Josué 9
9
Oy c'usi la xchapan xchi'uc gabaonetic li israeletique
1Li ajvaliletic yu'un hetetic, amorretic, canaanetic, ferezetic, hevetic, xchi'uc jebusetique laj ya'yic li c'usi ic'ot ta pasele. (Li ajvaliletic le'e ja' te nacajtic ta smaleb c'ac'al#9.1 C'ac'al - Oy boch'o chalic jtotic. yu'un li uc'um Jordán ta toyolaltic, ta vitsetic, ta stenlejaltic, xchi'uc ta scotol ti'ti' Nab Mediterráneo c'alal to ta yosilal Libanoe.) 2Le'e scotolic lic xchap sc'opic; tal stsaquic ta pleito li Josuee xchi'uc li israeletique. 3Pero li hevetic ti te nacajtic ta Gabaone ya'yojic c'usi la spas Josué ta stojol li chib ta lume, ja' li Jericoe xchi'uc li Haie. 4Jech la snopic c'u x'elan xu' ta slo'laic li Josuee. Jech lic sjapuic tal xanubal; ja' la scajanic tal ta sburoic li xcoxtalic ti poco'ic xae xchi'uc li yavil ya'lel sts'usubic pasbil ta nucul ti poco'ic xa, xchi'uc ti pac'anbilic xae. 5Jech noxtoc ja' la slapic tal sc'a'c'u'ic xchi'uc xonobic ti lajemic xae. Xchi'uc ja' laj yich'ic tal spanic ta sventa be ti bu taquinic xa, xchi'uc ti cuxinemic xae. 6C'alal ic'otic yo' bu spasoj scarpanaic ta Gilgal li israeletique, jech c'ot yalbeic li Josué xchi'uc israeletique:
—Li vu'uncutique toj nom liquemuncutic tal. C'otuc ta avo'ntonique jpas ta co'ol co'ntontic, yu'un ac'o lecuc chquil jbatic —xiic.
7Li israeletique jech la stac'beic li hevetique:
—Mu xu' ta jchapantic ti lec chquil jbatique yu'un oy yic'al li' no'ox nopol nacaloxuque#Ex 23.32; 34.12; Dt 7.2; 20.15-16. —xutic.
8Jech la stac'beic li Josuee:
—Xu' chicomcutic ta amozoic —xutic.
Li Josuee jech la sjac'be:
—¿Boch'ooxuc? ¿Bu liquemoxuc tal? —xut.
9Itac'ovic:
—Nom liquemuncutic tal, yu'un laj ca'icutic sc'oplal li Muc'ul Dios avu'unique. Laj ca'icutic c'usi la spas te ta Egipto, 10xchi'uc c'usi la spas ta stojol li chib ajvaliletic yu'un amorretic le' ta jot uc'um Jordane; ja' li ajvalil Sehón nacal ta Hesbón xchi'uc li Og ta Basán ti te to'ox nacal ta Astarote.#Nm 21.21-35. 11Ja' yu'un li banquilaletic cu'uncutique xchi'uc li jchi'iltacutique jech laj yalbuncutic: ‘Ich'ic batel c'usitic chtun avu'unic ta sventa be; batanic yo' bu oyic li israeletique. C'ot albeic ti ta jc'an chcac' jbatic ta sc'obic sventa chijtun yu'unique, xchi'uc ti ta jc'an ta jpastic ta co'ol co'nton jchi'uctique’, xiyutuncutic tal. 12C'alal liloc'cutic tal ta at'unelique, li pan quich'ojcutic tal li'i q'uixin to'ox, pero q'uelavilic, bacuben xa xchi'uc cuxinem xa ivul cu'uncutic. 13Jech noxtoc yach'el to'ox li nucul yavil ya'lel jts'usubcutic c'alal laj quich'cutic tale, pero li' ta orae li'emic xa ivul cu'uncutic. Jech noxtoc li jc'u'cutic xchi'uc jxonobcutique yach'elic to'ox ti c'alal la jlapcutic tale, pero q'uelavilic, lajemic xa ivul cu'uncutic, yu'un toj nom liliccutic tal —xiic.
