Esdras 8
8
Sbiic boch'otic isutic batel ta Jerusalén
1Li'i ja' sbiic li banquilaletic ta jujuchop sbiic ti co'ol iloq'uic batel ta Babilonia xchi'uc li Esdras c'alal ochem ta ajvalilal li Artajerjese, xchi'uc li' oy sbiic li smoltotic ta vo'onee:
2-3Gersón smomnich'on Finees;
Daniel smomnich'on Itamar;
Hatús xnich'on Secanías smomnich'on David;
Zacarías xchi'uc lajuneb xvaxacvinic (150) viniquetic jmoj tsacajtic sbiic, ja' smomnich'nabtac Paros;
4Elioenai xnich'on Zeraías smomnich'on Pahat-moab, xchi'uc lajunvinic (200) viniquetic la xchi'inic sutel;
5Secanías xnich'on Jahaziel smomnich'on Zatu, xchi'uc yan vo'lajunvinic (300) viniquetic la xchi'inic sutel;
6Ebed xnich'on Jonatán smomnich'on Adín, xchi'uc lajuneb yoxvinic (50) viniquetic la xchi'inic sutel;
7Jesaías xnich'on Atalías smomnich'on Elam, xchi'uc yan lajuneb xchanvinic (70) viniquetic la xchi'inic sutel;
8Zedaías xnich'on Micael smomnich'on Sefatías, xchi'uc yan chanvinic (80) viniquetic la xchi'inic sutel;
9Obadías xnich'on Jehiel smomnich'on Joab, xchi'uc yan vaxaclajuneb xbuluchvinic (218) viniquetic la xchi'inic sutel;
10Selomit xnich'on Josifías smomnich'on Bani, xchi'uc yan vaxacvinic (160) viniquetic la xchi'inic sutel;
11Zacarías xnich'on Bebai smomnich'on Bebai, xchi'uc yan vaxquib xcha'vinic (28) viniquetic la xchi'inic sutel;
12Johanán xnich'on Hacatán smomnich'on Azgad, xchi'uc yan lajuneb svacvinic (110) viniquetic la xchi'inic sutel;
13Elifelet, Jeiel, xchi'uc Semaías ja' li slajeb xa smomnich'on Adonicame, xchi'uc yan oxvinic (60) viniquetic la xchi'inic sutel;
14Utai xchi'uc Zabud smomnich'on Bigvai, xchi'uc yan lajuneb xchanvinic (70) viniquetic la xchi'inic sutel.
Sc'oplal j'abteletic ta ch'ulna
15Vu'un li Esdrasune lic jtsob scotol ti jech yepal jchi'iltaque; te la jtsob jbacutic ta nopol bevo' chc'ot ta Ahavae. Oxib c'ac'al te lijalijcutic. C'alal la jq'uel scotol li jchi'iltaque xchi'uc li paleetique, me junuc leví vinic mu'yuc te oy. 16Jech lic jtac batel li Eliezer, Ariel, Semaías, Elnatán, Jarib, Elnatán, Natán, Zacarías, xchi'uc Mesulam, ja' li viniquetic ti lec ich'bilic ta muq'ue. Xchi'uc la jtac batel noxtoc li Joiarib xchi'uc Elnatán, ja' li jchanubtasvanejetique. 17Laj calbe ti ac'o baticuc ta stojol Ido, ja' li banquilal te ta jun lum Casifiae. Laj calbeic batel scotol c'usi chc'ot yalbeic li Ido xchi'uc xchi'iltaque, ja' li j'abteletic ta ch'ulna yu'unique. Yu'un ac'o yiq'uic tal viniquetic sventa chcoltavanic ta abtel ta ch'ulna yu'un li Dios cu'untique. 18Coliyal Dios ti laj yiq'uic tal li Serebías ti lec bije. Ja' li xnich'on Malhi, smomnich'on Levie. Laj yiq'uic tal xchi'uc xnich'nab, xchi'uc yuts' yalaltac. Ja' vaxaclajuneb (18) ta scotolic. 19Jech noxtoc laj yiq'uic tal li Hasabías xchi'uc Jesaías; ja' li smomnich'nabtac Merarie. Laj yiq'uic tal xchi'uc xnich'nabic xchi'uc yan xchi'iltaquic. Ja' jtob (20) ta scotolic.
20Yan li j'abteletic ta ch'ulna sventa tscoltaic ta abtel levietic jech chac c'u cha'al la xchapan comel li David xchi'uc li banquilaletic yu'une oy buluchvinic (220). Scotol le'e tsacajtic ta vun sbiic.
