Daniel 7
7
Li Daniele laj yil ta xch'ulel chancot muc'tic chonbolom
1C'alal sba to jabil yochel ta ajvalilal ta Babilonia li Belsasare, li Daniele ivaychin, xchi'uc oy c'usi i'ac'bat yil ta xch'ulel ti c'alal ja'o te mochol ta svayabe. Ta ora la sts'iba ta vun li c'usitic tsotsic sc'oplal laj yil ta xvayeche. Jech la sts'iba:
2“Vu'un li Danielune, oy c'usi laj quil ta jvayech ta ac'ubaltic. Laj quil chanib ic' ital ta vinajel; la syuq'uilan li muc'ta nabe. 3Te iloc' tal ta nab chancot muc'tic chonbolom, pero yantic o c'u x'elan jujun.#Ap 13.1; 17.8. 4Li sbae xco'laj xchi'uc león, oy xic' jech chac c'u cha'al xic. Te jq'ueloj laj yich' c'ocbel li xiq'ue. Laj yich' va'anel ta sba banamil, iva'i ta yacan jech chac c'u cha'al cristiano. Laj yich' ac'bel sjol yo'nton jech chac c'u cha'al sjol yo'nton cristiano.
5“Li xcha'cotale xco'laj xchi'uc oso; stoyoj jun sc'ob, xchi'uc scats'oj ta ye oxch'ix ch'ilte', jech i'albat: ‘Batan, bat sa'o epal ti'bol ati'’, x'utat.
6“Li yoxcotal laj quile xco'laj xchi'uc bolom. Oy chanib xic' ta spat, xchi'uc chanib sjol; laj quil i'ac'bat spas mantal.#Ap 13.2.
7“Li xchanibal laj quile toj yan to x'elan, toj xi'bal sba, xchi'uc toj ven ech'em stsatsal ta jyalel. Li stanal yee puru muc'tic yijiquil tsatsal taq'uin yilel, ta xvoch'i, ta slilin ta jyalel li sve'ele; li scomelale ta xpech'ilan ta teq'uel. Toj yan o ta jyalel, mu xco'laj xchi'uc li yantic laj quil ta ba'yuque; oy lajuneb xulub#Ap 12.3; 13.1. noxtoc.
8“C'alal te jq'uelojbe li xulube, laj quil iloc' yan biq'uit xulub ta o'lol li yantic xulube. Li yantic ba'yuc xulub ta sts'el ti bu iloc' tal li biq'uite laj yich' c'oquel loq'uel oxib. Li xulub ts'acal iloq'ue oy sat jech chac c'u cha'al sat cristiano, xchi'uc oy ye toj ven tsotsic c'usi chal.#Ap 13.5-6.
9“Te jq'ueloj o c'alal laj yaq'uic lequil chotlebaletic.#Ap 20.4.
Te ichoti li Boch'o mu sna' xlaj yoraile.
Li sc'u'e toj ven sac jech chac c'u cha'al tayo;
li stsotsil sjole sac ta jyalel jech chac c'u cha'al saquil tsots.#Ap 1.14.
Li xchotlebe tsanal yilel jech chac c'u cha'al yat c'oc';
li yacantac xchotlebe xpulpun sc'ac'al yilel.
10Te iloc' tal ta stojol jun uc'um, xco'laj xchi'uc c'oc'.#Ap 5.11.
Ta mil (1,000) no'ox li boch'otic chtunic ta stojole;
ta millón (1,000,000) no'ox li boch'otic te va'alic ta stojole.
Li Jchapanvaneje ichoti ta xchotleb;
laj yich' jamel li vunetique.#Ap 20.12.
11“C'alal te jq'ueloj ta sventa chca'ay c'usitic tsotsic chal li biq'uit xulube, te jq'ueloj la smilic li xchanibal muc'ta chonbolom laj quile. Biq'uitic la sesinic; ts'acal la xchiq'uic ta c'oc'. 12Li yantic muc'tic chonbolometique laj yich'ic pojbel stsatsalic ec, pero laj to yich'ic natubtasbel yorailic jayibuc c'ac'al.
13“C'alal te to jbats'il o vaychinele,
“laj quil oy Boch'o chyal tal ta toc ta vinajel
xco'laj xchi'uc cristiano yilel.#Mt 24.30; 26.64; Mr 13.26; 14.62; Lc 21.27; Ap 1.7,13; 14.14.
Te ivul yo' bu oy li Boch'o mu sna' xlaj yoraile;
te la snopajesic batel ta stojol.
