Esdras 10
10
Li judaetique la sloq'uesic batel li yanlum antsetic yic'ojique
1C'alal te xquejet xpatet, te x'oc'olet ta sc'opanel Dios ta ch'ulna li Esdrase, te ital set sbaic ta stojol ep israeletic. C'alal ta vinic ta antsetic ta ololetic italic; bats'i ep laj yoc'ta sbaic ec. 2Ja' yu'un li Secanías xnich'on Jehiel, smomnich'on Elame, te lic c'opojuc, jech laj yalbe li Esdrase: “Toj tsots jtaoj jmulcutic ta stojol li Dios cu'untique, yu'un laj quic'ancutic li antsetic ta yantic lume. Ac'o me jech jpasojcutic, pero oy to c'uxubinel li' ta jtojoltic, vu'utic li israelutique. 3Ja' lec jchapantic ta stojol Dios ti ac'o yich' taquel sutel li antsetic xchi'uc yalabic jech chac c'u cha'al chaval vo'ote xchi'uc li boch'otic chich'ic ta muc' mantaletic yu'un Diose. Ja' ac'o jpastic c'usi chal li mantaletique. 4Lican me, yu'un vo'ot oy ta aventa xu' chapas. Li' chajcoltaotcutic ec; tsotsan, ac'o pasuc ta ora”, xut.
5Jech lic sva'an sba li Esdrase. Laj yalbe banquilal paleetic, levietic, xchi'uc scotol israeletic ti ac'o yalic ta stojol Dios me tspasic li c'usi chale. Te laj yalic ta jamal scotolic ti tspasique. 6Li Esdrase iloc' batel ta ch'ulna; ibat ta sna Johanán xnich'on Eliasib. Mu'yuc ve'em, mu'yuc yuch'oj vo', yu'un toj ep chat yo'nton ta sventa smulic li xchi'iltac ti i'ayic tal ta chuquel ta yan banamile.
7Te lic spuquic mantal ta scotol Judá xchi'uc ta Jerusalén ti ac'o stsob sba scotolic te ta Jerusalén li boch'otic isutic batel ta yosilalique. 8Li boch'otic mu xc'otic ta yoxibal c'ac'al jech chac c'u cha'al xchapanojic li jpasmantaletic xchi'uc li banquilaletique, ta xich'ic pojbel c'usitic oy yu'unic, xchi'uc ta xich'ic loq'uesel batel ta stojol xchi'iltaquic ti isutic tal ta mozoile, yu'un ja' jech la xchapanic li jpasmantaletic xchi'uc li banquilaletique. 9Ja' yu'un scotol li judaetic xchi'uc benjaminetique la stsob sbaic ta Jerusalén ta yoxibal c'ac'al; ja' ta jtob (20) c'ac'al yochel li sbalunebal ue. Scotolic te ichotiic ta yamaq'uil ch'ulna. Te xa chniquic ta scoj li c'usi chich' chapanele xchi'uc ta scoj ti tsots chac' vo'e. 10Ja' yu'un li pale Esdrase lic va'luc, jech laj yal:
—Li vo'oxuque toj tsots ataoj amulic ta sventa ti laj aviq'uic li yanlum antsetique. Jech laj avaq'uic epajuc mulil ta jtojoltic vu'utic li israelutique. 11Ja' lec otquino amulic li' ta stojol li Muc'ul Diose, ja' li Dios yu'un jmoltotactic ta vo'onee. Ja' pasic li c'usi tsc'ane. Voc'o abaic ta stojol li yanlum cristianoetique xchi'uc ta stojol li antsetic avic'ojique.
12Scotol li israeletique tsots i'avanic, jech laj yalic:
—Lec oy, ta jch'uncutic li c'usi chavale. 13Pero ¿c'usi ta jpastic, yu'un mu xch'abi li vo'e? Mu xu' chicomcutic ta xoraltic. Li a'yeje mu xlaj yich' chapanel ta jun chib no'ox c'ac'al, yu'un toj epuncutic ti jech jtaoj jmulcutique. 14Ja' lec ja' xa no'ox ac'o comicuc ta jq'uexolcutic li banquilaletic cu'uncutique. Li boch'otic te nacajtic ta lumetic cu'uncutic ti yic'anojic li yanlum antsetique ac'o yich' sa'bel sc'ac'alil li c'usi ora chtalique. Xu' chchi'inic tal li j'abteletic xchi'uc li jchapanvanejetic cu'uncutique, ja' to me ilaj sc'ac'al yo'nton ta jtojoltic li Diose —xiic.