21C'alal te oyuncutic ta nopol uc'um Ahavae, laj cal mantal ti ac'o quicta quiximcutic, yu'un jech ac'o cotquin jmulcutic ta stojol li Diose, xchi'uc ac'o jc'anbecutic ti ac'o xchabiuncutic batel ta be jchi'uc cajnil jnich'nabcutic xchi'uc c'usitic oy cu'uncutique. 22Yu'un chiq'uexov ta stojol ajvalil me ta jc'anbe yajsoldadotac sventa ac'o scoltauncutic me oy bu la jta cajcontracutic ta bee. Yu'un jech ono'ox calojbe li ajvalile: “Li boch'otic ta sa'ic Diose, ta xcoltaatic yu'un. Yan li boch'otic ta scomtsanic yich'el ta muq'ue, tsots ta x'ilintaatic”, xcut ono'ox. 23Ja' yu'un laj quicta quiximcutic; la jc'anbecutic vocol Dios cu'untic ti ac'o scoltauncutique. Laj ya'ibun li jc'opcutique.
24Jech te lic jvoc' loq'uel lajchab banquilal yu'un li paleetique: ja' Serebías, Hasabías, xchi'uc lajuneb xchi'iltaquic. 25Te la jbisbeic li c'anal taq'uin, li saquil taq'uin, xchi'uc li c'usitic chtunan ta ch'ulna ti laj yac' ta sventa ch'ulna yu'un Dios li ajvalile, xchi'uc li yich'ub-c'optaque, xchi'uc li banquilaletic yu'une, xchi'uc scotol li jchi'iltactic te oyique. 26C'alal la jbise, laj cac'be ta sc'obic. Ja' jun xcha'vinic ta mil xchi'uc o'lol yo'bal ciento (21,450) kilo saquil taq'uin, xchi'uc vo'vinic (100) c'usitic chtun ta ch'ulna pasbil ta saquil taq'uin, xchi'uc oxmil xchi'uc oxib ciento (3,300) kilo c'anal taq'uin. 27Xchi'uc laj cac'beic noxtoc jtob (20) muc'tic tazaetic pasbil ta c'anal taq'uin, ja' vaxquib kilo yalal ta scotol. Xchi'uc chib vaso pasbil ta bronce, lec sts'ayayet pasbil, jutuc mu co'oluc stojol jech chac c'u cha'al pasbil ta c'anal taq'uin.
28Jech laj calbeic: “Li vo'oxuque ts'u'iltasbiloxuc yu'un Muc'ul Dios jech chac c'u cha'al ts'u'iltasbil li c'usitic chtun ta ch'ulnae. Li saquil taq'uin xchi'uc c'anal taq'uine ja' smoton li Muc'ul Diose, ja' li Dios yu'un jmoltotactique. 29Q'uelic me, chabiic me lec batel, ja' to me c'ot yich' bisel ta junuc cuarto te ta xch'ulna Muc'ul Dios ta stojol li banquilal paleetique, li levietique, xchi'uc li banquilaletic ta jujuchop sbiic jchi'iltactic te ta Jerusalene”, xcut li jchi'iltaque. 30Li paleetic xchi'uc levietique laj yich'ic li saquil taq'uin, li c'anal taq'uin, xchi'uc li c'usitic chtun ta ch'ulnae. Laj yich'ic batel ta ch'ulna yu'un Dios cu'untic te ta Jerusalén.
31Ta xlajchabal c'ac'al yochel li sba ue, liloc'cutic batel ta nopol uc'um Ahava; libatcutic ta Jerusalén. Li Dios cu'untique la scoltauncutic ta sc'ob li cajcontracutique xchi'uc li j'eleq'uetic la jtacutic ta bee. 32C'alal lic'otcutic ta Jerusalene, oxib c'ac'al la jcuxcutic. 33Ta xchanibal c'ac'ale lic yich' bisel li saquil taq'uin, li c'anal taq'uin, xchi'uc li c'usitic chtun ta ch'ulnae. Ja' i'och ta sc'ob li pale Meremot xnich'on Uriase. Li Uriase te xchi'uc li pale Eleazar xnich'on Fineese, xchi'uc li Jozabad xnich'on Jesuae, xchi'uc li Noadías xnich'on Binúi, ja' li levietique. 34C'alal laj yich' bisel, laj yich' atel c'u yepale, laj yich' ts'ibael ta vun.
35Li boch'otic iloq'uic tal ta chuquel ta yan banamile la xchiq'uic matanaletic ta stojol li Dios yu'un Israele, xchi'uc ta sventa scotol li israeletique. Ja' laj yaq'uic lajcha'cot (12) ch'ium vacax, vaclajuneb yo'vinic (96) tot chij, vuclajuneb xchanvinic (77) ch'ium chij, xchi'uc lajcha'cot (12) tot tentsun; ja' matanal ta sventa smulic. Laj yich' chiq'uel scotol ta stojol li Muc'ul Diose. 36Ts'acal bat yalbeic noxtoc c'usi yaloj batel ajvalil li j'abteletic, li jpasmantaletic te ta smaleb c'ac'al#8.36 C'ac'al - Oy boch'o chalic jtotic. yu'un uc'um Eufratese. Jech lic yich'ic coltael li israeletique, xchi'uc laj yich'ic coltael ta sventa li ch'ulna yu'un Diose.
Currently Selected:
Esdras 8: TZE97
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.