I LUKASI 1
1
Pau amba-ambano
1:1-4
1I Teopilu anu pinelangkai,
Hadio mia mpompe'arahako iramo meburio aasa lele mongkona luwuno anu gagiomo i oloto, 2kana anu pinohawedo ndi ontae, anu inso a pompu'uano mengkitaakono matado ka anu mompalele pau-Do i Ue. 3Onaemo pu'uno, mansaku mepenteeo ntu'u luwuno anu gagi atuu inso a pompu'uano, kupakosiomo aku buriakomiu tepotuda moiko a wunta, 4ka upokonto'orio, nine luwuakoano anu upinaguruako mentee ntu'u.
Pompopoto'ori mongkona hinaano i Yohane Puu Mpobaho
1:5-25
5 #
1Taw. 24:10
Tempono i Herode, mokole i Yudea, hinao asa mia sando mpesomba anu meneeako i Sakaria inso a binawaano i Abia. Beineno mbo'u inso a inuleno i Haruni, neeno i Elisabe. 6Orua ira tuwu mentee i aro-Do Ue Ala ka tuwu montonda luwuno parenta ka pompakosi-Do i Ue ka nahina tataado. 7Sine nahina anado, hangano i Elisabe biita ka orua ira mota'u iramo.
8Pohona, tempono haweako tiano bawaano, i Sakaria weweuo anggaano sando mpesomba i aro-Do i Ue. 9Hangano tempono inundi, kana gaudo, ka itinantui sando mpesomba anu mo'angga, onaemo anu tiniso ka ipewinso a laro Raha Mempori ka montunu dupa i tu'ai. 10Kontongaano atuu luwuno bawaa mpepumpu i bungkuno ka mpekakai. Tempo atuu onaemo tempo pontunua dupa. 11Ka ikitaomo i Sakaria aasa mala'eka-Do i Ue mentade i koanano meda pontunua dupa pesomba. 12Kumitao anu gagi atuu onae tededengke ka gagi doito. 13Sine ipotae mala'eka atuu ndi onae, ”Si doito, hei Sakaria, hangano pekakaimu ininduomo ka i Elisabe, beinemu, ta me'anaakomu aasa ana ntama ka asalakono konumeeakono i Yohane. 14Komo'unde ka mawongko, tendeano hadio mia ira mempo'undeakono hinaano atuu. 15#Pod. 6:3 Hangano onae ta langkai i aro-Do i Ue ka onae nahi ta mo'inu anggoro ke inua mompokomolangu ka onae ta bukeako Penaa Mempori mompu'u inso a mpe'anakaano ineno; 16onae ta weweuo hadio to Isaraeli mpepokule ndi Ondae i Ue, Ue Alado, 17#Mal. 4:5-6 ka onae ta melempa mese'elungi Ira i Ue a laro mpenaa ka pabawano i Elia ka iweweuo aroado luwuno ama mpepokule a luwuno anado ka aroado mia me'ewa a mpinewowolodo mia mentee ka hangano kanandio patindaako Ira i Ue aasa bawaa anu mpompe'ala-ala ndi Ondae.” 18Ka i'amba i Sakaria motaeakono mala'eka atuu, ”Kana'umpeke ka kuto'orio, nine mongkona andio ta gagi? Hangano mota'u akumo ka beineku tende ntinuwuomo.” 19#Dan. 8:16; 9:21 Mala'eka atuu sumangkio, ”Ongkuemo i Gabarieli anu mekakaako Ira Ue Ala ka tinena akumo mepauakomu ka mohaweo lele moiko andio ndi omue. 20Menteeano kogagi beebe ka nahi komokompepau hawe a oleo, ka igagi luwuno andio, hangano nahi upe'ala-alao pinauku anu ta mengkaa menteeano a tempono.” 21Kontongaano atuu mia hadio mensisikorio i Sakaria. Mengkohali-hali iramo, hangano tehineomo lahi ipo'ia a laro Raha Mempori. 22Tempono ipeluarako, nahi pokompepauako ira ka dompokonto'oriomo, nine hinaomo kinitano a laro Raha Mempori. Ka i'amba kumawe-kawe ira, hangano kongkono beebe. 23Mansano tampulaomo tempo po'anggaano, mekuleomo i raha.
24Nahi tehine umarino atuu i Elisabe, beineno, mentia ka i larono olima wula nahi pelua-luarako, ipotae, 25”Onaemo andio wineweu-Do i Ue ndi ongkue, ka kanandio-andio Dopahihiakunemo tekoko'iiku a mia.”
