Matiusu 12
12
O Hiaini ma wangeoka de iwinii-niiki youtuku o redi ma hasilino
Maruku 2:23-28; Lukasa 6:1-5
1De ma moiuku o Hiaini ma wangeoka de naga o Yesusu de abe iwitobanii-niiki yotagi-tagi de o nyawa manga pine ma redika yoboa. De ona iwinii-niiki yahafini ho yotagi-tagi manga gogiriaka de ona homoi-homoi yomakokigutuku ma pine ma gosela de yaolomo. 2Masara o Farisi manga doomuino ma nyawa yamuruono naga ona yamake abe ma oraha ona yomagutuku de duru iwitaere o Yesusika abe ma titi iwinii-niiki manga datoro gea. De o Farisi ma nyawa manga dodaere ma demo ato, “Abeika to Ngona ani nyawa abe ininii-niiki gea ona yatilakuroka to ngone nanga Pareta ma titi o Hiaini ma wange ma hiaturu. Abe ko idadiua yokarajaanga hokogea angamoi gea yomaino-inomo o Hiaini ma wangeoka!”
3Masara o Yesusu wapaluhu onangika wato, “Ho mode ngini ko nibasauahi o Dautu ai ade-ade Ma Jou ai Bukuoka? Abe ma oraha gea o Dautu de ai dodiawo duru yahafini. 4Ho ipaha de Ma Jou ai Tau o Ngoerino ma goronaika wowohamika de wolomo o roti abe Ma Jouika iwidingakoka. Abe tanu ona manga hidemo ma nyawa Ma Jouiye ona dika ka idadi yaolomo ma roti gea, de o nyawa utu duru ko idadiua yaolomo. Masara o Dautu una waolomo de wahikodokuoo ai dodiawoika la onangoo yaolomo. De gea utu yotemo ato una watilakuru ma Paretaika, masara tanu una ko wahowonua Ma Jou ai himangoka, ngaro ma roti gea iwidingakoka Ma Jouika. Ho mode ngini gea ko nibasauahi ma ade-ade gea?”
5“De naa ma ade-ade moioli tinihihohininga la taademo ahi nyawa abe ihinii-niiki. Ho mode ngini ko nibasauahi o Musa ai Pareta ma demoino abe hokokia nanga hidemo Ma Jouiye yotobadiai? Angamoi ona gea manga biaha yokarajaanga o Hiaini ma wangeoka! Abe ona gea manga tagongo ngaro o Hiaini ma wangeoka masara gea kiani yodiai manga karajaanga abe Ma Jou ai Tauoka. De ngaro hokogea yokarajaanga o Hiaini ma wangeoka masara ona ko yahowonua Ma Jouika.”
6-8“De naa Ngohi tinihingahu nginika abe naga ma hiaturu ma hungi Ma Jouoka de aino iboa. De abe nako Ma Jou ai Tau ma hiaturu de ma hiaturu ma hungi naa, masara ka ma hiaturu ma hungiohi naa abe duru ikurutiye Ma Jou ai himangoka. De Ngohi naa abe tohiboa ma hiaturu ma hungi abe Unangoka de aino. De nagali ma titi abe Ngohi naa o Nyawa ma Ngofaka, ho Ngohioo o Hiaini ma wange ma hibaluhu. Ho Ngohi dika naga de ahi kuahaka la tomaputuhu abe ma hiaturu o kia itiai haniiki o Hiaini ma wangeoka. Ho koaho ufa ngini niataere ahi nyawaika ma titi manga datoro abe yodiaioka o Hiaini ma wangeoka.”