15-16Scotol li boch'otic i'ayic tal ta mozoile lec laj ya'yic ti jech chich' pasele. Ja' xa no'ox muc xc'ot ta yo'ntonic li Jonatán xnich'on Asaele xchi'uc li Jahazías xnich'on Ticvae, xchi'uc jech muc xc'ot ta yo'ntonic ec li levietique, ja' li Mesulam xchi'uc Sabetaie. Li pale Esdrase lic st'uj stuc jayibuc viniquetic ti ja' banquilaletic ta jujuchop sbiique. Ta sba c'ac'al yochel slajunebal u la stsob sbaic scotol li boch'otic laj yich'ic t'ujel sventa chchapanic c'u x'elan chcom li a'yeje. 17Ta sba c'ac'al yochel li sba ue ichapaj yu'unic c'u x'elan chcom li boch'otic yic'ojic yanlum antsetique.
18Li paleetic ti yic'ojic yanlum antsetic la staique ja' liquemic:
Ta smomnich'nabtac Josué xnich'on Josadac xchi'uc yuts' yalaltaquic Maasías, Eliezer, Jarib, xchi'uc Gedalías. 19Le'e jun yo'ntonic la staquic loq'uel li yajnilique. Laj yaq'uic jcot chij ta smoton Dios ta sventa li smulique.
20Ta smomnich'nabtac Imere ja' Hanani Zebadías.
21Ta smomnich'nabtac Harime ja' Maasías, Elías, Semaías, Jehiel, xchi'uc Uzías.
22Ta smomnich'nabtac Pasure ja' Elioenai, Maasías, Ismael, Natanael, Jozabad, xchi'uc Elasa.
23Ta smomnich'nabtac levietique ja' Jozabad, Simei, Kelaía ja' Kelita yan sbi, Petaías, Judá, xchi'uc Eliezer.
24Ta jq'uejimoletique ja' Eliasib.
Ta jchabi ti'naetique ja' Salum, Telem, xchi'uc Uri.
25Jech noxtoc li israeletic ti yic'anojic yantic antsetic la staique ja' liquemic:
Ta smomnich'nabtac Parose, ja' Ramía, Jezías, Malquías, Mijamín, Eleazar, Malquías, xchi'uc Benaía.
26Ta smomnich'nabtac Elame ja' Matanías, Zacarías, Jehiel, Abdi, Jeremot, xchi'uc Elías.
27Ta smomnich'nabtac Zatue ja' Elioenai, Eliasib, Matanías, Jeremot, Zabad, xchi'uc Aziza.
28Ta smomnich'nabtac Bebaie ja' Johanán, Hananías, Zabai, xchi'uc Atlai.
29Ta smomnich'nabtac Banie ja' Mesulam, Maluc, Adaía, Jasub, Seal, xchi'uc Ramot.
30Ta smomnich'nabtac Pahat-moabe ja' Adna, Quelal, Benaía, Maasías, Matanías, Bezaleel, Binúi, xchi'uc Manasés.
31Ta smomnich'nabtac Harime ja' Eliezer, Isías, Malquías, Semaías, Simeón, 32Benjamín, Maluc, xchi'uc Semarías.
33Ta smomnich'nabtac Hasume ja' Matenai, Matata, Zabad, Elifelet, Jeremai, Manasés, xchi'uc Simei.
34Ta smomnich'nabtac Banie ja' Madai, Amram, Uel, 35Benaía, Bedías, Quelúhi, 36Vanías, Meremot, Eliasib, 37Matanías, Matenai, Jaasai, 38Bani, Binúi, Simei, 39Selemías, Natán, Adaía, 40Macnadebai, Sasai, Sarai, 41Azareel, Selemías, Semarías, 42Salum, Amarías, xchi'uc José.
43Ta smomnich'nabtac Neboe ja' Jeiel, Matatías, Zabad, Zebina, Jadau, Joel, xchi'uc Benaía.
44Le'e ja' scotolic yic'ojic yanlum antsetic, pero la sloq'uesic batel xchi'uc yolic.
Currently Selected:
Esdras 10: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.