Matiusu 14
14
O Yohanese Wotobaohi-ohiki iwitoma
Maruku 6:14-29; Lukasa 9:7-9
1De ma oraha gea de o nyawa ko manga ngoe yomaketeade-ade abe ma titi o Yesusu ai demo de ai heheranga. De hiadono o Yahudi ma nyawa manga koano genangoka, abe to una ai romanga o Herodese Antipasa, unangoo woihenino abe ma titi o Yesusu. 2De ma abari gea woihenino de o Herodese wotemo ai nyawaika abe iwitobaduhunu wato, “Bote Una gea o Yohanese Wotobaohi-ohiki abe titomaka ho ai honengino womomikoka! De gea ma titi hiadono naga ai kuaha la wapoa wodiai o heheranga.” 3-4De o Herodese wotemo hokogea angamoi ma dihira una ma hirete abe wahuloko la o Yohanese iwitaoko de iwipakiti la iwibuika de hiadono iwitoma.
De hokonaa ma ade-ade abe hokokia idadi ma oraha o Yohanese iwitoma. De ma dihira o Herodese womagora to una ma hirete ai riaka ngoi fekata de woilaka munangikali, ho womihidadi to unangoli ngoi fekata. De muna gea ami romanga o ngo Herodiasa. Masara o Herodese ai riaka, abe ai romanga o Filipusu, una gea ka wowangohi. Ho mangale ma titi gea o Yohanese ma muruono naga witaere o Herodesika wato, “Ngona natilakuroka nanga pareta angamoi ngona nomagora ani riaka ngoi fekata abe ngaro una ka wowangohi.” De ipahaino to Herodese ngoi fekata gea mihigaro ami rokatika la o Yohanese iwitaoko, de to muna ami mau gea o Herodese waniiki ho iwitaokino. 5De tanu naga o Herodese ai hininga la o Yohanese witoma dika, masara una wohawana wato done ahao o kokawaaha duru iwingamo unangika. Angamoi ma kokawaaha ona duru ko manga ngoe ato o Yohanese una Ma Jou ai uru ma dodofanga womatengo. Ho o Herodese gea duru womahitiari abe ma titi ai kokawaaha ho o Yohanese ko witomauahi.
6Masara ika-ika naga o Herodese ai rame-rame abe ai ngumuru o taongo gea ka wadaenohi. De genangoka nagaoo o ngo Herodiasa de to muna ngomi ora. De ngomi ora gea moboa de moselo-selo manga hima-himangoka de duru mihisanangi o Herodese. 7De mangale ma titi una duru womisanangi munangika ho womihibehehongo wato, “O kia dika nomagahoko ngohino ma gea ka idadi tonihidoaka ngonaika.” 8De to muna ngomi meme duru momihigaro munangika ho mopaluhu mato, “Ngohi togahoko ma oraha naa dika de kiani tamake abe o Yohanese Wotobaohi-ohiki gea, to una ai pea o dodaioka.”
9De ami demo gea woihene de duru o Herodese ai hininga ihuha, masara angamoi ai behehongo gea wotemokau abe ai dodiawo manga hima-himangoka, ho ko idadiua de womieluku munangika. Ho una wiahoko de wihuloko o tentara womatengoika wato, “Noiki o Yohanesika la to una ai pea nale de naoino ngohino.” 10De o tentara gea wosobo woiki o bui ma tauika ho o Yohanese ai tomarino watobiki. 11Watobiki ibooto de o dodaiuku wonoauku de waoino o ngofekaika gea de womihidoaka. De muna gea ahao momihidoakoli ngomi memeika.
12De ipaha abe o Yohanese ai dodiawo iwinii-niiki ona yoihene abe iwitomaka de ona yoboa ai honenge yale, de ai honenge gea yalungunoka. De yalungunu ibooto de ahao iwiade-ade o Yesusika abe hokokia idadioka. De hokogea ma ade-ade abe ma titi o Yohanese wohonenge.
