Daniel 3
3
Icolic loq'uel ta horno oxib viniquetic
1Li ajvalil Nabucodonosore laj yac' ta pasel jun muc'ta loc'om ta c'anal taq'uin, lajuneb xcha'vinic (30) metro snatil, oxib metro sjamalil; te la sva'anic ta stenlejaltic Dura ta yosilal Babilonia. 2Li Nabucodonosore la stac ta iq'uel scotol li ajvaliletic ta jujun banamile, xchi'uc li ajvaliletic ta jujun lume, xchi'uc li banquilal soldadoetique, xchi'uc li yich'ub-c'optac ajvaliletique, xchi'uc li jchabitaq'uinetique, xchi'uc li jchapanvanejetique, xchi'uc li banquilaletique, xchi'uc scotol li boch'otic oy yabtelic ta jujun muc'tic lume, yu'un ac'o bat stsob sba scotolic ta sventa sq'uinal li muc'ta loc'om laj yac' ta pasel Nabucodonosore. 3Scotol li boch'otic oy yabtelic ta sjunul Babilonia banamil ti laj yich'ic taquel ta iq'uele, ital scotolic ta sventa li q'uine. Te la stsob sbaic ta yoc li loc'om laj yac' ta pasel ajvalil Nabucodonosore. 4Li boch'o yich'oj yabtel ta xal c'alal chlic q'uine tsots ic'opoj, jech laj yal: “A'yo ava'yic acotolic ta jujun lum, ta jujun banamil, ta jujuchop c'op: 5C'alal chava'yic chbac' oq'ues, ama, vob, arpa, muc'tic arpa, yantic amaetic, xchi'uc scotol li jaychop sonetique, xaquejan abaic ta stojol, xavich'ic me ta muc' li loc'om pasbil ta c'anal taq'uin ti laj yac' ta pasel ajvalil Nabucodonosore. 6Li boch'o mu squejan sba, mu xich' ta muq'ue ta xich' tiq'uel ta horno ti tsanbil sc'ac'ale”, xi.
7C'alal laj ya'yic scotol cristianoetic ta jujun lum, ta jujun banamil, ta jujuchop c'op laj yich' tijel scotol li jaychop sonetique, la squejan sbaic ta stojol; laj yich'ic ta muc' li loc'ome.
8Ta yorail le'e, oy jayibuc caldea viniquetic la stic'beic smul ta stojol ajvalil Nabucodonosor li judaetique, 9jech laj yalic:
—¡Ajvalil, ich'bilucot o ta muc'! 10Ajvalil, vo'ot atuc laj aval mantal ti scotol cristianoetic ac'o squejan sbaic, ac'o yich'ic ta muc' li loc'om pasbil ta c'anal taq'uin c'alal me laj yich' tijel scotol li jaychop sonetique. 11Li boch'otic mu squejan sbaic, mu sc'an xich'ic ta muq'ue, avaloj mantal ti ac'o yich'ic tiq'uel ta horno ti xpulpun lec sc'ac'ale. 12Yu'un oy jun chibuc judaetic ti avac'ojbe yabtelic ta sjunul yosilal Babiloniae, ja' li Sadrac, Mesac, xchi'uc Abed-negoe. Li querem viniquetic le'e mu xayich'icot ta muc', xchi'uc mu xich'ic ta muc' li dios avu'une, xchi'uc li muc'ta loc'om laj avac' ta pasel ta c'anal taq'uine —xutic.
13C'alal laj ya'ay li Nabucodonosore, tsots i'ilin. Ta sc'ac'al yo'nton laj yal ti ac'o yiq'uic tal li Sadrac, Mesac, xchi'uc Abed-negoe. Jech ta ora laj yiq'uic tal li oxib viniquetique. 14Li ajvalil Nabucodonosore jech la sjac'be:
—¿Me jech ti mu xac'an xavich'ic ta muc' li diosetic cu'une, xchi'uc ti mu xac'an xaquejan abaic ta stojol li loc'om laj cac' ta pasel ta c'anal taq'uine? 15¿Li' ta orae me chapaloxuc xa chaquejan abaic ta stojol, chavich'ic ta muc' c'alal me laj ava'yic chich' tijel li jaychop sonetic li' oye? Me mu xac'an xavich'ic ta muq'ue, ta ora chavich'ic tiq'uel ta horno ti tsanbil lec sc'ac'ale. ¿Me oy yan dios ti xu' chascoltaoxuc loq'uel ta jc'obe? —xi.
16Li Sadrac, Mesac, xchi'uc Abed-negoe jech la stac'beic li ajvalile:
—Mu'yuc persa ta jtac'cutic li c'usi laj avale —xutic.
