Daniel 8

Li Daniele la xvaychin jcot chij xchi'uc jcot tot tentsun

1“Ta yoxibal jabil yochel ta ajvalilal li Belsasare, livaychin yan velta noxtoc vu'un li Danielune. 2Ta jvayech te oyun ta muc'ta lum Susa, ja' li muc'ta lum te ta Elam banamile. Te va'alun ta ti' uc'um Elai laj quil. 3C'alal lic jtoy sate, laj quil te oy ta ti' uc'um jcot tot chij, oy chib natic xulub. Li jun xulube xjelov snatil, pero ja' ts'acal ich'i. 4Li tot chije laj quil la xul batel ta stuq'uil smaleb c'ac'al#8.4 C'ac'al - Oy boch'o chalic jtotic. xchi'uc ta stuq'uil norte xchi'uc ta stuq'uil sur. Me jcotuc chonbolom mu xva'i ta sat. Me jcotuc mu xu' chjatov loq'uel ta stojol. La spas li c'usi tsc'an yo'nton tspase, jech yantic to i'ayin stsatsal.

5“C'alal ja'o jbats'il snopel li c'usi laj quile, ja' to laj quil iloc' tal ta anil jcot tot tentsun ta smaleb c'ac'al.#8.5 C'ac'al - Oy boch'o chalic jtotic. Bats'i xvil no'ox tal ta anil, ech' xan tal scotol li banamile. Li tentsune oy jun smuc'ta xulub cacal ta o'lol yu'un li sbec' sate. 6Te ibat yo' bu oy li tot chij ti oy chib xulub te cotol ta ti' uc'um laj quile, yich'ojbe batel yipal ta anil. 7C'alal ic'ot yo' bu cotole, c'otel no'ox c'ot xul; toj c'asel no'ox ic'ot yu'un xchibal li xulube. La sjip ta lum, la xpech' ta teq'uel; solel mu'yuc stsatsal yilel li chije. Mu'yuc boch'o la spoj li tot chije.

8“Li tot tentsune yantic to laj yich' lec stsatsal ta jyalel. C'alal yich'oj lec stsatsale, ic'as loq'uel li smuc'ta xulube, pero te no'ox ich'i tal yan chanib xulub noxtoc. Li chanib xulube sq'uelanoj batel ta xchanjotal xocon vinajel. 9Oy jun xulub iloc' yan biq'uit sq'uelub, pero nat ich'i batel ta stuq'uil sur, ta stuq'uil sloq'ueb c'ac'al,#8.9 C'ac'al - Oy boch'o chalic jtotic. xchi'uc ta stuq'uil lequil banamil yu'un Israel. 10Solel imuq'uib batel; ic'ot c'alal to yo' bu oy li yu'untac Diose. La sjip ta lum jayibuc li c'analetique;#Ap 12.4. la xpech' ta teq'uel. 11La stoy sba ta stojol li Banquilal yu'un yu'untac Diose; la scontrain noxtoc. La slajesbe sc'oplal li mibil matanal ti scotol c'ac'al chich' aq'uel ta stojol Diose, xchi'uc la soquesbe o sc'oplal li ch'ulna yu'une. 12Ta scoj c'usi chopol, jech laj yich' ac'bel ta sc'ob li yu'untac Diose xchi'uc ti bu chich' aq'uel scotol c'ac'al li milbil matanale. Ja' yu'un la sjip ta banamil li c'usi melele, la spas scotol li c'usi tsc'an yo'ntone, ja' to ti bu c'alal ivu' yu'un laj ya'ye.

