Josué 10
10
La stsalic amorretic li israeletique
1-2Li Adonisedeque, ja' li ajvalil ta Jerusalene,#10.1-2 Jerusalén - Ja' jun lum yu'un jebusetic c'alal mu'yuc to ch-och ta sc'obic li israeletique. toj ep ixi' c'alal laj ya'ay ti laj xa stsalic lum Hai li Josuee, ti co'ol la spasbeic c'alal ta ajvalil yu'un jech chac c'u cha'al la spasbeic li lum Jericoe. Xchi'uc laj ya'ay noxtoc ti laj xa spas ta co'ol yo'ntonic xchi'uc israeletic li gabaonetique ti te xa xchi'uquic ta nacleje. C'alal laj ya'ay ti i'ochic xa ta c'abal li gabaonetique, yo'to ixi' ta jyalel, yu'un sna'oj ti ja' jun muc'ta lum li Gabaone, ti ich'bil lec ta muq'ue. Xchi'uc ja' xjelov smuc'ul yu'un li lum Haie, xchi'uc puru simarón viniquetic li yajvaltaque. 3Ja' yu'un li Adonisedeque, ja' li ajvalil ta Jerusalene, la stac batel mantal ta stojol li Hoham, ja' li ajvalil ta Hebrone, xchi'uc Piream, ja' li ajvalil ta Jarmute, xchi'uc Jafía, ja' li ajvalil ta Laquise, xchi'uc ta stojol Debir, ja' li ajvalil ta Eglone. Jech laj yalbe batel: 4“La'ic ta ora; la' coltaicun ta stsalel li gabaonetique yu'un laj xa spas ta co'ol yo'nton xchi'uquic li Josué xchi'uc scotol li israeletique”, xut batel. 5Ja' yu'un li vo'ob ajvaliletic le'e la stsob sbaic tal scotolic xchi'uc yajsoldadoic; te ivul spas scarpanaic ta sjoyobal lum Gabaón sventa tstsaquic ta pleito.
6Li jnaclumetic ta Gabaone la staquic batel mantal ta ora ta stojol li Josué te ta Gilgal yo' bu spasoj scarpanaique. Jech c'ot yalbeic: “Mu me xajip ta avo'nton li amozotaque. La' me coltauncutic ta ora; la' me pojuncutic. Yu'un scotol li ajvaliletic yu'un amorretic ti te nacajtic ta vitsetic ta toyolaltique stsoboj sbaic tal scotolic yu'un chtal smiluncutic”, xutic. 7Jech li Josuee iloq'uic batel ta Gilgal xchi'uc scotol li viniquetic sventa pleitoe, xchi'uc scotol li yajsoldadotac ti lec tsots yo'ntonique. 8Li Muc'ul Diose jech laj yalbe li Josuee: “Mu me xaxi'; vu'un chacac'bot ta ac'ob, me junuc mu xu' yu'un chatsalicot”, xut.
9Li Josuee iloq'uic tal ta Gilgal; sbejel ac'ubal ixanovic tal. Ch'ayel yo'nton itaatic li amorretique. 10Li Muc'ul Diose laj yac' ti ac'o xi'icuc yu'un israeletic li amorretique. Jech li Josuee bats'i ep la smilic comel te ta Gabaón. Ts'acal la snutsic batel ta sbelal Bet-horón; te la smilic batel c'alal to ic'otic ta Azeca xchi'uc ta Maceda. 11C'alal ja'o chjatovic batel ta anil yu'un israeletic te ta yalubaltic Bet-horone, li Muc'ul Diose la sjipbe yalel tal muc'tic bot ta sbaic xco'laj xchi'uc muc'tic ton. Ja' to toj ep ichamic; ja' mu sta jech yepal la smilic ta espada li israeletique.
12C'alal i'ac'bat ta sc'obic amorretic yu'un Muc'ul Dios li israeletique, li Josuee te lic sc'opan li Muc'ul Diose. Ts'acal jech lic yal ta stojol scotol li xchi'iltac ta israelale:
“C'ac'al,#10.12 C'ac'al - Oy boch'o chalic jtotic. pajan te ta lum Gabaone;
U,#10.12 U - Oy boch'o chalic jme'tic. pajan te ta stenlejaltic yu'un Ajalone”, xut.
13Li c'ac'al#10.13 C'ac'al - Oy boch'o chalic jtotic. xchi'uc ue#10.13 Ue - Oy boch'o chalic jme'tique. ipajic ta xanubal.
