2 Samuel 17
17
Li Husaie la socbe c'usi xchapanoj li Ahitofele
1Li Ahitofele ts'acal jech laj yalbe li Absalone:
—Ac'bun jt'uj lajcha'miluc (12,000) viniquetic, yu'un ta ac'ubaltic tana chbat jnuts li Davide. 2Ja' yorail xu' chbat cac'be, yu'un yo'to aluben ta lubel, jech xu' ta xi' cu'un. Jech xu' chjatovic batel scotol li svinictaque. Mu'yuc boch'o yan ta jmil; ja' no'ox ta jmil stuc li ajvalile. 3Jech ta stsob sba tal ta atojol cu'un scotol li jchi'iltactique (ja' ono'ox oy ta avo'nton ti oyuc c'uxi chamuc li jun vinic le'e). C'alal me talem xa ta atojol li jchi'iltactique, jech scotolic jun no'ox yo'ntonic —xut.
4C'alal laj ya'ay li Absalone, toj lec laj ya'yic xchi'uc li banquilaletic yu'un israeletique. 5Jech laj yal li Absalone:
—Iq'uic tal ec li Husaie, ja' li arquita vinique; ca'itic c'usi chal —xi.
6C'alal ivul li Husaie, jech ijac'bat yu'un li Absalone:
—Li Ahitofele ja' jech laj yal. ¿C'usi chaval li vo'ote; me lec li c'usi laj yale, o me mu lecuc? —xut.
7Itac'ov li Husaie:
—Li c'usi laj yal li' ta ora li Ahitofele, mu lecuc. 8Li atot xchi'uc svinictaque xana' ti toj lec xaq'uique. Tanae solel tsatsuben yo'ntonic jech chac c'u cha'al jcot me' oso c'alal pojbil xa yalabe. Li atote ja' jun vinic ti nopen xa'ay lec paspleitoe. Jech noxtoc muc teuc ch-ech' ac'ubal yu'un yo' bu oyic li svinictaque. 9Li' ta orae snac'oj sba ta jun nail ch'en, o me yan bu snac'oj sba. C'alal me ta sliqueb no'ox chvinaj ti ichamic xa li avinictaque, xu' jech chlic yalic li boch'o cha'yique: “Li svinictac Absalone tsalbil xa ic'otic”, xu' xiic. 10Li avinictac ti lec xu' yu'unique xu' chlaj stsatsal yo'ntonic o ta j'ech'el, ac'o me lec to'ox tsots yo'ntonic jech chac c'u cha'al león. Yu'un scotol jchi'iltactic sna'ic ti toj tsots yo'nton li atote, xchi'uc ti jech tsatsuben yo'ntonic ec li svinictaque. 11Ja' yu'un chacalbot ti ac'o stsob sbaic ta atojol scotol li israeletic ti xlic ta Dan c'alal to ta Beersebae, yu'un ja' to jech yepalic jech chac c'u cha'al yi' ta ti'nab. Xchi'uc tsc'an vo'ot atuc chbat achi'inic ta paspleito. 12Jech ec li vu'uncutique ta xcac'becutic ti buyuc no'ox ta jtacutic batele. Te but'ul chic'otcutic ta sba yac'ol jech chac c'u cha'al job osil ti chvul ta sba yac'ol banamile. Ta jmilcutic scotolic c'alal ta atot xchi'uc c'alal ta svinictac; me junuc mu'yuc cuxul ta jcomtsancutic. 13Me chbat snac' sbaic ta junuc lume, jcotolcutic ta xquich'cutic batel jlasucutic. Ta jochcutic batel c'alal ta bevo' li jujubej tonetic ti meltsanbil o li lume, ja' to ti c'alal mu xa jbejuc ton te chvinaje —xi.
14Li Absalón xchi'uc scotol israeletique jech laj yalic:
“Li c'usi laj yal Husai arquita vinique ja' toj lec; ja' chopol c'usi laj yal li Ahitofele”, xiic.
