Daniel 5
5
Li Daniele laj yalbe smelol c'usi ivinaj ta c'alna
1Li Belsasar ajvalil ta Babiloniae la spas jun muc'ta q'uin, laj yac' lec ve'el; la stsob jmil (1,000) banquilaletic yu'un ti bu c'alal sventainoje. C'alal te chve'ic li ajvalil xchi'uc li boch'otic yic'anoje laj yuch'ic ep pasem ya'lel ts'usub. 2-3C'alal q'uixnajem xa lec cha'ay li Belsasare, la stac ta ich'el li vasoetic pasbil ta c'anal taq'uin, ta saquil taq'uin ti laj yich' tal ta ch'ulna yu'un Dios te ta Jerusalén li Nabucodonosore, ja' li smuc'ta moltote, yu'un ja' te chuch'ic o pasem ya'lel ts'usub xchi'uc scotol li banquilaletic yu'une xchi'uc li yajniltaque xchi'uc li yan antsetic yu'une. Jech te laj yich'ic tal li vasoetic pasbil ta c'anal taq'uine; ja' te laj yuch'ic o pasem ya'lel ts'usub li ajvalile xchi'uc li banquilaletic yu'une xchi'uc li yajniltaque xchi'uc li yantic antsetic yu'une. 4Scotolic laj yuch'ic pasem ya'lel ts'usub, jech lic yich'ic ta muc' li diosetic yu'unic ti pasbilic ta c'anal taq'uin, ta saquil taq'uin, ta bronce, ta tsatsal taq'uin, ta te', xchi'uc ta tone.
5Ta ora no'ox te ivinaj jun c'obil ta c'alna ta yeloval candiletic ta spasubmantal li ajvalile, xco'laj xchi'uc sbic'tal sc'ob cristiano yilel. Te lic ts'ibajuc. C'alal laj yil ajvalil ti te tsts'ibaj li c'obile, 6toj saclich'tajel no'ox ic'ot, toj batel xch'ulel ic'ot; i'alub sbec'tal, solel xc'ojlajet ta t'elt'unel li sjoljol yacane. 7Li ajvalile tsots i'avan; laj yic' scotol li bijil viniquetic te ta Babiloniae, xchi'uc li boch'otic chilic c'usitic chc'ot ta pasele, xchi'uc li yantic bijil viniquetique, jech laj yalbe:
—Li boch'o xu' yu'un sq'uelel c'usi chal li c'usi ts'ibabil le'e, xchi'uc ti chiyalbun c'usi smelole, ta xich' ac'bel slap yax'elan c'u'il, xchi'uc jlic nats'il pasbil ta c'anal taq'uin, xchi'uc ja' yoxibal ajvalil chc'ot ti bu c'alal jventainoje —xut.
8Jech i'ochic scotol li bijil viniquetic yu'un ajvalile, pero me junuc mu'yuc boch'o laj yotquin li c'usi ts'ibabile, xchi'uc muc xu' yu'unic laj yalbeic c'usi smelol. 9Ja' yu'un li ajvalile yantic to i'och xi'el ta yo'nton, solel isaclich'taj o ta j'ech'el. Li banquilaletic yu'un te tsobolique mu xa sna' c'usi tspasic ec. 10Li sme' ajvalile ital ec ti c'alal laj ya'ay i'avan li ajvalile xchi'uc li banquilaletic yu'une. I'och batel ti bu tspasic q'uine, jech laj yal:
—Ajvalil, ich'bilucot o ta muc'. Mu me epuc xaxi'; mu me loq'uel xasaclich'taj. 11Li' ta banamil ti c'u smuc'ul aventainoje oy jun vinic ti yich'ojbe sbijil li ch'ul diosetique. C'alal ja'o ochem ta ajvalilal li anima amuc'ta moltote, oy c'usi lec la stabe; la stabe sbijil sjol yo'nton. Laj yil ti lec jamal sat jech chac c'u cha'al sbijil li diosetique. Ja' yu'un li Nabucodonosor, ja' li anima amuc'ta moltote, la stic' ta banquilal yu'un li bijil viniquetique xchi'uc li jt'unuletique xchi'uc li boch'otic sna'ic sq'uelel senyail ta vinajel c'usitic chc'ot ta pasele. 12Yu'un oy lec sbijil, oy c'usi lec sna', lec jamal sat ta sventa chalbe smelol vaychiletic; lec sna' staq'uel lo'iletic ti mucul smelole, xchi'uc lec xu' yu'un chal c'usi mu stac' na'el. Le'e ja' li Daniel ti Beltsasar laj yac'be sbi li anima amuc'ta moltote. Ja' lec ic'o tal ta ora li Daniele; ja' xu' yu'un chayalbot —xi.
