Nehemías 5
5
Ilic c'op yu'un stuquic li judaetique
1Li jchi'iltactique oy c'usi mu lecuc laj yilic xchi'uc yajnilic ta sventa c'u x'elan tspasic li yan judaetique. 2Ja' yu'un lic sc'anic parteal. Oy boch'o jech laj yal: “Li vu'uncutique epuncutic; oy ep jqueremcutic jtsebcutic, jech ep xa la jq'uexcutic trigo sventa mu xichamcutic ta vi'nal”, xiic. 3Oy yantic jech laj yal: “Li vu'uncutique cac'ojcutic xa ta prentail cosilcutic, jts'usubcutic, xchi'uc jnacutic ta scoj li vi'nale, yu'un laj xa jc'ancutic loq'uel taq'uin sventa ta jman jtrigocutic”, xiic. 4Oy yantic jech laj yalic noxtoc: “Li vu'uncutique la xa jq'uexcutic taq'uin sventa chcac'be jpatancutic li ajvalile. Ja' li spatan cosilcutic, xchi'uc jts'usubtique”, xiic. 5Jech laj yalic noxtoc: “Li yantic jchi'iltactique jun jts'unubal jchi'uctic, ja' yu'un muc yanticuc o li col jnich'ontic jchi'uctique. Pero li vu'uncutique persa chcac'becutic smozoinic li jquerem jtsebcutique. Oy xa j'o'lol jtsebcutic ti ochemic xa ta quiaraile. Mu xa c'u xcut jloq'uescutic, yu'un yan xa yajval noxtoc li cosilcutic xchi'uc jts'usubtique”, xiic.
6C'alal laj ca'ibe ya'yejique, tsots li'ilin. 7C'alal la jnop leque, ja' lic cut li jc'ulejetique xchi'uc li banquilaletique yu'un ja' chac'beic ep svocol li jchi'iltactique. Jech la jac'beic: “¿Me yu'un chatsatsal c'anbeic sjol c'usi chavac'beic xq'uex li jchi'iltactique?”, xcut. Jech te lic jtsob scotol li jchi'iltactique, lic cac' jun muc'ta tsobajel. 8Jech laj calbeic: “C'alal chonbilic batel ta yantic lum li jchi'iltactique, li vu'uncutique laj cac'cutic persa la jcoltacutic loq'uel tal. Pero li vo'oxuque chacha'chonic yan velta, yu'un jech vu'uncutic ta jpojcutic loq'uel yan velta”, xcutic.
Solel muc xa xtac'ov ic'otic. 9Jech laj calbeic noxtoc: “Mu'yuc lec li c'usi chapasique. ¿Me mu ja'uc lec ti ja' chavich'ic ta muc' li Diose, yu'un jech mu xquich'tic labanel yu'un li yantic lumetique, ja' li boch'o chiscontrainutique? 10Li vu'une xchi'uc li cuts' calaltaque xchi'uc li jmozotaque laj cac'becutic xq'uex jtaq'uincutic xchi'uc jtrigocutic ec. Ja' lec la' jch'aybetic li yilique. 11Pero ta jtojboxuc ta vocol, sutesbeic ta ora li yosilique, li ts'usubtic yu'unique, li olivatique, xchi'uc li snaic ti avich'ojbeic xae. Sutesbeic noxtoc me oy avich'ojbeic staq'uinic, strigoic, ya'lel sts'usubic, xchi'uc yaceiteic ta sventa sjol li c'usi la xq'uexboxuque”, xcutic. 12Itac'ovic: “Ta jsutescutic, mu'yuc c'usi xu' chcalcutic. Ta jpascutic scotol li c'usi chavale”, xiic.
Jech te laj quiq'uic li paleetique, te ta stojol scotolic laj cac'be yalic ta stojol Dios me ta melel tspasic li c'usi laj yalique. 13Jech noxtoc te la jlilin jc'u' ta stojolic, jech laj calbeic: “Ja' jech ac'o lilinatuc loq'uel yu'un Dios ta sna, xchi'uc ta yosil li boch'otic muc xch'un li c'usi laj yich' alel ta stojol Dios li'i. Xchi'uc ac'o pojbatuc scotol li c'usitic oy yu'une”, xcut. Jech itac'ovic scotol li jchi'iltaque: “¡Jechuc!”, xiic. Te laj yalbeic slequilal li Muc'ul Diose, xchi'uc la spasic scotol li c'usi laj yalique.
Ep laj yac' slequil yo'nton li Nehemiase
14Li c'usi ora la st'ujun ta ajvalil sventa Judá li muc'ta ajvalil Artajerjese ja' ta jtob (20) jabil yochel ta ajvalilal c'alal to ta lajchab xcha'vinic (32) jabil yochel ta ajvalilal. Li lajchab (12) jabil le'e mu'yuc bu la jc'an jtojol, xchi'uc li stojol jchi'iltac ti sc'oplal chquich' ta sventa ti ajvalilune. 15Pero li yantic ajvaliletic ti ba'yuc ijelovique laj yac'beic ep svocol li jchi'iltactique, yu'un ta jujun c'ac'al la sc'anic cha'vinic (40) ta sep saquil taq'uin sventa sve'elic, xchi'uc ya'lel sts'usubic. Jech noxtoc li xchi'iltac ta abtele toj muc' la spas sbaic ta stojol li jchi'iltactique. Yan li vu'une mu'yuc jech la jpas, yu'un ja' quich'oj ta muc' li Diose. 16Jech noxtoc c'alal laj yich' pasel li coraltone la jmac jtarial abtel jtuc ec. Xchi'uc mu'yuc la jc'an cosil. Scotol li jchi'iltac ta abtele laj yich' starial abtelic ec. 17Jech noxtoc ic'ot c'alal ta o'lol xchibal ciento (150) jmac'linbil vinic; oy j'o'lol jchi'iltactic ta israelal xchi'uc j'o'lol jchi'iltac ta abtel. Ja' mu'yuc atbil li yantic lumetic li' ta jpat ta jxocontic chtal svu'lanicun ta jujun c'ac'ale. 18Ti c'u yepal ve'lil laj yich' meltsanel ta jujun c'ac'al ti vu'un oy ta jventa ta jtoje, jcot tot vacax, xchi'uc vaccot chijetic ti bu lequique xchi'uc mutetic. Ta lajlajuneb c'ac'al laj cac'be ya'lel ts'usub yuch'ic ti c'u yepal chtun yu'unique. C'alal jech la jpase, mu'yuc bu la jc'an jtojol ta sventa ti vu'un ajvalilune, yu'un toj ol xa yicatsic li jchi'iltactique. 19Ja' no'ox jech laj cal ta stojol li Diose: “Dios cu'un, mu me xach'ayun ta avo'nton; na'o me ti lec c'usi la jpas ta stojol li jchi'iltaque”, xichi, xi li Nehemiase.
Currently Selected:
Nehemías 5: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
