Nehemías 4
4
Ichopolc'optaatic yu'un yajcontraic li judaetique
1C'alal laj ya'ay Sanbalat ti jbats'ilcutic spasel li coraltone, bats'i tsots i'ilin. Te lic chopolc'opojuc ta stojol li judaetique. 2Jech laj yal ta stojol scotol li xchi'iltaque xchi'uc ta stojol li soldadoetic te ta Samariae: “¿C'usi tspasic li jvi'nal judaetique? ¿Me yu'un tsnopic ti ch-ac'bat smilbeic smoton Dios yan veltae? ¿Me yu'un tsnopic ti chvu' no'ox yu'unic ta jun c'ac'al li abtele? ¿Me yu'un xu' chlic cha'pasuc ta ton yu'unic yan velta li stanil tonetic laj yich' chiq'uele?”, xi.
3Li Tobías Amón vinic te co'ol chotol xchi'uque jech laj yal ec: “Li coralton tspasique jcot no'ox vet ta xlom yu'un me imuy tee”, xi.
La sc'opan Dios Nehemías
4Jech te lic jc'opan Dios, jech laj cal: “Dios cu'un, a'yo ava'ay ti c'u x'elan chquich'cutic na'leele. Ac'o c'otuc ta stojol stuquic li c'usi chopol chiyalbuncutique; ac'o ochicuc ta sc'ob yajcontraic; ac'o yich'ic chuquel batel ta yan banamil. 5Mu me xats'icbe li smulique; mu me teuc no'ox xlaj ta avo'nton, yu'un chopol c'usi laj yalbeic li boch'otic ta xcha'va'anic li coraltone”, xcut li Diose.
Laj yich'ic sibtasel yu'un yajcontraic li judaetique
6Laj cac'becutic yipal spasel li coraltone. Ta ora no'ox ista o'lol cu'uncutic, yu'un scotol yo'nton i'abtejic li jchi'iltactique. 7Pero c'alal laj ya'yic li Sanbalat, li Tobías, li arabetic, li amonetic, xchi'uc asdodetic ti xquechet no'ox batel ta pasel cu'uncutic li coralton ta Jerusalene, xchi'uc ti ta xa jmaccutic ti bu jinesbilique, bats'i tsots i'ilinic. 8Jech te lic xchap sc'opic sventa chtal spasic pleito ta Jerusalén, yu'un tsc'an tsoquesic comel li abtele. 9Jech te lic jc'opancutic li Dios cu'untique, xchi'uc lic jchapancutic jchabivanejetic cu'uncutic ta c'ac'al ta ac'ubal. 10Jech laj yal li judaetique: “Li j'icatsnometique ta xa x'alubic. Li jinesbil tonetique toj ep, mu xu' cu'uncutic spasel li coraltone”, xiic.
11Li cajcontracutique jech laj yalbe sbaic: “Mu sna'ic, mu xilic ti c'alal ch-och jmiltique, jech ta jpajesbetic o li yabtelique”, xiic. 12Pero li judaetic ti te co'ol nacal xchi'uquique ep ta velta tal yalbuncutic ti chtal smacuncutic ta jujujote. 13Jech te lic jchapan ta jujuchop sbiic li jchi'iltaque; te laj yac'an sbaic ta pat coralton yo' bu jinesbilique, yich'anoj yespadaic, slanzaic, xchi'uc sflechaic. 14C'alal laj quil ti chi'ique, la jva'an jba, jech laj calbeic li banquilaletic, li jpasmantaletic, xchi'uc scotol li jchi'iltactique: “Mu xaxi'ic. Na'ic me ti ech'em smuc'ul, ti ech'em xi'elal li Diose. Cac'tic persa scoltael li cuts' calaltique, li cajnil jnich'nabtique, xchi'uc li jnatique”,#Nm 14.9; Dt 1.29-30; 2 S 10.12. xcutic.
15C'alal laj ya'yic cajcontracutic ti lec chapaluncutique xchi'uc ti isoquesbatic yu'un Dios li c'usi chapanbil yu'unique, isutic batel. Jech bat jtsac jtarial abtelcutic yan velta jujununcutic. 16Ja'o te lic jvoc' li jvinictaque. J'o'lol ch-abtejic, j'o'lol yich'anoj slanzaic, yich'anoj smaquic sventa pleito, sflechaic, xchi'uc smac scotol sbec'talic. Yan li banquilaletic cu'uncutique ja' la spatbeic yo'nton scotol li jchi'iltactic te ch-abtejique. 17Li boch'otic tspasic coraltone, li j'icatsnometique ta jun no'ox sc'ob ch-abtejic. Ta yan sc'obique stsacoj o yabtejebic sventa pleito. 18Scotol li boch'otic ch-abtejique xchuquinoj jujun yespadaic. Yan li boch'o tsjupan oq'uese ja' te jchi'inoj. 19Li banquilaletic, li jpasmantaletic, xchi'uc li yantic jchi'iltac ta israelale jech laj calbeic: “Li abtele toj muc', toj jamal, nomtic no'ox xquil jbatic. 20Pero c'alal me laj ava'yic yich' jupanel oq'ues bu oyoxuque, tsob abaic tal ta jtojolcutic, yu'un ja' stuc Dios ta scoltautic ta pleito”, xcutic.
21C'alal li'abtejcutique, sbejel c'ac'al te li'abtejcutic. La jliquescutic ta sob c'alal to ta xch'ay c'ac'al.#4.21 C'ac'al - Oy boch'o chalic jtotic. Yan li j'o'lol jchi'iltactique te yich'anoj o slanzaic. 22Jech laj calbe noxtoc li jchi'iltaque: “Li jujunoxuc xchi'uc amozoique te oyanic o ta yut lum Jerusalén. Ta ac'ubaltique tsc'an chachabivanic; yan ta c'ac'altique ja' yorail cha'abtejic”, xcut. 23Li vu'un xchi'uc cuts' calaltaque, li queremetic, xchi'uc li jchabivanejetic xchi'inojicune mu'yuc la jloc' jc'u'cutic c'alal livaycutic, xchi'uc te jtsacojcutic o jlanzacutic. Ja' no'ox la jloc' jc'u'cutic ti c'alal li'atincutique.
Currently Selected:
Nehemías 4: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