“De mangale ma titi ngini niataeroka ahi nyawa, nia demoino gea de tanu ngini ma hirete niatilakuroka moi Ma Jou ai Demo-demoino. Abe ma dodihiraino Ma Jou wotemo wato,
‘Abe nako o nyawa yomahihuba de o huhuba Ngohino, gea manga huhuba ihihisanangi Ngohi. De abe o nyawa yapake o hininga ma dora manga date-datekika, enangoo ma ihihisanangi Ngohi. Masara nako ma titi hinooto gea hohidotelega de abe utuohi ikurutiye to Ngohi ahi himangoka, gea abe o nyawa yatobapake manga hininga ma dora manga date-datekika.’” #12:6-8 Hosea 6:6
“Hokogea ihitulihukuoka Ma Jou ai Demo-demo ka ma dodihirainohi. Masara ngini naa ko niataokuahi ma titi ai demoino gea, de ko niapakeua nia hininga ma dora. Angamoi nako ngini niapake nia hininga ma dora, gea kangano de tanu ko niataerua ahi nyawaika. Abe ngini niato ona gea yatilakuroka nanga Pareta, masara tanu ona ko yahowonua manga datorino gea.”
Womatengo ai giama iheluku o Yesusu wihitogumu o Hiaini ma wangeoka
Maruku 3:1-6; Lukasa 6:6-11
9De o Yesusu de o Farisi manga doomuino ma nyawa yomakoketemo ibootino de ahao o Yesusu woiki wowohama o dodotoko ma tau moi ma goronaika. 10De genangoka womatengo wimakeika abe naga ai giama ma hononga iheluku. De nagali o Farisi ma nyawa yamuruono naga genangoka de ona iwibole ma goa-goa o Yesusika ato, “Nako nanga Pareta haniiki, sarakia, o Hiaini ma wangeoka de itiai hahitogumu o nyawaika eko ko itiaiua?” Ho hokogea iwileha angamoi ona yoigo la naga moi ai demoino abe ka idadi ihititi genangino la ka idadi iwitaere ato Una wahowonoka ma titi ma Paretaino.
11De o Yesusu wapaluhu onangika wato, “Nako nginioka naga nia domba o dutu moi de o Hiaini ma wangeoka iotaka o haara ma goronauku, ngini sarakia nidiai? Gea ngini bote ko nianoaikaua nia domba, masara gea nimasikaa de nioduhunu la niagorakiye, eko sarakia? 12De nako o domba moi de o nyawa womatengo masara duru ka o nyawahi yokurutiye Ma Jou ai himangoka. De genangino ma titi hiadono Ngohi tato ka idadi o datoro ma rorahai hodiai ngaro o Hiaini ma wangeoka.”
13De wapaluhu ibooto de ahao witemo ai giama ihelu-helukika wato, “Abeika nagorakiye ani giama.” De ai giama wagorakiye de itogumoka ho idadi imakadaene abe hoka ai giama ma honongali. 14De o Farisi ma nyawa ka de gea yamake de yosoboka de yahoko manga dodiawo la yomatoomuino de yomakoketemo ma titi o Yesusu. Abe gea yomakokeleha hokokia ma ngekomo irahai la ka idadi o Yesusu iwitoma.
Abe ma titi o Yesusu wileleani Ma Jouika de ai hininga ma dodipokouku
15De o Yesusu wahiorikoka o Farisi ma nyawa gea manga hininga de manga hidee ma dorou abe Unangika, ho Una wosobo wanoaika ma kapongo gea. De o nyawa manga ngoe iwiniiki Una. De abe onagona dika onangino yopopanyake, ona gea o Yesusu wahikokitogumu. 16Masara abe ma oraha wahitogumu de wahibehehongo onangika wato, “Ko idadiua ngini niade-ade o nyawa utuikali ma titi Ngohi.” 17De to Una ai demoino gea de womahitaana abe to Una ai hininga ma dodipokouku. De ai hininga ma dodipokoukuino gea de duru wohingodumu Ma Jou ai demo moi abe ma dodihiraino de o Yesaya wohitulihukuoka Ma Jou ai Demo-demoino. Ho hokonaa Ma Jou ai demo abe ma titi o Yesusu ai hininga ma dodipokouku, wato,
18 “Abeika naa Una ahi Huhuloko abe Ngohi tiirikoka. Abe Ngohi duru tidora de tidosanangi Unangika gea.
De Ngohi ahao tihidoaka Unangika ahi Womaha la Una duru de ai kuahaka, de Una ahao wahingahu-ngahu o dutu mata-mataika ma titi abe ma ngekomo hokokia la ka idadi ona yamake to Ngohi ahi totiai onangika.
