Matiusu 16
16
O Yahudi ma nyawa manga hidimono yogahoko o heheranga ma dodunguu
Maruku 8:11-13; Lukasa 12:54-56
1De o wange moiuku de naga o nyawa utu o Farisi manga doomuino de naga utuoli o Saduki manga doomuino de ona yomakutuono yoboaino o Yesusino. De gea yoboaino angamoi manga hiningaka yoigo la ato iwitaili Unangika. Ho ona iwitemo ato, “Ngomi marai migahoko la o heheranga nomihimatoko mia himangoka naa la ka idadi miamake de mihioriki abe ani kuaha o Horogaka de auku eko koua.”
2Masara o Yesusu duru woluku o heheranga wodiai manga himangoka, de Una wopaluhu onangika wato, “Ngini naa igoungu ka idadi nihioriki ma dodunguu abe niamake daku o hoanino ma rupa. Abe nako o bobimaowaka de nimalega daku ma hoaniye de niamake abe itokara, gea nihiorikoka de niato, ‘Itebini ahao ko iawanua masara ka o wange dika hamake.’ 3De ngaro o ngoru-ngorumino de nimalega daku ma hoaniye de niamake abe itokara ho ma lobi ilage, genangoo ma nihiorikoka ma titi hokokia ho niato, ‘Bootino o awana.’ Ho gea ena ma dodunguu nihioriki abe ma titi hokokia, ho done sarakia hiadono ngini ko idadiua niataoko ma dodunguu abe ihihitaanoka abe ma titi to Ngohi naa ahi kuaha o Horogaka de auku iboa?”
4“Ho gea Ngohi tato abe ti ngini nia gogahokino gea de nimahitaanoka abe nia hininga itorou de abe ngini ko niwingakua Ma Jouika. De gea itararonoka abe ngini nimahitingakoka Ma Jouino imaketero abe hoka o ngofeka momatengo ami hininga itagi utuikali ho momahitingaka ami rokatino. Ho Ngohi naa duru toluku todiai o heheranga ma dodunguu nia himangoka abe hoka ngini nioigo niamake. Masara naga moi ma dodunguu ka idadi tinihidoaka nginika. Abe hoka idadi ma dodihiraino Ma Jou ai uru ma dodofanga o Yunusika, hokogenangoo ahao idadioli Ngohino de gea dika ma dodunguu ngini ka idadi niamake.” De o Yesusu ai demo hokogea dika aika de wosoboka wanoaika.
O Yesusu wahitiari iwinii-niikika la yomahidodiai o Farisi manga doomuino ma nyawa de o Saduki manga doomuino ma nyawa manga dodotokino
Maruku 8:14-21
5De ipahaino o Yesusu de iwinii-niiki yomahihoraka o Galilea ma akere ma ngooto doka ma honongaika de ahao ihioriki abe manga bilaono yawohangika ho ko iwa manga inomo abe yaoino. 6De ahao o Yesusu wahitiari onangika ma titi o nyawa manga dodotoko wato, “Ngini kiani nihidodiai o Farisi manga doomuino ma nyawa manga ragi de o Saduki manga doomuino ma nyawa manga ragioo kiani nihidodiai.”
7De ai demo gea yoihene ma ona ko ihiorikua ho yomakoketemo ato, “Bote ai demo gea ma titi ma roti abe ko homagaoua.” 8De ona yomakoketemo gea o Yesusu wohioriki ho wataere onangika wato, “Adodoa ho nimakoketemo abe ma titi nia roti ko iwa? De ti ngini nia demoino gea de nimahitaanoka abe nia ngongaku ka ihutulohi! 9De ka idadi tamake abe ngini ko niataokuahi abe ma titi to Ngohi ahi kuaha. Ho mode ko niohiningakaua abe o nyawa tahiolomo yasana motoa de o roti motoa, de ahao yakokipunuhoka de nagahi o inomo ma hou ma amoko abe niagorakiye de o tupa? 10De mode genangoo ko niohiningakaua abe ma oraha Ngohi ma roti tumidi gea tahikodoku o nyawaika abe yasana iata, de ahao ipahaino nagahi manga inomo ma hou abe o tupa ma goronaka? 11Ho gea tanu itararonoka abe kangano ma ragi tafetongo de gea duru ko mangaleua ma titi Ngohi topusingi de o roti! Ho done sarakia hiadono ahi demoino de ngini niataoko ihowono ho niato bote Ngohi topusingi de nanga inomo? Angamoi to Ngohi ahi hiningaka de o inomo duru ko ihihipusingua. Ho naa Ngohi tohigalioli de tinihitiarioli nginika tato kiani nihidodiai o Farisi ma nyawa manga ragi de o Saduki ma nyawa manga ragioo kiani nihidodiai.”
