Daniel 4

Ipas ta chuvaj li Nabucodonosore

1“Vu'un li ajvalil Nabucodonosorune, chacalboxuc acotolic ta jujun lum, ta jujun banamil, ta jujuchop ac'opic ti nacaloxuc ta scotol banamile: Junuc avo'ntonic, lec oyanic o. 2Ta jc'an chana'ic ti toj tsotsic, toj labalic sba sq'uelubiltac stsatsal la spas ta jtojol li Dios te oy ta vinajele. 3¡Toj muc'tic, toj tsotsic ta jyalel li sq'uelubil stsatsal la spase! Li yabtel ta ajvalilale mu xlaj sc'oplal o sbatel osil. Ja' jpasmantal o ti jayc'ol cristianoetic chjelove.

4“Vu'un li Nabucodonosorune, toj jun no'ox co'nton li' oyun ta jpasubmantal; mu c'u xtal ta co'nton laj ca'ay. 5Pero c'alal te mocholun chivaye, oy c'usi la jvaychin, toj xi'bal sba. C'alal la jnopilan, c'alal te oy ta jol li c'usi laj quile, ich'ay co'nton yu'un. 6Jech lic jtac ta iq'uel scotol li bijil viniquetic ta Babiloniae, yu'un ac'o yalbicun c'usi smelol li jvayeche. 7Jech italic scotol li bijil viniquetique, li boch'otic sna'ic sq'uelel senyail ta vinajel c'usitic chc'ot ta pasele, xchi'uc li jt'unuletique. Te lic jcholbe ya'yic li jvayeche, pero muc xu' yu'un laj yalbicun c'usi smelol. 8Ja' to ti c'alal ital ta jtojol li Daniel, ja' li Beltsasar#4.8 Beltsasar - “Bel” Ja' sbi jun dios yu'unic li babiloniaetique. yan sbi jech chac c'u cha'al sbi li dios cu'une, ti ja' yich'ojbe sbijil li ch'ul diosetique, te lic jcholbe ya'ay li jvayeche, jech laj calbe: 9‘Beltsasar, vo'ot li banquilalot yu'un scotol bijil viniquetique, ta jna' ti vo'ot avich'ojbe sbijil li ch'ul diosetique, ti mu'yuc c'usi macal ta asat jchopuc li c'usitic mu stac' na'ele.#Gn 41.38; Dn 1.20; 2.47; 5.11. A'yo ava'ay li c'usi la jvaychine; albun ca'ay c'usi smelol. 10Li c'usitic la jvaychin c'alal mocholun ta jvayabe ja' jech chac li'i:

“Laj quil jpets te' yilel ta o'lol banamil, bats'i nat ch'iem.

11Ich'i batel ta jyalel, lec tsots ibat;

ic'ot c'alal to ta vinajel li sni'e.

Scotol cristianoetic c'alal to ta sti'iltac banamil xu' chilic.

12Lec c'upilic sba yanal, lec pim sat noxtoc.

Te tsta sve'el scotol li cristianoetique.

Te ital xcux yo'ntonic ta yolon scotol li chonbolometique.

Te ital spas stasic ta sc'obc'ob scotol li mutetique;

ja' te la sta sve'elic scotol li c'usitic cuxulic ta banamile.

13“Laj quil noxtoc jun jq'uelvanej j'almantal iyal tal ta vinajel. 14Tsots ic'opoj, jech laj yal:

‘Ts'etic li te'e, lilinbeic li sc'obc'obe;

tulbeic scotol li yanale, tanpuc ac'o batuc avu'unic li sate.

Ac'o batuc scotol li chonbolometic te oyic ta yolone,

xchi'uc li mutetic te oyic ta sc'obc'obe.

15Yan li xchumante'ile te tec'luc comuc ta banamil xchi'uc yibel;

te comuc o ta te'tic.

Chuquic ta cadena pasbil ta tsatsal taq'uin xchi'uc ta bronce.

Te ac'o ach'uc ta job osil;

co'ol ac'o sve'ic ts'i'laletic xchi'uc li chonbolometique.

16Ac'o jeluc yo'nton;

ac'o yich'be yo'nton chonbolometic.

