika de Ma Jou wonahikoano ngone abe to Una ai nyawa, sarakia, ma oraha gea de nako ngomi imingimoi de imihinootoino, ka onagonahi mikurutiye?”

2De naga genangoka o ngofaka ma eteteke womatengo. Ho o Yesusu ko wopaluhuahi de ma ngofaka gea wiahokinohi la womaokoino to ona manga hidogoronaka. 3De ma ngofaka womaokoino to ona manga himangoka de o Yesusu wopaluhu to ona manga lelehaika wato, “Ufa ngini nioigo la nimahikurutiye masara koaho nia hiningaka de nimahitipokouku. Angamoi naa tinihingahu tagou-goungu nginika abe kiani nitoba nia howo-howonino de nimahitipokouku la nia hininga ma dodipokouku imaketero abe hoka o ngofa-ngofakoli manga hininga ma dodipokouku. De nako ko nitobaua de ko nimahitipokoukua, gea ahao o nyawa ko inihiromangua abe Ma Jou winihikoano nginika.”

4“De nako onagona dika yomahitipokouku la hiadono manga hiningaka de yomaketero abe hoka o ngofaka ma eteteke naa ai hininga ma dodipokouku, ona gea ahao Ma Jou wahikurutiye. Abe gea ma oraha Ma Jou wahikoano ai nyawa de Una waetongo onangika wato ona gea duru yokurutiye ai himangoka.”

5“De onagona dika abe yadafongo o ngofaka hoka naa una mangale ma titi manga hiningaka ato ihihisanangi Ngohino, ona gea taetongo abe ka ma ngofakua dika yadafongo, masara gea Ngohioli naa ma hirete ihidafongoka. 6Abe ngini naa tinietongo ahi ngofa-ngofaka ma titi nihingakuoka Ngohino. De ngaro o nyawa onagona dika abe ihingaku-ngakuoka Ngohino, ma onangoo mata-mata ahi ngofaka yodadioka. Ho mangale ma titi ngini mata-mata tinihiromanga tato nidadioka ahi ngofa-ngofaka, ho onagona dika inidafongo ngini, gea imaketero Ngohioo ihidafongoka.”

“Masara nako ngini nihingaku-ngakuoka de o nyawa inihiatara la hiadono ko nihiniikokauali, ona gea Ma Jou wahohowono onangika. De ngaro ngini ahi nyawa abe nia gogere ma dodipokouku dika, masara nako o nyawa inihiatara la hiadono nirehene Ngohino, ona abe inihiata-atara, ona gea duru Ma Jou wahohowono. De abe ona inihiata-atara duru manga hohowono kohadubuho ho ngaro manga tomarino ihidilikoino de yadideuku o hakaru kohaamoko de yahidotumo o gahi ma lukuku, ma ko kia-kiaua. Hongoli nako nihingaku-ngakuoka de inihiata-atara, duru ka to onangohi manga hohowono itubuho.” Hokogea o Yesusu ai bobaluhu iwinii-niikika.

O Yesusu ai dodotoko ma dubuho abe ma titi to ngone nanga howo-howono

7De o Yesusu ka wotemohi de ai hitiari ma hiketero wapake wato, “Igoungu o duniaka naa de ngini naga nia kangela ma dodubuho angamoi ma ngoe inihiata-atara. De o hiatara gea ka ihikaika naga nginioka. Masara nako o nyawa abe yahiata-atara o nyawa utuikali hiadono ona yorehene Ma Jouino, ona yahiata-atara ahao manga hohowono duru kohadubuho ona yamake.”

8“De gea ma titi ho hiadono tinihitiari nginika tato nako inihiatara o howonika, gea tato kiani duru nialawana ma hiatarika gea done nirehene Ma Jouino. Ho nako de nia giama eko nia lou de inihiatara la nako nirehene Ma Jouino, gea nia giama eko nia lou niafoko de niaumoka dika. Angamoi koaho inihipoloka eko inihiluguoka la idadi nia toba genangino la ahao ka idadi niamake o wowango ka hiado-adonika. Masara nako ko nitobaua de gea kiani o Narakaika niwohama, abe genangoka ma uku ko ihone-honengua, genangoka ngaro nia giama ma gahumu eko nia lou ma gahumu nagahi, ma, ko kia-kiaua ma utumu niamake genangino. 9De nako nia lako ma hononga inihiatara la nako nirehene Ma Jouino, gea nia lako ma gomono niahuputoka de niaumoka dika. Koaho inihirafioka la genangino idadi nia toba de ahao nidoa o Horogaiye. Masara nako hiadono niloiki o Narakaika, genangoka ngaro nia lako ma gahumu nagahi, ma, duru ko kia-kiaua ma utumu niamake nia lakoino.”