O Yesusu wahiolomo o nyawa yasana motoa yofoloi
Maruku 6:31-44; Lukasa 9:10-17; Yohanese 6:1-14
13Ka de o Yesusu woihene ma abari abe o Yohanese iwitomaka de Una de iwinii-niiki yomatingaka o nyawa yowoe-woeino ho yofarene o ngotiroko. De ona yomahihora o akere ma ngooto ma honongaika angamoi manga hininga la yoiki o ngi moiika abe genangoka ko iwa o nyawa. Masara o nyawa manga ngoe yoihene ma titi o Yesusu ai dumutu ho ona yahiduru yotowongi. De nagali o nyawa abe o kapongo ma ngoeino yomahidogo onangika ho yomakiniiki yotowongi. De ona yototowongi, ona yohira yomahiadonika, ho o Yesusu de iwinii-niiki ka onangoli yoturu yomahiadono.
14De o Yesusu ona yomahiadonikaka de nagau o nyawa ko manga ngoe genangoka iwidodamaa. De Una ma ngotiroka de wouti de wofarene ma ngigoriye de ai hininga ma dora duru itagi o nyawa yowoe-woeika gea, ho abe yopopanyake ona o Yesusu wahikokitogumu manga popanyakeino.
15De o bobimaowaka de iwinii-niiki yoboa o Yesusino iwitemo ato, “De naa o bobimaowakau de nenangoka ko iwa o tau. Ho abe o nyawa manga ngoe-ngoe gea nahuloko la yoiki o kapo-kapongika abe naga imahitigi-tigino la ka idadi yomaija manga inomo.”
16De o Yesusu wapaluhu onangika wato, “Ona gea ngaro ufa dika de yoiki. Koaho ngini ma hirete dika manga inomo niahidoaka.”
17De ona yotemo ato, “Masara naa done sarakia? Angamoi to ngomi mia inomo o roti ka motoa dika de o nawoko ka o ngai hinooto dika!”
18De o Yesusu wato, “Abeika gea niao Ngohino.” 19De ahao Una wahuloko o nyawa manga ngoeika gea la ona yogogeruku. De ona mata-mata yogogeroka de ahao ma roti motoa de ma nawoko hinooto gea waleino o Yesusu de womamatagaiye o Horogaiye de wohitarimakase Ma Jouiye. Wohitarimakase ibooto de ahao ma roti watobiki de wahidoaka iwinii-niikika, de ma nawoko enangoo wahikodoku iwinii-niiki homoi-homoiika. De ahao onangoli yahikodoku o nyawa mata-mataika. 20De ona mata-mata yolomo ka hiadono yakokipunuhoka.
De yolomo ibooto de ahao o roti ma hou de o nawoko ma hou yagorakino iwinii-niiki gea de yonoa o tupauku. De gea yonoa hiadono o tupa ngimoi de hinooto aomangiye de manga inomo ma hou-hou. 21De o nyawa manga ngoe abe yolo-olomo o roti gea, ona abe o baluhu o nau-nauru dika genangoka, naga yasana motoa. De gea o ngo-ngofeka de o ngofa-ngofaka ko yahidetongua. De hokogea ma ade-ade abe o Yesusu wahiolomo o nyawa ko manga ngoe.
O Yesusu wotagi-tagi o akere ma ngooto ma lokuika
Maruku 6:45-52; Yohanese 6:16-21
22Ka de o Yesusu wahikokiolomo ipaha o nyawa ko manga ngoe gea de Una wahuloko iwinii-niikika la ona yokokifarene ma ngotiroko de yohira yomahihora doka ma akere ma ngooto ma honongaika. Abe Una ai hininga la wahulokohi o nyawa manga ngoe-ngoeika gea la yokokilio manga tau homoi-homoiika, de ona yokokilio ipaha de ahao bootino Una wahiduru yangimoi de yahinooto gea doka ma honongaika. 23De o nyawa ko manga ngoe gea wahulokoka de Una woiki o lokuiye wodoa la wato womaniatohi.
