Matiusu 13
13
O Yesusu ai hiketero ma ade-ade abe womatengo o bibiti wohibarihi
Maruku 4:1-12; Lukasa 8:4-10
1De ma wangeoka gea abe o Yesusu ngoi meme de ai doo-dodoto iwitutumu de bootino ahao Una ma tauoka de wosobo ho woiki o Galilea ma akere ma ngooto ma ngigoroka. De ma ngigoroka gea wogogeruku la wadotoko o nyawaika. 2De o nyawa duru ko manga ngoe yoboaino Unangino ho hiadono iwihigilolitino. Masara o nyawa gea duru ka yowoeokaholi ho o Yesusu womaturuuruoka abe wofarene o ngotiroko de wogogeruku o ngotiroka gea. Masara o nyawa yowoe-woe abe yomafafoino genangoka, ona ka o dowongioka dika yototoihene. 3De naga ma titi ma ngoe o Yesusu wadotoko o nyawaika abe wapake o hiketero ma ade-adeino.
De naa moi ai ade-ade abe wadotoko ona manga ngoe-ngoeika, wato, “Abeika nitotoihene ahi ade-ade naa. De naga womatengo wotobaredi-redi woiki wohibarihi o bibiti. 4Ho o bibiti ma gogiriaka wohibarihi de utu ipuraraha ka o ngekomuku dika, de o totaleo iboaino ho aolomoka. 5De abe utu ipuraraha ka o hakaruku de ma tonaka ko ipirinukua de ma bibiti gea itaiti iwango. 6Masara ka de yodihiwara o bibiti gea de amaai ho ikokimoraaka angamoi ko imahingutukukua. 7De abe utu ipuraraha ka o hihikauku ho imahidawango ka ma moi de ma hihika. Ho o hihika gea adehoroka enangika hiadono ko ihofokua. 8Masara abe o bibiti utu ipuraraha o tonaka ma rorahaiuku de iwango de hiadono ihofoko, ho utu naga ihofokoka ka hiadono ma hofoko moruange, gea ma titi ma hofoko ka yaowa. De nagali utu abe ihofoko ho hiadono ma hofoko moributaanga, ma titi ma hofoko kohangoe. De utuoli ihofoko ka hiadono ma hofoko o ratuhu moi ho gea ma titi duru kohatohofoko.”
9Ho gea o Yesusu wohiketero ma ade-adeoka ibooto de wotemo onangika wato, “Onagona dika de manga ngaukoka kiani ihigihene ahi demoino.”
10De ahao ona iwitobanii-niiki yomahitigi Unangika de iwileha ato, “Ma titi o kia hiadono ma oraha Ngona nadotoko o nyawaika de ka ihikaika napake o hiketeroino ma ade-ade?”
11De o Yesusu wapaluhu onangika wato, “Ma dihiraino o nyawa ko ihiorikuahi Ma Jou ai dogogono abe ma titi hokokia Una wahikoano ai nyawaika. Masara ma oraha naa Una ai dogogono gea winihimatokoka nginika abe nihinii-niiki la wato ngini ka idadi nihioriki. Masara naga o nyawa utuoli gea abe tanu ko iwa manga hininga Ma Jouika ho Una ko wahidoakua onangika la wato ufa ihioriki. 12De onagona dika abe ma hohutulu yotoihene de ma titi yataoko itiai gea ahao idogo-dogo manga tobahioriki hiadono to ona manga tobahioriki ilamoko. Masara abe onagona dika ko yotoihenua, to ona manga tobahioriki hatoli ko iwa angamoi duru ko ilamokua. De mangale ma titi ona ko yotoihenua ho ngaro to ona manga tobahioriki naga ma hohutulu dika masara ahao enangoo ka yawohanga hiadono duru ko iwaka manga tobahioriki. 13De gea ma titi hiadono o hiketero ma ade-adeino todotoko, la ufa hiadono o nyawa mata-mata ihioriki ma titi abe ahi hiketero ma demoino. Ho ona abe ko iwa manga hininga la yaniiki ahi demoino ufa yataoko ma titi Ma Jou ai dogogono gea abe ngini nitotoihene ka idadi niamake. Angamoi o nyawa yolega-lega ahi datorino, masara tanu ko ihiorikua abe ahi datorino ma titi. De ona gea ngaro yoihene to Ngohi ahi demoino, masara tanu ko ihiorikua ma titi genangino. 14De ma nyawaino gea de ihingodumu to Ma Jou ai demo abe duru ma dodihiraino de o Yesaya wohitulihuku. De ai demoka gea Ma Jou wotemo wato,
‘Ngaro ngini nihigali-gali nihigihene ahi demoino masara ngini ko nihiorikua,
De ngini gea ngaro nihigali-gali niolega ahi datorino masara gea ngini ko nihiorikua ma titi genangino.
