Esdras 7
7
Isutic batel ta Jerusalén ec li Esdras xchi'uc xchi'iltaque
1Ts'acal to c'alal ja'o tiq'uil ta ajvalilal ta Persia li Artajerjese, oy jun vinic Esdras sbi. Ja' bats'i smoltotac ta vo'one li Seraías, Azarías, Hilquías, 2Salum, Sadoc, Ahitob, 3Amarías, Azarías, Meraiot, 4Zeraías, Uzi, Buqui, 5Abisúa, Finees, Eleazar, xchi'uc li Aarón li sba pale it'ujat yu'un Diose. 6Li Esdrase ja' jun jchanubtasvanej, lec xchanojbe li smantaltac Muc'ul Dios yu'un Israel ti laj yal ta sventa li Moisese. Lec coltabil yu'un li Muc'ul Diose, jech i'ac'bat scotol c'usitic la sc'anbe li ajvalile. Jech iloc' tal ta Babilonia, 7isutic ta Jerusalén xchi'uc jayibuc xchi'iltac. Oy paleetic, levietic, jq'uejimoletic, jchabi ti'naetic, xchi'uc boch'otic chtunic ta ch'ulna. Ja' ta svucubal jabil yochel ta ajvalilal li Artajerjese. 8-9Iloq'uic batel ta Babilonia ta sba c'ac'al yochel sba u ta svucubal jabil yochel ta ajvalilal li Artajerjese. Ta sba c'ac'al yochel yo'bal u ic'otic ta Jerusalén. Lec coltabil yu'un li Diose. 10Li Esdrase ja' no'ox oy ta yo'nton o ta xchan lec li smantaltac Muc'ul Diose, xchi'uc oy ta yo'nton tspas batel, xchi'uc oy ta yo'nton chchanubtas ta smantaltac Dios li xchi'iltaque xchi'uc chalbe ya'ay c'usitic yan yaloj li Diose.
11Ja' jech chal scarta ajvalil Artajerjes ti laj yac'be batel li Esdrase, ja' li palee xchi'uc ja' li jchanubtasvanej ti lec xchanoj scotol li mantaletic, li chanubtaseletic yu'un Muc'ul Dios ac'bilic israeletique:
12“Pale Esdras, bijil vinic, jchanubtasvanej ta smantal Dios ta vinajel, chabanuc chacalbot tal vu'un li Artajerjesun, banquilalun yu'un yantic ajvaliletique.
13“Laj xa cal mantal ti xu' tsut achi'in ta Jerusalén scotol li israeletic ti bu c'alal jventainoje, ti me jech tsc'anique. Boch'ouc no'ox xu' tsutic, me paleetic, o me levietic. 14Vu'un chajtacotcutic sutel xchi'uc li vucub jchi'iltac li' chiscoltaicune yu'un ac'o bat aq'uel me jech yo'ntonic li Judá xchi'uc Jerusalén jech chac c'u cha'al chal li smantaltac Dios te avich'oj ta ac'obe. 15Ich'o batel li saquil taq'uin, li c'anal taq'uin ti yutsil co'ntoncutic chcac'cutic batel xchi'uc li vucub jchi'iltac li' chiscoltaicune, yu'un ac'o tunuc ta stojol li Dios yu'un Israel te ta Jerusalene, 16xchi'uc scotol ti c'u yepal saquil taq'uin, c'anal taq'uin chata batel li' ta scotol yosilal Babiloniae, xchi'uc ti c'u yepal chaq'uic batel ta yutsil yo'ntonic li achi'iltaquique xchi'uc li paleetique, yu'un ac'o tunuc ta sventa li ch'ulna yu'un Dios avu'unic te ta Jerusalene. 17Xu' ja' chamanic o ch'ium vacaxetic, tot chijetic, ch'ium chijetic, xchi'uc c'usitic yan co'ol jech chac c'u cha'al trigo, xchi'uc ya'lel ts'usub, sventa chavaq'uic ta scajleb smoton li Dios avu'unic te ta Jerusalene. 18Ti c'u yepal chcom li c'anal taq'uin, li saquil taq'uine xu' chapasic o c'usi tsc'an chavilic jech chac c'u cha'al tsc'an li Dios avu'unique. 19Li c'usitic chtun ta ch'ulna ti chavich' ac'bel batele, xc'ot avac' atuc ta stojol li Dios avu'unic te ta Jerusalene.
