Daniel 9
9
La sc'opan Dios ta stojol xchi'iltac li Daniele
1“C'alal sba jabil yochel ta ajvalilal ta stojol caldeaetic li Darío, xnich'on Asuero liquem ta Mediae, 2vu'un li Danielune te la jq'uelbe lec sc'oplal li jabiletic ts'ibabil ta vun yu'un j'alc'op Jeremiase. Ja' ti i'albat yu'un Muc'ul Dios ti lajuneb xchanvinic (70) jabil#Jer 25.11; 29.10. jinem chcom li Jerusalene. 3Jech te lic cac' jsat ta stojol li Cajvaltic Diose. La jc'anbe vocol, laj quicta ixim, la jlap c'u'il sventa at-o'nton, xchi'uc la jchotan jba ta tantic. 4La jc'opan li Muc'ul Diose, ja' li Dios cu'une. Laj calbe ta jamal li jmulcutique,#Neh 1.5-11; 9.6-37. jech laj calbe:
‘Cajval, Muc'ul Dios, vo'ot ti atalel ich'bilot ta muq'ue, ti c'ux ta avo'nton, ti chavac' c'otuc ta pasel ta stojol c'usi achapanoj li boch'otic chasc'anot, xchi'uc ti ta xch'unic amantaltaque, 5la jta jmulcutic; la jpascutic c'usi mu xtun. Toj chopol c'usi la jpascutic, ven jtoybauncutic; la jcomtsancutic li mantaletic avu'une xchi'uc li c'usitic avaloje. 6Mu'yuc laj quich'becutic ta muc' c'usi laj yalic li avajtuneltaque, ja' li j'alc'opetic avu'un ti ic'opojic ta aventae, ti la xchi'inic ta lo'il li ajvaliletic, li banquilaletic cu'uncutique, xchi'uc li jmoltot jyame'cutique, xchi'uc scotol li jchi'iltaccutic ta israelale. 7Cajval, li vo'ote toj tuc' c'usi chapas; yan li vu'uncutique ja' no'ox chcac' jbacutic ta q'uexlal. Ja' jech cha'yic scotol li judaetic li' ta orae, xchi'uc li boch'otic te nacalic ta Jerusalene xchi'uc ta scotol li israeletic ti nacalic batel ta nom ta noch' ta yantic lum ti bu laj apuc batel ta scoj ti la stoy sbaic ta atojole. 8Cajval, la jsa' jtuccutic li q'uexlal chca'icutic xchi'uc li ajvaliletic, li banquilaletic cu'uncutique xchi'uc li jmoltot jyame'cutique, yu'un la jsa' jmulcutic ta atojol. 9Pero ta atojol vo'ote Cajval, Dios cu'un, oy c'uxubinel, oy perdón avu'un, ac'o me ep jtoyoj jbacutic ta atojol. 10Mu'yuc laj quich'cutic ta muc' c'usi laj aval vo'ot li Muc'ul Diosot cu'uncutique. Muc ja'uc la jch'uncutic li mantaletic avu'un ti laj avac'buncutic ta sventa li avajtuneltaque, ja' li j'alc'opetique. 11Scotol israeletic la sbajic comel li amantale; muc xch'unic li c'usi laj avale. Jech vu'uncutic ic'ot ta jtojolcutic li tsots vocol ti jamal albil, ti ts'ibabil comel yu'un li Moisés,#Lv 26.14-39; Dt 28.15-68. ja' li avajtunele. Ja' ta scoj ti la jsa' jmulcutic ta atojole. 12Laj avac' c'otuc ta pasel li c'usi laj ono'ox aval ta jventacutic, xchi'uc ta sventa li ajvaliletic cu'uncutique, jech ital ta jtojolcutic li muc'ta vocolajele. Mu'yuc ono'ox bu jech c'otem ta pasel li' ta banamil jech chac c'u cha'al ic'ot ta pasel ta stojol li Jerusalene. 13Jech chac c'u cha'al ts'ibabil comel yu'un li Moisese, ja' jech ital ta jtojolcutic li vocole. Pero mu'yuc ta co'nton ta jsa'otcutic, Muc'ul Dios cu'un. Mu'yuc ta co'nton ta jcomtsan li jmulcutique; mu ja'uc ta jt'uncutic batel li c'usi melel avaloje. 14Jech muc xach'ay ta avo'nton; laj ono'ox atac tal ta jtojolcutic li stojol mulile, yu'un toj tuc' scotol li c'usitic chapase, Muc'ul Dios cu'un. Yu'un vu'uncutic muc jch'uncutic li c'usi laj avalbuncutique.