Pompopoto'ori mongkona hinaa-Do i Yesu
1:26-38
26I larono wula ko'onoo Dotenao Ue Ala mala'eka Gabarieli lumako a aasa kota i Galilea meneeako Nasare, 27#Mat. 1:18 a aasa ana beine anu mesamboraako aasa mia meneeako i Yusupu inso a nsomborino i Daudi; neeno ana beine atuu i Maria. 28Tempono ipewinso mala'eka atuu a rahano i Maria, ipotae, ”Tabea, hei omue anu rinonso, Ondae i Ue kumongkomiko.” 29Tededengke i Maria rumongeo pau atuu, ka i'amba mesikeno i laro aroano, bahapa pengkonaano tabea atuu. 30Mala'eka atuu motaeakono, ”Si doito, hei Maria, hangano omue mohawe pompehohawa i aro-Do Ue Ala. 31#Mat. 1:21 Menteeano komentia ka kome'anaakono aasa ana ntama ka asalakono ka uneeako Ira i Yesu. 32#2Sam. 7:12, 13, 16; Yes. 9:6 Ira gagi langkai tuwu-Do ka Ira nineeako Ana-Do Ue Ala Anu Lalu i Wawono. Ka Ondae Ue Ala weeako Ira kadera poparentaano i Daudi, uempu'u-Do, 33ka Ira gagi mokoledo inuleno i Yako hawe nahina tampulaano ka Poparentaa-Do nahina tompaano.” 34Motae i Maria a mala'eka atuu, ”Kana'umpe ka ta gagi pinau atuu, hangano napi hina tamaku?” 35Sumangki mala'eka atuu, ”Penaa Mempori ta metii ndi omue ka pabawa-Do Ue Ala Anu Lalu I Wawono ta umengoiko; onaemo pu'uno ana anu ta pine'anaako atuu ta pinau mempori, Ana-Do Ue Ala. 36Ka menteeano, i Elisabe, potehamu atuu, onae mbo'u kontongaano mentiaakono aasa ana ntama i tempono mota'uomo ka ndio ko'onoo wulanomo onae, anu pinau biita atuu. 37#Teg. 18:14 Hangano ndi Ondae Ue Ala nahina anu nahi ta gagi.” 38Motae i Maria, ”Menteeano ongkue andio tetenaa-Do i Ue; ka igagimo ndi ongkue montonda pinaumiu atuu.” Ka i'amba mala'eka atuu bintao.
I Maria ka i Elisabe
1:39-45
39Nahi tehine umarino atuu melungkaomo i Maria ka ipelempa lumako a mentorukuno te'aro a aasa kota i Yehuda. 40I tu'ai onae mewinso a rahano i Sakaria ka metabe ndi Elisabe. 41Ka mansano rumongeo i Elisabe petabeno i Maria, me'ungkulako ana anu a laro mpe'anakaano ka i Elisabe mbo'u bukeakoomo Penaa Mempori, 42ka i'amba mebooli meroku, ”Omuemo rinonso i olodo luwuno beine ka rinonsoomo wuano pe'anakaamu. 43Isemake ongkue andio ranta ka ihawe ine-Do Ueku kumita aku? 44Hangano menteeano, mansano hawe a biriku petabemu, ana anu a laro mpe'anakaaku me'ungkulako mo'unde. 45Ka me'uraomo onae, anu mompe'ala-alaomo, hangano hapa anu ipinauako inso ndi Ondae i Ue, ta inihii.”
Penani po'unde-undeno i Maria
1:46-56
46 #
1Sam. 2:1-10
Ka i'amba motae i Maria,
”Sumangaku umunde-unde Ira i Ue,
47ka aroaku mawongko hangano Ondae Ue Ala, Puu pongkaduduiku,
48hangano Dopensiroiomo kodeino tuwuno tetenaa-Do.
Menteeano, mompu'u kanandio-andio luwuno inule ira mempau aku me'ura,
49hangano Doweweuomo Anu Tedoa Pabawa luwuno wineweu langkai ndi ongkue ka nee-Do memporiomo nee-Do.
50Ka pompehohawa-Do mapa'api-api inule a mia anu doitoako Ira.
