I LUKASI 2
2
Hinaa-Do i Yesu
2:1-7
(Mat. 1:18-25)
1I tempo atuu Datu Agusutusi moluarako aasa parenta, metena buri ira luwu mia i asa wawontolino. 2Ndiomo peburia anu amba-ambano wineweu tempono i Kireniu gagi petewawa i wita Siria. 3Onaemo ka domelako luwu mia mpeburi, singge mia a ngkotano.
4Kanatuu koa mbo'u i Yusupu inso i kota Nasare lumako i Galilea i wita Yudea kotano i Daudi anu meneeako Beteleme – Hangano onae te inso a nsombori ka inuleno i Daudi – 5ka ibinuri meronga saru i Maria, samborano, anu kontongaano mentia.
6Tempono ondae i tu'ai haweakoomo tempono i Maria ta me'ana, 7ka ipe'anaakono aasa ana ntama, anano anu amba-ambano, ka i'amba tumongoakono tahu hawu ka ipomboleo a laro dulado pinotuwu, hangano nahina po'iangado a raha mperatoa.
Puu pompakambi
2:8-20
8I wita atuu hinao ba opia ira puu pompakambi anu mpo'ia a ntonga mpada mpodagai bawaano pinotuwudo i tempono wongi. 9Borono mentadeomo aasa mala'eka-Do i Ue umpeda ndi ondae ka maramba-Do i Ue wantahi ira ka tedoa ira medoito. 10Ka i'amba mala'eka atuu motaeako ira, ”Si medoito, hangano menteeano kupopoto'oriakomiu mawongkoa langkai tiado luwuno tongku: 11Oleo andio hina Iramo Puu Pongkaduduimiu, onaemo Ondae i Kerisituu, Ue a ngkotano i Daudi. 12Ka ndiomo tondonino ndi omiu: Komiu mehaweo aasa nana'ote kodei tinongoako tahu hawu ka pinombole a laro dulado pinotuwu.” 13Ka borono tengkitaomo mperonga saru mala'eka atuu asa bawaa langkai sorodaduno suruga anu umunde-unde Ira Ue Ala, dompotae,
14”Marambaa tia-Do Ue Ala a mpo'ianga anu lalu i wawono
ka rodoa i tolino i olodo mia anu pinemoiko-Do.”
15Mansado melako mala'eka atuu binta ira ka dompekule i suruga, puu pompakambi atuudo mpepau-pau pada ondae, ”Aiwamo ka tomelako i Beteleme ka tomengkitao hapa anu gagi i ra'ai, kana anu Dopauakita i Ue.” 16Ka do'amba mpontuturako mpelungka ka domehawe ira i Maria ka i Yusupu ka nana'ote kodei atuu, anu kontongaano pinombole a laro dula pinotuwu. 17Ka tempono domengkita Ira, domempauako ira hapa anu domempinauako mongkona nana'ote atuu. 18Ka luwuno mia anu rumongeo mengkohali-hali mongkona hapa anu pinaudo puu pompakambi atuu ndi ondae. 19Sine i Maria numaao luwuno anu gagi atuu i laro aroano ka ipenootio. 20Ka mpekule iramo puu pompakambi atuu saru mpo'unde-unde ka mpelangkai Ira Ue Ala hangano luwuakoano anu rinongedo ka kinitado, luwuno menunu saru hapa anu domempinauako.
Ondae i Yesu tinindi ka pineweengako ndi Ondae i Ue – i Simeo ka i Hana
2:21-40
21 #
Ima. 12:3; Luk. 1:31 Ka mansano sompoomo oalu oleo ka Ondae asalakono tinindi, Ondae nineeako i Yesu, onaemo nee anu pinauno mala'eka napi Domentiaako Ira ine-Do.
22 #
Ima. 12:6-8
Ka mansano sompoomo tempo pepokomorina, montonda songka Taurano i Musa, domewawa Ira i Yerusale ka Dopineweengako ndi Ondae i Ue, 23#Pel. 13:2; 12 kana hinao teburi a songka-Do i Ue, ”Luwuno ana ntama anu amba-ambano asalakono pinokomempori tia-Do Ue Ala,” 24ka dompopesombaako pesomba montonda hapa anu pinau a songka-Do i Ue, onaemo asa pasa manu-manu wurokou ke orua anano marapatii.
