Esdras 9
9
Li Esdrase la sc'opan Dios ta sventa smul xchi'iltac
1C'alal i'ech' scotol le'e, italic ta jtojol li banquilaletique. Jech vul yalbicun: “Li jchi'iltactic ta israelale, xchi'uc li paleetique, li levietique mu'yuc ono'ox la svoc' sbaic ta stojol li yanlum cristianoetique, ja' li cananetic, li hetetic, li ferezetic, li jebusetic, li amonetic, li moabetic, li egiptoetic, xchi'uc li amorretique. Ja' jech tspasic ec jech chac c'u cha'al sbol talelic li cristianoetique le'e. 2Yu'un laj yic'beic stsebic, xchi'uc laj yac'beic yic' squeremic noxtoc. Ja' yu'un li steclumal Diose laj xa scap sbaic xchi'uc li yantic lumetique. Li boch'otic ba'yuc la spasic li muliletic le'e ja' li banquilaletic xchi'uc jpasmantaletique”, xiyuticun.
3C'alal laj ca'ye, la jli' jc'u'; la jbul stsotsil jol xchi'uc quisim, yu'un toj vocol laj ca'ay. Jech te lichoti; ep laj cat co'nton. 4Te la stsob sbaic tal ta jtojol li boch'otic ixi'ic yu'un li stojol mulil chac' Dios ta scoj smulic li boch'otic ja' to no'ox isutic tal ta yan banamile. Pero li vu'une te chotolun o chcat co'nton c'alal to la sta yorail chich' milel smoton Dios ta bat c'ac'al.#9.4 C'ac'al - Oy boch'o chalic jtotic. 5C'alal jech orae, te litots xchi'uc yatel co'nton, jech li'em o li jc'u'e. Te lic jquejan jba; la jc'opan li Muc'ul Dios cu'une, 6jech laj calbe: “Dios cu'un, toj ep chiq'uexov ta atojol. Mu xa jna' c'usi chacalbot, yu'un bats'i ep li jmulcutique; jeloven xa c'alal ta jolcutic, c'otem xa c'alal ta vinajel. 7Yu'un ta vo'one c'alal cuxul ono'ox li jmoltot jyame'cutique, xchi'uc c'alal to tanae, ja' jech staoj yav o ta jsa'ilan o tal tsots jmulcutic. Ta scoj jmulcutic ti li'ochcutic ta sc'ob yantic ajvaliletic li' ta banamil c'alal ta ajvaliletic, ta paleetic cu'uncutique, jech la jtacutic milel, chuquel ta yan banamil, elc'anbel c'usi oy cu'uncutic, q'uexlaltasel jech chac c'u cha'al chc'ot ta pasel li' ta ora noxtoque. 8Muc'ul Dios cu'un, li' ta orae ta sventa xa no'ox slequil avo'nton ti licolcutic to tal avu'un ti c'u quepal li' tsoboluncutique, yu'un jech jun co'nton xu' li' chinaquicutic avu'un ta ch'ul banamile. Laj to avac'bun quilcutic saquil osil, yu'un laj to acoltauncutic jliqueluc ta sventa li mozoinel chquich'cutique. 9Ac'o me mozoinbiluncutic, pero muc xacomtsanuncutic; laj to avac'bun quilcutic slequil avo'nton ta sventa li ajvaliletic ta Persiae. Laj to avac' cuxicuncutic sventa tal jcha'pascutic li ch'ulna avu'un laj yich' vuq'uesele ti yav xa'ox li' oye. Laj to achabi li Judá xchi'uc Jerusalene.
10“Dios cu'un, ¿c'usi xu' chcalcutic ta atojol ta sventa ti jech la jpascutique? Yu'un muc jch'uncutic li mantaletic avu'un 11ti laj avalbuncutic ta sventa avajtuneltac, ja' li j'alc'opetic avu'une. Jech laj avalbuncutic: ‘Li banamil yo' bu chacac'boxuque boliben ta scoj smulic li cristianoetic tee. Nojem ta sbol talelic, xchi'uc li c'usitic toj chopol tspasique’, xavutuncutic. 12Laj avalbuncutic noxtoc ti mu me xcac'cutic yic' sbaic xchi'uc jquerem jtsebcutic li squerem stsebique.#Ex 34.11-16; Dt 7.1-5. Xchi'uc laj avalbuncutic ti mu xu' ta jco'lajes co'nton jchi'uccutic li cristianoetic le'e, yu'un jech oy lec jtsatsalcutic o, jech li' ta jve'cutic o li c'usitic chloc' li' ta banamile, xchi'uc jech xu' chcom o ta yu'unic li calab jnich'nabcutique.
13“Ac'o me toj chopol c'usi la jpascutic, ac'o me toj tsots jtaoj jmulcutic ta atojol, vo'ot li Diosot cu'uncutique, pero muc jechuc yepal laj avac' jtojcutic ti c'u yepal la jsa' jmulcutique, yu'un laj to acoltauncutic tal. 14Ja' yu'un li'i ta orae mu xa smeloluc ti ta jbajcutic li mantaletic avu'une, xchi'uc mu xa smeloluc ti chbat jpas ta co'ol co'nton jchi'uccutic li yanlum cristianoetic ti toj chopol stalelique. Yu'un cha'ilin ta jtojolcutic, chavulesuncutic jcotolcutic me jech ta jpascutique.
15“Muc'ul Dios yu'un Israel, toj tuc' avo'nton ta jtojolcutic. Vo'ot jech laj ac'an ti vi to quepal cuxuluncutic ta orae. Ta melel li vu'uncutique oy jmulcutic ta atojol, ja' yu'un mu smeloluc ti li' oyuncutic ta atojole”, xi la sc'opan Dios li Esdrase.
Currently Selected:
Esdras 9: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.