Job 37
37
1“C'alal chca'ay ti chtal xa tsots chauquil vo'e,
xbitbun no'ox liquel li co'ntone, chloc' xa ta yav ya'yel.
2A'yo lec ava'ay c'u x'elan tsots chbac' sc'opojel li Diose,
xchi'uc li chauc cht'om loq'uel ta yee.
3Sjislajet to batel yu'un ta scotol vinajel;
chvinaj c'alal to ta jujujot sti' banamil.
4Ta jliquel ja'o chca'ibetic yech'al
c'alal tsots chlic c'opojuc li Diose.
Ac'o me laj yich' a'yel li sc'ope, pero mu xpaj o li chauque.
5C'alal tst'omes loq'uel sc'opojel li Diose,
ep c'usitic muc'tic chc'ot ta pasel ti mu xca'ibetic smelole.
6Ja' tspas mantal ti ac'o yaluc ta banamil li tayoe;
ja' tspas ta mantal ti tsots yip ac'o taluc li chauquil vo'e.
7Yu'un jech ac'o maquicuc ta abtel li cristianoetique;
jech ac'o yotquinic ti ja' tspas mantal li Diose.
8Li chonbolometique ch-och ta xch'enic;
te tsnac' sbaic o.
9Ta stuq'uil sur chloc' tal li muc'ta sutub iq'ue;
ta norte chlic tal li siquil iq'ue.
10Ta yic'al ye Dios no'ox ta x'ayin li tayoe,
jech ta xlic spat sba li vo'etique.#Sal 147.17.
11Ts'acal chlic yac'be xcuch batel li toquetique;
ja' xa chlic scocan yalel tal, capal ta sacsevuletic chac' tal.
12Li toquetique xvalc'uj sutbijic no'ox;
ja' chch'unic c'usi ch-albatic yu'un li Diose;
ja' jech tspasic ta sbejel banamil.
13Scotol le'e xu' tstunes sventa chac'be stoj o smul cristianoetic li Diose,
xchi'uc sventa chac'be o yil slequil yo'nton.
14“Job, a'yo lec ava'ay;
nopilano lec ava'ay ti xch'ay co'ntontic yu'un yabtel li Diose.
15¿Me xana' c'u x'elan tspas scotol li Dios le'e,
xchi'uc c'u x'elan chut ti tstsan ta toc yu'un li sacsevule?
16¿Me xana' c'u x'elan ti jech no'ox joc'ol ta ic' li toque?
Ja' svinajeb ti toj labal sba c'u x'elan sbijil li Diose.
17¿Me xana' c'u x'elan ti toj q'uixin chava'ay ac'u'
c'alal chvul li' ta banamil li ic' chlic tal ta sure?
18¿Me vo'ot laj acolta ta xlich'anel vinajel li Dios
ti jech lec tsots icom jech chac c'u cha'al lechlech taq'uine?#Gn 1.6.
19Albuncutic me oy c'usi stac' chcalbetic li Diose.
Li vu'uncutique mu jna' c'usi chcalcutic;
mu xu' toj ep chic'opojcutic ta stojol.
20Li vu'une mu'yuc chcalbe ti oy ca'yej ta stojole;
me oy c'usi chcale yu'un xa no'ox ta jc'an ti ac'o yulesun oe.
21“Q'uelavil, mu xu' ta jq'ueltic c'ac'al#37.21 C'ac'al - Oy boch'o chalic jtotic. ti c'alal chbut'e;
pero c'alal me chtal tsots iq'ue tsacubtas lec scotol.
22Ta stuq'uil nortee chquiltic batel jech chac c'u cha'al xojobal c'anal taq'uin;
toj yan to sba yutsil slequilal li Dios chvinaje.
23Yu'un toj ech'em svu'el, mu jna'tic c'u x'elan;
toj ech'em stsatsal, tuc' c'usi tspas, mu'yuc boch'o ta jech no'ox chac'be svocol.
24Ja' yu'un scotol cristiano xi'bal sba cha'yic,
yu'un li stuque mu xich' ta muc' li boch'otic tsnop ti oy lec sbijilique —xi li Eliue.
Currently Selected:
Job 37: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
