Josué 8
8
I'och ta sc'obic lum Hai li israeletique
1Li Muc'ul Diose jech laj yalbe li Josuee: “Mu me xaxi'; mu me xchibaj avo'nton. Ic'o batel scotol li viniquetic ti xu' xa yu'unic pleitoe. Muyanic batel ta lum Hai yu'un cac'ojbot xa ta ac'ob li ajvalile, xchi'uc li svinictaque, xchi'uc scotol li slumale, xchi'uc li yosilale. 2Ja' no'ox jech co'ol xapasbeic jech chac c'u cha'al laj apasbeic li lum Jericoe xchi'uc li ajvalil tee. Le'e xu' xa chavich'beic comel scotol li c'usitic oy yu'unique xchi'uc scotol li sts'unub yovolique. Chapanic lec anac'ubbailic te ta spat li lume yu'un jech ch'ayel yo'nton chataic”, xut.
3Ja' yu'un li Josué xchi'uc xchi'iltaque ibat scontrainic li lum Haie. Li Josuee la st'uj lajuneb xcha'vinic (30,000) ta mil stsatsal viniquetic; ja' la stac batel ta ac'ubaltic. 4Jech laj yalbe: “A'yo ava'yic lec, sa'o lec anac'ubbailic te ta spat li lume. Mu me toj nomuc xavac' abaic; chapalucoxuc me lec. 5Li vu'un xchi'uc li yan jchi'iltactique te ta xinopajcutic batel ta lum ec. C'alal chloq'uic tal chtal stauncutic li yajvaltac lume, chijatovcutic batel ta anil jech chac c'u cha'al laj ono'ox jpastic ta yan veltae. 6Li stuquique ac'o snutsuncutic batel ta anil, ja' to me nom xa icom cu'uncutic li lume. Jech ac'o yalic: ‘Ijatovic xa batel cu'untic noxtoc jech chac c'u cha'al ta sba veltae’, ac'o xiicuc. 7Pero li vo'oxuque, licanic tal ti bu anac'oj abaique; la' ochanic ta slumalic, yu'un li Muc'ul Dios cu'untique yac'ojbutic xa ta jc'obtic. 8C'alal me i'och xa ta ac'obique, chiq'uic ta c'oc'. Ja' jech xapasic jech chac c'u cha'al yalojbutic li Muc'ul Diose. Ja' jech chacalboxuc mantal ec li vu'une”, xut.
9Li Josuee laj yal mantal ti ac'o xa baticuc li jvoc' st'ujoje. Jech ibatic, bat snac' sbaic ta o'lol yu'un li Betel xchi'uc Haie. Te xcom ta stuq'uil smaleb c'ac'al#8.9 C'ac'al - Oy boch'o chalic jtotic. yu'un li Haie. Yan li Josuee te bat vayuc ta scarpanaic. 10Ta yoc'omal sob ilic li Josuee; ech' stsob li yan svinictaque. Ja' ba'yucbe ibatic xchi'uc li banquilaletic yu'un israeletique yu'un bat stsalic li cristianoetic te ta lum Haie. 11Scotolic xchi'uc svinictac inopajic batel ta lum. Te ic'otic ta stuq'uil li lum Haie; te la spas scarpanaic ta stuq'uil norte. Li stenlejaltique ja' cacal ta o'lol ic'ot yu'un li scarpanaic xchi'uc li lum Haie. 12Li Josuee te la snac' comel vo'mil (5,000) viniquetic te ta o'lol yu'unic li Betel xchi'uc Hai ta stuq'uil smaleb c'ac'al#8.12 C'ac'al - Oy boch'o chalic jtotic. yu'un li lume. 13Jech la spas sbaic ta cha'voc'. Li jvoq'ue te la snac' sbaic comel ta stuq'uil smaleb c'ac'al#8.13 C'ac'al - Oy boch'o chalic jtotic. yu'un li lume. Li yan jvoq'ue te icomic ta scarpanaic ta stuq'uil Norte. Li Josuee ijelov batel stuc ta ac'ubaltic c'alal to ta o'lol stenlejaltic.
14C'alal laj yil li ajvalil te ta Haie, ta ora iloq'uic tal xchi'uc yajsoldadotac; tal stsaquic ta pleito te ta stenlejaltic ta uc'um Jordán li israeletique. Mu sna'ic me oy yan jvoc' te snac'oj sbaic ta spat li lume. 15Li Josué xchi'uc xchi'iltaque iliquic tal ta anil; itsalatic xa la scuy sbaic. Nutsbil iliquic ta Hai; te ibatic ta sbelal xocol banamil. 16Scotol li viniquetic te ta lum Haie la stsob sbaic scotolic; la snutsic batel li Josuee. C'alal snutsojic tale, nom icom yu'unic li slumalique. 17Me junuc vinic mu'yuc xcom yu'unic te ta lum Hai. Scotolic iloq'uic tal ta snutsel li israeletique, jech jamajtic xa la scomtsanic li slumalique. 18Li Muc'ul Diose jech laj yalbe li Josuee: “Ac'o xa ta ilel senyail ti ja' xa yorail ac'o tal stsalic li lume yu'un cac'ojboxuc xa ta ac'obic”, xut.
