Josué 2
2
Li Josuee la stac batel boch'o chbat sq'uelic tal c'u x'elan li osil te ta lum Jericoe
1C'alal te oyic ta Sitime, li Josuee la stac batel ta mucul chib viniquetic jech laj yalbe batel: “Bat q'uelic tal c'u x'elan li banamile xchi'uc li lum Jericoe”, xut.
Jech ibatic, te ic'otic ta sna jun jmulavil ants, Rahab sbi;#Heb 11.31; Stg 2.25. te ivayic ta sna. 2Pero oy boch'o bat yalbe li ajvalil te ta Jericoe. Jech c'ot yalbe:
—Oy jayibuc israeletic ivulic ta ac'ubaltic, yu'un tal spamuc'taic c'u x'elan li cosilaltique —xutic.
3Ja' yu'un li ajvalile oy boch'o la stac batel jech bat yalbe li Rahabe:
—Loq'ueso batel li viniquetic te vulemic ta anae yu'un ja' no'ox talemic ta spamuc'tael jlumaltic —xutic. 4Pero li antse la snac' li chib viniquetique, jech laj yal:
—Ta melel oy ital svu'lanicun chib viniquetic li' ta jnae, pero mu jna' bu liquemic tal. 5Ja'o iloq'uic batel ti c'alal yu'un xa'ox ch-och ac'ubale yu'un ja' xa yorail tsmaquic li ti'coraltone, jech mu jna' bu ibatic. Pero me chbat anutsic ta anile, oy yic'al ta to xataic ta be —xut.
6Pero li antse te laj yac' muyicuc ta yamaq'uil sjol sna; te la snac'. Oy ep ta chuc lino te ta sjol sna yu'un chac' taquijuc. Ja' te la sbut' o lec.
7Li svinictac ajvalile la snutsic batel ta anil ta stuq'uil uc'um Jordán. Te to ic'otic ti bu xtuch'ubil uc'ume. C'alal iloq'uic batele, ja'o la smaquic ti'coralton li soldadoetique. 8C'alal mu'yuc to chvayic li chib viniquetique, li Rahabe imuy batel ta sjol sna, jech laj yalbe li chib viniquetique:
9—Ta jna' ti yac'ojboxuc xa ta ac'obic Muc'ul Dios li osil li'i. Jech scotol li jchi'iltaque ta xi'ic avu'unic. Scotol li yajvaltac banamil li'i toj ep xi'el cha'yic scotolic. 10Yu'un ca'yojcutic ti Muc'ul Dios la staquijesboxuc li Tsajal Nab c'alal laloq'uic tal ta Egipto banamil yu'un lajelovic tal li'i.#Ex 14.21. Xchi'uc ca'yojcutic noxtoc ti laj avulesic o ta j'ech'el li chib ta lum cristianoetique xchi'uc li chib ajvalil yu'unic te oyic ta jot uc'um Jordane, ja' li Sehón xchi'uc Oge;#Nm 21.21-35. ja' li ajvaliletic yu'un amorretique. 11C'alal laj ca'icutique, bats'i ep chixi'cutic avu'unic yu'un laj ca'icutic ti mu'yuc boch'o xu' chastsaloxuque. Yu'un li Muc'ul Diose, ja' li Dios avu'unique, ja' Dios yu'un li vinajele xchi'uc li banamile. 12Jech ta jc'anboxuc vocol ta atojolic ti ac'o avalbun ca'ay ta stojol Muc'ul Dios ti ac'o ac'uxubinuncutic xchi'uc jtot jme', xchi'uc li boch'otic te oyic ta sna li jtot jme'e jech chac c'u cha'al la jc'uxubinoxuque. Ta jc'an ac'o avac'bun quil senyail ti ta melel chac'uxubinuncutique, 13ti muc teuc capal chamilic li jtot jme'e, li jchi'iltac ta voq'uele, ja' li queremetic, xchi'uc tsebetique, xchi'uc scotol li c'usitic oy yu'unique. ¡Coltauncutic me comel! —xut.
14Itac'ovic:
—Xu' ta xcac' jbec'talcutic ta apojelic li vo'oxuque, ja' no'ox venta me mu'yuc chavalic li c'usi ay jpascutique. C'alal chiyac'bun ta jc'obcutic Muc'ul Dios li banamil li'i, ta xajc'uxubinotcutic —xutic.
15Li Rahabe stsacoj sba xchi'uc scoraltonal lum li snae, jech te la xchech yalel ta lazu ta sventanail sna li chib viniquetique. 16Jech laj yalbe:
—Batanic ta toyolaltic yu'un jech mu xastaoxuc li boch'o chast'unoxuque. Te nac'o abaic oxibuc c'ac'al yu'un ac'o suticuc tal ba'yuc li' ta lum li boch'o chast'unoxuque. Ts'acal to xatam batel abeic yan velta —xut.
17Jech itac'ovic:
—Li vu'uncutique ta jpascutic li c'usi laj calcutic ta stojol Dios ti laj ac'anbuncutique. 18Pero c'alal ta xtal xa ochcuncutic li' ta banamile, xajoc'an me li' ta aventana li tsajal lazu li' chachechuncutic o yalele. Li' xatsob abaic ta ana xchi'uc li atot ame'e, li achi'iltac ta voq'uele, xchi'uc scotol li yuts' yalaltac atote. 19Pero me oy boch'o ta xloc' batel li' ta anae, ja' xa ta smul stuc me ichame; muc vu'cun chcom ta jventacutic. Pero me oy c'usi spas junuc li boch'o li' oy ta anae, ja' vu'un chcom ta jventacutic. 20Pero me vo'ot chaval batel li c'usi ay jpascutic li'i, li vu'uncutique muc xa persauc ta jpascutic li c'usi laj calcutic ta stojol Dios ta aventae —xutic.
21—Lec oy, jechuc —xi itac'ov li antse.
La sc'opanan batel, jech ibatic li viniquetique. Li antse te lic xchuc ta sventana li tsajal lazue.
22Li chib viniquetique ibatic ta toyolaltic; te la snac' sbaic oxib c'ac'al ti c'alal ja'o ta xt'unatic yu'un li soldadoetique. Pero muc xtaatic, jech isutic batel ta Jericó li jt'unvanejetique. 23Li chib viniquetique iyalic tal ta toyolaltic. I'ech' xtuch'ic li uc'ume; isutic batel yo' bu oy li Josee; c'ot yalbeic scotol li c'usitic ic'ot ta pasele. 24Jech laj yalbeic: “Li Muc'ul Diose yac'ojbutic xa ta jc'obtic li banamile. Scotol li yajvaltac banamil tee solel chchamic xa ta xi'el cu'untic”, xutic c'otel.
Currently Selected:
Josué 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