19 De to Una ai demoino de ko yomaketeribuutua Una de o nyawa, de ko wabobanaratua onangika. De nako o nyawa manga ngoe manga hima-himangoka de Una ko womahagaagaua, angamoi ko hokogenangua to Una ai hininga.
20 De ngaro womatengo abe ai ngongaku ko iputurunguahi masara ahi Huhuloko gea wibole-bole dika unangika ho ko waruwaeua ai ngongaku.
De ngaro womatengo ai nganganono Ngohino ka ietekohi imaketero hoka o uku ma dokara ma eteteke, masara ahi Huhuloko ko wahonengua abe una gea ai nganganono, masara ka wihigaro dika unangika la ai nganganono ka ifero.
De ahi Huhuloko Una gea ka ihikaika wao irahai o nyawaika abe de ai hininga ma dodipokoukuino. De ona gea ahao yamake to Ngohi ahi totiai ma titi abe ahi Huhuloko ai hininga ma bole-boleino gea.
21 De ahao ma oraha gea ahao o nyawa o dutu mata-mataino o dunia ma amokika de ona yomahikokinganono to Una dika ai romangika.” #12:21 Yesaya 42:1-4
De hokogea to Ma Jou ai demo ma dodihiraino abe ma titi ai Huhuloko o Yesusu ai hininga ma dodipokouku.
Ka o Yesusohi ai kuaha ilamoko nako de o Ibilihi ma haeke ma kuaha
Maruku 3:20-30; Lukasa 11:14-23, 12:10
22De ahao naga womatengo iwiao o Yesusino abe iwibare-barene o tokata ho ko womahiorikokaua de ka hiadono womouoka. De o Yesusu wohititoko ma tokata unangino ho wihitogumu una la ka idadioli womahioriki de wotemo-temo abe hoka ma dihirali. 23De o nyawa ko manga ngoe genangoka duru yokokiheranga ho yomakokeleha ato, “Ho sarakia, bote o Yesusu naa Una nanga Duduhunu abe ma dodihiraino de Ma Jou wonahibehehongoka ngoneino, de abe o Dautu ai totoforaukuino woboa?” Hokogea abe ipuda manga hiningaka ho hidutu yomakokeleha.
24Masara ka de o Farisi ma nyawa yoihene abe ma titi ma heheranga o Yesusu wodiaioka de ona yomakoketemo ato, “Ngaro ufa hoheranga abe Una ka idadi wakunu o tokata wohititoko o nyawaino, angamoi to Una ai kuaha womamake o tokata ma hidimonoka dika de aino.”#12:24 O Ibilihi ma haeke ma romanga moi gea o Beelsebulu. De hokogea iwitae o Yesusika o Farisi ma nyawa.
25De o Yesusu wahioriki to ona manga hininga ho Una wapaluhu onangika wato, “Ngini duru niahowonoka nia demoino gea, angamoi to Ngohi ahi kuaha ko o Ibilihi ma haekinoua iboa. De naa tohiketero moi la genangino de ka idadi tinihitararono nginika. Abe nako o koano womatengo de to una ai kokawaaha yomaketeparangi yomahikokoona, de ahao o nyawa gea yomahiketehibinaahaka. Eko o kota moioka eko ngaro o tau moioka de yomaketeliliara hiadono yomakumusu, gea ona ahao yomahiketehipusakoka. 26De hokogenangoo idadi nako o Ibilihi ma haeke ma kokawaaha de yahititoko to ena ma dodiawo o nyawaino. Abe gea imaketero hoka imakumusu, ho ma bahauku imahiketehipusakoka ho to ena ma kuaha duru ko iwaka. Ho genangino de itararono abe to Ngohi naa ahi kuaha ko genanginoua iboa. Angamoi nako hoka ahi kuaha o Ibilihi ma haekino, ho done sarakia tohititoko to ena ma kawaaha o nyawaino? Abe gea imaketero hoka o Ibilihioli ma kokawaaha imakumusu!”
