Salmos 139
139
Scotol yiloj, scotol sna'oj stuc li Diose
Q'ueoj yu'un David; ja' la sventain li banquilal yu'un jq'ueojetique.
1Muc'ul Dios, vo'ot laj aq'uel lec c'u xi'elan, xchi'uc lec xavotquinun.
2Vo'ot xavotquinun c'alal chichoti, xchi'uc c'alal chiva'i
aq'ueloj tal ta nom scotol li c'usitic ta jnope.
3Chajal ta aba ta asat scotol c'u xi'elan bu chixanov
xchi'uc c'alal ta jcux co'nton.
Xavotquin scotol li c'usitic ta jpase.
4Ac'o me mu'yuc to'ox chloc' ta que li c'usi chcale,
pero li vo'ote, Muc'ul Dios, avotquinoj xa ono'ox.
5Ajoyibtaojun lec ta jujujot;
amacojun lec ta yut ac'ob.
6Solel labal chca'ay ti c'u x'elan ana'oj scotole;
yu'un toj ech'em abijil, mu xa xca'ibe o smelol c'u x'elan.
7¿Bu xu' chibat ti jech mu xa xavilune?
¿Bu chijatov batel ti jech nom xa oyun ta atojole?
8Me chimuy batel ta yutil to vinajele, te ono'ox oyot;
me chiyal batel ta yutil to banamile, te oyot noxtoc.
9Me chivil batel c'alal ta sloq'uem c'ac'ale,
me chibat c'alal ta smaleb c'ac'ale,
10oyun ono'ox ta ac'ob;
atsacojun ono'ox ta abats'ic'ob.
11Ac'o me ta jnop ti xu' chisnac'un li ic' osile,
ac'o me chc'ataj ta ac'ubaltic li sac osil bu oyune,
12pero li ic' osile mu'yuc ic' chavil li vo'ote.
Li ac'ubaltique lec sac chavil jech chac c'u cha'al c'ac'altic;
co'ol chavil li ic' osile xchi'uc li sac osile.#Jer 23.23-24; Am 9.2.
13Yu'un vo'ot laj apas scotol c'u x'elan oy li jbec'tale;
vo'ot laj achapanun tal ta yut xch'ut li jme'e.
14Ta xcal alequilal, yu'un xch'ay co'nton chca'ay,
yu'un toj labal sba ti c'u x'elan apasojune;
jna'oj lec ta co'nton ti vo'ot avabtelune.
15Mu'yuc mucul ta asat c'u x'elan ichapaj tal li jbec'tale,
xchi'uc ti c'u x'elan lic chi'inatcun tal ti mu'yuc boch'o xu' chile,
xchi'uc ti c'u x'elan lic ayincun tal li' ta banamile.
16Aviloj c'u x'elan ilic nabuc tal li jbec'tale;
chapal ono'ox avu'un ti c'u yepal c'ac'al chicuxie;
tsacal ta vun avu'un scotol ti c'alal mu'yuc to'ox chc'ot ta pasele.
17Dios cu'un, toj yan yutsil chca'ay li c'usi anopoje;
toj muc' ta jyalel, mu xlaj ta alel c'u x'elan.
18Me ta xcat c'u yepale, xjelov to jech yepal chc'ot jech chac c'u cha'al yi' ta ti'nab;
ti c'u x'elan xu' chlaj ta atel cu'une, tsc'an cuxulun o ta atojol sbatel osil.
19Dios cu'un, vo'ot chavac' chamuc li boch'otic chopolique;
voc'bun loq'uel ta jtojol li jmilvanejetique.
20Yu'un ep ta xchopolc'opojic ta atojol;
altic no'ox ta xixtanic ta alel abi li avajcontrataque.
21Muc'ul Dios, li boch'otic chopol chayilicote, chopol chquilic ec;
li boch'otic chasbajicote ta jbajic ec.
22Chopol chquilic o ta j'ech'el;
contra chquilic o.
23Q'uelun lec avil c'u xi'elan, Dios cu'un;
otquino lec li c'usi oy ta co'ntone;
q'uelbun avil c'u x'elan co'nton, otquino lec avil li c'usitic ta jnope.#Sal 17.3; 26.2.
24Q'uelavil me oy c'usi chopol ta co'ntone;
tuq'uibtasun batel ta be sventa sbatel osil.
Currently Selected:
Salmos 139: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
