Matiusu 15
15
O Yahudi ma nyawa manga hihira manga dodotoko gea ko imakiniikua de Ma Jou ai Pareta ma hidumutu
Maruku 7:1-23
1De o wange moiuku de naga yoboa o Yerusaleeme ma kotaka de yaino abe o Farisi manga doomuino ma nyawa de nagali abe yotobadotoko o Musa ai Paretaino. Ho ona gea yoboa o Yesusino angamoi naga moi ma titi ona yoigo iwileha Unangika. De ona iwileha o Yesusika ma titi iwinii-niiki manga datoro abe ko imakiniikua de o Yahudioka manga dodotoko. 2De ona iwileha ato, “Adodoa ho ininii-niiki abe ma oraha yolomo de ona ko aniikua nanga pareta abe nanga balu-baluhino inadotokoka? Abe ma oraha ininii-niiki yolomo de ona ko yomaihorikaua manga giama.”
3De o Yesusu wapaluhu waleha onangika wato, “Ngini naa niahigurubungu ma titi ihinii-niiki abe niato ona ko yaniikua nanga balu-baluhu manga dodotoko, masara nanga balu-baluhu gea ka o nyawa biahaino dika. Masara ngini hiadono naa de ka niatilakurohi ma pareta utu abe Ma Jouoka de aino wonahidoaka. Ho ngini naa, adodoa ho ngini niatilakuru Ma Jou ma hirete ai Pareta ngoneino?”
4“Abeika ngini nimafikirohi abe ma pareta naa moi niatotilakuru. Abe ma dodihiraino Ma Jou wonahuloko wato,
‘Ngini kiani de nia horomati nia babaika de nia memeika hiadono niahingounu de niao irahai,’
de wotemoli wato,
‘Onagona dika abe yahikoboto manga babaika eko manga memeika kiani yohonenge, de manga hohowono gea itiai.’ # 15:4
Huhupu 20:12, 21:17; Gogao 20:9; Higalioli 5:16
5Masara ngini naa nihikawalimi ai pareta ma demo gea abe ninadotoko ngoneino niato to Una ai pareta gea ngaro ko hohingounua haniiki ma ko adodoaua. Abe biaha o nyawa yosanangi dika yaduhunu manga dimonika ma titi o kiahonanga eko o tiwi la ka idadi yao irahai manga dimonika. Masara ngini naa ninadotoko niato, ‘Abe nako nia duduhunu gea nia dimonika la niaduhunu de niahidailako manga perelu, gea ka idadi niwihidoakoli Ma Jouika. Ho ngaro ti ngini nia dimono ko yamakeokauali ma duduhunu nginioka de aino, ma gea ko adodoaua.’ Ho gea ngini niato ngaro o nyawa ko yaduhunua manga dimonika masara genangino de ona ko yahowonua de ko yatilakurua Ma Jou ai Paretaika. De hokogea ti ngini nia dodotoko o nyawaika, masara duru genangino de niahigaro o nyawa la niato ngaro ufa dika de manga dimono yao irahai ho duru niatilakuroka to Una ai Pareta gea.”
6“Masara nia dodotoko ma demoino gea de Ma Jou ai Pareta ngoneino ngini nihitipokouku. De gea ngini nidiai la ka idadi ti ngini ma hirete nia dodotoko de nia bohono niagorakiye de nihitihira! 7Masara ngini naa nimadokangeluku dika abe ka niabobeto ihinii-niikika abe ma titi o pareta ko yanii-niikua.”
“De naga ma dihiraino Ma Jou wihiakunu ai uru ma dodofanga o Yesaya la wohitulihuku Ma Jou ai Demo-demo moi abe ai demoino de duru winihitaana nginika. De hokonaa ai demo wato,
8 ‘O nyawa naa ngaro ato ihihimorene Ngohino,
Masara manga himorene ka manga uruoka dika,
De manga hiningaka ihiporetino dika.
9 Parahaja dika manga himorene Ngohino,
Angamoi ka o pareta o nyawaino dika
Abe yodoto-dotoko o nyawa utuikali.’ # 15:9
Yesaya 29:13
De hokogea o Yesaya ai demo ma dodihiraino abe genangino de Ma Jou winihitaana nginika ma oraha naa.”
10De ahao o nyawa ko manga ngoe genangoka o Yesusu wahokinoli Unangino de onangika wotemo wato, “Abeika ngini mata-mata nitotoihene ahi demoino naa la duru nihioriki de niataoko itiai ma titi ahi demoino. 11De naa Ngohi tinihitararono abe o kia tanu ka idadi inahihowono Ma Jouika. Angamoi ahao kangano naga abe yataere ahi nyawaika ihinii-niiki ato yahowono Ma Jouika mangale ma titi manga giama ko yomaihoruahi de ka yolomo, ho bote naga ma peseke iwohama manga badanguku. Masara naa tinihitararono tato ko iwa ma hoanino abe o nyawa manga badanguku iwohamuku de yahihowono Ma Jouika. Masara o demo ma dorou abe manga uruino ihupu, ena gea abe yahihowono Ma Jouika.” De hokogea o Yesusu ai demo onangika.