Abe hokokia Ma Jou ai hininga itagi ngone to Una ai dombaino

Lukasa 15:3-7

10De ahao o Yesusu wahitiari onangika wato, “Ho naa tinihitiari moioli abe ma titi o nyawa ihingaku-ngaku Ngohino de abe tahiromanga to Ngohi ahi ngofa-ngofaka la tato ufa ngini niaemono onangika. Abe ngaro o nyawa ihingaku-ngakuoka ma manga gogere ka ma dodipokouku dika, masara ufa niaemono ahi nyawaika. Angamoi tinihingahu abe ona ihingaku-ngakuoka de daku o Horogaka naga to ona manga malaekata abe yatobapaliara onangika. De to ona manga malaekata ka ihikaika naga ahi Baba ai himangoka, ho koaho ngini onagona dika de ufa niaemono to Ngohi ahi nyawaika gea.”

11[“De Ngohi naa o Nyawa ma Ngofaka toboa o Horogaka de tauku la ka idadi o nyawa abe yorehe-rehenoka Ma Jouino ona taduhunu manga howo-howonino.]”#18:11 Nako Ma Jou ai Demo-demo ma buku ma asli mata-mata abe yamake, gea ma buku iwoe-woe ko iwa ma demo abe o ayata 11 ma dolaka. Ho ma buku utu dika ko iwoeua abe genangoka hamake o ayata 11 ma demo. Abe yomatobadotoko manga ngoe yataoko ato ma ayata naa tanu o Lukasoka ho ihingohama dika nenangoka ma oraha yotobatuli-tulihi yodiai ma buku utu gea. Angamoi ma demo duru imakiniiki de o Lukasa ma pasala 19 de ma ayata 10 ma demo. 12Ho naa tinihidoaka o hiketero moi abe ma titi hokokia taduhunu o nyawa gea. “De abe ma titi ona gea yorehe-rehenoka, Ngohi tinileha naga moi la nia hininga sarakia. De naga o domba ma gogoana womatengo abe ai duduonoka naga o domba o dutu o ratuhu moi de gea itotimiono o loku ma geleforino. De nako ai domba o dutu moi irehene ma duduonino gea de hiadono ihihangoka, gea ahao ma gogoana una hokokia wodiai, nako ngini? Ti ngini nia hininga sarakia? Iya, nako Ngohi, tato bote una ma gogoana wanoaikahi ai domba morihiwo de hiwo gea abe nagahi ma duduonoka o loku ma geleforino de woiki wolingirohi abe o dutu moi gea abe ihihangoka ka hiadono wamake. 13Ho nako wamakeoka, boteua una ahao ai hiningaka duru wogogarago abe wongano-nganono ai domba moi gea wamakeoka de wohigilio ma duduonika. Ho nako ai domba morihiwo de hiwo abe ko irehenua de ai domba moi gea, ma ka ai domba moiikahi abe duru ai hininga igarago angamoi wamakeoka.”

14“De hokogenangoo ti ngini nia Baba o Horogaka ai hininga ai ngofa-ngofakika, abe Una gea duru ko woigoua la ai ngofaka yorehene hiadono ihihononga yahihanga Unangino. Abe ngaro womatengo ai ngofaka abe ai gogere ka ma dodipokouku dika masara Ma Jou ko woigoua la ai ngofaka gea iwihihanga.”

Abe hokokia haduhunu nanga gogianongoruika abe ona yahowonoka

Lukasa 17:3

15De o Yesusu wohigila-gila ai dodotoko onangika wato, “De nako idadi abe ani gianongoru o ngongakuoka wahowono ngonaika, gea irahai noiki unangika de nimakoketemo abe inihinootoka dika la ufa o nyawa manga himangoka. De gea ani demoino de nihidaere to una ai howono ngonaika. De nako una gea wotoihene hiadono womangaku ai howono, de gea nihigilioka o totiai ma ngekomino la to una ai gogao ngonaika de Ma Jouikaoo itiaiokali.”