13“Ts'acal laj ca'ay chc'opoj j'almantal, pero oy yan j'almantal jech la sjac'be li yan chc'opoje: ‘¿Baq'uin to chlaj sc'oplal li c'usi chopol chich' pasel te ta scajleb li milbil matanal chich' aq'uel scotol c'ac'ale, xchi'uc li c'usi toj chopol chich' pasel te ta xch'ulna Dios ta sventa ti ochem o ta c'abale, xchi'uc li pech'el ta teq'uel ta stojol yu'untaque?’, xi. 14Jech la stac' li yane: ‘Ja' to me la sta cha'mil xchi'uc oxib ciento (2,300) c'ac'ale. Jech lecubtasbil xa chcom o li ch'ulnae’, xi.

15“C'alal ja'o te ta jnopilan sventa ta jc'an ta jna'be lec smelol li c'usi laj quile, oy boch'o te va'al ivul ta jtojol, xco'laj xchi'uc cristiano yilel. 16Ta ora no'ox oy boch'o ic'opoj tal te ta ti' uc'um Ulai; tsots i'avan, jech laj yal: ‘Gabriel,#Lc 1.19,26. albo ya'ay smelol c'usi laj yil ta xch'ulel li vinique’, xi.

17“Jech te ital ti bu va'alune. C'alal inopaj tale, lixi'. La jpatan jba ta banamil ta stojol. Jech laj yalbun: ‘Xnich'on cristiano, a'yo lec ava'ay, li c'usi laj avile ja' sc'oplal slajebal c'ac'al’, xiyutun.

18“C'alal ja'o chisc'opanune, liyal ta lum, patal lic'ot. La stijun liquel, la sva'anun, 19jech laj yalbun:

‘A'yo ava'ay, ta xcalbot c'usi ta xc'ot ta pasel c'alal me ilaj sc'ac'al yo'nton li Diose, yu'un li c'usi laj avile ja' sc'oplal slajebal c'ac'al.

20‘Li jcot tot chij ti chib xulub laj avile ja' sc'oplal ajvaliletic ta Media xchi'uc ta Persia. 21Yan li tot tentsune ja' sc'oplal ajvalil ta Grecia. Li smuc'ta xulub ti cacal ta o'lol yu'un li sate ja' smelol sba ajvalil ta Grecia. 22Li xulub ti ic'oc loq'uel laj avile, xchi'uc ti te ich'i tal yan chanib xulub ta yave, ja' smelol ti ta to xlic chanib ajvaliletic ta banamile, pero mu sta jech stsatsal jech chac c'u cha'al li ba'yuc ajvalile.

23‘C'alal me ilaj yorail tspasic mantal li ajvaliletic le'e,

xchi'uc me ijelov ta bis li c'usitic chopol tspasique,

ja'o ta xlic jun ajvalil toj ven jtoyba, toj bij c'u x'elan chlo'lavan.

24Ta xlic yich' lec stsatsal svu'el,

pero muc ta stsatsaluc stuc.

Ep ta soquesvan, ta sjinesvan;

lec chbat yu'un scotol li c'usi tspase.

Ta xules scotol li boch'otic toj ech'em stsatsalique,

xchi'uc ep ta smil noxtoc li yu'untac Diose.

25Ta sventa sbijil lec xu' yu'un chlo'lavan.

Toj muc' cha'ay sba o.

Ep boch'otic tsmil ta muts'sat no'ox.

Ta xlic scontrain noxtoc li Ajvalil yu'un ajvaliletique,

pero ta xich' ulesel o, muc xa ta stsatsaluc cristiano.

26‘Li cha'mil xchi'uc oxib ciento c'ac'al (2,300) laj avile, melel ja' jech chc'ot ta pasel. Te no'ox chabio ta avo'nton, yu'un ep to c'ac'al sc'an xc'ot ta pasel’, xiyutun.

27“Vu'un li Danielune, toj alubenun licom o; oy jayibuc c'ac'al jchamelun licom yu'un. C'alal litsatsube, te lic jpas yan velta li cabtel ta stojol ajvalile. Pero te ono'ox chixi' o yu'un li c'usi li'ac'bat quile, yu'un mu xca'ibe o lec smelol.

Currently Selected:

Daniel 8: TZE97

Highlight

Copy