27“De naa moioli kiani nimaleha. Abe ahao kangano ipahaika ngini nihitae Ngohino niato ihibare-barene mangale o tokata tohititoko o nyawaino. Ho mode niawohangoka abe ti ngini ma hirete nia nyawa ininii-niiki de onangoo ka idadi yakunu ihititoko o tokata o nyawaino? Ho mode gea ma titi ti ngini nia nyawa yamake manga kuaha o Ibilihi ma haekino? Ho done sarakia nia demoino ma titi gea? Genangoka de duru niahowono. Ho ti ngini nia nyawa manga datoroka gea dika de inihitaana nginika abe nia demoino de niahowonoka. 28Masara nako to Ngohi ahi kuaha, gea iboa Ma Jou o Womahoka dika de aino. Ho Ngohi tato mangale ma titi Ngohi o tokata tohititoko de Ma Jou o Womaha ai kuahaino, gea duru itaanoka abe ma oraha adonoka la Ma Jou wahikoano ai nyawaika.”
29De ahao o Yesusu wodiai o hiketero moioli abe ma titi o Ibilihi ma haeke. De Una wato, “Nako o tau ma dutu womatengo ko ai buturungu, o nyawa moioo de ko yamoroinua ai tau ma goronaika iwingohama de ai kiahonanga iwiora. Ma nako ma tau ma dutu iwipaki-pakitokahi, gea ahao ka idadi ai kiahonanga iwiora. De hokogenangoo o Ibilihi ma haeke, abe igoungu ena duru iputurungu, masara ka Ngohiohi toputurungu de ena, ho imaketero hoka ena tapakitoka la to ena ma kokawaaha ka idadi tohititoko o nyawaino.” Hokogea o Yesusu ai hiketero ma demo.
30De o Yesusu wogila-gilali wahitararono onangika de wahitiari done ka ihikaika iwilawa-lawana Unangika. Ho Una wato, “De o nyawa onagona dika abe ko ihiduhunua ona gea tanu ihilawana Ngohino. Abe onagona dika ko ihidodiawoua abe homakutuono hatoomuino o nyawa Ma Jouino, ona gea imaketero hoka yahikabarihi o nyawa Ma Jouoka de aino. Ho ona gea abe yahikabarihi, ona duru mimakalawana ona de Ngohi.”
31De ka wohigila-gilahi ai demo wato, “Naa moi tinihitiari nginika. Abe o nyawa manga howono mata-mata, ngaro manga demoino iwingelo Ma Jou o Babaika eko ngaro o howono utuika mata-mata, masara gea ma howono mata-mata ka idadi Ma Jou wakokiofi. Masara onagona dika abe iwingelo Ma Jou o Womahika, ona gea ahao Ma Jou ko waofiua to ona manga howono, de gea manga howono ko ihihangua ka hiado-adonika. 32De ngaro o nyawa abe ihingelo-ngelo Ngohino, abe Ngohi o Nyawa ma Ngofaka abe o Horogaka de tauku toboa, masara ka idadi manga howono gea Ma Jou waofi. Masara onagona dika iwingelo Ma Jou o Womahika, ona gea ahao duru Ma Jou ko waofiua to ona manga howono. Ho ngaro o duniaka naa de ngaro ka hiadono dokena nanga himangika, masara to ona manga howono gea ko ihihangua ka hiado-adonika. De gea tinihitiari hokonaa mangale ma titi ti ngini nia dadae ma demo kangano abe niato ahi kuaha iboa o Ibilihi ma haekino. Angamoi Ngohi naa tapake Ma Jou o Womaha ai kuahaino la o tokata tohititoko o nyawaino, ho gea nimahidodiai la ufa niwingelo Ma Jou o Womahika de nihiromanga to Una ai kuaha niato o Ibilihi ma haeke ma kuaha.” Hokogea o Yesusu ai hitiari ma demo onangika.