16“Masara nako hoka una ko wodafongua ani demoika, gea kiani nahoko ani gogianongoru womatengo eko yahinooto la ininiiki de gea ngini niwigilioli abe una wahowonoka de niwitemoli unangika. La gea ma oraha de ngini nihidaere to una ai howono de abe una wopaluhu hokokia, gea nia demo mata-mata de naga ma hakihii abe yotoihene, de gea nia gogianongoru womatengo eko yahinooto abe ininiiki. Angamoi hokogea haniiki ma hiaturu abe hamake Ma Jou ai Demo-demoka.”#18:16 Higalioli 19:15

17“De nako hiadono ma hinooto nihidaere ai howono masara una ka wolukohi wodafongo nia demo, gea ahao kiani niao nia dodaere o garejaika de niahingahu onangika la ona ka idadi yomaputuhu nako una gea igou-goungu wahowonoka eko koua. De nako ona yomaputuhu ato wahowonoka masara una wahowo-howono ka wolukohi wodafongo to ona manga putuhu ma demo ho ko womangakuahi, gea ahao ngini mata-mata kiani niwihitingaka nginino. La gea niwiao abe imaketero hoka o nyawa ko iwihiorikua Ma Jouika eko abe hoka ona yotobagahoko o pajaka ma tiwi abe ti ngini nia hininga duru ko nimaketedodiawoua onangika.”

18“De naa tinihingahu abe ngini o gareja ma goronaka naga nia tagongo la nimaketetailako ma titi o howono abe ipuda nia hidogoronaka. Ho nia putuhu o kia dika naga o duniaka naa de gea Ngomi o Horogaka ka idadi mianiiki ti ngini nia putuhu gea. Ho o kia dika niahingahu ahi nyawaika niato ko idadiua, gea o gareja ma nyawa ko idadiua yodiai, ho imaketero abe hoka o ngorana niakusioka. De hokogenangoo abe nako moi niahingahu onangika gea niato ka idadi yodiai, gea imaketero hoka o ngorana moi niafelengaika.”

19De o Yesusu wotemo-temohi wato, “De naa moioli tinihingahu nginika. Abe nako naga moi o howono ipuda nginioka de ngini niatailako la ka idadi niaputuhu itiai, gea ka idadi nimagahoko o duduhunu Ma Jouino abe ma rupa o kia dika de ahi Baba o Horogaka Una ahao winihidoaka nginika, iti abe ngini inihinooto eko inifoloi de nimaketehiningamoi ma titi nia gogahoko gea. 20Angamoi o kiaka dika naga abe inihinooto eko inifoloi abe nimatoomuinoka la niato to Ngohi ahi hininga nianii-niiki, de genangoka Ngohioo naga ti ngini nia hidogoronaka ho ka idadi tiniduhunu.”

O ade-ade abe ma titi womatengo woluku wiapongo ai dodiawoika

21De gea o Yesusu wahitararono ibooto de ahao o Peturusu woboa de wileha o Yesusika wato, “Ahi Baluhu, nako ahi gianongoru watobahowono ngohino, gea ma muruono ngohi kiani tiapongo unangika ma titi ai howono ngohino? Bote hiadono ma tumidi tiapongo, eko sarakia nako Ngona?”

22De o Yesusu wipaluhu wato, “Koua! Angamoi nako ka ma tumidi dika niapongo, gea ko iwedonua. Ho gea Ngohi tato duru ko iwa ma dodogumu abe niapongo ani gianongoruika.”

23De ahao o Yesusu wahitararono onangika de o ade-ade wato, “De gea kiani ngini niatobaapongo nia gogianongoru manga howono mata-mataika abe yodiaioka nginika angamoi hokogenangoo Ma Jou ai hininga abe winiapongo ngini o nyawaika. De naa tinihidoaka o ade-ade moi abe genangino de inahitararono hokokia ahao idadi abe ma oraha Ma Jou wahikoano ai nyawaika.”

“De naga womatengo o koano abe womaputuhu wato ma oraha adonoka la ai tiwi watoomuinokali o nyawaino abe ma dihiraino de yomabau-bau unangino. Angamoi nengokadauinohi de ai tiwi duru kohaamoko wahibau-bau ai duduhunu ma nyawaika. 24Ho womulaenge wahokino ai duduhunu abe ai tiwi yomabau-bauoka, de naga ai duduhunu womatengo abe una gea ai nagimi duru kohaamoko ka hiadono ijuta. 25De ma duduhunu gea ko womagakunua wofangu, ho ma koano wahuloko ai nyawaika la ma duduhunu gea ai kiahonanga mata-mata yakokile la yakokifukunu. De barikua ka genangua dika ai huhuloko, masara una wahulokoo la ai duduhunu de ngoi fekata de ai ngofa-ngofaka yakokifukunoka o nyawa utuikali la yodadi o nyawa manga gilaongo. De gea mata-mata ma tiwi abe ahao ma koano wamake wato ka idadi ihipake la ai duduhunu womatengo gea ai nagimi ka idadi atamunu.”