15 De hokonaa idadi abe hiadono ngini ko nihiorikua ma titi, angamoi ti ngini nia pea duru itogowinoka, de gea nia ngauku hoka ko idadiokaua iihene, de ngaro nia lako ma ko idadiokaua nimahioriki. De gea mata-mata ma titi abe nimangiriki la niato ufa nimahioriki nia lakoino, de ufa nia ngauku iihene, de ufa ti ngini nia hiningaka niataoko to Ngohi ahi hininga de ahi datoro.
Angamoi nako ihioriki done yotoba de manga howono Ngohi Ma Jou taofi, masara ona gea manga ngiriki la ihioluku Ngohi.’” # 13:15
Yesaya 6:9-10
De hokogea Ma Jou ai demo abe ma dihiraino o Yesaya wohitulihuku.
16De ahao o Yesusu wahingahu iwitobanii-niikika wato, “Masara ngini naa nimakohowono de ona gea, ho ngini ka idadi duru nigarago. Angamoi ngini naa niagou-goungu niamake de nia lako to Ngohi ahi datorino hiadono ngini ka idadi nihioriki ma titi genangino. De ngaro nia ngauku ma enangoo niagou-goungu nitotoihene ahi demoino la nia sosawaro niamake genangino.”
17“De naa tagou-goungu tinihingahu nginika abe ma dodihirainohi de Ma Jou ai uru ma dodofanga de to Una ai nyawa naga utuoli iwitobaleleani ko manga ngoe abe ona ihiorikoka hokokia ahao idadi ma oraha Ngohi naa toboa o duniauku. Ho ona tanu duru yoigo la yamake de manga lako ahi datoro naa abe hoka nginioli naa niamake, masara gea ko adaenua angamoi ma deka-dekanuku de yokokihonengoka. De ona duru yoigo yoihene de manga ngauku to Ngohi ahi demoino abe hoka nginioli niihene ma oraha naa naga, masara ona gea ko adaenua de yokokipahaka. Ho ngini naa koaho duru nigogarago abe ma titi ma datoro de ma demo abe ngini ka niadaenohi nia wowangoka naa.”
O Yesusu ai hiketero ma ade-ade ma hitararono abe womatengo o bibiti wohibarihi
Maruku 4:14-20; Lukasa 8:11-15
18De ahao o Yesusu ka wotemohi iwinii-niikika wato, “De naa tinihitararono nginika ma hiketero ma ade-ade abe kangano tinihingahuoka, la ka idadi nihioriki abe ma titi womatengo gea o bibiti wohibarihi. 19De ma bibiti abe ipuraraha ma ngekomuku gea ma titi Ma Jou ai Demo-demo, abe o nyawa yoihenino o Abari ma Rorahai abe hokokia ahao Ma Jou wahikoano ai nyawaika. Masara o nyawa gea ko ihiorikua ma titi ai demoino gea. De ko itedekanuahi de o Ibilihi ma haeke iboa onangika de idiai manga hiningaka la yawohanga Ma Jou ai Demo-demo abe yoihenoka. Ho gea imaketero hoka ena yagorakino ma bibiti gea de ihiloaroka ma nyawaka de aino.”
