Job 36
36
Li Eliue laj yal ti toj ech'em smuc'ul li Diose
1Li Eliue jech to laj yal:
2—Malaun jutuc, ta xajchanubtasot;
yu'un oy to ep c'usi ta jc'an chcal sventa ta jpoj li Diose.
3Ta jtunes scotol li jbijile;
chcac' ta ilel ti tuc' c'usi tspas li Jpasvanej cu'une.
4Ta melel muc epalc'opuc li c'usi chcale;
li boch'o li' va'al ta atojole ja' li boch'o oy lec sbijile.
5“Li Diose toj ech'em smuc'ul, pero mu'yuc boch'o biq'uit ta sat;
toj ech'em stsatsal, pero mu sjel o yo'nton.
6Muc teuc no'ox cuxul yu'un li boch'o chopolique,
yan li boch'o abul sbaique tuc' c'usi tspasbe.
7Te oy o sat ta stojol li boch'o lequique;
te chac' chotluc o ta xchotleb li ajvaliletique;
chac' ti ac'o ich'bilicuc o ta muq'ue.
8Pero me chich'ic chuquel ta cadenae,
me chich'ic tsots vocole,
9chlic yac'be yil c'u x'elan li yabtelique,
ti yu'un ja' no'ox ibat ta yo'ntonic toybaile.
10Tsjulubtas sventa ac'o stuq'uibtas sbaic.
Chalbe ti ac'o scomtsanic li c'usi chopol tspasique.
11Me chich'ic ta muq'ue, me tspasic c'usi tsc'ane,
jun no'ox yo'ntonic; mu'yuc c'usi sc'an cha'yic
ti jayib to c'ac'al chcuxiic batele.
12Pero me mu xa'yic c'opanele, chmilatic ta espada,
jech mu'yuc sbijil chch'ayic o batel.
13“Li boch'otic chopolique te tsnac' ta yo'ntonic li sc'ac'al yo'ntonique;
ac'o me oy svocolic, pero mu sc'anbeic vocol li Diose.
14Jech squeremal to chchamic o;
co'ol chch'ayic batel xchi'uc li jpasmuliletique.
15Li cristianoetique ta sventa vocol xu' tstaic coltael yu'un Dios;
ta sventa vocol xu' chvic' satic.
16Ja' jech xu' chascoltaot ta sventa avocol ec li Diose;
chayac'ot lec ta jamalaltic, lec colemot chacom.
Chchapanbot lequil ve'liletic ta mexa.
17Pero li' ta orae vo'ot chatojbe xchopolil li boch'otic chopole;
mu xa xu' chapoj aba ta chapanel xchi'uc ta vocol.
18Ja' yu'un mu lecuc me lec xca'itic xch'amel taq'uine,
mu lecuc me chcac' jbatic ta lo'lael yu'un epal taq'uine.
19C'alal toj tsots avocole, ¿me chacuy ti chaspojot ti ep ac'ulejale,
xchi'uc ti lecuc to tsots vinicot, ti lecuc to xu' avu'une?
20Mu me xcuxetuc xa avo'nton ti chtal li ac'ubaltique
yu'un chanop ti jech mu xa xayilot li Diose.
21Q'uelo me aba, mu me xapas yan velta c'usi chopol.
Ti jech ital li avocole, yu'un jech mu xapas yan velta li c'usi chopole.
22“Na'o me, li Diose toj ech'em svu'el;
mu'yuc boch'o yan jech chchanubtasvan jech chac c'u cha'al li stuque.
23Mu'yuc boch'o xu' chalbe bu beal tsc'an chbat.
Mu'yuc boch'o xu' jech chalbe: ‘Chopol c'usi laj apas’, mu'yuc boch'o xu' xut.
24Na'o me ti tsc'an chavalbe lec sc'oplal yabtel Dios
jech chac c'u cha'al tsq'uejintaic ono'ox li cristianoetique.
25Li cristianoetique chilbeic yabtel li Diose;
ac'o me nom, xu' chilic batel.
26Li Diose toj ech'em smuc'ul, li vu'utique mu xlaj cotquintic;
mu xu' ta jna'betic sjabilal noxtoc.
27Jech noxtoc ja' tsjabajes muyel li vo' ta nabetique;
ja'o chlic sc'atajes tal ta vo'.
28Ja' xa chac' yalel tal ya'lel li toquetique;
malbil no'ox chyal tal ta sba li banamile.
29¿Boch'o xu' yu'un tsna' c'uxi tspuc sba li toque,
xchi'uc c'u x'elan chbac' li chauquetic ta toyole?
30Chavil ti xleblajet no'ox li sacsevuletic yu'une;
tsacubtas scotol sbaba li muc'tic nabetique.#Sal 18.13-15.
31Li Diose ja' jech chac'be sna' cristianoetic ti ja' tspas mantale,
xchi'uc ja' jech chloc' ep sve'elic yu'un.
32Ta stsac ta sc'ob li sacsevule;
ja' tspas batel ta mantal ti bu chc'ot t'abuque.
33Li chauque ja' chac' ta na'el ti chtal tsatsal ic'al vo'e;
c'alal ta ts'unub ovoliletic chaq'uic ta ilel ti chtal xa tsots vo'e.
Currently Selected:
Job 36: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