25Hinao i Yerusale asa mia meneeako i Simeo. Onae asa mia anu mentee ka moleo aroano anu sumisikorio pontarerodo to Isaraeli. Penaa Mempori mo'ia ndi onae, 26ka ndi onae Dopokomengkaaomo Penaa Mempori, nine onae nahi ta mate ba napi kita Ira i Mesia, onaemo Ondae anu inurapi-Do i Ue. 27Hangano Penaa Mempori onae ka i'aiwa a Raha-Do Ue Ala. Tempono Ondae i Yesu, Nana'ote atuu, dowawa Ira mia mota'u-Do mewinso ka Dowineweuako hapa anu pinauno songka, 28itotowo Ira Nana'ote atuu ka isene Ira saru umunde-unde Ira Ue Ala, ipotae,
29”Kanandio-andio, Ue, Ipo'ineeomo tetenaa-Miu andio ka ilako
a laro rodoa, menunu saru pau-Miu,
30hangano ikitaomo mataku tekaduduia anu inso ndi Omiu,
31anu Ipatindaomo i arodo luwuno tongku,
32 #
Yes. 42:6; 49:6; 52:10 onaemo mewine anu gagi wantano luwuno tongku susua
ka gagi marambado bawaa-Miu, to Isaraeli.”
33Ka tedoa dokohali-haliakono ama-Do saru ine-Do luwuno hapa anu pinau mongkona Ondae. 34Ka i'amba i Simeo rumonso ira ka ipotae ndi Maria, ine-Do Nana'ote atuu, ”Menteeano Nana'ote andio pinakosi gagi tedontaa ke tewanguano hadio mia i Isaraeli ka gagi aasa petondoni anu gagi pengengea 35— ka aasa ponai ta lumompahio sumangamu —, ka igagi mengkaa pinewowolono aroano hadio mia.”
36I tu'ai kongko koa mbo'u i Hana, aasa nabi beine, anano i Panueli inso a nsuku Asere. Onae tedoaomo mota'u. Umarino metao opitu nta'u tehineno ipe'asaakono tamano, 37ka kanandio-andio onae tuwu beine ka tinuwuno halupulu ka opaa nta'u. Nahi hori bintao Raha-Do Ue Ala meene ka wongi mesomba saru mepuasa ka mekakai. 38Ka i tempo koa mbo'u atuu onae aiwa i tu'ai ka umunde-unde Ira Ue Ala ka mepau mongkona Nana'ote atuu a luwuno mia anu mposikori tolaano Yerusale.
39 #
Mat. 2:23
Ka mansano umariomo luwu anu asalakono wineweu montonda songka-Do i Ue, mpekule iramo a ngkota po'iangado, onaemo kota Nasare i galilea. 40Nana'ote atuu kolangka-langkai-Do ka gagi moroso, buke ponto'ori anu mentee, ka pe'aroa-Do Ue Ala kongko ndi Ondae.
Ondae i Yesu tempono tinuwu-Do hopulu ka orua nta'u a laro Raha-Do Ue Ala
2:41-52
41 #
Pel. 12:1-27; Win. 16:1-8 Sompo-sompo ta'u mia mota'u-Do i Yesu dolako i Yerusale a oleo langkai Pasa. 42Tempono hopulu ka orua nta'umo tinuwu-Do i Yesu melako iramo i Yerusale kana anu lano gaudo a oleo langkai atuu. 43Tampulaomo oleo langkai atuu, tempono dompelempa mpekule, mo'ia Iramo i Yesu i Yerusale nahi doto'orio mia mota'u-Do. 44Hangano potaedo nine kongko Ira i olodo mia pe'asa pelempado, melempa iramo aasa oleo pelempaa olaino, ka do'amba umungke Ira i olodo pe'etu ka tepoto'orido. 45Hangano nahi dohawe Ira, mekule iramo i Yerusale saru umungke Ira mpiha. 46Umarino otolu oleo dohawe Ira a laro Raha-Do Ue Ala; kontongaa-Do mentoro i tonga-tongado guru agama, kontongaa-Do merorongeako ira ka hadio pesikeno-Do ndi ondae. 47Ka luwuno mia anu rumonge Ira tedoa mengkohali-haliakono ponto'ori-Do ka luwuno sangki-Do. 48Ka tempono mia mota'u-Do kumita Ira, kohali-hali iramo, ka i'amba ine-Do motaeako Ira, ”Anaku, tembio ka Iweweu kami kanandio? Salalaro kamimo Ama-Miu ka ongkue umungke-Komiu.” 49Dosangki ira, ”Tembio ka i'ungke Aku? Nahi to'orioke, nine Ongkue asalakono kongko a laro Raha-Do Ama-Ku?” 50Sine nahi dopokonto'orio hapa anu pinau-Do ndi ondae. 51Ka Do'amba mekule merongaako ira melako i Nasare; ka kongko Ira mpiha a pompekariado. Ka luwuno anu gagi atuu inaao ine-Do i laro aroano.
52 #
1Sam. 2:26; Pow. 3:4 Ka Ondae i Yesu kolangka-langkai-Do ka tetiangi pinokonto'ori-Do ka langkai-Do, ka tepaheomo Dopehohawa Ira Ue Ala ka mia.
Currently Selected:
I LUKASI 2: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
