Proverbios 27
27
1Mu me xanop ti oy c'usi lec xu' chapas ta yoc'omale,
yu'un mu xana' c'usi yich'oj tal li jun c'ac'al oc'ome.#Stg 4.13-16.
2Mu me xaval atuc ti lec ac'oplale;
yan boch'o ac'o yal ti ich'bilot ta muq'ue.
3Li ton xchi'uc yi'e toj olic,
pero li sc'ac'al yo'nton bol cristianoe ja' xjelov to yalal ta xcha'chopal.
4Li ilinele toj tsots, li sc'ac'al o'ntonale ja' jsoquesvanej;
toj vocol chcuch' cu'untic noxtoc li ti'-o'ntaele.
5Ja' toj lec ti jamal chij'albat c'usi jmultique;
ja' chopol me lec xa c'anbilutic yilele.
6Ja' xloc' venta me chijyututic li boch'o lec jc'opan jba jchi'uctique;
ja' altic me chists'uts'utic xa yilel li cajcontratique.
7Li boch'o lec noj xch'ute mu'yuc stu yu'un li spom muc'ta pome;
yan li boch'o oy vi'nal cha'ye, c'alal xa ta c'usi ch'a lec chi' cha'ay.
8Li boch'o chjatov no'ox loq'uel ti bu ivoq'ue
ja' jech chac c'u cha'al jcot mut ti chicta comel stase.
9Li muil poxile toj xcuxet xa chca'itic yu'un;
ja' jech toj xcuxet co'ntontic yu'un ti c'alal oy boch'o chisbijubtasutique.
10Mu me xacomtsan li boch'o lec xac'opane
xchi'uc li boch'o lec sc'opan sbaic xchi'uc atote.
C'alal oy jvocoltique, ja' lec me ja' no'ox ta jc'opantic li boch'o nopol nacalutic jchi'uctique;
ja' vocol me ja' chbat jc'opantic li jchi'iltic ta voq'uel ti nom to nacalique.
11Jnich'on, bijan me, jech xcuxet no'ox co'nton avu'un;
jech xu' ta jtac'be li boch'o chopol chiyalbun jc'oplale.
12Li boch'o bijubtasbile chotquin li c'usi chopole, jech mu sc'an stic' sba te;
yan li boch'o mu'yuc bije tstic' no'ox sba batel, jech te ta sta o svocol.#Pr 22.3.
13Li boch'o tstic' sba ta piarol yu'un yan cristianoe ich'bo sc'u';
li boch'o tsva'an sba ta sventa yil xchi'ile c'anbo prentail.#Pr 6.1-5; 20.16.
14Li boch'o chbat sc'opan xchi'il ta ic'pulan ti x'avet no'ox c'otele
ja' chc'ataj ta uts'intael ti jech ta spase.
15Me jsa'c'op ants quic'ojtique,
ja' jech chc'ot ta jtojoltic jech chac c'u cha'al ts'ujel ta yorail vo'olaltic.#Pr 19.13.
16Li boch'o tsc'an tspajese ja' co'ol jech chac c'u cha'al me tsc'an tspajes li iq'ue,
o jech chac c'u cha'al me tsc'an tstsac ta sc'ob li aceitee.
17Li taq'uine tsc'an juxbel ye ta taq'uin noxtoc;
ja' no'ox jech ec li cristianoe ta ye cristiano xu' ta xbijub.
18Li boch'o ta xchabi lec li higo te'e ta slo'be sat;
ja' no'ox jech ec li boch'o lec sc'anoj yajvale ta sta ich'el ta muc'.
19Li c'usi oy ta co'ntontique lec jna'tic,
jech chac c'u cha'al lec xquil jsatic ta vo'e.
20Li yavil animaetic xchi'uc li c'atinbaque mu sta yo'ntonic ta ve'el;
ja' jech li jsatique mu x'ech' yo'nton o ta sq'uelel li c'usi chile.
21Li taq'uinetique ta c'oc' ta xvinaj me ja' saquil taq'uin, me ja' c'anal taq'uin;#Pr 17.3.
ja' no'ox jech ec li cristianoe ta sventa ich'el ta muc' chlic vinajuc c'u x'elan yo'nton.
22Ac'o me solel chamaj jech chac c'u cha'al trigo li boch'o bole,
mu ono'ox xloc' o li sbolil yo'ntone.
23Q'uelo me lec c'u x'elan li achijtaque;
teteuc me ach'ulel achi'uc.
24Yu'un li jc'ulejaltique mu sbateluc osil te oy,
jech noxtoc li ajvalile mu scotoluc jabil tiq'uil ta yabtel.
25C'alal ta xch'i tal li jobeltique, c'alal ta xyaxub tal li ts'i'laltique,
xchi'uc c'alal chich' tsobel tal li ts'i'laltic ta vitsetique,
26lec xch'i o li avunin chijtaque, ja' te chata o ac'u' ta sventa li stsotsile;
jech noxtoc ta sventa avunin tentsuntac chaman o avosil.
27Jech noxtoc ta ya'lel xchu' me'tentsunetic avu'un chata ave'elic achi'uc avajnil anich'nab,
xchi'uc scotol li boch'otic te ch-abtejic avu'une.
Currently Selected:
Proverbios 27: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