De ahao ifufutuku de o Yesusu Una ka womatengokahi o lokuokahi. 24Masara abe iwitobanii-niiki ona duru kohagurutikaka o akere ma ngooto ma goronaka, de ona duru yokangela yomahioru angamoi duru yomahidomo o rato ma hidaloko. De nagali ma lulu ma ago-agomo ka hiadono ihilopa-lopaka manga ngotirika.
25De ipaha de ahao ngade-ngade de itebini masara ka ifufutuohi de Una woboa onangika, de wotagi-tagi o ngooto ma lokuika. 26De ona iwinii-niiki ka de iwimake wotagi-tagi o ngooto ma lokuika de ona yato bote o tokata, ho duru yopoa-poaka ma titi manga hininga aomangoka de o hawana. Ho ona yopoaka ato, “Ei, abeika ga gena o tokata itagi-tagi!” 27Masara ka de yopoaka de o Yesusu wotemo onangika wato, “Ngohi naa, ho nimatotomoroini dika, ngaro ufa de nihimodongo.”
28De wotemo ibooto de ahao o Peturusu wiahoko Unangika wato, “Ahi Baluhu, nako igoungu abe gea Ngona genangoka notagi-tagi, kiani nomahitaana ma titi ani kuahaino abe nohihiakunu ngohi la ngohioo totagi-tagi o akere ma ngooto ma lokuika abe imaketero hoka Ngonali.”
29De o Yesusu wipaluhu wato, “Ka idadi noboa notagi-tagi Ngohino.”
Ho o Peturusu wouti o ngotiroka de wauku o ngooto ma lokuika de womulaenge wotagi-tagi abe ai dumutu o Yesusika, de una ko wolutua! 30Masara gea de ahao womalega arihononga de wamake ma lulu ma ago-agomo de duru wohawanoka ho hiadono imulaenge wohodoa. De gea ahao wopoaka de womagahoko o duduhunu o Yesusika, wato, “Ahi Baluhu, nohiduhunu ngohi naa la done ihilutu!”
31Ka de o Peturusu wopoaka de o Yesusu ai giama widoaka de wiso o Peturusika done wogila-gila iwilutu. De o Yesusu witemo unangika wato, “Ahi dodiawo, marai ani ngongaku Ngohino ko ilamokuahi, e? Adodoa ho hiadono ani hininga ka hinootohi Ngohino?”
32De ona yahinooto yofarene o ngotiriye, de gea ka de yodoaka de ma hidaloko iriidoka. 33De ona iwinii-niiki o ngotiroka gea yomakokihuba Unangika de ato, “Ngona naa duru igou-goungu Ma Jou ai Ngofaka!”
O Yesusu o nyawa ko manga ngoe wahitogumu manga popanyakeino o Genesarete ma kapongoka
Maruku 6:53-56
34De ipahaino yomahiadonikaka o ngooto ma honongaika de youti o Genesarete ma kapongiha. 35De ona youtioka de o nyawa genangoka yamake abe naga o Yesusu de iwinii-niiki yangimoi de yahinooto yoboaka, ho o nyawa utu yomaketeade-ade ma titi manga boa hiadono ma abari gea imataiti imahikabarihi manga tonaka ma amokika hiadono mata-mata ihiorikoka. De duru ko itedekanuahi de o nyawa mata-mata ona yomulaengoka yaoino o Yesusino manga dodiawo de manga dutu abe yopopanyake la ato Una wahitogumu. 36De ona yopopanyake yaoinoka de duru yogaho-gahoko Unangika la iti ka idadi ai baju ma barenika yaso. De abe onagona dika ai bajuika yaso, ona gea manga popanyake ikokitogumoka.
Currently Selected:
Matiusu 14: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