12De wotemo ibooto de ahao iwinii-niiki yomahitigi Unangika de iwitemo ato, “Mia Baluhu, marai ma titi ani demoino gea de o Farisi ma nyawa ona duru inihininga kuranga Ngonaika.”
13De o Yesusu wopaluhu onangika de o hiketero moi abe ma dumutu o Farisi ma nyawaika, wato, “O nyawa onagona dika abe manga dodotoko imakalawana de to Ma Jou ai Demo, ona gea ahao Una watingakika, de gea duru imaketero hoka o datomo o kia dika naga abe womatengo wotobaredi ko unangua wodatomo, ho ma datomo gea ahao akiwuku. 14Ho ngini ngaro ufa dika de niatoihene o Farisi ma nyawaika. Angamoi ona gea yomahiromanga hoka o nyawa yatobahihira-hira o nyawa utuikali abe yorafi-rafioka la ufa ma ngekomoka de yaino yorehene. Masara o Farisi ma nyawa gea tanu ona ma hirete yorafi-rafioka ma titi Ma Jou ai hininga duru ko ihiorikua. Ho gea nako o nyawa yorafi-rafioka de yahihira-hira o nyawa utuoli abe onangoo yorafi-rafi, gea ona mata-mata ahao yaboriotaka ma guhuku. Ho ngini ngaro ufa de niatoihene to ona manga demoika.”
15De ahao o Peturusu wileha o Yesusika wato, “Abe ani demoino kangano de Ngona nato ko iwa ma hoanino abe o nyawa manga badanguku iwohamuku de yahihowono Ma Jouika. De gea ani demo done ma titi o kia?”
16De o Yesusu wipaluhu unangika wato, “Mode nginioo ko nihiorikua abe ahi demo gea ma titi? 17Marai hokonaa ma hitararono. De o kia dika abe ngone haolomo de ena gea ko itulua nanga hiningaika ma ka igila-gila nanga pokoruku de ahao nanga badangoka ihupuokali. 18Masara nako o demo ma dorou gea mata-mata o hininga ma dorouoka de aino iboa, de ena gea abe inahipeseke de inahihowono Ma Jouika.”
19“Angamoi doka o nyawa manga hiningaka ka ipuda ma dorou irupa-rupa. Abe hoka manga hininga ma dorou, de nagali o doma, de abe yomakitigi de abe ko manga fekatua eko manga rokatua. De nagali o dohiki, de o ngeluku, de o doa-doana o nyawaika. 20De ma dorou ena gea abe ka idadi inihihowono Ma Jouika. Masara abe nako o nyawa ko yomaihorikaua manga giama de yolomo, gea duru ko idadiua inihihowono Ma Jouika.” De hokogea o Yesusu ai dodotoko ona yowoe-woeika.
Naga momatengo ko o Yahudi ma nyawaua de o Yesusu womiduhunu ma titi ami ngongakuino
Maruku 7:24-30
21De ipaha de wosobo o Yesusu de woiki o Tirusu de o Sidono ma tonakika. 22Ka de womahiadonika de naga momatengo moboa o Yesusino la mato momagahoko o duduhunu Unangika. De muna gea o Kananioka ma nyawa ho ko o Yahudi ma nyawaua. De muna moboa Unangino de duru momagaho-gahoko o duduhunu o Yesusika mato, “Ahi Baluhu o Dautu ai Toforauku, ngohi naa duru togahoko la nohidora de nohiduhunu! Angamoi to ngohi ngohi ora imibare-barene o tokata, de ena gea duru imihikokangela munangika.”
23Masara ngaro hokogea muna momagaho-gahoko masara o Yesusu moioo de ko wopaluhua munangika. De gea ahao abe iwinii-niiki ona iwitemo o Yesusika ato koaho womihuloko la moikoka dika. Abe ona ato, “Ou! Muna naa monaruwaeoka ma titi ami gigoro angamoi ka ihikaika mogaho-gahoko Ngonaika. Ho koaho Ngona nomihuloko la monanoaika dika.”
24De ona yotemo ibooto de ahao o Yesusu womitemo munangika wato, “Tomahilooa, ma Ngohi naa ihihidingotino la taduhunu o Isiraele ma nyawaika dika, abe ona hoka o domba o duduono moi abe ko iwa manga gogoana. Ho tanu ko idadiua tiniduhunu ngini abe ko o Yahudi ma nyawaua.”
25Masara muna gea ko mosoboua ho ka ino dika momahitigi o Yesusu ai himangino de matilabukuku genangoka. De gea ka momagahokohi o duduhunu mato, “Ahi Baluhu, duru tomagahoko la Ngona nohiduhunu ngohi!”