17A'yo ava'ay, li Dios cu'uncutic ti quich'ojcutic ta muq'ue ja' xu' yu'un chiscoltauncutic ta sventa li horno ti tsanbil lec sc'ac'ale, xchi'uc xu' yu'un chiscoltauncutic loq'uel ta ac'ob. 18Ac'o me mu xiscoltauncutic, pero ta jc'ancutic chana' lec ti mu xquich'cutic ta muc' li diosetic avu'une, jech noxtoc mu'yuc ta xquich'cutic ta muc' li muc'ta loc'om laj avac' ta pasel ta c'anal taq'uine —xutic.
19Li Nabucodonosore solel ichacpochtaj ta il ta stojol li Sadrac, Mesac, xchi'uc Abed-negoe, jech lic yal mantal ti vucub velta ven c'oc' ac'o spasic jech chac c'u cha'al tspasic ono'oxe. 20Jech lic yalbe mantal li yajsoldadotac ti lec tsots xu' yu'unique, yu'un ac'o xchuquic li Sadrac, Mesac, xchi'uc Abed-negoe; ac'o stiq'uic ochel ta horno ti bats'i ech'em tsanbil sc'ac'ale. 21Jech te lic yich'ic chuquel xchi'uc sc'u' spoq'uic, xonobic, xpix sjolic, xchi'uc scotol li c'usitic yan slapojique; laj yich'ic tiq'uel ochel ta horno ti bats'i ech'em sc'ac'ale. 22Ta sventa ti tsots mantal laj yal li ajvalile, jech toj tsots la sc'ac'ubtasic li hornoe. Solel xpulpun ta jyalel, jech ta yat c'oc' no'ox ichamic li boch'o la sjipic ochel ta horno li Sadrac, Mesac, xchi'uc Abed-negoe. 23Li oxib viniquetic le'e lec chucul ic'otic ta yut li horno ti bats'i tsots sc'ac'ale.
24C'alal la sq'uel batel li ajvalil Nabucodonosore, ixi'. Iva'i ta anil, jech laj yalbe li yajcoltaubbail ta lo'ile:
—¿Me mu oxibuc no'ox li viniquetic chucul la sjipic ochel ta c'oq'ue? —xut.
—Oxibic no'ox, —xi itac'ovic.
25—Pero tana chanib xa viniquetic te oyic ta yut c'oc' ta xquil, mu'yuc xa chuculic; jun yo'nton te xva'lajetic ta yut c'oc', me jutuc mu'yuc c'usi tspasbatic. Li june xco'laj xchi'uc j'almantal yilel —xi li ajvalile.
26Li Nabucodonosore inopaj batel ta sti' li horno ti xpulpun sc'ac'ale; tsots ic'opoj batel:
—Sadrac, Mesac, Abed-nego, vo'oxuc li yajtuneloxuc Dios ta toyole, loc'anic tal, la'ic li'i —xi.
Jech iloq'uic tal ta yut c'oc' li oxib viniquetique. 27Scotol li j'abteletic ta sjunul banamil te oyique te inopajic batel ta stojol li viniquetique, yu'un tsq'uelic c'u x'elan. Me jutuc mu'yuc c'usi ipasbatic yu'un li c'oq'ue, me jutuc mu'yuc bu c'aq'uem jbejuc stsotsil sjolic, me jutuc mu'yuc c'usi spasoj li sc'u'ique, me jutuc mu'yuc xcuchoj yic' ch'ayil.
28Ja' yu'un li Nabucodonosore jech laj yal: “¡Ich'biluc ta muc' li Dios yu'un Sadrac, Mesac, xchi'uc Abed-negoe, yu'un la stac tal yaj'almantal ta sventa tscolta li yajtuneltac ti jun yo'ntonic ta stojole. Ja' muc xch'unic li mantal laj cale; ja' laj yac' sbec'talic ta scoj ti mu sc'an xich'ic ta muc' yan dios jech chac c'u cha'al chich'ic ta muc' li Dios yu'unique. 29Ja' yu'un li' ta xcal mantal: Acotolic ta jujun lum, ta jujun banamil, ta jujuchop ac'opic, li boch'o chchopolc'opoj ta stojol Dios yu'unic li viniquetic li'i, biq'uitic ta xich' sesinel. Li snae puru slilijemal xa te chcom, yu'un mu'yuc xa yan dios xu' yu'un chcoltavan jech chac c'u cha'al li Dios le'e!”, xi li ajvalile.
30Ja' yu'un li ajvalile, toj tsots yabtel laj yac'be ta sjunul Babilonia banamil li Sadrac, Mesac, xchi'uc Abed-negoe.
Currently Selected:
Daniel 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.