20“De abe utu yoihene Ma Jou ai Demo-demo imaketero hoka o bibiti gea ipuraraha o hakaruku. Ho ona gea abe yoihene Ma Jou ai Demo-demoino de yodafongo de manga garagoka. 21Masara nako o huha yamake eko naga yahikangela mangale ma titi Ma Jou ai Demo-demo ona yaniiki, de gea itaitino hiadono ko yaniikokaua. De ona gea itaiti yomahirehene angamoi ko yomahigunoaua la Ma Jou ai Demo-demo gea imahingutuku manga hiningauku.”
22“De abe naga utuohi yoihene Ma Jou ai Demo-demo ona gea imaketero hoka o bibiti abe ipuraraha o hihikauku. Abe ngaro yoihenoka masara manga hininga itagi ka o dunia ma kiahonangika dika la ato yowango yososanangi dika. Ho gea yahibudi de o kiahonanga la ato iti yokaya, de gea ka hiadono Ma Jou ai Demo-demo adehoroka de manga horoodo. Ho to ona manga wowango imaketero hoka o datomo abe ko ihofo-hofokua.”
23“Masara abe ma bibiti ipuraraha o tonaka ma rorahaiuku, gea imaketero hoka o nyawa abe yodafongo Ma Jou ai Demo-demo yagou-goungu. Ho to ona manga wowango imaketero hoka yadatomoka o tonaka ma rorahaiuku ho naga de ma hasiloka. Ho ona utu manga hasili ka yaowa ihofoko, de naga utu manga hasili iwoe, de ona utuoli duru ifoloiholi manga hasili abe hoka o datomo kohatohofoko.” De hokogea o Yesusu ai hiketero ma ade-ade ma hitararono onangika.
O Yesusu ai hiketero ma ade-ade abe ma titi o pine de o ruruubu
24De ahao o hiketero moioli o Yesusu wahidoaka o nyawaika, wato, “Ahi ade-ade ma demoino naa de tinihingahu nginika abe hokokia idadi ma oraha Ma Jou wahikoano ai nyawaika. De naga womatengo wotobaredi de o pine ma bibiti ma rahai wohibarihi ai redioka. 25De wohibarihi ipahaino de ma futuku gea o nyawa mata-mata yakiookoka. Masara naga womatengoli abe wotobaredi gea ai musu, de una womatohiki woboaino de unangoli wodatomo o ruruubu abe o pine ma redioka gea ho imakasapurino de ma pine ma bibiti ma rahai.”
26“De ipahaino hiadono ma pine iwangoiyeoka de hiadono imulaenge ihofoko de ahao wotobaredi ai nyawa yamake abe nagaoo o ruruubu ma ngoe ma pineoka gea. 27De to una ai duduhunu yoboaino de iwihingahu ato, ‘Mia baluhu, doka ma pine ma redioka de ngomi mihioriki abe ngona nohiaturu la ka o pine ma bibiti ma rahai dika idatomo genanguku. Ho naa done sarakia? Angamoi kangano miamake abe nagaoo ma ruruubu kohangoe iwangoiyeoka!’”
28“De una wotobaredi wato, ‘Bote naga womatengo to ngohi ahi musu abe nengokaino yodiaioka!’”
“De ai duduhunu iwileha unangika ato, ‘Ho sarakia, marai koaho ma ruruubu gea ngomi miatumule?’”
29“De una wopaluhu wato, ‘Koua, ko idadiua ma ruruubu hatumule done ma pine ka ma moi hohidotumule ho parahaja dika ma pine ma rahai gea. 30Koaho hanoaikahi dika la ma pine de ma ruruubu imahidawangoiyeohi dika ka hiadono adonoka o gugutuku ma oraha. De ma gugutuku ma oraha adonoka de ngohi tahuloko ona youtu-utukika la youtuku ma gogiriaka de kiani yairiki la ihikatingaka ma ruruubu de ma pine. La gea ma ruruubu yapaki-pakiti de ma papakiti gea yatufuku hiadono itinoka. De nako ma pine enangoo yatoomuino masara gea de ahao ihingohama ahi rawongo ma tau ma goronaika.’ De hokogea ahi hiketero abe ma titi hokokia Ma Jou wahikoano ai nyawaika.”