14Laj yich' ac'bel tsots yabtel;
laj yich' ac'bel svu'el, xchi'uc laj yich' ac'bel spas mantal.
Li cristianoetic ta jujun lum,
ta jujun banamil, ta jujuchop c'ope te chtunic ta stojol.#Ap 11.15.
Li yabtel i'ac'bate mu xlaj sc'oplal o;
li yabtel ta ajvalilale mu xu' chich' tuch'bel o.
15“Vu'un li Danielune ep lixi'; ich'ay co'nton yu'un li c'usi laj quil ta jvayeche. 16Linopaj batel ta stojol jun li boch'otic te va'alique; la jac'be lec smelol scotol li c'usi laj quile. Jech te lic xcholbun scotol c'usitic smelol, jech laj yalbun: 17‘Li chanib muc'tic chonbolometique ja' smelol ti ta to xlic spasic mantal chanib ajvaliletic li' ta banamile. 18Ts'acal to chlic yich' yabtelic ta pasmantal xch'ul nich'nabtac li Boch'o te oy ta vinajele. Sbatel osil mu xlaj sc'oplal o li yabtelique; j'ech'el te chcom o ta stojolic’,#Ap 22.5. xiyutun.
19“Li vu'une la jac'be lec smelol noxtoc li xchanibal chonbolom ti toj yan to sbae, ti mu xco'laj xchi'uc li yantique. Toj xi'bal sba, yu'un puru tsatsal taq'uin li stanal yee, bronce taq'uin li yic'ache, solel chvoch'i, tslilin li sve'ele, chpech'ilan ta teq'uel li scomelale. 20Jech noxtoc la jac'be lec smelol li lajuneb xulube xchi'uc li yan xulub ts'acal iloc' tal ti bu laj yich' c'oquel loq'uel li yan oxib xulube, ti oy sate, ti oy yee, ti toj tsotsic c'usi laj yale, ti xco'laj xchi'uc ja' toj muc' ic'ot ta scotol li yantic xulube. 21Laj quil ilic pleito yu'unic xchi'uc li xch'ul nich'nabtac Dios li jun xulub le'e, pero ja' itsalvan li xulube.#Ap 13.7. 22Ja' to ti c'alal ital li Boch'o mu sna' xlaj yoraile, la scolta li xch'ul nich'nabtac Diose, yu'un ic'ot xa yorail ti ja' chlic spasic mantal li xch'ul nich'nabtac Dios ta vinajele.#Ap 20.4. 23Jech laj yal:
‘Li xchanibal chonbolome ja' smelol xchanibal ajvalil
ta xlic spas mantal li' ta banamil;
mu xco'laj jech chac c'u cha'al li yantic ajvaliletique.
Sbejel banamil ta slajes, ta xpech'ilan ta teq'uel, ta slilin scotol.
24Li lajuneb xulube ja' smelol ti ta to xlic lajuneb ajvaliletic
ti c'alal ja'o yorail tiq'uil ta yabtel li jun ajvalil le'e.#Ap 17.12.
Ta ts'acal chlic jun ajvalil noxtoc,
ti mu xco'laj jech chac c'u cha'al li lajuneb ajvaliletique;
li ajvaliletic le'e tstsal oxib ajvaliletic.
25Chlic chopolc'opojuc ta stojol li Boch'o te oy ta vinajele;
ta xlic yac'be svocol li xnich'nabtac Diose.
Tsc'an ta sjel li mantaletic yu'un Diose xchi'uc li c'usitic ora chcux yo'ntonic
sventa chich'ic ta muc' Diose.
Li xnich'nabtac Diose ta x'och ta sc'ob o'lol xchanibal jabil.#Dn 12.7; Ap 12.14; 13.5-6.
26Pero ta xlic xchapan li Jchapanvaneje;
Ta slajesbe o stsatsal li yabtele;
j'ech'el tstu'pbe o sc'oplal.
27Li yabtelic ta ajvalilal, ta pasmantale,
li svu'el stsatsalic ajvaliletic li' ta banamile,
ja' ch-ac'bat ta sc'obic li steclumal Boch'o te oy ta vinajele.#Ap 20.4.
Sbatel osil ja' tspasic o mantal;#Ap 22.5.
scotol li cristianoetic li' ta banamile
ta xich'ic ta muc', te chtunic o ta stojolic’, xi.
28“Ja' no'ox jech yepal li c'usi laj quile. Vu'un li Danielune toj ep ilo'ilaj co'nton yu'un, iyanij jsat yu'un, pero te no'ox la jchabi ta co'nton scotol.”
Currently Selected:
Daniel 7: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
