Esdras 6
6
1Ja' yu'un li ajvalil Darioe laj yal mantal ti ac'o yich' t'unel vunetic ti tsotsic sc'oplal yu'unic te ta Babiloniae. 2Te ta spasubmantal ajvalil ta lum Ecbatana ta yosilal Media banamil la staic jun vun jech chal chac li'i:
3“Ta sba jabil yochel ta ajvalilal li Ciroe, jech laj yal mantal ta sventa li ch'ulna yu'un Dios ta Jerusalene:
‘Ac'o yich' cha'pasel li ch'ulnae; lec tsots ac'o yich' pasbel li spac'benale yu'un ja' te ac'o yich' milel li matanaletique. Ja' vucub xcha'vinic (27) metro stayalil ac'o yich' pasel, xchi'uc vucub xcha'vinic (27) metro sjamalil. 4Ac'o yich' aq'uel oxcoj muc'tic anbil tonetic, xchi'uc jcoj ach' tenalte'etic. Ti c'u yepal taq'uin chlaje ja' tstoj li ajvalil li'i. 5Ac'o sutuc scotol ta Jerusalén li c'usitic jtuneletic to'ox ta ch'ulna yu'un Dios ti pasbilic ta c'anal taq'uin, ta saquil taq'uin ti la sloq'ues batel ta Jerusalén, ti laj yich' batel ta Babilonia li ajvalil Nabucodonosore. Ac'o yich' aq'uel ta ch'ulna yu'un Dios, yu'un ja' ono'ox te yavil’, xi li smantal ajvalil Ciroe”, xi ts'ibabil li vun la staique.
6Ja' yu'un li muc'ta ajvalil Darioe jech laj yalbe batel mantal li Tatnai ajvalil ta jun banamil ta smaleb c'ac'al#6.6 C'ac'al - Oy boch'o chalic jtotic. yu'un uc'um Eufratese, xchi'uc li Setar-boznai xchi'uc xchi'iltaque:
“Loc'anic batel ta Jerusalén. 7Ac'o abtejicuc li ajvalil#Hag 2.21. yu'un judioetique xchi'uc li banquilaletic yu'unique; ac'o sventainic xcha'pasel li ch'ulna yu'un Dios te ti bu ono'ox yave. 8Vu'un ta xcal mantal c'u x'elan xu' ta jcoltatic li banquilaletic ta Judae yu'un ac'o spasic li ch'ulna yu'un Diose: Ja' li' chloc' scotol ta spatanic chaq'uic li jun banamil te ta smaleb c'ac'al#6.8 C'ac'al - Oy boch'o chalic jtotic. yu'un uc'um Eufratese. Pero mu me xjelov ta yorail li c'usi ora sc'oplal chich'ique yu'un jech mu xpaj li abtele. 9Xchi'uc tsc'an yatelal jujun c'ac'al ac'o yich' ac'bel paleetic te ta Jerusalén li c'usitic chtun yu'unique, me ch'ium vacaxetic, me tot chijetic, o me ch'ium chijetic sventa chich' chic'bel smotonin li Dios ta vinajele. Xchi'uc me tsc'anic trigo, me ats'am, me ya'lel ts'usub, o me aceite, persa ac'o yich'ic ac'bel ta jujun c'ac'al. 10Yu'un jech ac'o xchic'beic smotonin li Dios ta vinajele, xchi'uc ac'o sc'anic vocol ta jtojol ec xchi'uc li calab jnich'nabe.
11“Me oy boch'o mu xch'un li jmantal li'i, ac'o yich' loq'uesbel jteluc sts'amte'al sna; te ac'o yich' xojel o. Li snae ac'o yich' vuq'uesel. 12Boch'ouc no'ox ajvalilal, buyuc no'ox banamilal tsc'an tsoques, tsc'an tsjines li ch'ulna yu'un Dios ta Jerusalene ac'o ulesatuc yu'un li Diose, yu'un ja' la st'uj li Jerusalén ta sventa te chich' ich'bel ta muc' sbie. Vu'un li Darioune ja' jech mantal chcal. Xquechet me ac'o yich' ch'unel scotol”, xi li ajvalile.