Ja' to iliquic ta xanubal ti c'alal la stsalic scotol yajcontraic li israeletique.
Le'e ja' te ts'ibabil ta svun li Jaser#2 S 1.18. ti jech ic'ot ta pasele. Li c'ac'ale ipaj te ta o'lol vinajel; jutuc mu junuc c'ac'al inatub li c'ac'ale, muc xanov o batel. 14Mu'yuc ono'ox bu jech ic'ot ta pasel ta vo'one, xchi'uc mu'yuc bu jech chc'ot ta pasel yan velta ti jech ch-a'ibat sc'op yu'un Muc'ul Dios li jun vinique. Yu'un li Muc'ul Diose la scolta ta paspleito li israeletique.
15Jech isutic tal ta scarpanaic te ta Gilgal li Josué xchi'uc scotol xchi'iltaque. 16Pero li vo'ob ajvaliletic ti ijatovic batele te la snac' sbaic ta nailch'en te ta Maceda. 17C'alal laj ya'yic ta ts'acal ti te snac'oj sbaic ta nailch'en li vo'ob ajvaliletique, bat yalbeic li Josuee. 18Li Josuee jech laj yalbe mantal li xchi'iltaque: “Bat setuic lec ta muc'tiquil ton li sti' nailch'ene; tsinic lec comel. Comtsanic boch'o chchabiic li sti' nailch'ene. 19Pero li vo'oxuque, mu me teuc no'ox xlaj avo'ntonic. Bat ac'beic yipal sa'el li cajcontratique; milic noxtoc li jchabivanej yu'unic ta ts'acalpate. Me junuc mu me xavaq'uic suticuc ta slumalic, yu'un li Muc'ul Dios cu'untique yac'ojbutic xa ta jc'obtic”, xut.
20C'alal laj xa stsalic yajcontraic li Josué xchi'uc xchi'iltaque, li boch'otic cuxul to icome te bat snac' sbaic ta lumetic yu'unic. Bats'i ep la smilic; jutuc xa mu laj yulesic o scotol. 21Scotol li israeletique lec tsots isutic tal yo' bu spasoj scarpanaic ta Maceda yo' bu oy li Josuee. Mu'yuc boch'o xu' tstoy sbaic, chchopolc'opojic ta stojol li israeletique.
22Li Josuee jech laj yal: “Jambeic sti' li nailch'ene; loq'uesic tal li vo'ob ajvaliletique”, xi. 23Jech li israeletique la sloq'uesic tal ta nailch'en li vo'ob ajvaliletique, ja' li ajvalil ta Jerusalén, ta Hebrón, ta Jarmut, ta Laquis, xchi'uc ta Eglone. 24C'alal te xa oy yu'unic ta stojol Josuee, li Josuee laj yic' scotol li xchi'iltaque, jech laj yalbe li banquilaletic yu'un soldadoetic te xchi'inoje: “Nopajanic tal; la' pech'beic ta teq'uel snuc' li ajvaliletic li'i”, xut. Jech lic stec'beic li snuq'ue. 25Li Josuee jech laj yalbe: “Mu me xaxi'ic; mu me xlo'ilaj avo'ntonic. Tsc'an oy lec stsatsal avo'ntonic; tsc'an mu xlo'ilaj avo'ntonic. Yu'un li Muc'ul Diose ja' jech co'ol ta spas batel ta stojol scotol avajcontraic ti bu chapasic batel pleitoe”, xut.
26Li Josuee lic smil li ajvaliletique. Laj yal mantal ti ac'o sjoc'anic ta jujubej te' jujunique. Te joc'ol icom o c'alal to imal c'ac'al. 27C'alal chch'ay xa'ox c'ac'ale,#10.27 C'ac'ale - Oy boch'o chalic jtotique. li Josuee laj yal mantal ti ac'o syalesbeic li sbec'talique; ac'o bat yaq'uic ta yut nailch'en ti bu ono'ox la snac' sbaique. La smaquic lec comel ta muc'tiquil ton li sti' nailch'ene; ja' jech oy o c'alal to tana.
Bat spasic yan velta pleito li israeletique
28Ta sc'ac'alil no'ox ti c'alal jech la spasique, li Josuee i'ochic ta lum Maceda; solel laj yulesic o ta j'ech'el. La smilic ta espada scotol li boch'otic te to oyique; me junuc mu'yuc boch'o cuxul la scomtsanic. La smil noxtoc li ajvalile; ja' co'ol la spasbe jech chac c'u cha'al la spasbe li ajvalil ta Jericoe.