Abe ma titi nanga uru ma demo de nanga wowango ma datoro gea imaketero de o gota ma hofoko
Lukasa 6:43-45
33De o Yesusu ka wogila-gilahi ai demo o Farisi ma nyawaika wato, “De naa moi irahai ngini nimafikirohi abe ma titi ahi datorino todiaioka. Abe ngini nihioriki nako o gota, ka idadi homalega to ena ma hofokika de hohiorikoka gea ma gota ma rupa hokokia. Abe nako ma gota ma rahai, gea hamake ma hofoko ma rahai genangino. Masara nako o gota abe to ena ma hofoko ma dorou, gea hohiorikoka ma gota ma dorou. De gea ma gota imaketero hoka Ngohioli naa, angamoi ngini niamakeoka ahi hofoko abe ahi wowango ma datorino, de ahi wowango ma hofoko gea irahai. Ho gea tanu genangino de ngini ka idadi nihihioriki abe Ngohi naa ahi hininga ma rorahai. 34Masara ngini ka nioluku nihifetongo abe to Ngohi ahi hininga ma rorahai. De genangino ma titi hiadono Ngohi tinihiromanga nginika tato nimaketero abe hoka o dodiha ma biha-biha, angamoi ngini niatobabudi-budi o nyawaika de niahitobahirehene la ma bahauku ona yokangela. De ti ngini nia demo mata-mata gea ka o demo ma dorou dika ihupuino, angamoi ka o dorou dika imanoa ti ngini nia hiningaka. Ho done sarakia ma rorahai iboa nginioka de aino? Duru ko idadiua! Abe o kia dika imanoa o nyawa manga hiningaka, gea ena ma demo abe ahao ihupu manga uruino. 35De nako naga womatengo abe ai hininga irahai, una gea ai demo ihupu ma rorahai ma titi iboa ai hininga ma rorahaioka de aino. Masara abe naga o nyawa ma dorou, una gea ai demo ma dorou dika ihupu ai uruino mangale gea ai hininga ma dorouoka de aino iboa.”
36“De naa tinihingahuohi nginika abe ahao dokengika ma oraha Una winitailako ti ngini homoi-homoi nia wowango, de ma wangeoka gea kiani nimahitararono Unangika ma titi nia demo mata-mata abe ka nifeto-feto dika ma oraha nia wowangoino naa de nitemo-temo. 37De nia demo-demoino de Ma Jou winitailako la womaputuhu nia hibalaha hokokia ahao niamake. Abe nako ngini nia wowangoka de nitemo-temo de nia demo ma rorahai, gea ahao ko winihohowonua nia demoino. Masara nako o demo ma dorou ngini nitemo-temo, gea Una ahao winihohowono nginika abe ma titi nia demoino.” De hokogea o Yesusu ai demo o Farisi ma nyawaika abe iwitae Unangika.
O nyawa yogahoko o Yesusika la wahimatoko o heheranga ma dodunguu
Maruku 8:11-12; Lukasa 11:24-26, 11:29-32
38De ipahaino de ahao naga abe yotobadoto-dotoko o Musa ai Paretaino de nagali o Farisi ma nyawa yamuruono naga de ona mata-mata yoboa o Yesusino. De ona iwitemo Unangika yato, “Mia Guru, ngomi migahoko Ngonaika la nodiai o heheranga ma dodunguu moi la ka idadi miamake de mihioriki abe Ngona igoungu noboa o Horogaka de nauku eko koua.”
39De o Yesusu wapaluhu onangika wato, “Abe ti ngini nia gogahokino gea de nimahitaanoka nia hininga itorou de abe ngini ko niwingakua Ma Jouika. De gea itararonoka abe ngini nimahitingakoka Ma Jouino imaketero abe hoka o ngofeka momatengo ami hininga itagi utuikali ho momahitingakoka ami rokatino. Ho Ngohi naa duru toluku o heheranga ma dodunguu todiai nia himangoka abe hoka ngini nioigo Ngohi todiai. Masara duga-duga moi dika ma dodunguu abe ka idadi tinihimatoko nginika. Abe hoka o heheranga moi idadi ma dodihiraino Ma Jou ai uru ma dodofanga o Yunusika, hokogenangoo ahao ma heheranga idadioli Ngohino, de gea dika ma dodunguu ahao tinihimatoko nginika. 40Abe ma dodihiraino o Yunusu una o nawoko kohaamoko iwilahiroka ho una naga o nawoko ma pokoroka ai dekana ai futu hangeino. De ai futu hange ibooto de ahao iwihihupuoli ai ngango. De hokogenangoo Ngohi o Nyawa ma Ngofaka abe toboa o Horogaka de tauku ahao ahi futu hange dika o tonaka ma goronaka de ahao Ngohi towangoli ahi honengino.”