Ivu' yu'unic spasel li ch'ulnae
13Li Tatnai ajvalil te ta smaleb c'ac'al#6.13 C'ac'al - Oy boch'o chalic jtotic. yu'un uc'um Eufratese, xchi'uc li Setar-boznai xchi'uc xchi'iltaque, xquechet la xch'unic scotol c'usi laj yal li muc'ta ajvalil Darioe. 14Ja' yu'un li banquilaletic yu'un judaetique la sts'aquic batel yan velta xcha'pasel li abtel jech chac c'u cha'al laj yal li j'alc'op Hageo xchi'uc Zacarías xnich'on Idoe.#Esd 5.1-2; Hag 1.1; Zac 1.1. Jech ivu' yu'unic spasel, yu'un jech la sc'an stuc li Dios yu'un Israele, xchi'uc jech laj yal mantal li ajvalil Ciro, li Darío, xchi'uc li Artajerjes ajvaliletic ta Persiae. 15Li ch'ulnae ivu' yu'unic ta yoxibal c'ac'al yochel li u Adare,#6.15 C'ac'al - Oy boch'o chalic jtotic. ja' ta svaquibal xa'ox jabil yochel ta ajvalilal ta Persia li Darioe.
16Ja' yu'un li israeletique, li paleetique, li levietique, xchi'uc li boch'otic chucbil to'ox ibatique xcuxet no'ox yo'nton la spasbeic sq'uinal, laj yaq'uic ta sc'ob Dios li ch'ulnae. 17La smilic ta smoton Dios vo'vinic (100) ta cot ch'ium vacaxetic, lajunvinic (200) ta cot tot chijetic, chanib ciento (400) ta cot ch'ium chijetic. Xchi'uc laj yaq'uic lajcha'cot tot tentsunetic, jujucot ta sventa xch'ayubil smulic ta jujuchop sts'unubal li israeletique. 18Te lic yac'beic yabtel li paleetique; la sjelilan sbaic ta abtel. Li levietique ja' lic spasic li c'usi yabtelic ono'oxe, yu'un jech xu' chlic yich'ic ta muc' Dios te ta Jerusalén jech chac c'u cha'al ts'ibabil ono'ox comel ta svun li Moisese.
19Jech noxtoc la spasic q'uin Coltael ta xchanlajunebal (14) c'ac'al yochel li sba ue.#Ex 12.1-20; Dt 16.1-8. 20Li paleetic xchi'uc levietique yac'oj xa sbaic ta lecubtasel scotolic. Ja' yu'un la smilic li smoton Dios sventa q'uin Coltael ta sventa scotol li xchi'iltaquic ti i'ayic tal ta chuquel ta yan banamile, xchi'uc ta sventa li xchi'ilic ta paleale, xchi'uc ta sventa stuquic. 21Scotol li israeletic ti i'ayic tal ta chuquel ta yan banamile xchi'uc li boch'otic la scomtsanic spasel#Neh 9.2; 10.28; 13.3. li c'usitic chopol tspasic li yanlum cristianoetique ti ja' xa no'ox chich'ic ta muc' ec li Muc'ul Dios, ja' li Dios yu'un Israele, scotolic co'ol la sve'ic li ve'lil sventa q'uin Coltaele. 22Xcuxet no'ox yo'ntonic la spasic vucub c'ac'al li q'uin sventa tsve'ic pan ti mu'yuc yich'oj svolesubil xch'ute. Yu'un i'ac'bat lec xcuxetel yo'ntonic yu'un Muc'ul Dios ta sventa ti ic'uxubinatic yu'un li ajvalil ta Persia, xchi'uc ti icoltaatic ta xcha'pasel li ch'ulna yu'un Diose, ja' li Dios yu'un Israele.
Currently Selected:
Esdras 6: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