29Li Josué xchi'uc scotol xchi'iltaque ibatic ta lum Libna, bat scontrainic noxtoc. 30Li Muc'ul Diose laj yac'be ta sc'obic noxtoc li lume xchi'uc li ajvalil yu'une. La smilic scotol; me junuc mu'yuc boch'o cuxul la scomtsanic. Li ajvalil tee ja' co'ol la spasbeic jech chac c'u cha'al la spasbeic li ajvalil ta Jericoe.
31Ts'acal iloq'uic batel ta Libna noxtoc li Josué xchi'uc xchi'iltaque; ibatic ta Laquis. Te la spas scarpanaic ta nopol li lume; te lic scontrainic noxtoc. 32Li Muc'ul Diose laj yac'be ta sc'obic noxtoc li lum Laquise. Jech ta xchibal c'ac'al i'ochic batel; la smilic ta espada scotol li boch'otic te nacajtique xchi'uc scotol li sts'unub yovolique. Ja' co'ol la spasic jech chac c'u cha'al la spasic ta Libnae. 33Li Horam, ajvalil ta Gezere, ital scotol xchi'uc yajsoldadotac, tal scoltaic li laquisetique. Pero li Josué xchi'uc xchi'iltaque la smilic noxtoc; me junuc mu'yuc cuxul la scomtsanic.
34C'alal ilaj yo'ntonic ta Laquis li Josué xchi'uc xchi'iltaque, ibatic noxtoc ta Eglón. Te c'ot spas scarpanaic ta nopol li lume; te lic spasic pleito xchi'uquic. 35Ta jun no'ox c'ac'al i'och ta sc'obic, jech la smilic ta espada scotol li boch'otic te nacajtique. Solel laj yulesic o comel jech chac c'u cha'al la spasic ta Laquise.
36Ts'acal iloq'uic batel noxtoc ta Eglón; ibatic ta Hebrón.#Jos 15.13; Jue 1.10. Te c'ot stsaquic ta pleito noxtoc. 37C'alal i'och ta sc'obique, laj yulesic o comel scotol; la smilic ta espada noxtoc li ajvalil yu'unique, xchi'uc li cristianoetique, xchi'uc li sts'unub yovolique. Xchi'uc la smilic noxtoc li cristianoetic te ta bic'tal lumetic ti te no'ox nopajtique. Ja' co'ol la spasic jech chac c'u cha'al la spasic ta Eglone.
38Ts'acal iloq'uic batel noxtoc li Josué xchi'uc xchi'iltaque; ibatic ta Debir.#Jos 15.15; Jue 1.11. Te c'ot stsaquic ta pleito noxtoc. 39I'och ta sc'obic li ajvalile xchi'uc li lumetic sventainoje. La smilic ta espada scotol; laj yulesic o comel scotol li cristianoetique xchi'uc li c'usitic te cuxajtique. Jech chac c'u cha'al la spasbeic li ajvalil ta Hebrón xchi'uc ta Libnae, ja' jech la spasic noxtoc ta Debir.
40Ja' jech i'och ta sc'ob Josué scotol li banamil te ta vitsetic ta toyolaltique. I'och ta sc'ob li Néguev, xchi'uc li stenlejaltique, xchi'uc li svitsticale.#Jue 1.9. I'och ta sc'ob noxtoc li ajvaliletique. La smilic scotol; me junuc mu'yuc c'usi cuxul la scomtsanic jech chac c'u cha'al albilic ono'ox yu'un Muc'ul Dios li israeletique. 41Scotol i'och ta sc'ob li Josuee, xlic ta Cades-barnea c'alal to ta lum Gaza. Xchi'uc laj yu'uninbe scotol li yosilal Gosén#10.41 Gosén - Ma'uc li Gosén te ta Egipto banamile. c'alal to ta lum Gabaone. 42Li Josuee ja' to ilaj yo'nton c'alal i'och ta sc'ob scotol li ajvaliletic xchi'uc c'alal ta yosilalique. Yu'un li Muc'ul Diose la scolta batel ta pleito li israeletique. 43C'alal ivu' yu'un li Josuee, isutic tal ta scarpanaic te ta Gilgal xchi'uc scotol li xchi'iltac ta israelale.
Currently Selected:
Josué 10: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