O Yesusu ai hiketero ma ade-ade abe ma titi o gauku moi
Maruku 4:30-32; Lukasa 13:18-19
31De o Yesusu woade-ade ibooto ma hiketero gea abe ma titi o pine de ma ruruubu de ahao wodogoli o hiketero ma ade-ade moioli onangika. De ma hiketero naa ma demoino de Una wahitararono o nyawaika ma titi abe Ma Jou ai nyawa yodadi yowoe abe ma oraha wahikoano ai nyawaika. Ho gea o Yesusu wato, “Ho naa tohiketero moioli abe ma titi hokokia Ma Jou wahikoano ai nyawa. De naga womatengo woiki ai redika de wodatomo o gauku ma bibiti moi ma romanga o sawi. 32De nako o sawi ma bibiti gea nihioriki abe ena gea duru ieteteke nako hohidotelega de o bibiti utu. Masara nako hiadono iwangoiyeoka de ka enangohi ikurutiye nako de o gauku utu mata-mata o redioka. Abe gea ma sawi idadi duru ilamokiye hiadono ngade-ngade hoka o gotali ma gurutiye, ho o totaleo iboaino de ka idadi yodangi ma jaga-jagaika angamoi ma ago-agomo. De hokogenangoo idadi abe ma oraha Ma Jou wahikoano ai nyawaika.” De gea ma hiketero ma titi abe ma dodihiraka de Ma Jou ai nyawa duru ko yowoe-woeua, masara ika-ika de ahao duru yodogo-dogo yowoe hiadono ma bahauku de duru ko manga ngoe iwingaku-ngaku Unangika.
O Yesusu ai hiketero ma ade-ade moioli abe ma titi o ragi
Lukasa 13:20-21
33De ahao o Yesusu woade-ade o hiketero moioli onangika abe enangoo ma titi hokokia Ma Jou ai nyawa yodadi yowoe abe ma oraha wahikoano ai nyawaika. De gea o Yesusu wotemo wato, “De naa o hiketero moioli tinihingahu abe ma titi hokokia Ma Jou wahikoano ai nyawa. De naga momatengo o ngofeka abe momadiai o roti. De muna maleino o ragi ma hohutulu dika de gea mohikasapuru de mohidoojo de o tarigu kohaamoko abe ngade-ngade o litere moruata ma amoko. De ngaro o tarigu gea kohaamoko de ma ragi duru ma hohutulu dika mohidogo, masara gea ahao ma tarigu mata-mataika ifero ma titi ma bobero ma kuaha ma ragioka gea. De hokogenangoo idadi abe ma oraha Ma Jou wahikoano ai nyawa.” Ho o Yesusu ai hiketero enangoo ma titi ka imakadaene dika de abe kangano. Abe ma titi ma dodihiraka de Ma Jou ai nyawa duru ko yowoe-woeua, masara ika-ika de ahao duru yodogo-dogoli yowoe hiadono ma bahauku de duru ko manga ngoe iwingaku-ngaku Unangika.
Abe ma titi o Yesusu ka ihikaika wapake o hiketero ma ade-adeino
Maruku 4:33-34
34De hokogea o Yesusu ka ihikaika wadotoko o nyawa yowoe-woeika de o hiketero ma ade-ade dika. Angamoi ko iwa ma oraha abe Una ko wapakeua de o hiketeroino, masara ka o hiketero dika wohidemo-demo onangika. 35De abe o Yesusu ka ihikaika wadotoko de o hiketero ma ade-ade, genangino de duru imakiniiki de ihingodumu moi Ma Jou ai Demo-demoino abe duru ma dodihiraino de atulihukuoka. De ai demoka gea de itemo ato,
“De Ngohi ahao totemo-temo nginika de o hiketero ma ade-adeino.
De genangino Ngohi ahao tinihitararono nginika o dogogono ma titi, abe ma dogogono gea ngaro ma dodihirainohi abe ahao Ma Jou watulaada o dunia naa de ka hiadono ma oraha naa ma o nyawa duru ko ihiorikuahi ma titi genangino. Ho ma dogogono ma titi ahao tinihitararono ahi hiketero ma ade-adeino.” #13:35 Higiriiri 78:2
De hokogea Ma Jou ai demo ma dodihiraino abe ma demo gea ma hidumutu duru o Yesusu ai dodotokika.