26De o Yesusu womipaluhu wato, “Hobata, tomahilooa, ma kiani ma ngofa-ngofaka ona yohira yahiolomo. Ko idadiua o ngofa-ngofaka manga inomo genangino yagoraka de yododutumoika o kahoika gea. Ho gea Ngohi tato kiani o Yahudi ma nyawa tatihira abe taleleani.”
27De muna mataoko ai demoino ma titi abe wahiketero ona ko o Yahudi ma nyawaua hoka o kaho, ho gea momagahokoli mato, “Ahi Baluhu, igoungu, masara ngaro o kaho, ma naga utu o inomo ma hou abe ma dutu ma mejaka de auku itifa-tifauku de gea ena ngomi o kaho ka idadi miaolomo. Ho bote ka idadiohi Ngona nohiduhunu.”
28Ho ka de o Yesusu woihene ami demoino de wotemo wato, “Hobata, to ngona ani ngongaku Ngohino duru ko ietekua. Ho naa tonihidoaka ngonaika abe imaketero hoka ngona nomagahokoka.” Ka de wotemo hokogea de to muna ngomi ora motogumoka angamoi ma tokata gea imatitokoka munangino.
O Yesusu wahitogumu o nyawa manga ngoe-ngoeika gea
29De ipaha o Yesusu wosoboli ho wanoaika ma tonaka gea de wolio o Galilea ma akere ma ngootika. De ma ngootoka gea Una wodoa o lokuiye ho genangoka wogogeruku. 30De genangoka ahao o nyawa duru ko manga ngoe yao-aoino o Yesusino o nyawa yokokangela. Abe utu naga yaoino ona yolugu-lugu ho ko yomagakunua, de utu yorafi-rafi, de nagali abe yotalo-talo, de utuoli yomou-mou, de nagahi utuohi manga badanga ma kokangela. De ona mata-mata yaoino de yakokelengauku o Yesusu ai himangoka, de Una wahikokitogumu ona mata-mataika! 31De o nyawa ko manga ngoe genangoka duru yokokiheranga, angamoi abe ona yomou-mou ona ka idadi yotemo-temo, de abe ona yotalo-talo ka idadioka yotagi irahai, de ona yolugu-lugu ka idadi yomadagi, de abe yorafi-rafi ona gea yomahioriki! Ho ona mata-mata duru iwihigiriiri Ma Jouika abe Una o Isiraele ma nyawa manga Jou.
O nyawa utuoli abe yosana de o Yesusu wahiolomo
Maruku 8:1-10
32De ipaha de o Yesusu wahokino iwinii-niiki Unangino. Ho ona yomatoomuinoka Unangoka de Una wotemo wato, “De naa ahi hininga duru ihuha ma titi o nyawa manga ngoe naa. Angamoi ona naga de de Ngohi abe manga futu hangeinoo de manga inomo duru ko iwaka. De Ngohi ko toigoua tahuloko la yokokilio nako ko hahiolomuahi. Angamoi gea ona ka de manga hafinokahi ho done ahao manga dodagi ma goronakahi de manga hininga ka ihihihanga de ko yomahiadonua manga tau-tauika.”
33De iwinii-niiki yopaluhu ato, “Masara naa done sarakia angamoi ma hoanoka ho done o kiaino hamake ma roti la hato hahikawedono o nyawa mata-mataika naa la yolomo?”
34De o Yesusu woleha onangika wato, “Ga naga nia roti muruonohi?”
De ona yopaluhu ato, “Mia roti naga o gahumu tumidohi, de nagali o nawoko ma hohumuduru muruono ka nagahi dika.”
35De ahao o Yesusu wahuloko o nyawa manga ngoe-ngoeika gea la yokokigogerukuohi. 36De ona yokokigogeruku de ahao Una waleino ma roti tumidi de ma nawoko gea de wohitarimakaseohi Ma Jouiye. Wohitarimakase ibooto de ahao ma roti wakokabelaka de ma nawoko wahikokodoku abe iwinii-niikika la onangoli yahikodoku o nyawa manga ngoe-ngoeika gea.
37De o nyawa ko manga ngoe gea ona mata-mata yokokiolomo ka hiadono yakokipunuhoka. Ho ka de yolomo ibooto de ahao o inomo ma hou yagorakino de o tupa ma ago-agomo naga ma gahumu tumidi aomangiye de manga inomo ma hou. 38De ona yolo-olomo gea abe o baluhu o nau-nauru dika genangoka naga yasana iata, de gea o ngo-ngofeka de o ngofa-ngofaka ona ko yahidetongua. 39Ka de gea ipaha de o Yesusu wahuloko o nyawa manga ngoe-ngoeika gea la yokokilio manga tau-tauika. De ahao o Yesusu de iwinii-niiki yofarene o ngotiroko de yoiki o Magadana ma tonakika.
Currently Selected:
Matiusu 15: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