Vucub jabil jech ac'o comuc o.

17Ja' jech stojol mulil chalic li jq'uelvanej j'almantaletique.

Ja' jech iloc' ta yeic li ch'ul j'almantaletique,

yu'un jech ac'o sna'ic scotol cristianoetic

ti ja' sventainojbe yabtel scotol ajvaliletic li Boch'o te oy ta vinajele.

Ja' chac'be yabtel li boch'o tsc'an chac'bee;#Job 36.7; Jer 27.5-8.

xu' yu'un chac'be tsots yabtel li boch'o biq'uit ch-ilat yu'un cristianoetique’, xi li boch'o iyal tal ta vinajele.

18“Ja' jech laj quil ta jvayech, vu'un li ajvalil Nabucodonosorune. Beltsasar, albun ca'ay c'usi smelol li jvayeche, yu'un scotol li bijil viniquetic oy c'u smuc'ul jventainoje muc xu' yu'un xiyalbicun c'usi smelol. Yan li vo'ote xu' avu'un, yu'un te oy ta atojol sbijil li ch'ul diosetique.

19“Li Daniele, ja' li Beltsasar yan sbie, toj ch'ayel ic'ot yo'nton ti c'alal laj ya'ye; jliquel te ch'ayem yo'nton, yu'un ixi' ta jyalel. Vu'un li ajvalilune jech laj calbe: ‘Beltsasar, mu me toj ch'ayeluc xc'ot avo'nton yu'un li jvayeche xchi'uc li c'usi smelole’, xcut. Itac'ov li Beltsasare: ‘¡Ay ajvalil, ja' ac'o c'otuc ta stojol avajcontra scotol ti c'u x'elan smelol li avayeche! 20Li jpets te' laj avil xchi'uc ti lec tsots ibate, ti ic'ot c'alal to ta vinajel li sni'e, xchi'uc ti chilic tal scotol cristianoetic c'alal to ta sti'iltac banamile, 21ti lec c'upilic sba yanale, ti lec pim sate, ti te tsta o sve'el scotol li cristianoetique, ti te chcux yo'ntonic ta yolon scotol li chonbolometique, xchi'uc ti te spasoj stasic ta sc'obc'ob li mutetique, 22vo'ot ac'oplal atuc ajvalil. Vo'ot ti lec muc' labate, ti oy lec atsatsale, yu'un imuq'uib ac'oplal ta jyalel; ic'ot c'alal to ta vinajel, xchi'uc ic'ot c'alal to ta sti'iltac banamil ti bu c'alal chapas mantale. 23Yan li jun jq'uelvanej j'almantal laj avil iyal tal ta vinajele, ti jech laj yale: Ts'etic li te'e, lilinic o ta j'ech'el. Yan li xchumante'ile te ac'o comuc ta banamil xchi'uc yibel; chuquic ta cadena pasbil ta tsatsal taq'uin xchi'uc ta bronce. Te ac'o comuc o ta osilaltic; te ac'o ach'uc ta job osil. Co'ol ac'o ve'uc xchi'uc chonbolometic, ja' to me ista vucub jabil, ti xie, 24ajvalil, li avayeche ja' jech smelol chac li'i, xchi'uc ja' jech x'elan li stojol mulil chac' taluc ta atojol li Dios te oy ta vinajele. 25Chavich' loq'uesel batel ta stojol li cristianoetique; ja' chbat achi'in ta naclej li chonbolometique. Ts'i'lal chlic alo' jech chac c'u cha'al vacaxetic, xchi'uc te cha'ach' o ta job osil. Vucub jabil te chacom, ja' to me laj avil ja' sventainojbe yabtel ajvaliletic li Boch'o te oy ta vinajele, xchi'uc ti ja' chac'be yabtel li boch'o tsc'an chac'bee. 26Yan li xchumante'il laj yich' alel te ac'o comuc ta banamil xchi'uc yibele ja' smelol ti mu xlaj sc'oplal o li avabtel ta ajvalilale, ja' no'ox me laj avotquin lec ti ja' sventainoj scotol li Boch'o te oy ta vinajele. 27Ja' yu'un ajvalil, ch'uno li bijubtasel chacalbote: pajeso xa me aba ta sa'el li amule; ja' xa paso batel li c'usi tuq'ue. Quechano spasel li c'usitic chopole; ja' coltao li boch'otic abul sba ta uts'intaele. Oy yic'al jech xu' to chlic ata batel jun avo'nton’, xiyutun li Daniele”, xi li ajvalile.