20“Scotol li c'usitic yan chtun avu'un ta ch'ulna yu'un li Dios avu'une, xu' chac'an batel li' ta snail cu'un, vu'un li ajvalilune. 21Vu'un li ajvalil Artajerjesune laj xa calbe mantal scotol li jchabitaq'uinetic te ta smaleb c'ac'al#7.21 C'ac'al - Oy boch'o chalic jtotic. yu'un uc'um Eufratese, jech laj calbe: ‘Scotol li c'usitic tsc'an li pale Esdras, ja' li jchanubtasvanej ta smantal Dios ta vinajele, ac'beic me. 22Li spajeb c'u yepal xu' chavac'beique ja' oxmil xchi'uc vo'lajunvinic (3,300) kilo saquil taq'uin, jmil xchi'uc vo'vinic (1,100) anmul trigo, cha'mil xchi'uc lajunvinic (2,200) litro ya'lel ts'usub, cha'mil xchi'uc lajunvinic (2,200) litro aceite, xchi'uc ac'beic ti c'u yepal ats'am tsc'ane.
23“Scotol li c'usitic tsc'an Dios ta vinajel ta sventa li ch'ulna yu'une, ac'o yich' aq'uel ta ora, yu'un jech mu x'ilin Dios ta jtojol, xchi'uc ta stojol jnich'nab xchi'uc ti c'u smuc'ul jventainoje. 24Tsc'an chana'ic noxtoc ti mu xu' chac'anbe spatanic xchi'uc sloc' yosilic li paleetique, li levietique, li jq'uejimoletique, li jchabi ti'naetique, xchi'uc li yantic j'abteletic ta ch'ulnae’, xcut laj calbeic.
25“Vo'ot Esdras, t'ujo jchapanvanejetic, jpasmantaletic sventa tscoltaic li achi'iltac ti te oyic ta smaleb c'ac'al#7.25 C'ac'al - Oy boch'o chalic jtotic. yu'un uc'um Eufratese, ja' li boch'otic sna'ic c'usi chal li smantaltac Dios avu'une. Yan li boch'otic mu sna'ique chanubtaso me. Paso me ta sventa li abijil yac'ojbot Dios avu'une. 26Li boch'otic mu xch'unbe li smantaltac Dios avu'une xchi'uc li mantaletic cu'une ac'o yich' chapanel ta ora me chich' milel, me chich' nutsel loq'uel, me chac' smulta, o me chich' tiq'uel ta chuquel”, xi li scarta ajvalil laj yich' batel Esdrase.
La sc'opan Dios li Esdrase
27Li Esdrase lic sc'opan Dios, jech laj yal: “Muc'ul Dios, ich'bilucot ta muc' vo'ot li Diosot yu'un jmoltotcutique. Colaval ti laj avac'be lec ta yo'nton ajvalil ti tsots sc'oplal laj ya'ay li ch'ulna avu'un te ta Jerusalene. 28Xchi'uc laj avac'bun quil slequil avo'nton ta stojol li ajvalile, xchi'uc li vucub xchi'iltac te chcoltaat yu'une, xchi'uc li banquilaletic ti tsots yabtelic te ta stojol li ajvalile. Vo'ot ta aventa ti la stsatsubtasbun lec co'ntone, jech xu' xa cu'un ta jtsob scotol li banquilaletic yu'un jchi'iltaque, yu'un jech xu' chisutcutic batel jchi'uc ta Jerusalén”, xi.
Currently Selected:
Esdras 7: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
