Proverbios 26
26
1Jech chac c'u cha'al mu snupin me chac' tayo ta yorail q'uepelaltique xchi'uc mu snupin chac' vo' ta yorail c'aojtique,
ja' jech mu snupin me ich'bil ta muc' li bol cristianoe.
2Li j'ilc'ope mu xc'ot ta jtojoltic ti me muc ta jmulticuque,
jech chac c'u cha'al mut, o xaval-eq'uen ti xvilet no'ox jelovel ti mu xluchi ta jtojoltique.
3Li ca'e chich'be smelol ta torcio,
li buroe chich'be smelol ta vozal;
ja' no'ox jech ec li boch'o bole chich'be smelol ta nucul.
4Mu me xanupultasbe slo'il li boch'o bole,
yu'un naca me te xlic boliban ec.
5Tac'bo sutel jech chac c'u cha'al tsc'an tac'bel sc'op li boch'o bole,
yu'un jech mu snop ti lec bije.
6Li boch'o tstacbe batel mantal jun bol vinique
ja' jech chc'ot jech chac c'u cha'al boch'o tsboj yacan ti ja' no'ox tsa' svocol stuque.
7Li coxoe mu xu' yu'un nat chanov
ja' jech li bol cristianoe mu xu' yu'un chal li bic'tal lequil chanubtasele.
8C'alal chich' ac'bel stanal li jimich'e, mu smeloluc me chich' chuquel lec li tone,
ja' jech mu smeloluc me chich' ich'el ta muc' li boch'o bole.
9Jech chac c'u cha'al jyacubel ti mu xa'ibe xc'uxul li ch'ix ch-och ta sbec'tale,
ja' jech li bol cristianoe mu xa'ibe smelol li bic'tal lequil chanubtasele.
10Li boch'o chic' ta abtel bol vinic, o me jcotcovil vinique
ja' co'ol chac c'u cha'al j'ac'flecha ti ep boch'o chac'be svocole.
11Li bol cristiano ti te no'ox chcha'pasilan o sbol talele
ja' jech chac c'u cha'al jcot ts'i' ti chcha'lo' yan velta xee.#2 P 2.22.
12Mu'yuc bu xquiltic ti toj bij li boch'o chal ti oy lec sbijile;
ja' xu' to jutuc li boch'o bole.#Pr 29.20.
13Ti c'u cha'al mu x'abtej o li boch'o ch'aje, jech chal:
“Oy bolom snac'oj sba ta be;
oy bolom chmalavan ta xoraltic”, xi.#Pr 22.13.
14Li boch'o ch'aj ti te no'ox xbalet ta svayabe
ja' jech c'otem jech chac c'u cha'al macna ti te no'ox xvelet o ta stsaclebe.
15Li boch'o toj ven ch'aje ja' no'ox lec cha'ay stiq'uel sc'ob ta sets';
puru mac'linel tsc'an, solel tic'bel ta ye tsc'an.#Pr 19.24.
16Li boch'o ch'aje tsnop ti ja' xjelov to sbijil
jech chac c'u cha'al me oy vucub viniquetic lec bijique.
17Me ta jtic' jbatic ta c'op ti ma'uc jventatique,
xu' chlic sjol jech chac c'u cha'al jcot ts'i' me ta jnitbetic ta xchiquine.
18-19Li boch'o tslo'la xchi'il ti ts'acal chalbe ti slo'il no'oxe
ja' jech chc'ot jech chac c'u cha'al jun jchuvaj ti chac' tsanajtic flecha ti chmilvan xchi'uque.
20Me mu'yuc boch'o toj ech'em xlo'ilaje, mu xlic c'op,
jech chac c'u cha'al c'oc' ti te no'ox chtu'p me mu'yuc si'ile.
21Li ac'ale lec stsan ta ora, li si'e chac' lec yac'alil;
ja' no'ox jech li jsimaroniltique xu' ta ora tsliques c'op.
22Li boch'o toj ech'em xlo'ilaje toj lec ya'yel li c'usi chale;
chc'ot xa c'alal ta yut co'ntontic yu'un ya'yel.#Pr 18.8.
23Me oy jun bin ti bonbil ta saquil taq'uine, toj lec xa c'upil sba yilel;
ja' jech li boch'o chopol c'usi oy ta yo'ntone, toj lec xa ya'yel li c'usi chale.
24Li boch'o stsoq'uet yo'ntone mu xac' ta ilel ti c'alal chc'opoje,
ac'o me toj chopol li c'usi tsnop ta yo'ntone.
25Me toj lec xasc'opanot yilele, mu me xach'un,
yu'un puru chopol c'usi oy ta yo'nton.
26Ac'o me mu xac' ta ilel ti stsoq'uet yo'ntone,
pero li xchopolile ta ono'ox xvinaj ta stojol scotol xchi'iltac.
27Li boch'o ta sjoc'be xch'enal xchi'ile ja' te ta x'och yalel stuc;
li boch'o ta xbalch'un batel jbejuc tone ja' te net'bil ta xc'ot stuc.
28Li epalc'ope chijyac'butic jvocoltic;
li lo'iletic ti toj lec xa ya'yele chijsocutic yu'un.
Currently Selected:
Proverbios 26: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
