2 Samuel 19
19
1C'alal laj ya'yic israeletic ti ep ch-oc', ti ep chat yo'nton yu'un Absalón li ajvalile, ibat yalbeic li Joabe. 2Ac'o me la spasic canal ta pleito, pero ja'o yorail ic'ataj ta at-o'nton yu'un scotolic. Yu'un ja'o laj ya'yic scotol israeletic ti ep chat yo'nton yu'un xnich'on li ajvalile. 3Ja' yu'un scotol li israeletic ti i'ayic ta pleitoe ta nac'nac'bail xa i'ochic batel ta lum, ep q'uexlal cha'yic; co'ol chac c'u cha'al ta jatubal xa isutic tal ta pleito. 4Pero li ajvalile smacoj sat; tsots ch-avan, jech chal: “¡Cunin nich'on Absalón, cunin nich'on Absalón!”, xi.
5Ja' yu'un li Joabe ibat ta stojol li ajvalile, jech c'ot yalbe:
—Li' ta orae chavac' ta q'uexlal scotol li avinictac ti la scoltaot yo' jech cuxulot toe, xchi'uc ti jech cuxulic to li aquerem atsebetic, li avajniltac xchi'uc li yantic antsetic avu'une. 6Pasuc venta ja' c'ux ta avo'nton yilel li boch'otic chascontrainote; ja' abajoj yilel li boch'otic chaxc'uxubinicote. Lec chvinaj ti ja' mu'yuc ta avo'nton li banquilaletic avu'une xchi'uc li yantic avaj'abteltaque. Ja' xcuxet avo'nton jna' ti vu'cun chamcuncutic jcotolcutique, ti ja'uc cuxul icom li Absalone. 7Loc'an me batel un, bat me patbo yo'nton li avaj'abteltaque. Me mu xloc' ac'opane, jamal chacalbot ta stojol Muc'ul Dios ti mu junuc achi'il chcom li' ta ac'ubaltic tanae. Pero ja' toj ven chopol chaloc'; ja' xu' to jutuc ti c'alal ja' no'ox ep avocol laj ata tal ta aqueremal c'alal to tanae —xut.
8Li ajvalile itots; ibat chotluc ta sti' li ochebal yu'un lume. C'alal laj ya'yic scotol yaj'abteltac ti te xa chotol ta sti' lum li ajvalile, la stsob sbaic tal ta stojol scotolic. Scotol li yan xchi'iltaquique jatovenic xa'ox batel ta anil ta snaic.
Isut ta Jerusalén li Davide
9Ta scotol li jaychop israeletique jech chalilanic: “Li ajvalil Davide la scoltautic loq'uel ta sc'ob li cajcontratique xchi'uc ta sc'ob li filistaetique, pero ijatov batel li' ta cosilaltic ta scoj li Absalone. 10Li Absalón ti laj ox jt'ujtic sventa ajvalilal cu'untique, icham ta pleito. ¿C'u yu'un te no'ox ch'an xijchi? ¿C'u yu'un muc ta jc'antic ac'o sutuc tal li Davide?”, xiic.
11Li a'yej le'e ic'ot ta stojol li ajvalil Davide, jech la stacbe batel mantal li paleetic Sadoc xchi'uc Abiatare. Jech laj yalbe batel: “Bat c'opanic li banquilaletic yu'un Judae; jac'beic c'u yu'un ti ja' vocol chc'ot ta yo'ntonic chiyiq'uicun sutel ta jpasubmantale. 12Albeic ti mu smeloluc ti ja' ts'acal chiyiq'uicun sutele, yu'un ja' jun jch'ich'al, ja' jun jts'unubal jchi'uc”, xut. 13Jech la stacbe batel mantal ec li Amasae: “Li vo'ote jun jts'unubaltic jun jch'ich'altic ec. Li' ta ora xchi'uc le' to batele vo'ot chacom ta mero jpasmantal yu'un cajsoldadotac. Vo'ot xq'uexolot Joab chacom. Me mu xc'ot ta pasel cu'une, tsots ac'o yac'bun jtoj li Muc'ul Diose”, xut batel.