26“Masara ma duduhunu gea ka de woihene ma koano ai huhuloko ma demo de womamotumuku ma koano ai himangoka de duru womagaho-gahoko wato, ‘Ahi koano, ngohi duru tomagahoko la nohihiainohi de tonihibehehongo ngonaika abe ahi nagimi ahao takokitamunu.’ 27De ma koano woihene ai duduhunu ai gogahoko ma demo gea de ai hininga ma dora duru itagi unangika ho wato, ‘Ma oraha naa de ani nagimi ngohino takokiofioka ho naa tonihihupuoka ma hohailoaika.’”

28“Ho ma duduhunu gea ma koano ai himangoka de wosobo de woiki ai dodiawoika abe unangoo ma koano ai duduhunu womatengoli ho ona yomahikarajaanga moi. De nengokadau ma duduhunu wohira-hira ai tiwi wihibauoka naa ai dodiawoika, ho ai dodiawo naga ai nagimi ma duduhunu ihira-hiraika abe ma tiwi marai isana, ko ilamokua. Angamoi nako ona yahinooto manga nagimi de ka ma duduhunu ihira-hira ka to unangohi ai nagimi duru ilamoko, masara naa ma koano waofioka. Ho ngaro to ai dodiawo ai nagimi unangika hatoli ieteke masara woiki unangika de wiso ai tomarika de wihookoko. De duru wiribuutu unangika la ma oraha naa dika de wakokifangu ai nagimi. 29Ho gea ai dodiawo womamotumuku to una ai himangoka de duru womagaho-gahoko la iti ma duduhunu ihira-hira wihiainohi la wofangu. Abe ai dodiawo wato, ‘Dodiawo, ngohi duru tomagahoko la nohihidoaka ma oraha de tonihibehehongo ngonaika abe ahao ahi nagimi takokitamunu.’ 30Masara ngaro hokogea womagahoko ma una wohira-hira ko wodafongua. Ho wahuloko la ai dodiawo gea iwitaoko de iwibuioka ka hiadono wakokifangu ho ngaro ma hohutuloo ma duru ko iwaka ai nagimi.”

31“De naga genangoka manga dodiawo utuoli abe onangoo yodadi o koano ai duduhunu. De ona ka de yamake abe hokokia ma duduhunu ihira-hira wodiai ai dodiawoika de manga hininga duru ihuha. Ho ona yoiki ma koanoika de iwikalaki unangika ma titi ma duduhunu ihira-hira ai datoro ma dorou. 32De gea ma koano woihene de duru wongamo. Ho wiahokino ai duduhunu gea abe ai nagimi wakokiofioka de wotemo wibobanarata unangika wato, ‘Ngona naa duru ani hininga ka itorouokaholi! Angamoi ahao kangano de to ngona ani nagimi kohaamoko gea ma ngohi takokiofioka mangale ma titi duru nomagahoko ngohino. 33Ho tanu koaho ngonaoo ani hininga ma dora itagi ani dodiawoika gea abe imaketero hoka to ngohioli ahi hininga ma dora tapake ngonaika!’ 34Ho mangale ma titi ma koano duru wingamo ai duduhunika ho ai hininga waturuuruoka de wahuloko la iwiao la iwibuika ka hiadono ai nagimi ma koanoika ka idadi wakokifangu ho ngaro ma hohutuloo ma duru ko iwaka ai nagimi.”

35De o Yesusu ai ade-ade wabootoka de wotemo wato, “Ho nako nginioka nia howono ko nimahikokaapongua ngini de nia gogianongoru o ngongakuoka, gea nginioo o hiapongo ko niamakeua. Angamoi to Ngohi ahi Baba o Horogaka ahao winihohowono nginika abe duru imaketero abe hoka ma koano wihohowono ai duduhunika gea abe ko iwa ai hininga ma dora ai dodiawoika. Ho koaho ti ngini nia hininga homoi-homoioka de nimahikokaapongo nia gogianongoru manga howono nginika.” De hokogea o Yesusu ai demo onangika abe ma titi o hiapongo.

Currently Selected:

Matiusu 18: MJDD

Highlight

Copy