Jech li Josuee lic yac' ta ilel senyail ti ac'o xa yich' tsalel li lume. 19Ja' yu'un li boch'otic te snac'oj sbaique iloq'uic tal ta ora scotolic; tal ochicuc ta lum. Ta ora laj yac'beic sc'ac'al.
20C'alal la sq'uel sutel sva'lupatic li viniquetic ta Haie, ja' to laj yilic ti chmuy c'alal ta vinajel li xch'ayilal slumalique. Jech mu xa sna' bu jotucal chjatovic batel, yu'un li israeletic ti ja' to'ox snutsojic tal ta xocol banamile ja' xa tsnutsvanic ec. 21C'alal laj yil Josué xchi'uc scotol xchi'iltac ti ochem xa ta sc'obic lum Hai li boch'otic te snac'oj sbaique, xchi'uc ti ochem xa sc'ac'al yu'unique, ibat yac'beic ec li cristianoetic loq'uemic tal ta lum Haie. 22Jech iloq'uic tal ta lum ec li yan jvoc' li boch'otic i'och xa ta sc'obic li lume; cacal ta o'lol ic'ot yu'unic li yajcontraique. La smilic comel scotol, me junuc mu'yuc boch'o ijatov batel yu'unic. 23Ja' xa no'ox cuxul icom yu'unic li ajvalile. La xchuquic batel; laj yiq'uic batel ta stojol li Josuee.
24C'alal laj xa smilic ta espada scotol li viniquetic ti inutsvanic tale, ibatic noxtoc ta lum Hai; bat smilic scotol li boch'otic te comenique. 25Ja' jech ora icham scotol li lajcha'mil (12,000) jnaclumetic te ta lum Haie; icham c'alal ta vinic ta antsetic. 26Yu'un li Josuee la xch'un li mantal albil ti persa chulesic o scotol li jnaclumetic te ta lum Haie. 27Scotol li c'usitic oy yu'unic te ta lume xchi'uc li xvacaxic xchijique ja' laj yich'ic comel scotol li israeletique, yu'un jech ono'ox albil yu'un Muc'ul Dios li Josuee. 28Li Josuee lec la xchiq'uic li lum Haie. Solel yav la scomtsanic o; ja' jech o c'alal to tana. 29Yan li ajvalil yu'unique la sjoc'an ta te' li Josuee; te joc'ol o c'alal to ibat c'ac'al.#8.29 C'ac'al - Oy boch'o chalic jtotic. C'alal ich'ay c'ac'ale, laj yal mantal ti ac'o syalesbeic li sbec'tale; ac'o bat xmochanic ta ochebal yu'un li lume. Laj yal mantal noxtoc ti ac'o sbusanbeic comel ton ta sba yac'ole. Li ton la sbusanique te busul o c'alal to tana.
Li Josuee laj yapta mantaletic te ta vits Ebal
30Li Josuee laj yac' ta pasel jun scajleb smoton Muc'ul Dios te ta vits Ebal. 31Yu'un jech ono'ox albilic comel yu'un li Moisese, ja' li yajtunel Muc'ul Diose, xchi'uc jech ts'ibabil comel ta svunal li mantaletic ti la sts'iba li Moisese. Jech ts'ibabil: “Jun scajleb smoton Dios latsbil ta sbejequil ton”,#Ex 20.25. xi ts'ibabil. Ja' yu'un li israeletique te la xchic'beic smoton Muc'ul Dios ta sba li scajlebe, xchi'uc te la smilbeic smoton Dios sventa co'ol yo'ntonic xchi'uc. 32Li Josuee te ta sat scotol xchi'iltac la sts'iba ta sba tonetic ta scajleb smoton Dios li mantaletic ti yaloj comel li Moisese.#Dt 27.2-8. 33Jech scotol li israeletique li banquilaletique, li j'abteletique, li jchapanvanejetic yu'unique, xchi'uc li yanlum cristianoetic te oy ta stojolique la sva'an sbaic ta jujujot xocon li xcaxail smantal Muc'ul Diose. Ja' te la sva'an sbaic ta stuq'uil li pale-levietic ti xq'uechojic tal ta snecubic li caxae. J'o'lol te va'al ic'otic ta stuq'uil vits Gerizim; j'o'lol te va'al ic'otic ta stuq'uil vits Ebal sventa chich'ic c'anbel bendición ta stojolic yu'un li pale-levietique. Yu'un jech ono'ox albilic comel ta sliquebal yu'un li Moisés, ja' li yajtunel Muc'ul Diose.
34Ja' yu'un li Josuee te lic yapta ta jujubel li mantaletic yu'un Diose. Te laj yaptabe sc'oplal li bendicione xchi'uc li vocoletique jech chac c'u cha'al ts'ibabil ta svunale. 35Scotol li mantaletic laj yal Moisese laj yapta scotol ta stojol xchi'iltac li Josuee. Laj ya'yic c'alal ta vinic, ta antsetic, ta ololetic, xchi'uc c'alal ta yanlum cristianoetic ti te nacajtic xchi'uquique. Me jbeluc mu'yuc la scomtsan.#Dt 11.29; 27.11-14.
Currently Selected:
Josué 8: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.