14Ja' jech ic'ot ta yo'nton yu'un scotol li viniquetic ta Judae. Scotolic jun no'ox laj yac' sbaic. Jun no'ox ya'yej scotolic, jech laj yalbeic batel li ajvalile: “Xu' chasut tal achi'uc scotol li j'abteletic avu'une”, xutic batel. 15Jech isut batel li ajvalile; te ic'ot ta uc'um Jordán. Li judaetique ibatic ta Gilgal, bat snupic tal, xchi'uc bat sjelubtasic tal ta uc'um. 16Jech ec li Simei#2 S 16.5-13. xnich'on Gera ti liquem ta Benjamín, te nacal ta Bahurime, laj yac'be yipal batel ec. La xchi'in batel li judaetique yu'un bat snup tal ec li ajvalile. 17Xchi'inoj batel jmil (1,000) viniquetic liquemic ta Benjamín. Jech noxtoc li Siba, ja' li smozoic xnich'nab Saule, ibat ec. Bat xchi'in svo'lajunebal (15) xnich'nab xchi'uc jtob (20) smozotac. Ijelovic batel ta jot uc'um Jordán te yo' bu oy li ajvalile. 18Te ijelovic batel ta xtuch'ubil li uc'ume yu'un chic'beic jelovel tal yalab xnich'nab li ajvalile, yu'un jech lec ch-ilatic yu'un li ajvalile. C'alal jeloven xa ta jot uc'ume, li Simei xnich'on Gerae la spatan sba ta stojol li ajvalile, 19jech laj yalbe:
—Ajvalil, avocoluc ch'aybun ta ajol ta avo'nton li c'usi chopol la jpasbote, ti c'u yepal jmul la jta ta atojol ti c'alal laloc' tal ta Jerusalene. Avocoluc mu xa'ilin ta jtojol. 20Laj xa jna' ti ta melel oy jmule. Ta scotol li yalab xnich'nab Josee, vu'un no'ox jtuc ti ba'yuc tal jnupot ta be vo'ot li ajvalilote —xut.
21Li Abisai yol Sarviae jech laj yal:
—¿Me yu'un mu'yuc tstoj ta milel avu'un ti la xchopolc'optaot, vo'ot li ajvalilot ti t'ujbilot yu'un Muc'ul Diose? —xi.
22Pero li Davide jech laj yal:
—Mu xatic' abaic vo'oxuc, yalabtac Sarvia. ¿C'u yu'un ti chaliquic ta vulajetel ta jtojole? Ta jna' ti vu'un ajvalilun avu'unic li' ta Israele, ja' yu'un li' ta orae me junuc mu'yuc boch'o ta xcac' ta milel —xi.
23Ts'acal jech laj yalbe li Simeie:
—Ta xcalbot ta stojol Dios ti mu'yuc chavich' milele —xut.
24Jech noxtoc li Mefi-boset#2 S 9.1-13; 16.1-4. xnich'on Saule iloc' snup ta be ec li ajvalile. C'alal iloc' batel li ajvalile xchi'uc c'alal to isut tale, yoquel mu'yuc spocoj o yacan, mu'yuc sloc'oj o yisim, xchi'uc mu'yuc xchuc'oj o sc'u' li Mefi-bosete. 25C'alal iloc' batel ta Jerusalén, bat snup ta be li ajvalile, jech i'albat yu'un li ajvalile:
—Mefi-boset, ¿c'u yu'un ti muc xachi'inune? —xut.
26Itac'ov:
—Ajvalil, yu'un la slo'laun li jmozoe. Ta scoj ti coxoune ja' yu'un jech laj calbe: ‘Cajanbo syavarta li jburoe, yu'un ta xicaji batel, chbat jchi'in li ajvalile’, xcut. 27Pero la soquesbun jc'oplal ta atojol. Vo'ot li ajvalilot cu'une co'olot jech chac c'u cha'al yaj'almantal Dios, ja' yu'un pasbun li c'usi tsc'an avo'ntone. 28Scotol li cuts' calal ta sventa jtote xu' laj avac' ta milel ta asat ti jechuque, vo'ot li ajvalilote. Pero ja' no'ox laj aval ti chibat ta ve'el ta amexae. Ja' yu'un mu'yuc c'usi xu' cu'un chcal ta atojol ajvalil —xut.