O Yesusu wahitararono ma titi ma pine de ma ruruubu ma hiketero
36De ipahaino de o Yesusu wadotoko ibooto o nyawa ko manga ngoeika gea ho Una de abe iwitobanii-niiki ona yokokiwohama ma tau ma goronaika. De genangika yowohamoka de ona iwinii-niiki yomagahoko o Yesusika ato, “Mia Baluhu, marai ngomi migahoko la Ngona nomihitararono ngomino ma hiketero kangano ma titi. Abe ma hiketero ma goronaka de notemo nato womatengo ai redioka de naga o ruruubu duru kohangoe. Gea ena done ma titi o kia?”
37De o Yesusu wopaluhu wato, “Ka idadi tinihitararono nginika. Ho hokonaa ma titi. Abe womatengo wotobaredi de wohibarihi ma pine ma bibiti ma rahai, una gea tanu tomahiketero Ngohi naa o Nyawa ma Ngofaka abe toboa o Horogaka de tauku. 38De nako ma redi gea tohiketero hoka o dunia ma amokika, de abe ma pine ma bibiti ma rahai gea Ma Jou ai nyawa abe wahikoano onangika. De nako ma ruruubu gea tohiketero de o nyawa abe yatobanii-niiki o Ibilihi ma haekika abe duru itobatorou. 39De abe ahi musu yotobadato-datomo ma ruruubu ahi pineoka gea o Ibilihi ma haeke. De nako ma gugutuku ma oraha, gea tohiketero de ma oraha dokengika abe o dunia naa ihibobaha. De abe ona youtu-utuku, gea Ma Jou ai momalaekata.”
40De o Yesusu wohigila-gila ai hitararono wato, “Ho imaketero abe hoka o gugutuku ma oraha adonoka de ahao ma ruruubu ihikatingaka ma pineino la yatufuku ka hiadono itinoka, hokogenangoo ahao idadi abe ma oraha o dunia ma bobaha adonoka. 41De ma oraha gea de Ngohi naa o Nyawa ma Ngofaka abe toboa o Horogaka de tauku, gea Ngohi ahao ahi momalaekata tahidingoto o dunia ma amokika. De gea ahao tahitagongo ahi momalaekata la yahikatingaka ahi nyawaka de aino onagona dika abe yahiruba o nyawa utu o howonika de onagona dika abe yotobadiai o dorou manga wowangoka. La gea ibootohi ona yomahisapuru de to Ngohi ahi nyawa abe tahikoano.”
42“De ona gea ahi momalaekata yahikatingakoka de ahao o dorou ma nyawa gea yaumo manga hohowono ma ngiika abe o uku kohaamoko ma goronaika. De mangale ma titi to ona manga hohowono kohadubuho genangoka hiadono ona ahao yopoa-poaka ma amokiye de manga ingiri ka ihikaika ihidokagoli ma titi ko yapoaua manga odiri.”
43“Masara nako o nyawa abe manga wowango yototiaioka Ma Jou ai himangoka, to ona manga baha duru imakohowono. Abe ona ahao ma oraha gea abe Ma Jou wahikoano onangika de naga to ona manga medebini ma dararono duru kohadararono abe ihitararono onangoka de aino. De to ona manga dararono gea imaketero hoka o wangeoli abe daku ma dihangino inahitararono o duniauku naa. De hokogea ahi hiketero ma demo ma hitararono nginika. Ho nginioka onagona dika abe de nia ngaukoka, kiani nitoihene la ma titi niataoko itiai!”
