Josué 4
4
La stamic loq'uel lajcha'bej ton ta uc'um Jordán
1C'alal jelovenic xa'ox ta jot uc'um Jordán scotolique, li Muc'ul Diose jech laj yalbe li Josuee: 2“T'ujo lajchabuc achi'iltac, jun vinic ta jujuchopoxuc. 3Albeic ac'o stamic tal jujubejuc ton ta o'lol uc'um; ja' lajcha'bej ta scotol. Ja' te ac'o bat stamic tal yo' bu va'ajtic li paleetique; te to ac'o bat yaq'uic ti bu chapas acarpanaic ta ac'ubaltic tanae”, xut.
4Jech li Josuee lic yic'an li lajchab (12) viniquetic st'ujoj xa'oxe. 5Jech laj yalbe: “Ochanic batel ta mero o'lol yut uc'um Jordán te ta stuq'uil li xcaxail smantal Muc'ul Dios cu'untique. Tamic tal jujubejuc ton; cajano tal ta anecubic. Ja' lajcha'bej ta scotol; ja' jujubej chc'ot ta sventa li jujuchoputique. 6Ja' senyail chcom ta aventaic. C'alal me jech chlic sjac'boxuc anich'nabique: ‘Tati, ¿c'usi sventa li ton li'i?’, me xayutoxuque, 7jech xavalbeic: ‘Li'i, ja' senyail ti la svoc' sba li uc'um ta sventa li xcaxail smantal Muc'ul Diose. Yu'un c'alal ijelov tal ta uc'um li xcaxail smantal Diose, la svoc' sba li uc'ume. Ja' yu'un li tonetic li'i ja' sna'ubil chcom o cu'untic c'alal ta calab jnich'nabtic ti oy c'usi lec ic'ot ta pasel ta jtojoltic, vu'utic li israelutique’, utic”, xi li Josuee.
8Jech lic spasic li c'usi i'albatic yu'un Josuee. La stamic batel lajcha'bej ton ta uc'um Jordán, ja' jujubej ta jujuchopic. Te laj yich'ic batel ti bu la spas scarpanaique; te lic slatsic jech chac c'u cha'al i'albat yu'un Muc'ul Dios li Josuee. 9Jech ec li Josuee la slats yan lajcha'bej ton te ta o'lol uc'um yo' bu la stec'an yacanic li paleetic ti yich'ojic tal xcaxail smantal Diose. Li tone te to oy o c'alal to tana.
10Li paleetic ti yich'ojic tal li xcaxail smantal Muc'ul Diose te va'ajtic o ta o'lol yut uc'um ti c'alal sbats'ilic spasel scotol israeletic li c'usi i'albatic yu'un Muc'ul Dios ta sventa li Josuee. Scotol la spasic jech chac c'u cha'al laj yalbe comel Josué li Moisese. Li israeletique ijelovic ta ora ta jot uc'um scotolic. 11C'alal jelovenic xa ta jot uc'um scotolique, ja'o ijelov ec li xcaxail smantal Muc'ul Diose xchi'uc li paleetique. Ta stojol scotol israeletic ijelovic ta jot uc'um. 12Jech ec li boch'otic liquemic ta Rubén, ta Gad, xchi'uc li o'lol jchop liquemic ta Manasese ijelovic batel ta ba'yucbe xchi'uc yabtejebic ec jech chac c'u cha'al albilic ono'ox yu'un li Moisese. 13Jutuc mu cha'vinicuc ta mil (40,000) ta scotol ti lec chapalic xchi'uc yabtejebic sventa pleitoe. La xchol sbaic lec ta stojol li Muc'ul Diose; ibatic ta stenlejaltic yu'un li lum Jericoe. 14Li Muc'ul Diose ja'o yorail te lic yac' ta ich'el ta muc' ta stojol scotol israeletic li Josuee. Ja' co'ol la spas jech chac c'u cha'al la spas ta stojol Moisés ti jayib c'ac'al cuxule.
15Ja' yu'un li Muc'ul Diose jech laj yalbe li Josuee: 16“Albo paleetic ti ac'o xa jelovicuc ta jot uc'um Jordán xchi'uquic li xcaxail jmantale”, xut.
17Jech li Josuee lic yalbe paleetic ti ac'o xa loq'uicuc batel ta jot uc'ume. 18C'alal ja' to no'ox la stec'an yacanic ta taqui banamil ta ti' uc'ume, li vo' sts'anoj sba muyele ta ora no'ox lic xanovuc yan velta. Inoj, xchi'uc imalan loq'uel ta sti'ti' jech chac c'u cha'al ono'oxe.
19C'alal ijelovic ta jot uc'um Jordán li israeletique, ja' ta slajunebal c'ac'al yochel li sliquebal ue. Te lic spas scarpanaic ta Gilgal ta stuq'uil sloq'ueb c'ac'al#4.19 C'ac'al - Oy boch'o chalic jtotic. yu'un li lum Jericoe. 20Li Josuee ja' te lic slats li lajcha'bej ton laj yich'ic tal ta uc'um Jordane. 21Li Josuee jech laj yalbe scotol li xchi'iltaque: “C'alal me oy jech chlic sjac'boxuc anich'nabic le' to batele: ‘Tati, ¿c'usi sventa li ton li' latsbile?’, me xayutoxuque, 22albeic ti ja' senyail ti itaquij li uc'um Jordán c'alal lijelovutic tal li'i. 23Albeic c'u x'elan la staquijes Muc'ul Dios cu'untic li uc'um c'alal ja'o lijelovutic tale. Albeic ti co'ol jech la spas jech chac c'u cha'al la staquijes Tsajal Nab ti c'alal lijelovcutic tale. 24Jech scotol cristianoetic ta banamil tsna'ic ti toj ech'em stsatsal li Muc'ul Diose, yu'un jech ac'o avich'ic o ta muc' scotol c'ac'al li Muc'ul Dios cu'untique”, xi li Josuee.
Currently Selected:
Josué 4: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.