41De o Yesusu wogila-gilali wotemo wato, “De naa tinihihohininga nginika abe ma titi ma dodihiraino o Niniwe ma nyawa manga ade-ade abe ma oraha o Yunusu woiki wadotaka onangika Ma Jou ai Demo-demo.#12:41 Yunusu 1:17, 3:1-5 Abe o Yunusu wahingahu-ngahu onangika ma abari Ma Jouino de ona gea yototoihene de yodafongo ka hiadono yotoba manga howo-howonino de iwingaku Ma Jouika. De masara nako ngini naa, naga Womatengo nia himangoka abe Ma Jou ai Demo-demo winihingahu-ngahu nginika de ka Unangohi ai kuaha duru ikurutiye nako de o Yunusu. De barikua ka Unangohi duru wokurutiye masara ngini naa ka nioluku ai demoika de ko nitobaua nia howonino. De gea ma titi hiadono Ma Jou ahao winihohowono nginika. De naa tinihingahu abe ona o Niniwe ma nyawa ma dodihiraino ona gea ahao yodomoteke de to Ma Jou ai hohowono nginika. Angamoi ona gea ma dodihiraino de yotobaka masara ngini naa ko nitobaua. Abe dokengika ma oraha Ma Jou winitailako nginika de o Niniwe ma nyawa onangoo naga genangoka. De to ona manga hininga nginika ka imaketero dika de to Ma Jouoli ai hininga, abe ona ato kiani ngini niamake nia hohowono Unangino mangale ngini ko nitobaua abe ma oraha Ma Jou ai Demo-demo inihingahu-ngahu nginika.”
42De o Yesusu ai demo ka wohigila-gilahi wato, “De naa moioli ma ade-ade tinihihohininga nginika la ka idadi nimafikirohi genangino. Angamoi ahao ma oraha Ma Jou watailako o nyawa mata-mataika de nagali momatengo abe muna ahao motemo mato ngini kiani nia hohowono niamake Unangino. De muna ma dodihiraino abe ma oraha o Saloomo de munangoo modadi mokoano abe imaketero hoka o Saloomo unangoo wokoano. Masara to muna ami tonaka imakitingaka kohagurutika de o Isiraele ma tonaka, de ami tonaka gea ihiromanga o Seba.#12:42 1 Kokoano 10:1-13 De ngaro ami gogere kohagurutika masara muna motagi-tagi moboaino o Isiraele ma tonakino la mato mitutumu manga koano o Saloomo. Angamoi muna moihenoka abe to Saloomo ai sosawaro ka enangohi ikurutiye nako de o nyawa utu mata-mataika manga sosawaro. De muna duru moigo mototoihene to una ai sosawaro ma demoino. Masara abeika ma oraha naa naga de ti ngini nia hidogoronaka naga Womatengo abe ka to Unangohi ai sosawaro ikurutiye nako de o Saloomo ma dodihiraino ai sosawaro. De ngaro ma sosawaro naga naangoka masara ngini ko iwa nia magawe la nitotoihene genangino. De genangino ma titi hiadono ngini ahao nia hohowono niamake abe ahao dokengika ma oraha Ma Jou winitailako. De naa tinihingahu abe munangoo naga Ma Jouoka ma oraha gea. De abe muna moihene Ma Jou ai putuhu la winihohowono nginika de to munangoo ami hininga ahao modomoteke de Ma Jou ai hininga. Abe muna Ma Jou ai himangoka de mato ngini kiani niamake nia hohowono angamoi ngini ko nitoihenua to Una ai sosawaroino.”