Yu'un li Muc'ul Diose ja' laj yac' ch'ayuc ta be c'usi laj yal li Ahitofele, yu'un ja' ac'o joybijuc ta stojol c'usi chopol li Absalone. 15Li Husaie jech laj yalbe li pale Sadoc xchi'uc Abiatare:
—Li Ahitofele ja' jech bijubtasel laj yalbe li Absalone xchi'uc li banquilaletic yu'un israeletique. Pero li vu'un eq'ue ja' jech bijubtasel laj calbe ec. 16Ja' lec bat me albeic ta ora li Davide: mu me teuc xvay ta stenlejaltic ta xocol banamil tana. Ja' lec ac'o jelovuc ta ora ta jot uc'um Jordán, yu'un jech mu xmilat xchi'uc li svinictac te xchi'inoje —xut.
17Li Jonatán xchi'uc Ahimaase te oyic ta nio' Rogel, yu'un mu sc'an xac' sbaic ta ilel te ta lum. Jun xa no'ox quiara ibat yalbe, jech li stuquique ja' xa bat yalbeic ec li Davide. 18Pero i'ilatic ono'ox yu'un jun querem, jech li quereme ibat yalbe ta ora li Absalone. Pero li chibique laj yac'beic batel yipal, te ic'otic ta sna jun vinic ta Bahurim. Te ta yamac' oy jch'oj joc' ja' te la stic' sbaic li chibique. 19Li yajnil yajval nae la smac ta ora li joq'ue. Ts'acal te lic sq'ui trigo ta sba, jech mu'yuc boch'o laj yil o. 20C'alal ic'otic li svinictac Absalone, jech la sjac'beic li antse:
—¿Bu oyic li Ahimaas xchi'uc Jonatane? —xutic.
Itac'ov li antse:
—Li' ijelovique; xi ibatic ta stuq'uil uc'ume —xi.
Jech ibat st'unic, pero muc staic. Jech isutic batel ta Jerusalén. 21C'alal batemic xa'oxe, iloq'uic ta joc' li Ahimaas xchi'uc Jonatane. Jech ibatic ta anil, bat yalbeic li ajvalil Davide. C'ot yalbeic ti ac'o jelovuc batel ta ora ta jot uc'ume, yu'un laj xa yal Ahitofel ti ac'o yich'ic milele. 22Ja' yu'un li David xchi'uc scotol svinictaque ijelovic batel ta ora ta jot uc'um Jordán. C'alal isacub ta yoc'omale, me junuc mu'yuc xa boch'o te oy.
23C'alal laj yil Ahitofel ti muc xc'ot ta pasel c'usi laj yale, lic xchapan sburo; isut batel ta sna te ta slumal ti bu ivoq'ue. C'alal c'ot xchapan lec snae, bat sjoc'an sba ta te', jech icham o. Te ibat yich' muquel yo' bu mucul li stote.
Ic'ot ta Mahanaim li Davide
24Li Davide ja' to no'ox ic'ot ta Mahanaim ti c'alal ijelov xa'ox batel ta jot uc'um Jordán xchi'uc svinictac ec li Absalone. 25Li Absalone ja' la stic' ta banquilal soldado yu'un jun vinic, Amasa sbi, sventa xq'uexol Joab. Li Amasae ja' xnich'on jun ismael vinic, Itra sbi. Ja' ti la yic' li Abigail, stseb Nahase; ja' li xvix Sarvia, sme' Joabe.
26Li Absalone te la spas scarpanaic xchi'uc israeletic ta yosilal Galaad. 27C'alal ic'ot ta Mahanaim li Davide, te ital nupatuc ta be yu'un Sobi, xnich'on Nahas te ta Rabá; ja' smomnich'nabtac li Amnone. Te ital noxtoc li Maquir xnich'on Amiel ta Lodebar, xchi'uc li Barzilai galaad vinic ta Rogelime. 28Te laj yich'beic tal vaybaletic, tazaetic, binetic, trigo, cebada, arina, bacuben bec' trigo, javus, arabejo, lentejaetic, 29pom, tatuben ya'lel xchu' vacax, chijetic, xchi'uc quesoetic pasbil ta ya'lel xchu' me' vacax sventa tsve'ic xchi'uc xchi'iltac li Davide. Yu'un la snopic ti chvi'najic, ti lubenic, ti taquin yo'ntonic tal ta xanubal ta xocol banamile.
Currently Selected:
2 Samuel 17: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
