2 Samuel 16

La xchi'in ta lo'il Siba li Davide

1C'alal ja' to no'ox ijelov batel jutuc ta jolvits li Davide, te ital nupatuc ta be yu'un smozo Mefi-boset, Siba sbi.#2 S 9.9-10. Yic'oj tal cha'cot buro cajajtic syavartaic, xcuchojic tal lajunvinic (200) pan, xchi'uc vo'vinic (100) ta choj taqui sat ts'usub, xchi'uc vo'vinic (100) pan pasbil ta taqui sat higo, xchi'uc jbej nucul ya'lel ts'usub. 2Li ajvalile jech la sjac':

—¿C'u yu'un ti laj avich' tal li'i? —xut.

Itac'ov li Sibae:

—Li buroetique ja' sventa chcajiic batel li boch'otic oy avu'un, vo'ot li ajvalilote. Li panetic xchi'uc li sat ts'usube ja' sventa tsve'ic li soldadoetique. Li pasem ya'lel ts'usube ja' sventa chuch'ic li boch'otic chlubic ta xocol banamile —xi.

3Itac'ov li ajvalile:

—¿Bu oy li smomnich'on anima avajvale? —xut.

Itac'ov li Sibae:

—Te comen ta Jerusalén, yu'un scotol israeletic tsnopic ja' chac'beic sutel li abtel ti oy to'ox ta sventa smoltote —xut.

4Itac'ov li ajvalile:

—Lec oy. Li' ta orae ja' avu'un scotol li c'usi ja' to'ox yu'un li Mefi-bosete —xi.

Li Sibae la squejan sba ta stojol li ajvalile, jech laj yalbe:

—Ajvalil, toj lec ti oyuc jech ac'uxubinun oe —xut.

5C'alal ic'ot ta Bahurim li ajvalil Davide, te iloc' tal jun vinic. Ja' yuts' yalal li Saule, Simei sbi; ja' xnich'on Gera. Te chchopolc'opoj tal ta spatic; 6te tsjipilan tal ton ta stojol li Davide xchi'uc li yaj'abteltaque. Pero li Davide te xchi'uc ta jujujot xocon li svinictaque, xchi'uc chabibil yu'un li jchabivanejetic yu'une. 7Li Simeie jech chalilanbe tal li Davide:

—¡Loc'an batel chopol vinic, jmilvanej vinic! 8Li Muc'ul Diose laj xa yac'bot atoj amul ta sventa ti laj amilbe yuts' yalal li Saule, xchi'uc ti vo'ot lapojbe li yabtel ta ajvalilale. Li Muc'ul Diose ja' xa laj yac'be ta sc'ob anich'on Absalón li avabtele. Li vo'ote oyot xa ta vocol ta scoj achopolil, yu'un vo'ot jmilvanej vinicot —xut.

9Li Abisai, yol Sarviae, jech laj yalbe li ajvalile:

—¿C'u yu'un ti ta xchopolc'opoj ta stojol ajvalil cu'un li chamen ts'i' le'e? Chbat jc'ocbe sjol —xut.

10Pero li ajvalile jech laj yal:

—Yalabtac Sarvia, li c'op le'e muc vo'ocoxuc ta aventaic. Me jech chchopolc'opoj ta jtojole, yu'un van jech la sc'an li Muc'ul Diose. Ja' yu'un mu'yuc boch'o jech xu' chalbe: ‘¿C'u yu'un jech chapas?’, mu'yuc boch'o xu' chut —xi.

11Ts'acal jech laj yalbe li Abisai xchi'uc yaj'abteltaque:

—Me jnich'on no'ox jtuc tsc'an chismilune, c'u to x'elan tsc'an chispasbun li jun vinic liquem ta Benjamine. Ch'an utic; te ac'o xchopolc'optaun, yu'un van jech yaloj mantal li Muc'ul Diose. 12C'alal chiyilbun jvocol li Muc'ul Diose, oy van yic'al chisc'atajesbun ta bendición li c'usi chopol chquich' albel li' ta orae —xut.

13C'alal chanovic batel ta be li David xchi'uc xchi'iltaque, li Simeie xi ibat ta ch'ut vits ta stuq'uil li Davide. Te xvulvun batel, tsjipilan batel ton xchi'uc tsliques batel pucuc. 14C'alal ic'otic ta uc'um Jordán xchi'uc xchi'iltac li Davide, lubenic xa, jech te la xcuxic.

I'och ta Jerusalén li Absalone

15Ja'o i'och batel ta Jerusalén li Absalone xchi'uc scotol li israeletic xchi'inoje, xchi'uc li Ahitofele. 16Ts'acal te ital li Husai, ja' li arquita vinic ti lec sc'opan sba xchi'uc li Davide. Ibat snup ta be li Absalone; te x'avet batel jech laj yal:

—¡Toj lec li muc'ta ajvalile; toj lec li muc'ta ajvalile! —xut.

17Li Absalone jech laj yalbe li Husaie:

—¿Me ja' jech chavich' ta muc' li boch'o lec xac'opan aba achi'uque? ¿C'u yu'un muc ja'uc xbat achi'in li boch'o lec xac'opan aba achi'uque? —xut.

18Itac'ov li Husaie:

—Mu jc'an. Ja' ta jc'an li' chicom ta stojol li boch'o t'ujbil yu'un Muc'ul Diose xchi'uc ti t'ujbil yu'un scotol israeletique. 19Mu'yuc boch'o yan ta jc'an chitun yu'un; ja' no'ox ta jc'an chitun yu'un xnich'on li boch'o lec jc'opan jba jchi'uque. Ti c'u x'elan litun yu'un li atote, ja' jech ta jc'an chitun avu'une ec —xut.

20Li Absalone jech la sjac'be li Ahitofele:

—¿C'usi chanop? Alo ca'tic c'usi xu' ta jpastic —xut.

21Itac'ov li Ahitofele:

—Bat chi'inbo ta vayel yajniltac li atot te scomtsanoj ta xchabiel spasubmantale. Me jech chapase, jech tsna'ic o scotol israeletic ti j'ech'el chopol chayilot o li atote, jech ta stsatsub lec yo'ntonic li avinictaque —xi.

22Jech lic yaq'uic jun carpana sventa Absalón te ta yamaq'uil jolna. Te ta sat scotol israeletic lic xchi'inbe ta vayel yajniltac stot li Absalone.#2 S 12.11-12. 23Li bijubtasel laj yal Ahitofel jech orae, ja' co'ol cha'yic jech chac c'u cha'al me oy c'usi tsjaq'uic ta stojol Diose. Ja' jech bijubtasel chal o li Ahitofele, jech chal ta stojol David, o me ta stojol Absalón.

Currently Selected:

2 Samuel 16: TZE97

Highlight

Copy