2 Samuel 18
18
Icham li Absalone
1Li Davide lic xchapan lec li svinictaque. La st'ujbe banquilaletic yu'unic ta jujumil (1,000) xchi'uc vo'vo'vinic (100). 2Ts'acal lic stac batel ta oxvoc'. Jvoc' laj yac'be sventain li Joabe; jvoc' laj yac'be sventain li Abisai yol Sarvia, yits'in Joabe. Jvoc' laj yac'be sventain li Itai geteo vinique. Li ajvalile jech laj yalbe scotolic:
—Vu'un ta xbat jchi'inoxuc jtuc ta paspleito —xut.
3Pero li stuquique jech itac'ovic:
—Ja' lec mu xabat, ajvalil. Yu'un me lijatovcutic li vu'uncutique, mu'yuc tsots sc'oplal cha'yic. Ac'o me chichamcutic j'o'loluc li vu'uncutique, jech mu'yuc tsots sc'oplal cha'yic noxtoc. Yu'un li vo'ote toj ven tsots ac'oplal cha'yic jech chac c'u cha'al lajunmil (10,000) quepalcutic li vu'uncutique. Ja' yu'un ja' lec ti li' no'ox ta lum chavac'buncutic batel yan boch'otic xu' chiscoltauncutique —xutic.
4Itac'ov li ajvalile:
—Lec oy, ta jch'un li c'usi chavalique —xi.
Jech ta ora laj yac' sba ta xocon li ochebal yu'un lume, jech iloq'uic batel scotol li israeletic ti yic'ojan sbaic ta vo'vinic (100), ta jmil (1,000), ta jujutsobe.
5Li ajvalile jech to laj yalbe batel li Joab, Abisai, xchi'uc Itaie:
—Avocolicuc lec no'ox me xac'opanic li querem Absalone —xut.
Laj ya'yic scotol svinictac c'usi laj yal batel ta sventa Absalón li ajvalile, xchi'uc laj ya'yic scotol li banquilal soldadoetique. 6Jech ibatic scotolic, bat spasic pleito xchi'uc li yan israeletique.
Te c'ot yac'be sbaic ta toyolaltic yu'un Efraín. 7Scotol li yantic israeletique tsalbil ic'otic yu'un li svinictac Davide. Li jun c'ac'al le'e ep ichamic; ja' ichamic jtob ta mil (20,000) viniquetic. 8Li pleitoe i'epaj batel ta scotol yosilalic. Ja' toj ep ichamic ta scoj li te'etique; ja' mu sta jech yepal ti ichamic ta espadae. 9Li Absalone cajal batel ta machu; te la sta sbaic xchi'uc li svinictac Davide. Li xmachue i'och batel ta yolon jpets tulan, pero toj pim sc'ob li tulane. Jech te cacal icom snuc' ta c'ob tulan li Absalone, te xt'uyet icom. Li xmachue ijelov batel ta anil. 10Oy jun boch'o laj yil, jech ibat yalbe ta ora li Joabe.
—Le' jipil icom ta c'ob tulan li Absalone —xut.
11Itac'ov li Joabe:
—Me laj avil lec atuque, ¿c'u yu'un muc xamil comel? Te laj amochan comel ta banamil ti jechuque. Ti jechuc laj apase, xcuxet no'ox co'nton chacac'bot lajunsep saquil taq'uin xchi'uc achuc ti jechuque —xut.
12Li vinique jech la stac'be li Joabe:
—Ac'o me chavac'bun jmil (1,000) ta sep saquil taq'uin, pero mu ono'ox xcac' jc'ob ta stojol li xnich'on ajvalile, yu'un laj ca'icutic ti laj avich'ic lec mantal yu'un ajvalil achi'uc li Abisaie xchi'uc li Itaie. La'albatic tal ti mu me c'usi xc'ot ta pasel ta stojol li querem Absalone. 13Ti lajuc jpas jeche, altic, yu'un mu'yuc c'usi stac' naq'uel ta stojol li ajvalile. Jech ec li vo'ote mu'yuc c'usi xu' avu'un chapas sventa chapojun ti jechuque —xut.
14Itac'ov li Joabe:
—¡Ay! Altic tal jch'ay c'ac'al avu'un —xi.
Jech la stsac oxch'ix taq'uin lec ts'ubajtic sni'; la spajbe ta yo'nton li Absalone, yu'un cuxul to'ox ti c'alal te joc'ol ta tulane. 15Oy lajuneb jcuch-abtejebaletic yu'un li Joabe, vul sjoyibtaic li Absalone; la xcha'milic o lec. 16Li Joabe laj yal ti ac'o yich' jupanel oq'uese. Jech isutic tal ta snutsel xchi'iltaquic li svinictac Davide yu'un ipajesatic yu'un li Joabe. 17Ts'acal laj yich'beic batel sbec'tal li Absalone, bat stiq'uic ta muc'ta vomlum ta toyolaltic; lic sbusanic comel epal ton ta sba yac'ol. Scotol li israeletique ta jujuntal isut batel ta anil ta snaic.
