Nehemías 3
3
La svoq'uic ta jujuchop yabtelic c'alal la xcha'pasic li coraltone
1Ja' yu'un li banquilal pale Eliasib xchi'uc xchi'iltac ta paleale lic xcha'pasic li ti'coralton Chijetic sbie. Laj yac'beic li sts'amte'altaque, xchi'uc la snacanbeic li smactaque. La spasic noxtoc li coralton xlic ta toyol q'uelub osil Hamea#3.1 Hamea - Ta hebreo c'op ja' smelol vo'vinic (100). c'alal to ta toyol q'uelub osil Hananeel. 2Ja' te lic sts'aquic batel li viniquetic liquemic ta Jericoe. Ja' te lic sts'ac batel ec li Zacur xnich'on Imrie. 3Li smomnich'nabtac Senaae ja' la spasic li ti'coralton, Choy sbie. Laj yac'beic ste'eltac, xchi'uc laj yac'beic smactac, sllavialtac, xchi'uc sbajubiltac. 4Te lic sts'ac batel noxtoc li Meremot xnich'on Urías smomnich'on Cose. Ja'o te lic sts'ac batel ec li Mesulam xnich'on Berequías smomnich'on Mesezabeele. Ja'o te la sts'ac batel ec li Sadoc xnich'on Baanae. 5Te la sts'aquic batel ec li tecoaetique. Pero li boch'o muc'tic cha'ay sbaic te ta stojolique muc sc'anic pasel ta mantal yu'un li banquilaletique, jech muc x'abtejic. 6Li ti'coralton Jesana sbie ja' la spasic li Joiada xnich'on Paseahe, xchi'uc Mesulam xnich'on Besodías. Laj yac'beic ste'eltac, smactac, xchi'uc laj yac'beic sllavialtac xchi'uc sbajubiltac. 7Ja'o te lic sts'ac batel ec li Melatías liquem ta Gabaone, xchi'uc li Jadón liquem ta Meronote, xchi'uc li viniquetic ta Gabaón, ta Mizpa ti ventainbilic yu'un li ajvalil ta smaleb c'ac'al#3.7 C'ac'al - Oy boch'o chalic jtotic. yu'un uc'um Eufratese. 8Ja'o te lic sts'ac batel ec li Uziel xnich'on Harhaía ti lec sna' abtel ta saquil taq'uine. Ja'o te lic sts'ac batel li Hananías xnich'on jun vinic jpasperfumeetique. Ja' jech ivu' yu'unic xcha'pasel li Jerusalén xchi'uc c'alal ta spimil coraltonale. 9Ja'o te lic sts'ac batel ec li Refaías xnich'on Hur, ja' li ajvalil sventa jvoc' yosilal Jerusalene. 10Ja'o te lic sts'ac batel ec li Jedaías xnich'on Harumaf te ta yeloval snae. Ja'o te la sts'ac batel ec li Hatús xnich'on Hasabniase. 11Li Malquías xnich'on Harim, xchi'uc li Hasub xnich'on Pahat-moabe, yan xa o bu lic spasic ec. Ja' la xcha'pasic li toyol q'uelub osil Hornoetic sbie. 12Ja' te lic sts'ac batel ec li Salum xnich'on Halohes, ja' li ajvalil yu'un yan jvoc' yosilal Jerusalene, i'abtej xchi'uc stsebetic. 13Li ti'coralton Stenlejal sbie ja' la spas li Hanún xchi'uc jnaclumetic ta Zanoae. La snacanbeic smactac; laj yac'beic syavialtac xchi'uc sbajubiltac. Xchi'uc la spasic batel o'lol yo'obal ciento (450) metro li coraltone; ic'ot yu'unic c'alal to ta ti'coralton Ch'ayub C'a'ep. 14Li Malquías xnich'on Recab, ajvalil te ta lum Bet-haquereme, ja' la spas li ti'coralton yo' bu Ch'ayub C'a'ep sbie. La snacanbe li smactaque; laj yac'be syavialtac, xchi'uc sbajubiltac.
15Li Salum xnich'on Colhoze, ja' li ajvalil te ta yosilal Mizpae, ja' la spas li ti'coralton Nio' sbie. Laj yac'be smac sjol, la snacanbe smactac; laj yac'be syavialtac xchi'uc sbajubiltac. Xchi'uc ja' la spas noxtoc li coralton te ta stanqueal vo' Siloé ta stuq'uil ts'unubaltic yu'un ajvalil, xc'ot c'alal to ta tec'ubal ti bu chyalic batel ta Lum yu'un Davide. 16Ja' te la sliques batel ec li Nehemías xnich'on Azbuc, ja' li ajvalil yu'un jvoc' yosilal Bet-sure. Te ijelov batel yu'un ta yeloval muquinaltic yu'un David, xchi'uc ta yavil epal vo' c'alal to ta sna soldadoetic.