15‘Li vo'ote Cajval, Dios cu'un, laj avac' ta ilel atsatsal; laj aloq'ues tal ta Egipto li ateclumale.#Ex 20.2; Dt 6.21; Jer 32.20-21. Ja' yorail te lic avac' pucuc ac'oplal; ja' jech o c'alal to tana. Pero li vu'uncutique ja' no'ox ta jsa' jmulcutic ta atojol; bats'i chopol li c'usi la jpascutique. 16Cajval, ta sventa ti tuc' avo'nton o li vo'ote, loq'ueso xa batel sc'ac'al ajol, sc'ac'al avo'nton ta stojol li lum Jerusalén te ta ch'ul vits avu'une. Yu'un ja' ta scoj jmulcutic, ta scoj xchopolil jtot jme'cutic ti abul sba ta na'leel ta jujujot li Jerusalene xchi'uc li ateclumale. 17Ja' yu'un li' ta orae, Dios cu'un, a'ibun li jc'op ti li' xivocolet ta atojol, vu'un li avajtunelune. Ac'o xa xojobanuc asat ta stojol li ach'ulna ti jinesbil xae, yu'un jech ac'o ich'atan ta muc'. 18Dios cu'un, ts'e'ano lec achiquin ta ya'yel li jc'ope. Vic'o avil asat; q'uelo avil ti c'u x'elan jvocolcutique xchi'uc c'u x'elan jinesbil li lum ti bu chavich' ich'el ta muq'ue. Mu yu'unuc ta scoj lec c'usi ta jpascutic ti li' xivocolet ta atojole; ja' no'ox ta scoj ti toj ep xc'uxul avo'ntone.#Neh 9.17-19,27-28; Sal 51.1-4; 57.1-3; Is 54.8-10; Tit 3.5. 19Cajval, a'ibun li jc'ope. Cajval, pasbuncutic perdón. Tuc'ulanbun li jc'ope Cajval. Paso no'ox ta ora; mu xa me xamala jal, yu'un jech ac'o ich'atuc ta muc' li abie. Yu'un li abie ja' te ch-ich'at ta muc' ta lum avu'un xchi'uc ta stojol li ateclumale’, xichi ta stojol li Diose.
Oy c'usi laj yich' alel ta sventa lajuneb xchanvinic (70) xemunaetic
20“C'alal ja'o xivulvun ta sc'opanel Dios ta yalel ta jamal li jmule xchi'uc li smul jchi'iltac ta israelale, xchi'uc ti te xivocolet ta stojol Muc'ul Dios cu'untic ta sventa li ch'ul vits yu'une, 21ja'o te laj yac' sba ta ilel ta jtojol li Gabriele,#Lc 1.19,26. ja' li Gabriel ti laj ono'ox quil ta jch'ulel ta sliquebe. Te xvilet tal ta jtojol. Ja' jech ora jech chac c'u cha'al yorail chich' aq'uel milbil matanal ta stojol Dios ta bat c'ac'ale.#9.21 C'ac'ale - Oy boch'o chalic jtotique. 22Oy c'usi laj yac'bun jna', jech laj yalbun:
‘Daniel, li' ta orae talemun sventa tal cac'bot lec abijil, xchi'uc tal jambot lec ajol avo'nton. 23C'alal ja' to no'ox lic ac'anbe vocol li Diose, iloc' xa'ox mantal ti ac'o c'otuc ta pasel c'usi laj ac'ane. Jech vu'un tal cac'bot ana', yu'un toj lec c'anbilot. Ja' yu'un, a'yo lec ava'ay li c'usi chcale xchi'uc li c'usi li' chavile.
24‘Ja' lajuneb xchanvinic (70) xemuna#9.24 70 xemuna - Ja' smelol 490 jabil.
chapanbil ti jech chc'ot ta pasel
ta stojol li achi'iltaque xchi'uc li ach'ul lumale,
yu'un jech chich' lajesbel sc'oplal o
li c'usi chopole xchi'uc li muliletic chich' pasele.
Jech ch'aybil chcom o li c'usitic mu'yuc lec pasbile;
ja' chlic yich' pasel o li c'usitic tuc' ti mu'yuc slajebale.
Jech chc'ot o ta pasel li c'usi laj avil ta ach'ulele xchi'uc li c'usitic laj ava'ibe sc'oplale;
jech ts'u'iltasbil chcom o yan velta li ch'ulnae.
25A'ibo lec smelol ava'ay li c'usi chacalbot li'i:
C'alal chloc' mantal chich' cha'liquesel li lum Jerusalene,
ja' to me la sta yorail tstsac yabtel li Boch'o t'ujbil yu'un Diose,
ja' li banquilal jpasmantale.
Ta ono'ox x'ech' vucub xemuna.#9.25 Vucub xemuna - Ja' smeol 49 jabil.
Li xoraltic xchi'uc li coralton yu'un Jerusalén chich' cha'meltsanele,
ta xjalij chib xchanvinic (62) xemuna;#9.25 62 xemuna - Ja' smelol 434 jabil.
ti jech yepal c'ac'ale ja'o yorail tsots vocol.
26C'alal me i'ech' xa'ox li chib xchanvinic (62) xemunae,
ta xlic smilic li Boch'o t'ujbil yu'un Diose.
Li Jerusalén xchi'uc ch'ulnae ta xtal sjines
jun ajvalil xchi'uc svinictac.
Li slajebale ja' jech chc'ot ta pasel jech chac c'u cha'al pulel ta vo';
li milel chamesele mu xlaj sc'oplal o.
Jech tspasic o batel c'alal to ta slajebal,
jech chac c'u cha'al chapanbil sc'oplale.
27Ta to xtal yan jun xemuna#9.27 Jun xemuna - Ja' smelol vucub jabil. noxtoc;
li ajvalile ja'o oy ep boch'otic oy c'usi chchapanic xchi'uc.
C'alal o'lol x'ech' li xemunae, ta xlaj sc'oplal yaq'uel li milbil matanale xchi'uc li yantic matanale.
Toj ven chopol c'usi chlic yich' pasel te ta scajleb smoton Dios,#Dn 11.31; 12.11; Mt 24.15; Mr 13.14.
ja' to me ic'ot ta pasel chich' ulesel
li boch'o chac' ta pasel c'usi chopol jech chac c'u cha'al chapanbil ono'ox sc'oplale’, xiyutun li Gabriele”, xi li Daniele.
Currently Selected:
Daniel 9: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
