Josué 3
3
La xtuch'ic jelovel uc'um Jordán li israeletique
1Ta sob yoc'omal li Josué xchi'uc scotol israeletique iloq'uic batel ta Sitim; te ic'otic ta uc'um Jordán. C'alal mu'yuc to ta xtuch'ic jelovele, te lic spas scarpanaic. 2C'alal i'ech' oxib c'ac'ale, li banquilaletique lic xanovicuc ta scotol carpanaetic. 3Jech laj yalbeic scotol li israeletique: “C'alal chavilic chjelovic xchi'uc xcaxail smantal Muc'ul Dios li pale levietique, loc'anic me batel ti butic oyoxuque. Te nabal xabatic ta spat.#Nm 10.33-36. 4Yu'un jech chana'ic c'uxi chabatic. Yu'un me junuc mu'yuc boch'o xanoven avu'unic li' ta bee. Pero mu me xanopajic batel ta sts'el li caxae; nom no'ox xacomic ta spat. Comtsan abaic junuc kilómetro snatil”, xutic.
5Li Josuee jech laj yalbe li xchi'iltaque: “Ac'o abaic ta lecubtasel, yu'un oc'om chavilic ta spas sq'uelubil stsatsal li Muc'ul Diose”, xut. 6Jech laj yalbe ec li paleetique: “Ich'ic batel li xcaxail smantal Diose. Jelovanic batel ta ba'yucbe yu'un li jchi'iltactique; tuch'ic jelovel li uc'um Jordane”, xut.
Jech li paleetique laj yich'ic batel li xcaxail smantal Diose; ijelovic batel ta ba'yucbe yu'un li xchi'iltaquique. 7Li Muc'ul Diose jech laj yalbe li Josuee: “Li' tanae ta xcac' ich'atan lec ta muc' yu'un scotol li achi'iltac ta israelale. Yu'un jech ac'o yilic ti ta melel li' jchi'inojot jech chac c'u cha'al la jchi'in li Moisese. 8Vo'ot chavalbe ya'yic paleetic ti ac'o yich'ic batel li xcaxail jmantale. C'alal chc'otic ta ti' uc'um Jordane, ac'o ochicuc batel ta yut uc'um; te ac'o sva'an sbaic”, x'utat.
9Ja' yu'un li Josuee jech lic yalbe scotol li xchi'iltac ta israelale: “La'ic acotolic; la' a'yic c'usi chal li Muc'ul Dios cu'untique. 10Li'i ja' svinajeb ti ta melel li' xchi'inojutic li mero cuxul Diose. C'alal chijxanovutic batele, ja' stuc ta smes loq'uel scotol li canaanetic, hetetic, hevetic, ferezetic, gergesetic, amorretic, xchi'uc li jebusetique. 11Q'uelavilic, li xcaxail smantal Dios ti sventainoj sbejel banamile ja' ta xtuch' jelovel avu'unic li uc'um Jordane. 12Ja' yu'un li' ta orae t'ujic lajchabuc viniquetic, jujun vinic ta jujuchopoxuc. 13C'alal chavilic chich'ic xa batel xcaxail smantal Muc'ul Dios li paleetique, li vo'oxuque tic'o ochel avacanic ta uc'um, jech te chlic svoc' sba ta o'lol li uc'ume. Li yoc uc'um chanov tal ta cajale jmoj ta sts'an sba muyel”, xut.
14-16Jech scotol israeletic iloq'uic batel ti bu spasoj scarpanaique, yu'un ta xtuch'ic jelovel li uc'ume. Ja'o yorail tuch' trigo yu'unic, jech noj li uc'um Jordane chmal loq'uel ta sti'ti' li vo'e. Li paleetic ti chich'ic jelovel li xcaxail smantal Diose ja' ba'yucbeic batel yu'un scotol li xchi'iltaquique. C'alal i'ochic jutuc ta uc'um li paleetique, c'alal i'ach' xa'ox jutuc yacanic ta vo'e, li uc'um chanov tal ta cajale ipaj ta xanubal, jech jmoj lic sts'an sba muyel. Nom to ti bu la sts'an sbae ja' to te ta lum Adam ta xocon Saretán. Li yoc uc'um chyal batel ta Nab Arabá ja' li ta Nab Muerto yan sbie i'ul scotol. Jech la svoc' sba li uc'um Jordane, jech ijelovic batel ta lum Jericó scotol li israeletique. 17Scotolic lec taquin laj ya'yic li uc'um Jordán c'alal ijelovique. Li paleetic ti yich'ojic jelovel li xcaxail smantal Muc'ul Diose te iva'iic ta o'lol uc'um scotolic, pero lec taquin li banamil bu va'alique.
Currently Selected:
Josué 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