O hiketero abe ma titi o kiahonanga ihali-hali agogonoka
44De o Yesusu o hiketero moioli woade-ade ona iwitobanii-niikika wato, “De naa o hiketero moioli tinihingahu abe ma titi hokokia Ma Jou wahikoano ai nyawa. De hokonaa ma hiketero. De naga ma dihiraino abe o nyawa yagogono o kiahonanga duru ma hali-hali abe manga redioka dau ma tonaka ma goronaka. De ipahaino ma nyawa gea yohonenge ho ko moiokaua ihioriki ma gogogono ma ngi gea. De ahao ipahaino o wange moiuku de o nauru womatengoli wokarajaanga ma redioka gea de wamake ma kiahonanga ma hali-hali gea ma tonakoka. Ho una gea duru wogaragoholi ho ka wopohukukuoli ma hali-hali gea de una womataiti woiki la to una ma hirete ai kiahonanga mata-mata wakokifukunoka. De ma tiwi abe wamake ai kiahonangino, gea wapake la womaijaino ma redi ma tonaka gea la ka idadi womahitouna abe ma kiahonanga duru ihali-hali gea. De hokogea tohiketero abe Ma Jou ai hiowa duru kohaamoko gea abe ai nyawa yamake ma oraha Una wahikoano onangika, ho tato ai hiowa gea hoka o kiahonanga duru ma hali-hali hiadono ngaro mata-mataika masara ka enangohi de ma ijaka.”
O hiketero abe ma titi o biagaro ma hakaru ma hohailoa
45De o Yesusu wogila-gilahi wotemo iwinii-niikika wato, “De naa o hiketero moioli tinihingahu abe ma titi hokokia Ma Jou wahikoano ai nyawa. De hokonaa ma hiketero. De naga womatengo wotobalingiri o biagaro ma hakaru ma hohailoa o nyawa-nyawaika la gea ka idadi wofuku-fukunu de womatiwi-tiwi genangino. 46De o wange moiuku wamake moi o biagaro ma hakaru abe duru ihohailoa de duru de ma ijaka, ho una woiki de to una ai kiahonanga wakokifukunoka. De ma tiwi abe womamake ai kiahonangino, gea wapake la womaijaino ma biagaro ma hakaru gea angamoi duru wodosanangi enangika. De hokogenangoo o nyawa manga hininga nako Ma Jou wadafongo ma oraha wahikoano o nyawaika. Abe koaho o nyawa yaetongo gea duru de ma ijaka imaketero hoka o biagaro ma hakaru ma hali-hali gea.”
O hiketero abe ma titi o homa moi aomangoka de o nawoko
47De o Yesusu ka wotemohi iwinii-niikika wato, “De naa o hiketero moioli tinihingahu abe ma titi hokokia Ma Jou wahikoano ai nyawa. De hokonaa ma hiketero. De naga o nyawa yotobahoma-homa abe manga homa yodotumo o akeruku. De manga homaka gea naga o nawoko irupa-rupa kohangoe ihidotadaene hiadono aomangoka de o nawoko. 48De gea aomangoka ho ona yotobahoma-homa ona yatauriha manga homa gea dina ma dudungiha. De genangoka yogogeruku ho yairiki ma nawoko gea la abe duru ma rorahai haolomo gea yonoa ma ngiuku, masara abe ko irahaiua haolomo ma nawoko gea ka yaumoka dika.”
49“De hokogenangoo ahao idadi nako o dunia ma bobaha adonoka. Angamoi ma oraha gea de ahao o momalaekata yoboaino de yairiki o nyawa la o nyawa ma dorou yahikatingaka Ma Jou ai nyawaka de aino. 50De o dorou ma nyawa gea ka yaumoka dika o uku ma goronaika. Abe genangoka to ona manga hohowono duru kohadubuho ho hiadono ona ahao yopoa-poaka ma amokiye de manga ingiri ka ihikaika ihidokagoli angamoi ma titi ko yapoaua manga odiri.” De hokogea ahi hiketero ma demo.
O hiketero abe inahigaro la homadotoko hiadono nanga tobahioriki ingodumu
51De o Yesusu ma hiketero gea wahitararono ibooto de ahao wotemoli iwinii-niikika wato, “Naa moi tinileha nginika. Sarakia, ka idadi ngini niataoko ma titi ahi hiketero ma ade-adeino kangano?”
De abe o Yesusu iwitobanii-niiki ona iwipaluhu Unangika ato, “Iya, ngomi ka idadi miataoko ma titi to Ngona ani demoino.”