51Dopopokitao pabawa-Do a wineweuno kae-Do
ka sumiarawo ira mia anu aroado mpompelangka-langkai;
52Dopotii ira mia anu mempabawa inso a ngkadera poparentaado ka tumande ira mia anu tetotoako;
53Dopokohadioako ira ntu'u luwuno anu moiko a mia anu mokoninggo, ka tumenao mia anu kaea lumako saru kae mooa;
54Dotulungio i Isaraeli, tetenaa-Do,
hangano Dorambeo pompehohawa-Do,
55 #
Teg. 17:7
kana anu Dodandiako ira uempu'uto, ndi Burahima ka inuleno ranta nahina tampulaano.”
56Ka i Maria mo'ia bara'ura otolu wula tehineno merongaakono i Elisabe, ka i'amba mekule i rahano.
Hinaano i Yohane Puu Mpobaho
1:57-66
57Ka i'amba sompoomo wulano i Elisabe ta me'ana ka ipe'anaakono aasa ana ntama. 58Mansado merongeo pehori rahano saru pe'etuno, nine Dopopokitaomo i Ue pompehohawa-Do anu tedoa langkai ndi onae, mpo'unde iramo meronga saru onae. 59#Ima. 12:3 Ka a oleo anu ko'oalu mehawe iramo mia ka domentindio nana'ote atuu ka mingki ira meneeakono i Sakaria montonda neeno amano, 60sine motae ineno, ”Osi'i, onae asalakono nineeako i Yohane.” 61Dompotaeakono, ”Nahina i olodo pe'etumu anu meneeako kanatuu.” 62Ka do'amba mengkaweo amano mpesikenoakono nee anu ta pinoponeeako anano atuu. 63I'emao watu poburia, ka i'amba buri ira pau andio, ”Neeno onaemo i Yohane.” Ka mengkohali-hali iramo luwu. 64Ka i tempo koa mbo'u atuu te'ungkahiomo ngangano ka tepotolaomo elono, ka i'amba mepau ka umunde-unde Ira Ue Ala.
65Ka medoito iramo luwu mia anu mpo'ia i horino, ka luwuno anu gagi atuu gagiomo popauado luwuno anu mpo'ia i mentorukuno Yudea. 66Ka luwuno mia, anu merongeo, mpe'ihilaroo ka dompotae, ”Gagi hapake nana'ote andio lembuino?” Hangano kae-Do i Ue kumongkomio.
Penani po'unde-undeno i Sakaria
1:67-80
67Ka i Sakaria, amano, bukeako Penaa Mempori, ka i'amba mompau anu ta gagi, ipotae,
68”Inunde-unde Iramo i Ue, Ue Alado to Isaraeli,
hangano hawe Ira kumitao bawaa-Do ka mowawaako ira tolaa,
69Dopotuwuo aasa tandu tekaduduiato
a laro inuleno i Daudi, tetenaa-Do atuu,
70– kana anu Dopauomo
a wiwido luwuno nabi-Do anu mempori inso i ndi'upua –
71ka Dopotola kita inso a luwuno iwalito
ka inso a ngkaedo mia anu umo'aliaakita,
72ka Dopopokitao pompehohawa-Do a uempu'uto
ka rumambeo pedandia-Do anu mempori,
73onaemo sumpa anu pinau-Do ndi Burahima, uempu'uto, nine Ira moweeakita,
74ka tontepotola inso a ngkaedo iwali,
mpokompesomba ndi Ondae nahi tomedoito,
75a laro memporia ka menteea i aro-Do asa ntinuwuto.
76 #
Mal. 3:1
Ka omue, hei anaku konineeako nabi-Do Ue Ala Anu Lalu i Wawono;
hangano komelempa mese'elungi Ira i Ue patindaako Ira pesalaa-Do.
77Ka Dopoweeako ira bawaa-Do ponto'oria mongkona tekaduduia anu me'empehiako po'ampunia luwuno halado,
78hangano pe'aroa ka pompehohawa inso ndi Ondae Ue Alato,
onaemo ka Dohawe kumita kita,
mata'oleo mo'oru inso i wawono,
79 #
Yes. 9:1
ka ipansari ira anu mpo'ia a wongi-wongiano ka a laro mpe'engono matea ka Dopo'aroo karuto a nsala rodoa.”
80Ndio nana'ote atuu kolangka-langkaino ka komoro-morosono penaano. Ka onae mo'ia i pada one hawe a oleo anu asalakono ka ipeposaba a nto Isaraeli.
Currently Selected:
I LUKASI 1: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