17Ja' te lic sts'aquic batel ec li levietique. Ja' te lic spas batel li Rehum xnich'on Banie; ja'o lic sts'ac batel ec li Hasabías ajvalil yu'un jvoc' yosilal Keilae; ja' la spasic ti bu sventainojic jujunique. 18Ja'o te lic sts'aquic batel ec li yan yuts' yalalic; ja' li Binúi#3.18 Binúi - Ja' Bavai sbi ta hebreo, pero chvinaj ta 3.24 xchi'uc ta 10.9 ti ja' co'ol xchi'uc Binúi. xnich'on Henadad, ajvalil yu'un yan jvoc' yosilal Keilae. 19Ja'o te la sts'ac batel ec li Ezer xnich'on Jesúa, ajvalil ta Mizpae, xchi'uc ja' la spas batel noxtoc te ta yeloval muyeltic, ta snail abtejebaletic sventa pleito te ta chiquin coraltone. 20Ja'o la sts'ac batel ec li Baruc xnich'on Zabaie. Te la sliques batel ta chiquin coralton, c'alal to ta stuq'uil sti' sna banquilal pale Eliasib. 21Ja'o te lic sts'ac batel ec li Meremot xnich'on Urías, smomnich'on Cose. Te la sliques batel ta sti' sna pale Eliasib, ja' to te ipaj yu'un ti bu c'alal pajem sna li Eliasibe.
22Ja'o te lic sts'ac batel ec li paleetic te nacalic ta stenlejaltic ta ti' uc'um Jordane. 23Ja'o te la sts'aquic batel ta yeloval snaic ec li Benjamín xchi'uc Hasube. Ja'o te la sts'ac batel ec li Azarías xnich'on Maasías smomnich'on Ananiase, te no'ox ta nopol sna i'abtej ec. 24Ja' te la sts'ac batel ec li Binúi xnich'on Henadade. Te la sliques batel ta nopol sna Azarías c'alal to ta yan chiquin coralton. 25Ja'o te lic sts'ac batel ec li Palal xnich'on Uzaie; te la sliques ta chiquin coralton c'alal to ta toyol q'uelub osil ta spasubmantal ajvalil ta yamaq'uil chuquinab. Ja'o te lic sts'ac batel ec li Pedaías xnich'on Farose, 26xchi'uc li j'abteletic ta ch'ulna ti te nacalic ta unin vits Ofele. Ic'ot yu'unic c'alal to ta sti' coralton Vo'etic sbi, ti bu pasbil stoyol q'uelub osilal te ta stuq'uil sloq'ueb c'ac'ale.#3.26 C'ac'ale - Oy boch'o chalic jtotique. 27Li tecoaetique la sts'aquic batel ec; te la sliquesic batel ta nopol muc'ta toyol q'uelub osil, c'alal to ta coralton Ofel.
28Li paleetique te la sliquesic batel ta ti'coralton Ca'etic sbi. Ja' te la spasic ti bu yeloval snaic jujunique. 29Te lic sts'ac batel ec li Sadoc xnich'on Imere; ja' te la spas ta yeloval sna. Ja'o te la sts'ac batel ec li Semaías xnich'on Secanías, ja' li boch'o chchabi ti'coralton Sloq'ueb C'ac'al#3.29 C'ac'al - Oy boch'o chalic jtotic. sbie. 30Ja'o te lic sts'aquic batel ec li Hananías xnich'on Selemías, xchi'uc li Hanún, ja' li svaquibal xnich'on Salafe. Ja'o te lic sts'ac batel ec li Mesulam xnich'on Berequiase, te no'ox ta yeloval sna i'abtej. 31Ja'o te lic sts'ac batel ec li Malquías xnich'on jun vinic lec sna' abtel ta saquil taq'uine. Te to ipaj yu'un ta snaic j'abteletic ta ch'ulna, xchi'uc ta sna jchonolajeletic ta yeloval ti'coralton Mifcad,#3.31 Mifcad - Ta hebreo c'op ja' smelol chich' q'uelel. xchi'uc c'alal to ta biq'uit na ta chiquin coralton. 32Ja'o te lic sts'aquic batel ec li boch'otic lec sna' x'abtejic ta saquil taq'uine xchi'uc li jchonolajeletique; ic'ot yu'unic c'alal to ta ti'coralton Chijetic.
Currently Selected:
Nehemías 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