12De gea ma bahauku de ahao iwinii-niiki yataoko itiai ai demo ma titi, abe Una ko wahitiariua ma titi o ragi eko o roti. Masara tanu wahitiari onangika ma titi o Farisi ma nyawa de o Saduki ma nyawa manga rerehene ma dodotoko abe yatobadoto-dotoko o nyawa utuika. De gea manga rerehene ma dodotoko wohiketero de o ragi angamoi ngaro ma ragi ka ma hohutulu dika ma gea ka idadi ma tarigu ihifero mata-mataika. De hokogenangoo o rerehene ma dodotoko ka idadi yahirehene o nyawa ko manga ngoe Ma Jouino.
O Peturusu wihioriki abe o Yesusu Una o Koano abe ma dodihiraino de Ma Jou wahibehehongoka onangika gea
Maruku 8:27-30; Lukasa 9:18-21
13De ipahaino o Yesusu de iwitobanii-niiki ona yoiki o Kaisarea Filiipi ma tonakika. Ho ka de yomahiadonika ma tonakika gea de waleha onangika wato, “Ma oraha o nyawa utuoli ihimake Ngohi naa o Nyawa ma Ngofaka, de ona ato Ngohi naa onaguna?”
14De iwinii-niiki yopaluhu Unangika ato, “Utu naga ato Ngona Ma Jou ai uru ma dodofanga ma dihira abe nato noboali o duniauku naa, ho ato Ngona o Yohanese Wotobaohi-ohiki. De naga o nyawa utu ato bote Ngona naa ai uru ma dodofanga o Elia, de nagali utu ato bote Ngona naa Ma Jou ai uru ma dodofanga o Yeremia eko moiinoli abe ma dihira woboaka ho naa woboali.”
15De o Yesusu walehali iwinii-niikika wato, “Masara nako ngini, niato bote Ngohi naa onaguna?”
16De o Simono Peturusu wipaluhu o Yesusika wato, “Ngona gea o Mesia, mia Koano abe ma dihira Ma Jou womihibehehongoka ngomino, ho Ngonaoo Ma Jou Wotobawango ai Ngofaka gea.”
17De o Yesusu wipaluhu unangika wato, “Simono abe ngona to Yunusu ai ngofaka, ngona duru nagoungu. De ngona namakeoka ma hiowa Ma Jouoka de aino angamoi ngona nataoko itiai abe Ngohi naa to Una ai Ngofaka ma dodutu abe winihibehehongoka. De gea ahi Baba o Horogaka Una ma hirete abe wonihingahu ngonaika abe ma titi Ngohi, de ko o nyawainoua namake ma hingahu gea.”
18“De naa moioli tonihingahu ngonaika abe o hiketero ma demoino tapake. Abe to ngona ani romanga gea o Peturusu de ani romanga ma titi gea o hakaru. Ho imaketero hoka o nyawa yomaatau o hakaru ma dengeoti ma lokuiye, hokogenangoo to Ngohi ahi gareja ahao todiai o hakaru ma lokuiye. De ma hakaru gea ihidumutu ngonaika. De abe ma titi ahi gareja gea Ngohi todiai, ma doomu gea duru ko iwa ma dorou o kia dika abe akunu yahikala onangika. Abe ngaro o hone-honenge ma kuaha abe ma oraha naa nagahi o Ibilihi ma haeke ma giamoka, masara enangoo ko idadiua yahikala ahi garejaika.”
19De o Yesusu wogila-gilahi wotemo o Peturusika wato, “De ngonaika ahao tonihitagongo la ngona naga de ani kuahaka o duniaka naa. De ani kuaha gea de tonihiketero abe ngona hoka nasoino o tau ma ngorana ma kokusi. Abe ngona ahao ka idadi ma ngorana nabelenga hiadono o nyawa ka idadi yowohamino o tau ma goronaino. De ahi hiketero gea ma titi ngona ahao Ma Jou ai Demo-demo nahingahu de nahitararono o nyawa manga ngoe la hiadono ona yodadi o nyawa abe Ma Jou ka idadi wahikoano onangika.”
“Masara ma titi ani kuahaino gea de naga moi ahi behehongo ngonaika abe ngona kiani nohidodiai naniiki. Abe ma oraha nahingahu de nadotoko o nyawaika gea de kiani ani demo duru imakiniiki de to Ngohi ahi demo de to ahi Baba ai demo o Horogaka. Angamoi ahao ani putuhu o kia dika naga o duniaka naa de gea Ngomi o Horogaka ka idadi mianiiki to ngona ani putuhu gea. Ho o kia dika nahingahu ahi nyawaika nato ko idadiua, gea imaketero abe hoka o ngorana nakusioka. De hokogenangoo abe nako moi nahingahu onangika gea nato ka idadi, gea imaketero hoka o ngorana moi nofelengaika. Ho ngona naga ani kuaha Ma Jouoka de aino la nahiaturu ahi nyawa o duniaka naa abe ahao Ma Jou wahikoano onangika.”
