I MARAKUSU 16

Pewangu-Do i Yesu

16:1-8

(Mat. 28:1-10; Luk. 24:1-12; Yoh. 20:1-10)

1Mansano laloomo oleo Saba, i Maria Madalena ka i Maria ineno i Yakobu, saru i Salome mpo'oli rampa-rampa ira melako a ngkaburu ka lumanai Ira i Yesu. 2Ka mo'o-mo'oru ntu'u a oleo amba-ambano minggu atuu, mansano saba oleo, melako iramo a ngkaburu. 3Mpepau-pau iramo pada ondaedo, ”Isema anu ta lumundiakita watu atuu inso a mpewowano kaburu?” 4Sine mansado me'umpeda ka domengkitao, tengkitaomo, watu anu lano tedoa langkai atuu telundiomo. 5Ka do'amba mpewinso a laro ngkaburu ka domengkitao aasa mangalitau anu melemba meloe mopute mentoro i koana. Ntededengke ira ntu'u, 6sine ipotaeako ira mangalitau atuu, ”Si medoito! Inungkemiu Ondae i Yesu to Nasare, anu pinaso a ngkeu pinotamba atuu. Mewangu Iramo. Nahi Dokongko i ndi'ai. Kitao! I ndi'aimo dopombole Ira. 7#Mat. 26:32; Mrk. 14:28 Sine kanandio-andio imelakomo, imempauako iramo ana guru-Do ka i Peturu: Dopese'elungi komiu lumako i Galilea; i ra'ai komiu mengkita Ira, kana anu Dopauakomiumo.” 8Ka do'amba mpeluarako ka mpelulu mebintao kaburu atuu, hangano mpondidi-ndidi ira tedoa medoito. Nahi dompopau hapa-hapa maupo ndi sema hangano medoito.

Owowa koa dompohaweo luwuno pe'oliwi atuu ndi Peturu ka a wali-walino. Umarino atuu Ondae i Yesu mesala a ana guru-Do paleleo inso i Sabaano oleo hawe i Sumooano oleo lele anu mempori ka nahi pinokompenaa-naa mongkona tekaduduia anu nahina tampulaano.

Ondae i Yesu ba pempia Dopeposaba ka tumena ira ana guru-Do

Ondae i Yesu mewuatako i suruga

16:9-20

9Mansa-Do mewangu i Yesu mo'o-mo'oru a oleo amba-ambano minggu atuu, amba-ambano Dopeposaba ndi Maria Madalena. Inso ndi onae hori Ira i Yesu monsaari opitu onitu nsa'o. 10Ka i'amba beine atuu lumako pauako ira anu wela tumonda Ira i Yesu, ka anu i tempo atuu kontongaado mpopemasusa ka mpengese. 11Sine tempono domerongeo, nine Ondae i Yesu tuwu ka ikita Iramo, nahi dompompe'ala-ala.

12Umarino atuu meposaba Ira a rupa anu susua a orua mia inso ndi ondae, tempono orua ira atuu a laro pelempaa lumako bintao kota. 13Ka do'amba mekule ka pauako ira wali-walido anu mehano, sine maupo ndi ondae nahi dompompe'ala-ala wali-walido atuu.

14Poko'ariano mesabaako Ira a ana guru-Do anu hopulu ka aasa atuu tempono kontongaado mpongkaa, ka Dotatao hangano nahi dompompe'ala-ala ka moteano aroado, hangano nahi dompe'ala-ala ira mia anu mengkita Iramo umari-Do mewangu. 15#Tin. 1:8 Ka Do'amba motaeako ira, ”Imelakomo i asa wawontolino, paleleomo Lele Mawongkoa a luwuno anu tuwu. 16Isema anu mompe'ala-ala ka ibinaho ta kinadudui, sine isema anu nahi pompe'ala-ala ta hinuku. 17Luwuno petondoni andio ta kumongkomi ira mia anu mpompe'ala-ala: ira mponsaari onitu nsa'o a nee-Ku, ira mpepau a luwuno pau anu nahi dohori mpepauako, 18ira mpo'ini ule, ka maupo dompo'inu rasu pompepate, nahi ira memasola; ka ira medampoakono kaedo a mia mahaki, ka mia atuu ta tompa.”

19 # Tin. 1:9-11 Umari-Do i Yesu mepauako ira kanatuu, tetande Iramo lumako i suruga, ka Do'amba mentoro i koana-Do Ue Ala. 20Ondae mbo'u melako iramo mempaleleo Lele Mawongkoa a sompo siuno wita, ka Ondae i Ue mokowali ira a mpo'anggaado ka pau-Do atuu Dopokomorosoakono luwuno petondoni anu kumongkomi ira.

Currently Selected:

I MARAKUSU 16: XMZ

Highlight

Copy