Nehemías 6
6
La xchapanic c'u x'elan tsmilic ox li Nehemiase
1C'alal laj ya'yic Sanbalat, Tobías, xchi'uc Gesem liquem ta árabe banamil, xchi'uc li yantic cajcontracutic ti vu'un la jcha'pas li coraltone, ti la jmacancutic scotol bu jinesbilique, ac'o me mu'yuc to'ox nacanbil cu'un li ti'coraltonetique, 2jech laj yalbicun batel li Sanbalat xchi'uc Geseme: “Bat jtsob jbatic ta junuc biq'uit lum te ta stenlejaltic ta Ono”, xiyuticun. Yu'un snopojic xa'ox c'usi chopol chispasbicun. 3Jech te lic jtac batel j'almantaletic cu'un ec, jech laj calbe batel: “Mu xu' cu'un chbat jchi'inoxuc yu'un ep cabtelcutic. Yu'un me chbat jchi'inoxuque ja' ta xpaj li cabtelcutique”, xcut batel. 4Chanib velta jech la staquicun ta iq'uel, pero ja' no'ox jech la jtac'beic batel ec.
5Ja' yu'un li Sanbalate te lic stac tal jun smozo yich'oj tal jun carta; ja' yo'obal xa'ox velta chistacun ta iq'uel. 6Jech chal li cartae: “Puquem xa ac'oplal ta yantic lumetic, xchi'uc jech chal ec li Gesem ti chanop chaliquesic c'op achi'uc li achi'iltaque, ja' yu'un avochelic spasel li coraltone. Xchi'uc vinajem xa ti vo'ot cha'och ta ajvalilal yu'unique. 7Jech noxtoc chalic ti laj xa at'ujan j'alc'opetic sventa jech ac'o yalic ac'oplal te ta Jerusalene: ‘Oy xa ajvalil cu'untic li' ta Judá’, ac'o xiicuc. Scotol li a'yejetic le'e ta ono'ox xa'ay li ajvalil Artajerjese. Ja' lec la' me, la' jnoptic c'usi ta jpastic jtuctic”, xiyutun tal ta carta.
8Jech te lic jtacbe batel spacol ec li cartae, jech laj calbe batel: “Li c'usi chavale te no'ox chanop atuc; mu'yuc boch'o jech chal”, xcut batel. 9Yu'un ja' no'ox oy ta yo'ntonic tsc'an chisibtasuncutic, tsc'an ta xchibajes co'ntoncutic, yu'un jech ac'o jquechancutic li abtele. Pero te lic jc'opan Dios: “Dios cu'un, ac'bun jtsatsal ta abtel”, xcut li Diose. 10Jech te libat ta sna li Semaías xnich'on Delaía smomnich'on Mehetabele; te smacoj sba ta sna, jech laj yalbun: “Bat jtsob jbatic ta yut ch'ulna yu'un Dios; jmactic lec li ti'naetique, yu'un ta ac'ubaltic tanae oy yic'al ta xtal smilicot”, xiyutun. 11Jech la jtac'be: “Li vu'une mu lecuc ti me chijatove, ti me ch-och jnac' jba ta yut ch'ulna sventa mu xilaj ta milele. Ja' yu'un li vu'une mu'yuc chi'och”, xcut.
12Yu'un la jna' ti muc ja'uc i'ac'bat sna' yu'un Dios ti jech laj yalbune; ja' no'ox tsc'an chiscontrainun ec. Yu'un ac'bil xa'ox taq'uin yu'un li Sanbalat xchi'uc li Tobiase. 13La jna' ti ja' no'ox la stojic ta taq'uin yu'un ac'o sibtasun yu'un jech ac'o jta jmul. Yu'un jech xu' chisoquesbicun jc'oplal sventa chiyaq'uicun ta q'uexlal. 14Jech lic jc'opan Dios: “Dios cu'un, na'o me c'usi chispasbicun li Sanbalat xchi'uc Tobiase. Na'o me c'usi chispasbun noxtoc li Noadías j'alc'op antse xchi'uc li yantic j'alc'opetic ti tsc'anic ac'o ochuc xi'el ta co'ntone”, xcut li Diose.
15Li coraltone ivu' cu'uncutic ta vo'ob xcha'vinic (25) c'ac'al yochel u Elul,#6.15 Elul - Q'uelo Yotol Israeletic. ja' lajchab yoxvinic (52) c'ac'al laj yich' cu'uncutic. 16C'alal laj ya'yic li cajcontracutique xchi'uc scotol li yantic banamiletic jts'aquinojan jba jchi'uccutique, toj ep ixi'ic. Toj biq'uit xa icom laj ya'yic, yu'un la sna'ic ti ja' ta sventa Dios ivu' cu'uncutic li abtele.
17Ja'o yorail te lic staquilanbe sbaic ep carta li Tobías xchi'uc li banquilaletic ta Judae. Jech ec li Tobiase la stac tal carta ta stojol li judaetique. 18Yu'un oy ep judaetic co'ol yo'nton xchi'uquic li Tobiase, yu'un li Tobiase ja' sni'anoj li Secanías xnich'on Arae. Xchi'uc li xnich'on Tobías, ja' li Johanane ja' yic'ojbe stseb ec li Mesulam xnich'on Berequiase. 19Ja' yu'un ep chtal yalbicun ti lec yabtel li Tobiase; ts'acal chbat yalbeic ec li c'usi chcale. Li Tobiase ep cartaetic la stacbun tal sventa ac'o xi'cun.
Currently Selected:
Nehemías 6: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