20De ai demo gea o Peturusika wotemo ibooto de ahao o Yesusu duru wahitiari onangika wato, “Ufa o nyawaika niahingahu abe Ngohi naa o Mesia abe ma dihiraino de Ma Jou winihibehehongokau.”
O Yesusu wahingahu iwinii-niikika abe wato Una de ahao kiani iwihikangela de ka hiadono iwitoma
Maruku 8:31—9:1; Lukasa 9:22-27
21De abe ma oraha gea de imahikaino de o Yesusu ma ngoe wahingahu iwinii-niikika abe hokokia ahao idadi Unangika. De gea Una wahingahu onangika wato kiani o Yerusaleeme ma kotaika woiki de genangoka ahao o Yahudi ma nyawa manga balu-baluhu iwihikangela Unangika. Abe to ona manga hidemo Ma Jouiye abe yokokurutiye de abe ona yotobadoto-dotoko o Musa ai Paretaino de manga hibaluhu utuoli naga, masara ona mata-mata ahao iwihikangela de hiadono iwitoma Una. Masara Una wahingahuoo onangika wato ai wange hange dika de womomikoka ai honengino.
22De o Peturusu woihene o Yesusu ai demo gea ho wihidohikika o Yesusu yomatingakika ma hohutulu de duru witaere o Yesusika wato, “Ahi Baluhu, duru toluku o nyawa manga hidee gea. Angamoi duru ko idadiua o nyawa initoma Ngonaika.”
23Masara o Yesusu womadogilioro womalega o Peturusika de Unangoli witaere wato, “Ngona naa hoka o Ibilihi dika ma mau naniiki! Ho ahi poretoko nomahiwalimoka! Angamoi ani demoino gea idadioka hoka o modoi Ngohino abe yoigo ihitaoko la hiadono ihihiruba Ngohi o howonika. Ibootoka notemo hokogea angamoi gea o nyawa dika manga hininga naniiki, ko Ma Jou ai mauua naniiki abe nako hokogea notemo.”
24Gea o Peturusika witemo ibooto de ahao wahitiari iwinii-niikika wato, “Onagona dika abe nginioka niato nihinii-niiki Ngohi, kiani ti ngini ma hirete nia biaha ma mau nianoaka. De ngaro duru inihikangela ma ngoe ma titi nihinii-niiki Ngohi, abe ngaro ka hiadono marai o nyawa utu ato inihohonenge o gota isosalioainoka, ma ufa genangino de inihirehene Ngohino. Abe nako nia biaha ma mau nianoaka de ma kokangela gea niamakeoka de ko inihirehenua Ngohino, gea ahao nihinii-niiki igou-goungu Ngohi.”
25“Ho onagona dika abe ko ihiniikua Ngohi angamoi ato manga wowango yomadatoko la ato ufa yohonenge, ma, ahao ona gea ka yohonengohi. Masara abe onagona dika ihingakuoka de manga wowango yomahidoaka ma titi Ngohi ihiniiki, ona gea tanu manga badanga dika ihonenge, masara manga wowango gea ka iwangohi.”
26“Ho naa tinileha. Done o kia o nyawa manga utumu abe nako o kiahonanga mata-mata o dunia ma amokika yomaleino, masara ka de ma oraha yohonenge de duru yomakitingaka kohagurutika Ma Jouino angamoi yomanoa o Narakaka? De mode naga o kia ho ato ka idadi yomabangu la ato manga wowango amake ka hiado-adonika? Gea duru ko iwa!”
27“Ahao naga ma oraha abe Ngohi o Nyawa ma Ngofaka ahao toboali de ahi medebini ma dararono. De gea ahi medebini ma dararono imaketero hoka ahi Babali ai medebini ma dararono, de ma oraha gea ahi Baba ai momalaekata onangoo mimakutuono ihiniiki. De gea dokena nanga himangika toboali la o nyawa mata-mataika manga wowango ma datoro homoi-homoi tatailako la tahibalaha onangika.”
28“De naa duru tagou-goungu tinihingahu nginika abe ngini utu ko nihonenguahi de gea ngini nihimakeoka de nia lako Ngohi o Nyawa ma Ngofaka abe ma oraha toboa duru de ahi kuahaka la tahikoano o nyawaika.”
Currently Selected:
Matiusu 16: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