18C'alal cuxul to'ox li Absalone, laj yac' ta va'anel jun muro te yo' bu “Stenlejaltic yu'un Ajvalil” sbie. Yu'un li Absalone jech laj yal: “Li vu'une mu'yuc jnich'on, jech mu'yuc boch'o xu' chiyich'bun comel li jbie”, xi. Ja' laj yac'be yich' sbi li muroe. “Sna'ubil Absalón”, xi sbi o c'alal to tana.
19Li Ahimaas xnich'on Sadoque jech laj yal:
—Avocoluc coltaun batel; chbat calbe ta ora ajvalil ti toj lec c'usi ipasbat yu'un li Muc'ul Diose, yu'un icoltaat xa loq'uel ta sc'ob yu'un li yajcontrae —xi.
20Itac'ov li Joabe:
—Li' ta orae muc vo'ocot oy ta aventa chbat avalbe li ajvalile. Ta yan to c'ac'al xabat. Pero muc ta orauc, yu'un icham xa o li xnich'one —xut.
21Li Joabe jech laj yalbe jun etiope vinic:
—Batan vo'ot. Bat albo ya'ay ajvalil scotol li c'usi laj avile —xut.
Li etiope vinique la snupbe comel sc'ob li Joabe, jech ibat ta anil. 22Li Ahimaase jech laj yalbe yan velta li Joabe:
—Pero ac'un batel ec; ta xibat ta anil ta spat li etiope vinique —xut.
Itac'ov li Joabe:
—Pero ¿c'usi chbat apas ti chac'an chabat ta anile, querem? Mu yu'unuc chavich' amoton ta sventa li c'usi chbat avale —xut.
23Itac'ov li Ahimaase:
—Mu labluc. Ta ono'ox xibat ta anil —xi.
—Lec oy, batan ta anil cha'e —xi li Joabe.
Li Ahimaase i'anilaj batel ta stenlejaltic; ech' stsal ta be li etiope vinique. 24Li Davide te chotol ta o'lol yu'un li chib sti' yochebal lume. Li boch'o tsq'uel me oy boch'o chtale te muyem ta yamaq'uil li scoraltonal lum te ta yac'ol yo' bu oy li sti' coraltone. C'alal la stoy sate, ja' to laj yil ti oy boch'o ch-anilaj tale, pero stuc no'ox. 25X'avet xa ta yalbel li ajvalile. Li ajvalile jech laj yal:
—Me stuc chtale, yu'un oy lec a'yej yich'oj tal —xi.
C'alal nopol xa xtale, 26ja' to laj yil ch-anilaj tal yan vinic noxtoc, jech laj yalbe ta ora li jchabi ti'nae:
—Oy yan vinic le' xtal ta anil noxtoc —xut.
—Yu'un oy lec a'yej yich'oj tal noxtoc —xi li ajvalile.
27Li boch'o muyem ta toyol tsq'uele jech to laj yal:
—Li boch'o ba'yuc iloc' tale, xco'laj xchi'uc x'anilaj Ahimaas yilel, ja' li xnich'on Sadoque —xi.
Itac'ov li ajvalile:
—Le'e ja' lequil vinic. Ta melel yu'un yich'oj tal lec a'yej jna' —xi.
28C'alal ivul li Ahimaase, vul squejan spatan sba ta banamil ta stojol li ajvalile; vul sc'opan, jech lic yalbe:
—Coliyal li Muc'ul Diose, ja' li Dios avu'une, yu'un laj xa yac' ta c'abal li viniquetic ti liquemic ta acontrainel vo'ot li ajvalilot cu'uncutique —xut.
29Jech la sjac' li ajvalile:
—¿Me lec oy li querem Absalone? —xi.
Itac'ov li Ahimaase:
—Laj quil oy ep boch'o xvochlajet ti c'alal ja'o la stacun tal li avaj'abtel Joab, vo'ot li ajvalilote. Pero muc xquil me oy c'usi ic'ot ta pasel —xi.
30Jech i'albat yu'un li ajvalile:
—Q'uejo aba batel jutuc le'e —x'utat.
Li Ahimaase la xch'un. 31Ja'o ic'ot ec li etiope vinique, jech c'ot yal:
—Oy lec a'yej quich'ojbot tal ajvalil. Toj lec c'usi la spas li Muc'ul Diose, yu'un laj xa scoltaot loq'uel ta sc'obic li boch'otic chascontrainicote —xut.
32Li ajvalile jech la sjac':
—¿Me lec oy li querem Absalone? —xut.
Itac'ov li Etiope vinique:
—Scotol li boch'otic chascontrainicote, ti chopol c'usi tsc'an chaspasboxuque, toj lec ti oyuc c'uxi jech xc'ot ta stojolic jech chac c'u cha'al ic'ot ta stojol li querem Absalone —xut.
33Li ajvalile toj chopol ic'ot yo'nton. Imuy batel ta scuarto te ta yac'ol li ti'nae; te bat oc'uc. Jech laj yalilan muyel: “¡Cunin nich'on Absalón, cunin nich'on Absalón! Vu'cun chamcune, ¡cunin nich'on Absalón, cunin nich'on!”,#2 S 19.4; Ex 32.32; Ro 9.3. xi.
Currently Selected:
2 Samuel 18: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.