28Scotol li c'usitic laj yich' alele ic'ot ono'ox ta pasel ta stojol li ajvalil Nabucodonosore. 29C'alal iloc' jun jabile, li ajvalile te xva'et ta sjol spasubmantal ta Babilonia, 30jech laj yal: “Li muc'ta lum Babilonia li'i, vu'un la jpas ta jmuc'ul jtsatsal, ja' muc'ta lum yu'un scotol ti c'u smuc'ul jventainoje; ja' sq'uelubil ti toj ech'em jmuc'ule”, xi.

31C'alal ja' to no'ox jech iloc' ta yee, oy boch'o ic'opoj tal ta vinajel, jech laj yal: “Ajvalil Nabucodonosor, chacalbot tal ava'ay, li avabtele tuch'bil xa. 32Chavich' jipel loq'uel ta stojol li cristianoetique; ja' chbat achi'in ta naclej li chonbolometique. Ts'i'lal chlic alo' jech chac c'u cha'al vacaxetic. Vucub jabil te chacom o, ja' to me laj avil ti ja' sventainojbe yabtel ajvaliletic li Boch'o te oy ta vinajele, xchi'uc ti ja' chac'be yabtel li boch'o tsc'an chac'bee”, xi.

33Te no'ox ta yorail ic'ot ta pasel li c'usi laj yich' alel ta sventa li Nabucodonosore. Laj yich' net'el loq'uel ta stojol li cristianoetique, bat slo' ts'i'laletic jech chac c'u cha'al vacaxetic. Te i'ach' ta job osil, inatub stsotsil jol jech chac c'u cha'al sc'uc'umal xic, xchi'uc inatub yic'ach jech chac c'u cha'al yic'ach mutetic.

Ilecub yan velta li Nabucodonosore

34“C'alal its'aqui li vucub jabile, vu'un li Nabucodonosorune, la jtoy jsat ta vinajel, ja' to laj ca'ay ti isut tal yan velta li jrazone. Jech te lic calbe slequilal li Dios ta vinajele; laj quich' ta muc' li Boch'o cuxul o sbatel osile, jech laj cal:

‘Ja' tspas mantal o sbatel osil;

ja' ajvalil o yu'un ti jayc'ol cristianoetic chjelove.

35Scotol li jnaclumetic li' ta banamile

mu'yuc c'usi xu' yu'un ch-ilatic.

Li stuque ta spas c'usi tsc'an ta stojol

li boch'otic te oy ta vinajele xchi'uc li jnaclumetic li' ta banamile.

Mu'yuc boch'o xu' yu'un tspajes;#Is 40.22-23.

mu'yuc boch'o xu' yu'un jech chalbe:

¿C'u yu'un jech chapas? mu'yuc boch'o xu' xut.’#Job 9.12; Is 45.9.

36“Te no'ox ta sc'ac'alil ital lec jrazon yan velta. Isut tal scotol li cabtel sventa ajvalilale xchi'uc li jmuc'ule, li jlequilale. Li ajvaliletic xchi'uc li quich'umc'optac ta abtel ti bu c'alal jventainoje ital sa'icun, jech te linaqui lec ta cabtel yan velta. Ech'em to li'ac'at ta ich'el ta muc'.

37“Ja' yu'un vu'un li Nabucodonosorune, ta xcalbe slequilal, ta xquich' ta muc', ta xcac' ta ich'el ta muc' li Ajvalil ta vinajele, yu'un li yabtele puru melelic; tuc' scotol li c'usitic tspase,#Dt 32.4. xchi'uc xu' yu'un ta sbic'tajes li boch'otic tstoy sbaique”, xi li ajvalile.

Currently Selected:

Daniel 4: TZE97

Highlight

Copy