Job 35
35
1Jech to laj yal li Eliue:
2—¿Me chacuy ti toj tuc' li c'usi laj avale?
¿Me chanop ti vo'ot xjelov atuq'uil jech chac c'u cha'al li Diose?
3Yu'un jech laj aval: ‘Mu sventauc Dios me ta jsa' jmule;
mu'yuc c'usi lec ta jta noxtoc me mu'yuc ta jsa' jmule’, xachi.#Job 7.20.
4Vu'un chajtac'bot sutel li ac'ope,
xchi'uc sc'opic li achi'iltac li' oyique.
5Q'uelo muyel avil li vinajele;
q'uelo lec avil li toquetique ja' toyol oy avu'un.
6Me chasa' amule, mu ja'uc tsoc avu'un li Diose;
ac'o me ep chasa' li amule, mu'yuc c'usi chc'ot ta pasel ta stojol avu'un.
7Me tuc' c'usi chapase, ma'uc oy c'usi lec tsta avu'un noxtoc;
ma'uc tsta slequilal avu'un li Diose.
8Li cristiano jech chac c'u cha'al vo'ote ja' tsoc ti c'alal chopol c'usi chapase;
ja' chlecubic noxtoc ti c'alal lec c'usi chapase.#Job 22.2-3.
9“Ta scoj tsots uts'intael ch-avan li cristianoetique;
ta scoj ilbajinel yu'un jpasmantaletic ch-oq'uic ta sc'anel vocol.
10Pero mu'yuc jech chalic:
‘¿Bu oy li Diose?, ja' li Boch'o la spasutique,
ti chijyac'butic xcuxetel co'ntontic c'alal xco'laj xchi'uc ic' osil chquiltique,
11ti xjelov to jbijiltic chijyac'butic jech chac c'u cha'al li chonbolometique,
ti ech'em chisabaltajesutic jech chac c'u cha'al mutetique’, mu'yuc xiic.
12Ac'o me ch-avanic, pero mu xtac'batic yu'un li Diose,
yu'un chopol yo'ntonic, xchi'uc jtoybaetic.
13Li Diose mu xich' ta muc' li c'usi mu'yuc stue;
li Boch'o ech'em svu'ele li c'usi mu'yuc stue mu sc'an sq'uel, mu sc'an xa'ay.
14¿C'u x'elan xu' tstuc'ulan ti c'alal chaval ti mu'yuc chavil c'usi tspas li Diose?
Scotol ti c'u xa'elane te xa oy ta stojol; malao no'ox ava'ay.
15Chaval ti mu x'ilin, ti mu xac'be stojol li c'usi chopole,
xchi'uc ti mu sventauc li muliletique.
16Pero li c'usi chavale Job, mu'yuc stu;
li epal lo'il chapase mu'yuc smelol o.
Currently Selected:
Job 35: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