13Ja' yu'un li Daniele laj yich' iq'uel tal ta stojol li ajvalile, jech i'albat yu'un li ajvalile:
—¿Me vo'ot li Daniel abie? ¿Me vo'ot xnich'onot li boch'otic chucbil iloq'uic tal ta Judá banamil yu'un anima jmuc'ta moltote? 14Ca'yoj ac'oplal ti avich'ojbe sbijil li ch'ul diosetique; ilbilot ti oy lec abijil, ti oy c'usi lec xana'e, ti lec jamal aba asate. 15Laj quiq'uic tal li bijil viniquetic, xchi'uc li boch'otic sna'ic sq'uelel senyail ta vinajel c'usitic chc'ot ta pasele, yu'un ac'o yaptaic li c'usi li' ts'ibabile, pero muc xu' yu'un xiyalbicun c'usi chal, xchi'uc c'usi smelol. 16Jech laj ca'ay ti vo'ot xu' avu'un chavalbe smelol li c'usi tsotsique, li c'usi mu stac' na'ele. Me chavalbun c'usi chal li c'usi li' ts'ibabile xchi'uc me xu' avu'un chavalbun c'usi smelole, chavich' ac'bel alap yax'elan c'u'il, xchi'uc jlic nats'il pasbil ta c'anal taq'uin. Jech noxtoc vo'ot yoxibal ajvalil chac'ot ta scotol ti c'u smuc'ul jventainoje —xut.
17Pero li Daniele jech la stac'be li ajvalile:
—Te ich'o li matanaletic avu'une, o me chavac' batel ta yan. Pero ta xcaptabot tal ava'ay li c'usi ts'ibabile; chacalbot ava'ay li c'usi smelole. 18Li Dios ta toyole ja' laj yac'be yabtel ta ajvalilal li amuc'ta moltot Nabucodonosore, ja' laj yac'be muc' yabtel; laj yac'be svu'el, xchi'uc laj yac' ta ich'el ta muc'. 19Ta sventa ti la smuq'uibtasbe yabtele, jech lic ich'atuc ta muc' yu'un scotol li cristianoetic ta jujun lum, ta jujun banamil, xchi'uc ta jujuchop c'ope; xi'bil o yu'un scotolic. Li boch'o tsc'an tsmile la smil; li boch'o mu sc'an smile mu'yuc la smil. Li boch'o tsc'an chac' ta ich'el ta muq'ue laj yac' ta ich'el ta muc'; li boch'o tsc'an tsbic'tajese solel la sbic'tajes o. 20Pero c'alal toj ech'em lic stoy sbae, c'alal la spas ta tsots yo'nton ta scoj li stoyobbaile, lic yich' loq'uesel ta yabtel; laj yich' pojbel li slequilale. 21Laj yich' nutsel loq'uel ta stojol li cristianoetique; ja' laj yich'be sjol yo'nton chonbolometic. Ja' xchi'il ta naclej ic'ot li te'tical buroetique; ts'i'laletic lic slo' jech chac c'u cha'al vacaxetic, te i'ach' o ta job osil. Ja' to ti c'alal laj yotquin ti ja' sventainojbe yabtel ajvaliletic li Dios te oy ta vinajele, xchi'uc ti ja' stuc chac'be yabtel li boch'o tsc'an yo'nton chac'bee. 22Li vo'ote ana'oj ti jech ic'ot ta pasel ta stojole yu'un vo'ot smomnich'onot, pero mu'yuc ono'ox xabic'tajes aba ec. 23Ja' no'ox latoy aba ta stojol li Yajval vinajele; laj acontrain, xchi'uc laj atac ta ich'el noxtoc li vaso te liquem tal ta ch'ulna yu'une. Ja' te laj avuch'ic o pasem ya'lel ts'usub achi'uc li banquilaletic avu'une, xchi'uc li avajniltaque, xchi'uc li yantic antsetic avu'une. Jech noxtoc te lic avich' ta muc' li diosetic avu'un ti pasbil ta saquil taq'uin, ta c'anal taq'uin, ta bronce, ta tsatsal taq'uin, ta te', xchi'uc ta ton ti mu xil osile, ti mu xa'ay c'ope, ti mu c'usi sna' oe. Yan li Dios ti ja' oy ta sc'ob acuxlejale#Job 12.10. xchi'uc ti ja' ta sventa chapas scotol li c'usitic chapase, me jutuc muc xavich' ta muc'. 24Ja' yu'un ja' stuc la stac tal li c'obil ti la sts'iba comel li c'usi li' ts'ibabile. 25Li c'usi la sts'ibae ja' jech chal: MENE, MENE, TEKEL, PARSIN, xi. 26Li smelole ja' li'i: MENE: atbil xa. Li Diose laj xa yata c'u sjalil la'och ta ajvalilal, jech te no'ox c'alal ta spajes o li avabtele. 27TEKEL: bisbil. Laj xa sbisot ta kilo, pero mu'yuc lec iloc'. 28PARSIN: voc'bil. Li Diose laj xa svoc' ti c'u smuc'ul aventainoje; laj xa yac'be li mediaetic xchi'uc li persiaetique —xut.
29Ja' yu'un li ajvalil Belsasare laj yal mantal ti ac'o yich' lapbel yax'elan c'u'il li Daniele, xchi'uc ti ac'o xojbeic snats' pasbil ta c'anal taq'uine, xchi'uc laj yal ti ja' yoxibal ajvalil chc'ot ti c'u smuc'ul sventainoje.
30Te no'ox ta yac'ubalil laj yich' milel li Belsasar, ja' li ajvalil yu'un caldeaetique. 31Li Darío liquem ta Mediae ja' lic ochuc ta ajvalilal. Yich'oj xa'ox chib xchanvinic (62) jabil.
Currently Selected:
Daniel 5: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.