29Itac'ov li ajvalile:
—Mu'yuc c'usi yan xu' chcaltic. Laj xa cal mantal ti vo'ot chavoc'be abaic li banamil achi'uc Sibae —xi.
30Itac'ov li Mefi-bosete:
—Ac'o yich' comel stuc scotol. Ja' no'ox tsots sc'oplal chca'ay ti lec tsots lasut tal li' ta apasubmantal li vo'ote —xi.
31Jech ec li Barzilai#2 S 17.27-29. liquem ta Galaade iyal batel ta Rogelim; ijelov batel ta jot uc'um Jordán ec, yu'un bat xchi'in li ajvalile. 32Pero toj mol xa'ox; yich'oj xa'ox chanvinic (80) jabil. Ti jayib c'ac'al te oy ta Mahanaim li ajvalile, ja' laj yac'be scotol c'usi itun yu'un, yu'un toj jc'ulej. 33Li ajvalile jech laj yalbe li Barzilaie:
—Bat chi'inun ta Jerusalén; te chajventainot o —xut.
34Pero li Barzilaie jech laj yal:
—Mu xa epuc c'ac'al cuxulun sventa chbat jchi'inot ta Jerusalén, vo'ot li ajvalilote. 35Quich'oj xa chanvinic (80) jabil ta ora. Ich'ay xa smuil li c'usi ta jtune. Mu xa xu' chcal me mu, me muc muuc. Jech noxtoc mu xa xca'ay lec c'alal chq'uejinic li vinic antsetique. Ja' yu'un jeche' xa no'ox chbat cac' ep avocol, ajvalil. 36Me ja' xa no'ox ta jchi'inot jelovel ta jot uc'um Jordane, ¿c'u yu'un ti toj muc' li jmoton chavac'bune? 37Ja' no'ox ta jc'anbot vocol ti coltaun sutel ta jlumale, yu'un te chbat chamcun; te chbat muccun yo' bu mucajtic li jtot jme'e. Li' oy li jnich'on Quimame. Ja' bat chi'ino, ac'o tunuc avu'un. Ac'bo spas li c'usi oy ta avo'ntone —xut.
38Itac'ov li ajvalile:
—Ac'o bat xchi'inun li Quimame; ta xcac'be scotol li c'usi lec chava'ye. Scotol li c'usi chac'anbune ta xcac'be —xi.
39Scotolic ijelovic ta jot uc'um Jordán. C'alal ijelov ec li ajvalile, la sts'uts' li Barzilaie; la sc'anbe bendición, jech isut batel ta sna. 40Li ajvalile ijelov batel ta Gilgal; te xchi'uc batel li Quimame. Scotol li israeletic ta Judae xchi'uc li j'o'lol ta Israele te xchi'uquic batel li ajvalile. 41Scotol li viniquetic ta Israele jech tal yalbeic li ajvalile:
—¿C'u yu'un ti ja' no'ox jchi'ilcutic ta Judá tsc'an chayic'ot, xchi'uc ti ja' no'ox la sjelubtasoxuc tal li' ta jot uc'um Jordán achi'uc boch'otic oy avu'un, xchi'uc scotol achi'iltac ta abtel, vo'ot li ajvalilot cu'uncutique? —xutic.
42Itac'ov li Judá viniquetique:
—Yu'un li ajvalile ja' mero cuts' calalcutic, ja' yu'un mu smeloluc ti cha'ilinic ta jtojolcutique. ¿Me yu'un oy xa co'ol live' jchi'ucutic, xchi'uc me yu'un oy xa bu la jch'am jmotoncutic avilic? —xiic.
43Itac'ov li israel viniquetique:
—Li vu'uncutique lajuneb to velta xjelov xu' ta jchi'incutic li ajvalile, xchi'uc vu'uncutic toj ep ta chop oyuncutic. Jech ¿c'u yu'un ti mu'yuc tsots jc'oplalcutic ta avo'ntonique? ¿Me muc vu'cun ba'yuc laj calcutic ti ac'o sutuc batel li ajvalil cu'untique? —xiic.
Pero li judá viniquetic ja' toj tsots c'usi laj yalic; ja' mu'yuc tsots c'usi laj yalic li yan israeletique.
Currently Selected:
2 Samuel 19: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.