43De ahao o Yesusu wogila-gilahi wahitiari o Farisi ma nyawaika de onangikaoo abe yotobadoto-dotoko o Musa ai Paretaino angamoi ona yoluku yodafongo ai demoika gea. De gea Una wotemo wato, “De naa tinihitiari nginika tato nako ngini nioluku niodafongo ahi demoino, gea ahao ka idogohi ma dorou abe imanoa ti ngini nia hiningaka. Angamoi abeika tinihitararonohi hokokia idadi o nyawa womatengoika nako iwikitokata de ipahaino ihititoko unangoka de aino. Abe ma tokata gea ihihupuoka ho iloiki o tonaka ma kakaahaika de imalingiri to ena ma ngi abe ma hininga adaene masara ko imamakeua. 44De ma tokata gea imatemo ato, ‘Marai naa tigilio dika ma nyawaika abe nengokadauino ihihititokoka unangino la togogeroli unangoka gea.’ De ma tokata gea iwigilio de amake abe ma nyawa gea ai hiningaka de ko iwahi utu imanoa gea ma goronaka. De nako hohidotelega to una ai hininga de o tau, ka idadi hato gea ma homoa angamoi yaparihoka de ma pesekoo yatebinoka o tau ma goronaka gea. 45Ho ka de ma tokata amake abe una gea ai hininga ka ma homoahi ho imahidiaioka la yodafongoli, de gea ma tokata isoboka imalingirohi to ena ma dodiawo la enangoo imanoa genangoka. De to ena ma dodiawo tumidi imamake abe ka enangohi itorou abe nako de ma tokata ihira-hira gea. De gea ma tokata yahokohi la ena mata-mata ka idadi imakokutuono imanoa womatengo gea ai hiningaka. Ho ma tokata tufange gea imanoa o nyawa gea ai hiningaka, ho hiadono nako ma dihiraino de ma oraha naa de ma oraha naangohi ma dorou ilamoko to una gea ai hiningaka. De hokogea tinihitiari nginika abe ma oraha naa niwango o duniaka. Angamoi nako ngini nioluku niodafongo ahi demoino, gea ahao ka idogohi ma dorou abe imanoa ti ngini nia hiningaka hiadono ngini duru nimahidadidorou.” Hokogea o Yesusu ai hitiari ma demo onangika.
O Yesusu wahitararono abe ma titi to Una ngoi meme de ai doo-dodoto idodutu
Maruku 3:31-35; Lukasa 8:19-21
46De o Yesusu wotemo ai gogiriaka abe o nyawa ko manga ngoeika de ahao ngoi meme de ai doo-dodoto yoboa ma tauino abe naga genangoka o Yesusu de iwinii-niiki. De ona yoboaino masara ka o tau ma poretoka dika de iwibehehongo la ato wohupuohi onangino la watutumohi. 47De doka o tau ma goronaka de naga womatengo wihingahu o Yesusika wato, “Ahi Baluhu, naga ngoni meme de ani doo-dodoto ona yoboaka doka ma poretoka ho ona inibehehongo.”
48De o Yesusu ko wohupuahi watutumu de naga ai dodotoko ma demo moi abe o nyawa manga ngoeika gea abe Una wato, “Abeika ngini nimafikirohi ahi demo naa. Ngohi meme o ngo kia? De ahi doo-dodoto onagona honanga?” 49De gea wotemo ibootino de ahao wadumutika de ai giama iwitobanii-niikika de wotemo wato, “Ona naa ka idadi tahiromanga tato to Ngohi ngohi meme de to Ngohi ahi doo-dodoto. 50Angamoi o nauru onaguna dika abe ka ihikaika waniiki ahi Baba o Horogaka ai mau, una gea tietongo to Ngohi ahi dodoto. De o ngo kia dika abe ka ihikaika maniiki Ma Jou ai mau, muna gea tomihiromanga to Ngohi ngohi firanga de to Ngohi ngohi meme.” Hokogea o Yesusu ai demo onangika.
Currently Selected:
Matiusu 12: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