14Li israeletique la sq'uelbeic scotol li c'usitic yich'ojic tale; laj yilic ti ja' melele, pero mu'yuc la sjac'beic Muc'ul Dios me melel. 15Jech li Josuee te laj yac' ye ta stojolic. Laj yalbeic ta jamal ti mu'yuc ta spasic pleito xchi'uquique, ti te cuxul ac'o comicuque. Ja' jech laj yalic jamal ec scotol li banquilaletic yu'un israeletique.
16Ta yoxibal c'ac'al laj ya'yic ti te no'ox nopol oy slumalique, ti jutuc mu co'oluc te nacalic xchi'uquique. 17Jech iloq'uic batel li israeletique; bat sq'uelbeic bu oy li slumalique. Ta yoxibal no'ox c'ac'al te ic'otic ta lumetic yu'unic. Li lumetic yu'unique ja' Gabaón, Cafira, Beerot, xchi'uc Quiriat-jearim. 18Pero mu'yuc la smilic comel, yu'un li banquilaletic yu'unique yalojbeic xa'ox ta jamal ta stojol Muc'ul Dios ti mu'yuc ta smilique.
Ja' yu'un li israeletique iliquic ta vulajetel ta stojol banquilaletic yu'unic ta sventa ti jech la spasique. 19Li banquilaletique jech laj yalic:
—Li vu'uncutique laj xa calbecutic ta stojol Muc'ul Dios cu'untic ti mu'yuc ta jmiltique. Ja' yu'un li' ta orae mu'yuc c'usi xu' ta jpasbetic. 20Te cuxul ac'o comicuc. Yu'un me ta jsoquestic li c'usi calojtic ta jamal ta stojol Diose, ta x'ilin ta jtojoltic li Diose —xiic.
21Ja' yu'un li banquilaletique laj yalic mantal ti te cuxul ac'o scomtsanique, ti ac'o ochuc ta cuch si', ta lup vo' yu'unic scotolique. Ja' jech laj yaq'uic c'otuc ta pasel c'usi xchapanojic li banquilaletique.
22Li Josuee laj yic' li gabaonetique, jech la sjac'be:
—¿C'u yu'un ti laj alo'launcutique? ¿C'u yu'un laj avalic ti toj nom liquemoxuc tal ti c'alal li' no'ox nopol nacaloxuc yo' bu oyuncutique? 23Ta sventa ti jech laj apasique, chavich' avocolic scotol c'ac'al, mozooxuc chacomic o. Vo'oxuc chbat atuch'ic tal si', chbat alupic tal vo' ti c'alal chtun cu'uncutic te ta sna li Dios cu'uncutique —xut.
24Jech itac'ovic:
—Jech la jpascutic, yu'un lixi'cutic avu'unic ti me chbat amiluncutique. Yu'un laj ca'icutic ti albil ono'ox yu'un Muc'ul Dios li Moisés yajtunel Diose ti vo'oxuc chavich'ic scotol li banamil li'i, xchi'uc ti persa chavulesbeic scotol li yajvaltaque. 25Li' xa oyuncutic ta ac'obique. Pasic li c'usi lec chava'yique —xiic.
26Li Josuee muc xac' ti ac'o milaticuc yu'un israeletic li gabaonetique. 27Ja' no'ox laj yal ti j'ech'el chcomic o ta cuch si', ta lup vo' sventa chtun yu'un scotolique, xchi'uc sventa chtun te ta scajleb smoton Dios yo' bu tst'ujbe yavil stuc Muc'ul Dios chchic'beic smotone. Ja' jech yabtelic o c'alal to tana.
Currently Selected:
Josué 9: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.