52De o Yesusu wotemoli onangika wato, “Gea irahai ngini ka idadi niataoko ahi dodotoko ma demoino. Angamoi nengokadauino de ngini nimadotokoka o Musa ai Paretaino, de naa ma duruinoli ngini nimadotokoo to Ngohi ahi dodotokino abe ma titi hokokia ahao idadi ma oraha Ma Jou wahikoano ai nyawaika. De o nyawa onagona dika abe yomadotokoka de yataoko itiai o Musa ai Paretaino de to Ngohioo ahi dodotoko ma hungino naa, onangoka gea naga manga tobahioriki abe ihira-hiraino de nagali manga tobahioriki abe hatoli naa ma duruino, ho ma tobahioriki gea duru ingodumoka onangoka.”
“De ona abe manga tobahioriki ingodumu hokogea, ka idadi tahiketero abe ona hoka womatengo o tau ma dutu abe naga ai kiahonanga ma rahai abe ma deka-dekanuku de nagali ai kiahonanga ma rorahai abe ka ma hungiohi, ho gea ai kiahonanga ingodumoka de o kia dika woperelu wapake, gea naga unangoka ho ko ikurangokaua. De hokogenangoo ngini naa ka idadi niapake nia tobahiorikino ma dodotoko abe ma deka-dekanoka o Musa ai Paretaino, de ka idadioo to Ngohi ahi dodotoko abe ka ma hungiohi niapake, angamoi gea mata-mata ingodumu ti ngini nia hiningaka.”
O Nasarete ma nyawa iwioluku o Yesusika
Maruku 6:1-6; Lukasa 4:16-30
53De o Yesusu wadotoko ibooto ai hiketero ma ade-adeino de ahao genangoka de wosobo, 54de wolio to Una ma hirete ai kapongo o Nasarete ma kapongika. De o Nasaretoka Una wadotoko Ma Jou ai Demo-demoino to ona manga dodotoko ma tauoka. De ona mata-mata o dodotoko ma tauoka de duru yokokiheranga ma titi ai dodotoko ma demoino. De ona gea yomakokeleha ato, “Adoo! Naa Una done o kiaino wamake ai kuaha de ai sosawaro? Angamoi nako ai dodotoko ma demoino hotoihene de ka idadi hamake abe Una duru wososawaro ai demoino! De hongoli Unangoka naga ai kuaha la o heheranga wodiai! Ho ai kuaha gea done o kiaino iboa?”
55“De ngone hohioriki Una o nyawa biaha dika, angamoi to Una ai baba ka o bas dika. De ngaro to Una ngoi meme de ai doo-dodoto ma ngone hahioriki ona mata-mata. Abe ngoi meme gea o ngo Maria, de ai doo-dodoto to ona manga roma-romanga o Yakobusu de o Yusupu de o Simono de o Yudasa. 56De to Una ngoi fira-firanga onangoo hahioriki angamoi ona mata-mata yogogere o Nasaretoka naa. Ho Una gea done sarakia wamake ai kuaha abe hokogea ma amoko?” Hokogea o Nasarete ma nyawa manga demo abe ma titi o Yesusika. 57De ona iwihininga kuranga Unangika de hiadono iwioluku.
De o Yesusu wotemo onangika wato, “Ti ngini nia hininga Ngohino ko toherangua. Angamoi ngaro Ma Jou ai uru ma dodofanga utuoli, masara o nyawa o kia-kiaka dika naga manga horomati onangika. Masara nako to ona manga nyawa abe yomahikapongo moi de de una, gea ona ko iwa manga horomati onangika. De ngaro manga dutuoo eko manga tauoka, ma onangoo ko iwa manga horomati Ma Jou ai uru ma dodofangika gea. Ho Ngohi duru ko toherangua abe ngini ahi kapongoka naa de ko iwa nia horomati Ngohino.” Hokogea o Yesusu ai dodaere ma demo onangika. 58Ho o Yesusu ai kapongoka gea de hatoli ko iwa manga ngongaku Unangika, ho ko wodiaiua o heheranga genangoka, bowahu naga o nyawa yamuruono naga dika abe o heheranga wodiai la waduhunu onangika.
Currently Selected:
Matiusu 13: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
